GENESIS 50
50
1Huan Joseph in apa mai asi a, akah a, atawp hi. 2Joseph in asikha damdawi siamte apa luang muat thei lou a bawl ding in thu apia hi. Huchi in damdawisiamte'n Israel luang muat thei lou in abawl uhi. 3Aluang bawlna in ni sawmli azang ua; muat thei lou a bawlna ding a ni hiai zah lut zel mah ahi. Ni sawmsagih sung teng Aiguptate'n amah asuun uhi.
4Amah asuun nite uh abei nung in, Joseph in Pharaoh inkuante ahoupih a, “Na mitmuh ua deihsakna ka tanleh hehpih in Pharaoh bil a zak ding in, ‘Ka pa'n, ngai in, si ding ka hita. 5Kanaan gam a ka han ding a ka tohsa ngei ah na hon vui ding ahi,’ chi in ahon kichiamsak hi. Huaiziak in tu in hehpih in ka pa hon potousak inla, hon va vuisak in. Huchi in ka hong pai nawn ding, achi, chi in hon gensak un,” achi hi.
6Pharaoh in, “Ahon kichiamsak bang in na pa va potou ve,” achi hi. 7Joseph, apa vui ding in ava hohtou hi. Pharaoh sikha teng, a-inkuan lak a upate leh Aigupta gam upate tengteng leh, 8Joseph inkuanpih tengteng leh asanggamte leh apa inkuanpihte, akiang ah ava hohtou uhi. Ataneu chikchikte uleh abelamhonte uleh abawnghonte kia uh Goshen gam ah anusia uhi. 9Akiang uah kangtalaite leh sakol tungtuang mite leng ahohtou ua, pawlching petmah ahi uh.
10Jordan lui gal a Atad phual atung ua, huai ah nakpitak in akah ua, ni sagih sung apa suunna anei uhi. 11Hiai gammi Kanaante'n, Atad phual a ami suun uh amuh un, “Hiai Aiguptate misi suunna thupitak ahi,” achi uhi. Huaiziak in huai mun Abel-mizraim asa ua, huai Jordan lui gal a om ahi. 12Atapate'n athupiak bang in ahihsak uhi. 13Atapate'n Kanaan gam ah azawnglut ua, Abraham in kivuina mun ding a, Hit mi Ephron a kipan alou toh aleikhawm Mamre ma a Makpelah lou a kokhuk ah avuita uhi. 14Apa avui khit in Joseph leh asanggamte leh apa vui ding a amah toh hohtou tengteng Aigupta gam ah akik nawnta uhi.
Joseph In Asanggamte Atheisak Thak
15Joseph sanggamte'n apa uh sita ahi chih amuh un, “Joseph in ahon mudah ding a, atung a i thilhihkhelh tengteng phu i tung uah akim in ahon la kha ding e,” achi uhi. 16Joseph kiang a hilh ding in mi asawl ua, “Na pa'n asih ma in hichi in thu apia hi. 17Joseph kiang ah, ‘Hehpih in na sanggamte tatlekna leh agitlouhna uh ngaidam in. Na tung ah thil hoih lou ahihta ngal ua. Tu in hehpih in na pa Pathian sikhate tatlekna ngaidam in,’ achi, chi in va gen un,” achi hi. Akiang a agentak un Joseph akap hi.
18Asanggamte leng ava hoh ua, ama ah abokkhup chiat ua, “Ngai in, na sikhate ka hi uh,” achi uhi.
19Joseph in akiang uah, “Lau kei un. Pathian sik a om ka hi a hia? 20Nou zaw ka tung ah thil gilou hih lungsim na pu ua; himahleh tuni in mi tampi hing leh dam a humbitna ding a thil hoih suahsak Pathian lungsim ahi zaw hi. 21Huaiziak in tu in lau kei un. Nou leh na taneu chikchikte uh ka hon vak ding,” achi hi. Huchi in amau alungmuan a, kamsiamtak in ahoupih hi.
Joseph Sihna
22Joseph, amah leh apa inkuanpihte toh Aigupta gam ah ateng ua, Joseph kum za-le-sawmkhat adam hi. 23Joseph in Ephraim ta, tusawn thum chiang amu hi. Manasseh tapa Makir tate leng Joseph phei tung a khanglian ngen ahi uh. 24Joseph in asanggamte kiang ah, “Si ding ka hita hi. Himahleh Pathian in ahong veh ngeingei ding a, hiai gam a kipan hon pikhia in, Abraham, Isak leh Jakob kiang a kichiam a, piak ding achiamsa gam ah ahon pitou ding,” achi hi. 25Joseph in Israel suante akichiamsak a, “Pathian in ahong veh ngeingei ding a, hiai a kipan ka guhte na potou ding uh ahi,” achi hi. 26Huchi in Joseph kum za-le-sawmkhat a upa ahih in asita hi. Aluang muat thei lou ding in abawl ua, Aigupta gam ah hankuang sung ah akoih uhi.
ទើបបានជ្រើសរើសហើយ៖
GENESIS 50: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.