Romaanos 2
2
Uvaʼs talt Paʼp uvaʼ ikʼulelxhtuʼ laʼ taqʼ kuʼ quBʼaal Tiuxh inqʼa yol tinuqul tiʼ inqʼa xaol s-kaqaayil
1Echetz ikʼulelxh inqʼa xaol s-kaqaayil u kʼaxbʼichil vatz quBʼaal Tiuxh. Tiʼetz uvaʼ ikʼulelxh inqʼa xaol u kʼaxbʼichil, tul yeʼxhabʼil invaʼq laʼ utxh talt yol tiʼ imol, kʼuxh jabʼilxhtuʼ, eche uvaʼ nik ebʼan tiʼ inqʼa jit tij imam Israeel. Tan, tiʼ uvaʼ nik etal yol tiʼ inqʼa emol, tul juntetz kuxh nik etaqʼ jaʼpe u yol setiibʼa.{*}#2.1 Jankʼalxh inqʼa yol uvaʼ nik tal Paʼp tu kaʼv kapiitulo nik ixeʼt tu bʼaxa versiikulo, tetxhal topoon tu vinaq bʼelval versiikulo, tan aʼ nik talvat Paʼp te inqʼa tij imam Israeel, inqʼa ataq vet ok s-niman tetz Jesuus tu mam tenam Rooma. Aʼetz tal Paʼp te inqʼa tij imam Israeel uvaʼ laʼ motx imaq tibʼ tiʼ talax yol tiʼ inqʼa jit tij imam Israeel. Tan eela kuxh inqʼa ipaʼvin vatz quBʼaal Tiuxh. Kʼuxhetz nikich iyaj Paʼp inqʼa tij imam Israeel, pet aloq nikich ibʼen te Paʼp uvaʼ bʼaʼnich inqʼa bʼekʼbʼal. Tul aʼ nikich titzʼa Paʼp uvaʼ laʼich motx inima kam uvaʼ nikich tal Jesuus. Pet aʼ laʼich taqʼ vet ka jabʼiste u bʼekʼbʼal uvaʼ yeʼxhkam nikich tal vet Jesuus inimaleʼ. 2Tul qootzaqle uvaʼ, aʼ nik bʼenk quBʼaal Tiuxh tiʼ vinuqul tiʼ taqʼt jaʼp u yol tiibʼa inqʼa xaol, inqʼa nik bʼanon inqʼa paʼv inqʼae. 3Echetz s-tiʼile toq taqʼ jaʼp quBʼaal Tiuxh u yol tiibʼa inqʼa nik alon yol tiʼ imol, eche uvaʼ nik ebʼaneʼ. Tan echat kuxh nik epaʼvin, eche vemol uvaʼ nik etal yol s-tiʼ. Echetz yeʼxhabʼil vaʼq ex laʼ itzʼan uvaʼ jit ant ex laʼ aqʼax kuʼ yol tinuqul setiʼ, tiʼ ebʼen tu kʼaxbʼichil taʼn quBʼaal Tiuxh.
4Pet bʼenoqetz sete, ex inqʼa nik alon yol tiʼ emol, uvaʼ mam yol vibʼaʼnil quBʼaal Tiuxh tiʼ ikuyux inqʼa epaʼv, ex inqʼa ant ex tiʼ ibʼanax inqʼa yeʼbʼaʼn. Kamal jit ant ex nik txhokon u kuybʼal nik tal quBʼaal Tiuxh sete. Atz bʼenoqat sete uvaʼ il quBʼaal Tiuxh nik ikotxʼ ivatz sete, ex inqʼa bʼanolaq tetz yeʼbʼaʼn, tiʼ etitzʼat etibʼ. Atz bʼenoqat sete uvaʼ ile txʼebʼoʼmy al setiʼ. Tan aʼ titzʼabʼal uvaʼ laʼ etitzʼa etibʼ t-inqʼa epaʼv.{*}#2.4 Echetz s-tiʼile talvat Paʼp inqʼa yol te inqʼa niman tetz Jesuus s-eche, tan atich inqʼa niman tetz Jesuus nikich eesan iqʼij inqʼa imol s-niman tetz Jesuus, inqʼa jitich tij imam Israeel. Tan nikich toksa inqʼa tij imam Israeel iqʼij tiʼ uvaʼ tijichaq imam Avraʼaam, atz aʼ inqʼae, chʼexich taʼn quBʼaal Tiuxh nikich motx taleʼ. Pet inqʼa jit tij imam Israeel, tan jitich ichʼexoʼm quBʼaal Tiuxh s-vatz. Tul jitetz kuxh taʼne. Pet nikich motx toksa iqʼij tiʼ iqejt inqʼa bʼekʼbʼal, inqʼa txhuselich ka s-te taʼn Moisees. Tan atich ok s-jik taʼn inqʼa bʼekʼbʼal nikich taleʼ. Pet eche inqʼa jit tij imam Israeel, tan yeʼxhkam atich ok s-jik. Tan aʼ nikich motx inima inqʼa kantxhaqla uqʼeʼybʼal tetz inqʼa grieego inqʼa kam kuxh paʼvil nikich motx ibʼan s-tuulbʼal. Pet nikichetz tok inqʼa jit tij imam Israeel s-niman tetz Jesuus, tul aʼetz vet inqʼa tij imam Israeel nikich alon yol s-tiʼ.
5Pet tiʼetz u tial ekʼuul tiʼ ibʼanax u paʼv, ex inqʼa nik alon yol tiʼ vemol, atz tiʼ vetijbʼixsat vetaanima tiʼ yeʼ enimat quBʼaal Tiuxh, tul aʼletz vet nik emolt jaʼp u kʼaxbʼichil setiibʼa. Tan laʼ opoon invaʼl qʼij uvaʼ laʼ taqʼ kuʼ quBʼaal Tiuxh inqʼa yol tinuqul uvaʼ ikʼulelxh laʼ jaʼp setiibʼa. Tul laʼ etatxhi vikʼaʼnal quBʼaal Tiuxh tiʼ vepaʼv. 6Tan aʼ laʼ bʼenk quBʼaal Tiuxh tiʼ vibʼanoʼm junun inqʼa xaol, yaʼne laʼ taqʼ quBʼaal Tiuxh s-te kam uvaʼ ikʼulel laʼ ikʼul junun.#Saalmo 62.12; Proveervios 24.12; Tio 25.31-46; Apokaliipsis 20.11-15 7Tan qʼij saq uvaʼ yeʼl iyaʼebʼal imotxebʼal laʼ taqʼ quBʼaal Tiuxh te inqʼa xaol uvaʼ bʼenamen nik ibʼant yaʼl tiʼ ibʼanax u bʼaʼn, atz inqʼa nik txhokon tatin tu nimla tatin quBʼaal Tiuxh, atz inqʼa nik txhokon u toksal iqʼij taʼn quBʼaal Tiuxh. Aʼetz inqʼae, yeʼl inpaqul laʼ kam veteʼ.
8Pet koq inqʼa xaol uvaʼ, aʼ kuxh u tetz nik toksa, tan aʼetz inqʼae, laʼ ul vikʼaʼnal quBʼaal Tiuxh s-tiibʼa, atz laʼ lakp iviʼ quBʼaal Tiuxh s-te. Atz aʼetz inqʼae, nik eesan iqʼij vinuqul uvaʼ nik tal quBʼaal Tiuxh. Tul aʼ kuxh at vet ok tiviʼ ibʼanax inqʼa yeʼbʼaʼn. 9Tan quBʼaal Tiuxh laʼ bʼanon uvaʼ laʼ motx pal titzaʼlal, atz tu mam txumlebʼal, jankʼal inqʼa bʼanol tetz yeʼbʼaʼn. Tul aʼxh bʼaxa tzij tiibʼa inqʼa tij imam Israeel, yaʼne inqʼa jit tij imam Israeel.
10Pet jatvaʼl inqʼa xaol uvaʼ, aʼ nik ibʼan u bʼaʼn, tan laʼ bʼen atinoq tu nimla tatin quBʼaal Tiuxh. Atz laʼ oksal iqʼij taʼn quBʼaal Tiuxh. Atz aʼ vibʼaʼnil quBʼaal Tiuxh laʼ motx atin vet tu taanima, tul aʼxh bʼaxa tzij inqʼa tij imam Israeel, yaʼne inqʼa jit tij imam Israeel. 11Tan vatz u quBʼaal Tiuxh, tan yeʼl nim, atz yeʼl txhʼoj.
12Tul at xaol nik ipaʼvineʼ uvaʼ yeʼ tootzaq inqʼa bʼekʼbʼal. Tul jatuetz laʼ motx kami, tul laʼ aqʼax kuʼ yol tinuqul s-tiibʼa taʼn quBʼaal Tiuxh. Pet yeʼ laʼ ibʼanbʼe quBʼaal Tiuxh inqʼa bʼekʼbʼal s-tiʼ. Tul yek vet tu kʼaxbʼichil s-kaqaayil. Atz atat xaol nik ipaʼvineʼ uvaʼ tootzaq inqʼa bʼekʼbʼal, tul nik inima inqʼa bʼekʼbʼal. Tul jatuetz laʼ motx kami, tul laʼ aqʼax kuʼ yol tinuqul s-tiibʼa taʼn quBʼaal Tiuxh. Tul aʼ laʼ ibʼanbʼe quBʼaal Tiuxh inqʼa bʼekʼbʼal s-tiʼ. Tul yek vet tu kʼaxbʼichil s-kaqaayil. Pet aʼ laʼ bʼenk quBʼaal Tiuxh tiʼ taqʼax kuʼ yol tinuqul s-tiibʼa inqʼa xaol, maq tootzaqich inqʼa bʼekʼbʼal, maq yeʼ tootzaqiche.{*}#2.12 ¿Kam nik elkaʼpun u yol ‹inqʼa bʼekʼbʼal› nik tal tu versiikulo kabʼlaval? Jitetz kuxh taʼn nik yolonk tiʼ laval inqʼa bʼekʼbʼal uvaʼ nik tal tu Eeksodo 20.3-17. Pet aʼ nik tal jankʼal kuxh inqʼa yol uvaʼ motx tal quBʼaal Tiuxh itzʼibʼat Moisees. Tan ayaʼl kuxh nik toksa s-tuul inqʼa yol uvaʼ nik tal tu Eeksodo, Nuumeros, Leviitiko, Deuteronoomio. Kʼuxhetz nik tal vikaʼv iyol qubʼaal tiuxh (nuevo testamento) inqʼa yol ‹u bʼekʼbʼal,› atz at uvaʼ nik taleʼ ‹inqʼa bʼekʼbʼal,› tul nima tel kuxh yol nik tok tzaan s-tuul. Tan nik tal inqʼa yol tiʼ kam tatin inqʼa tij imam Israeel laʼ motx ibʼan vatz quBʼaal Tiuxh. Kam laʼ motx ibʼan tiʼ inatxhkʼuulal Tiuxh. Tul kam laʼ motx ibʼan tiʼ ijaqax kuya vatz quBʼaal Tiuxh tiʼ inqʼa ipaʼv. Tul nikat tal inqʼa yol tiʼ kam laʼ motx ibʼan inqʼa tij imam Israeel s-vatzaq. Atz nikat tal yol tiʼ kam laʼ motx ibʼan tiʼ tatin tuchʼ bʼaʼnilaq ikʼuul, tul kam laʼ motx ibʼana, oq laʼ okaq iyaabʼil. Jankʼaletzxh inqʼa yol uvaʼ motx tal quBʼaal Tiuxh te Moisees bʼen vet s-bʼekʼbʼal te u tenam, inqʼa tij imam Israeel. Pet paletz vet paʼl tuulbʼal uvaʼs maʼtich ikam vet Moisees, tul antxh inqʼa yol inqʼae bʼen vet s-bʼekʼbʼal te inqʼa tij imam Israeel uvaʼ motx tokaʼp vet tu txʼavaʼ Kanaan. Aloq tira atich tiqʼabʼ inqʼa iqʼesal oksan yol vatz Tiuxh, tiʼ uvaʼ tetxhal laʼich inima inqʼa xaol jankʼal inqʼa bʼekʼbʼal. Pet aloq nikich motx ijalpu inqʼa iqʼesal inqʼa tij imam Israeel bʼiitxhaqul inqʼa yol. Tan at uvaʼ aʼl nik teesat ka vaʼq yol, atz at uvaʼ aʼl nik toksat vaʼtoʼq yol s-tiʼ. Yeʼletz laʼ etitzʼa uvaʼ taʼn kuxh laval bʼekʼbʼal nik tal u yol ‹u bʼekʼbʼal,› pet sibʼatel kuxh bʼekʼbʼale nik tok tzaan s-tuul s-tiʼ. 13Tan jit aʼ nik tal quBʼaal Tiuxh s-jik inqʼa xaol, inqʼa nik kuxh abʼin inqʼa bʼekʼbʼal. Pet aʼ nik tal quBʼaal Tiuxh s-jik, inqʼa nik niman kam uvaʼ nik tal inqʼa bʼekʼbʼal.#Santiaago 2.14 14Kʼuxhetz yeʼl inqʼa bʼekʼbʼal nik ibʼekʼon tiibʼa inqʼa jit tij imam Israeel, poro aʼ iqʼomal tzaan taʼn inimal kam uvaʼ nik tal inqʼa bʼekʼbʼal. Tan junt kuxh nik ibʼekʼ tibʼ s-junal tiʼ ibʼanax u jik, kʼuxh yeʼ tootzaq inqʼa bʼekʼbʼal. 15Tul aʼetz nik motx ikʼutxheʼ uvaʼ tuchʼ taanima nik motx ibʼaneʼ kam inqʼa bʼekʼbʼal tzʼibʼamal. Tul junt kuxh nik motx inatxhbʼe tibʼ tiʼ yeʼ ipaʼvineʼ. Kʼuxh at uvaʼ nik tal u titzʼabʼal s-te uvaʼ paʼv nik ibʼaneʼ, atz at uvaʼ nik tal u titzʼabʼal s-te uvaʼ jit paʼv nik ibʼaneʼ. 16Tan laʼ opoon vaʼl qʼij uvaʼ laʼ tal vet quBʼaal Tiuxh taqʼt kuʼ u quBʼaal JesuKriisto inqʼa yol tinuqul. Tul aʼ laʼ taqʼ kuʼ yol tinuqul tiʼ jankʼal vipaʼv inqʼa xaol, kʼuxh muqel qat ibʼantaʼ. Aʼetz inqʼa yole, inqʼa nik valeʼ, uvaʼs nik inpaxsat inqʼa bʼaʼnla txhaq yol tiʼ u quBʼaal JesuKriisto xoʼl inqʼa xaol.
Uvaʼs talt Paʼp uvaʼ jit kaqaay u tuqʼeʼybʼal inqʼa tij imam Israeel nik ibʼan eela tuchʼ inqʼa bʼaʼnla txhaq yol tiʼ quBʼaal Jesuus
17Echetze ex, inqʼa tij imam Israeel, tan aʼ txhabʼamal tok teviʼ uvaʼ, ex ichʼexich quBʼaal Tiuxh. Pet aʼe tan, yeʼ nik ekʼutxh tuchʼ venimataʼ. Tan nik etoksa txha eqʼij, tiʼ uvaʼ, ex tij imam Israeel, vitenam quBʼaal Tiuxh. Tul nikat etoksa txha eqʼij, tiʼ uvaʼ, aʼ kolbʼal etibʼ jankʼal inqʼa yol, atz inqʼa bʼekʼbʼal uvaʼ motx itzʼibʼa ka Moisees. Tul tira nik etaqʼ txha bʼen etibʼ s-nim, tiʼ uvaʼ bʼaʼn kuxh etatin tuchʼ quBʼaal Tiuxh nik enatxheʼ. 18Tul nikat etoksa txha eqʼij, tiʼ uvaʼ etootzaq vet kam uvaʼ nik isaʼ quBʼaal Tiuxh. Tul nik etel vet s-tuul kame inqʼa bʼaʼnla txumbʼal laʼ bʼanaxi, tan txhusel vet etibʼ tiʼ inqʼa bʼekʼbʼal. 19Tul txhabʼamalat kuxh tok teviʼ, tiʼ uvaʼ, aʼ ex alol inuqul inqʼa yol, atz inqʼa bʼekʼbʼal te inqʼa xaol, inqʼa yeʼ ootzaqin tetz. Tul aʼ nik enatxheʼ uvaʼ ech vete ex txhʼiqin tetz inqʼa tzot, inqʼa yeʼ nik til ibʼey. Tul txhabʼamalat kuxh tok teviʼ uvaʼ, aʼ ex kʼutxhul tetz inqʼa bʼaʼnla txumbʼal tetz quBʼaal Tiuxh xoʼl inqʼa xaol, inqʼa jit tij imam Israeel. Tul ech vete txiqubʼal etatin xoʼl inqʼa xaol, inqʼa at tu tokto nik enatxheʼ. 20Tul txhabʼamalat kuxh tok teviʼ, tiʼ uvaʼ, ex vet aqʼol itxumbʼal inqʼa xaol, inqʼa tira yeʼ tootzaqle kam uvaʼ nik isaʼ quBʼaal Tiuxh. Tul ex vet txhusul tetz inqʼa xaol, inqʼa bʼiil txhan vatziʼ tootzaqle. Echetz vet vetitzʼabʼale s-tiʼ, tan jankʼal inqʼa yol, atz jankʼal inqʼa bʼekʼbʼal uvaʼ motx itzʼibʼa ka Moisees at ka sexoʼl, tul aʼat etitzʼabʼal uvaʼ, aʼ taqʼil u tootzaqil quBʼaal Tiuxhe, atz u taqʼil vinuqul. Aʼe u tootzaqil inqʼa bʼekʼbʼal uvaʼ itzʼibʼa ka Moisees.
21Bʼantan bʼaʼn ex qʼaoq, tiʼ itxhusux inqʼa xaol. Pet aʼe tan, aʼ, ex yeʼ nik etxhus etibʼ. Tan nik etal te inqʼa xaol uvaʼ yeʼ laʼ motx elqʼi; tul aʼ, ex nik etelqʼeʼ. 22Tul nik etal te inqʼa xaol uvaʼ yeʼ laʼ motx iyansa tibʼ tuchʼ uvaʼ jit ikʼulel tibʼ s-tuchʼ; tul aʼ, ex nik eyansa etibʼ. Atz nikat etal te inqʼa xaol uvaʼ txoqebʼal kʼuul inatxhkʼuulal inqʼa bʼitichla tiuxh; tul aʼ, ex nik motx elqʼan el inqʼa bʼitichla tiuxh, inqʼa sibʼ ijaʼmil.{*}#2.22 Eche u yol nik tal tu versiikulo uvaʼa tiʼ telqʼal inqʼa bʼitichla tiuxh. Tan at inqʼa tij imam Israeel, inqʼa jequnyich xoʼl inqʼa jit tij imam Israeel t-inqʼa kalabʼaq tenam. Ataqichetz ibʼitichla tiuxh inqʼa jit tij imam Israeel, tan aʼ inqʼae, nikich motx iqeje. Pet aʼetz txhan vet inqʼa tij imam Israeel nikich paxin u tostiuxh tetz inqʼa bʼitichla tiuxh. Tul nikich motx telqʼa inqʼa bʼitichla tiuxh. Tan nikich motx ipaxi el inqʼa bʼitichla tiuxh, inqʼa kam kuxh tiqleʼm bʼanbʼemal s-tiʼ. Pet jabʼisteichetz inqʼa bʼitichla tiuxh uvaʼ plaataich txakunsamal s-tiʼ, tul yeʼxhkam nikich motx ipaxi el, pet aʼl nikich motx tiqʼo tzaan. Aloq jit aʼ nikich motx inatxhkʼuulae. Pet aʼl nikich motx taqʼ vet bʼen s-puaq. Ech uvaʼe nik tal t-Vibʼanoʼm inqʼa Apoostol 19.37. 23Tul tira nik etaqʼ txha bʼen etibʼ s-nim, tiʼ uvaʼ nik enima inqʼa bʼekʼbʼal sevatz; tul aʼ, ex nik eesan iqʼij quBʼaal Tiuxh tiʼ erint inqʼa bʼekʼbʼal. 24Tan ech nik ebʼan, eche val u yol uvaʼ tzʼibʼamal ka t-viyolbʼal quBʼaal Tiuxh uvaʼ ech nik tal s-eche:
—Eqʼaqʼal kuxhtuʼ, ex inqʼa tij imam Israeel,
tul nik iyoqʼox quBʼaal Tiuxh
xoʼl inqʼa jit tij imam Israeel,
—chich u yol.#Isaiias 52.5; Esekieel 36.22
25Bʼantan at itxaʼk uvaʼ qolel vet el inbʼiil te vetxhiʼoʼl, oq antxh nik enima jankʼatel inqʼa yol, atz jankʼatel inqʼa bʼekʼbʼal uvaʼ motx itzʼibʼa ka Moisees. Pet oqetz nik erin inqʼa bʼekʼbʼal, tul echatetz kuxh vet exe, eche inqʼa yeʼ qolel el inbʼeeq te vitxhiʼoʼl, inqʼa yeʼ nik qeon quBʼaal Tiuxh nik etaleʼ. 26Pet at inqʼa jit tij imam Israeel, inqʼa yeʼ qolel el inbʼeeq te vitxhiʼoʼl, nik motx niman kam uvaʼ nik tal inqʼa bʼekʼbʼal. Tul echetz vete qolel el inbʼiil te vitxhiʼoʼl vatz quBʼaal Tiuxh tiʼ vinimat inqʼa bʼekʼbʼal. 27Tan jaʼl u xaol uvaʼ nimamal inqʼa bʼekʼbʼal taʼn, tan aʼ uvaʼe, yeʼl vet u kʼaxkʼo laʼ aqʼax jaʼp s-tiibʼa kʼuxh yeʼ qolel el inbʼeeq te vitxhiʼoʼl. Tul aʼ vet laʼ alon inuqul inqʼa yol setiʼ vatz quBʼaal Tiuxh uvaʼ, ex aj paʼvom tiʼ yeʼ enimat inqʼa bʼekʼbʼal, kʼuxh etootzaqle kam nik tal inqʼa bʼekʼbʼal, atz kʼuxh qolel el inbʼeeq te vetxhiʼoʼl.
28Tan jit tiʼ kam inqʼa qejoʼm uvaʼ nik inima inqʼa xaol, tul laʼ bʼen vet sitenam quBʼaal Tiuxh, eche uvaʼ nik ibʼan inqʼa tij imam Israeel, tetxhal tul tzitza. Atz jit tiʼ viqolox el inbʼeeq te vitxhiʼoʼl inqʼa xaol, tul laʼ bʼen vet sitenam quBʼaal Tiuxh. 29Pet jaʼl uvaʼ nik niman quBʼaal Tiuxh tuchʼxh taanima, aʼetz uvaʼe, itenam vet quBʼaal Tiuxh laʼ ibʼana, echiche u titzʼabʼal quBʼaal Tiuxh tiʼ inqʼa tij imam Israeel. Tan qat qukuy tok viTiuxhil Tiuxh tu qaanima tiʼ ijalput oʼ. Pet jit aʼ vinimal kam inqʼa s-tiʼeʼl nik tal u bʼekʼbʼal uvaʼ tzʼibʼamal ka. Jaʼletz u xaol uvaʼ ech nik ibʼane tiʼ inimal quBʼaal Tiuxh, tul aʼetz quBʼaal Tiuxh laʼ oksan iqʼij, kʼuxh yeʼ laʼ oksal iqʼij taʼn inqʼa xaol.
ទើបបានជ្រើសរើសហើយ៖
Romaanos 2: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
