EKSODAS 1
1
Israelte Aigupta Ah Hihgentheih In A-om Uh
1Aigupta gam a hong lut Israel suante, michih leh a-inkote Jakob toh hong tonte min hiaite ahi: 2Reuben, Simeon, Levi leh Judah, 3Issakar, Zebulun leh Benjamin, 4Dan leh Naphtali, Gad leh Asher, 5Jakob khal a pan hong pawtkhia mi tengteng sawmsagih ahi uhi. Joseph bel Aigupta gam ah ana om khinta hi. 6Joseph leh a-unau tengteng leh asuan tengteng leng asita uhi. 7Israel suante'n gah asuang ua, tampi in akhang ua, ahong kibehlap zel ua, hat petmah in ahong hatkhia ua; agam hong dimta uhi.
8Joseph thei lou, Aigupta gam ah kumpi thak ahong omta hi. 9Ama'n amite kiang ah, “En un, Israel suante ei sang in atamzaw ua, ahatzaw uhi. 10Kisa un, piltak in amaute i bawl ding uh. Huchi lou in zaw ahong kibehlap semsem ding ua, huan, hichi ahong hi ding a, kidouna ahong om chiang in, i melmate lam ah apang ding ua, ei ahon dou kha ding uh, huchi in gam apawtsan kha ding uh,” achi hi. 11Huaiziak in puakgikte a amau hihgim ding in atung uah nasem heutu akoihta uhi. Huchi in Pharaoh a ding in khopite, Pithom leh Rameses alamta uhi. 12Himahleh amau ahihgim semsem uleh, akibehlap semsem ua, akhang semsem uhi. Huchi in Aiguptate'n Israel suante alau mahmah uhi. 13Huaiziak in Aiguptate'n Israel suante gimtak in nna asemsak uhi. 14Nasep haksa in ahinna uh nuamloutak in abawlsak ua, buanman leh teklei bawl in gamlak a nna chiteng sem in, nakpitak in nna asemsak uhi.
15Aigupta kumpipa'n Hebru naudom mite kiang ah thu agen a, huaite lak a khat min Siprah ahi a, adang khat min Puah ahi. 16“Hebru numeite lak a nau na dop chiang un, tutphah tung ah en unla, tapa ahihleh na that ding ua, tanu ahihleh bel na hawi ding uh,” achi hi. 17Himahleh naudom mite'n Pathian alau ua, Aigupta kumpipa'n thu apiak bang a hih lou in, pasal naupangte ahinghawi uhi. 18Aigupta kumpipa'n naudom mite asamsak a, akiang uah, “Bangziak a hiai thilhih a pasal naupangte hinghawi na hi ua?” achi hi.
19Naudom mite'n Pharaoh kiang ah, “Hebru numeite zaw Aigupta numeite bang ahih louh ziak un, atei ngal ua, naudom mite akiang uh atun ma un ana nei khin man zel uh,” achi uhi. 20Huaiziak in Pathian in naudom mite a-angvan a, huchi in mite ahong kibehlap ua, ahat mahmah uhi. 21Huchi in naudom mite'n Pathian alauh ziak un inkuante abawlsakta hi. 22Pharaoh in asikha tengteng thu pia in, “Tapa hong piang peuhmah lui ah na pai ding ua, tanu hong piang peuhmah na hinghawi ding uh,” achi hi.
ទើបបានជ្រើសរើសហើយ៖
EKSODAS 1: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.