Romaanos 1
1
ROMAANOS
Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus tu tenam Rooma
1In Paʼp, vaʼl te inqʼa taqʼonvil quBʼaal JesuKriisto. Tan qat isaʼ tzaan in quBʼaal Tiuxh tiʼ inbʼen sitxhaq, atz siapoostol. Tul qat ichʼexeʼl in tiʼ ipaxsal inqʼa bʼaʼnla txhaq yol tiʼ quBʼaal JesuKriisto, inqʼa yol uvaʼ tzajnaʼq kʼatz quBʼaal Tiuxh.{*}#1.1 Aʼ nik tal tu versiikulo uvaʼa ‹Kriisto Jesuus,› chiche. Pet ‹quBʼaal JesuKriisto,› chich itzʼibʼaleʼ. Tan nik kuxh iyuj Paʼp talax inqʼa ibʼij u quBʼaal Tiuxh tuchʼ u quBʼaal JesuKriisto. Tan at nik tal Paʼp ‹quBʼaal JesuKriisto.› Atz at nik tal ‹Kriisto.› Atz at nik tal: ‹Jesuus.› Atz at nik tal: ‹JesuKriisto.› Atz at nik tal: ‹quBʼaal Kriisto.› Atz at nik tal: ‹quBʼaal Jesuus.› Atz at nik tal: ‹quBʼaal.› Pet aloq ant kuxh titzʼabʼalil u yol nik tal tiʼ quBʼaal Jesuus, pet jit vaʼlen koq vet nik tal junun inqʼa yol. Pet aloq aʼxh vibʼij quBʼaal Jesuuse, u yol Jesuus. Pet u yol u Kriisto, tan aʼe u tiqleʼm, eche talax presideente, atz eche talax direktoor. Pet aʼetz vet inqʼa apoostol oksan u yol Kriisto s-tzʼeqsabʼ tetz vibʼij Jesuus. Xaʼte ‹JesuKriisto,› chich veteʼ, atzoq ‹Kriisto Jesuus› qʼaoq. Jitetz kuxh vet nima vatzlen qat txakun s-tiʼ, pet kaʼoxvatzul kuxh vet qat oki. Tan aʼ qat iqʼol vet tetz jabʼiste uvaʼ nima paqlen nik itxakunsa Paʼp t-inqʼa tuʼ. Aʼetz vet qat txakun u yol ‹quBʼaal Jesuus.› Pet atel kaʼt yol qat txakun paqte s-tiʼ. Atz at nik tal Paʼp Tiuxh. Tul jatvatzulat kuxh nik tal Paʼp tiʼ quBʼaal Tiuxh paqte. Tan at uvaʼ quBʼaal Tiuxh, atz at uvaʼ Tiuxh. Xaʼtetze aʼ qat txakeʼv vet talax u yol quBʼaal Tiuxh. 2Aʼetz inqʼa bʼaʼnla txhaq yole uvaʼ alel ka taʼn quBʼaal Tiuxh s-naʼya te inqʼa qʼexsanich tetz viyol tiʼ u tul u quBʼaal JesuKriisto. Tul motx itzʼibʼa vet ka t-inqʼa loqʼola iyol quBʼaal Tiuxh. 3Aʼetz inqʼa bʼaʼnla txhaq yole tiʼ viKʼaol quBʼaal Tiuxh; aʼe u quBʼaal JesuKriisto, uvaʼ bʼen s-alam aanima tiʼ pal tiqʼot vixaʼnil kʼatz inqʼa tij imam Daviid; 4pet iKʼaolxh quBʼaal Tiuxh, tiʼ uvaʼ kʼuxh maʼtich ikam u quBʼaal JesuKriisto, tan itzʼeʼv inpaqte taʼn viTiuxhil Tiuxh. Tan ech uvaʼe ikʼutxh viTiuxhil Tiuxh tuchʼ u nimla tiqleʼm, tiʼ uvaʼ chʼexichla aanimaich u Kriisto. Aʼetz vet JesuKriisto, quBʼaal. 5Tul aʼetz vet quBʼaal JesuKriisto qat chʼexon in s-vaʼl bʼanol itxhaq taʼn vibʼaʼnil uvaʼ jit inkʼulel laʼ inkʼula. Tan aʼ qat qukʼulvat u aqʼon tiqʼabʼ quBʼaal JesuKriisto tiʼ ipaxsal inqʼa bʼaʼnla txhaq yol s-tiʼ. Echetz nik isaʼt tzaan quBʼaal Tiuxhe inqʼa xaol tiʼ tok s-niman tetz tiʼ vikʼuqbʼat ikʼuul tiʼ quBʼaal JesuKriisto. Tul nik isaʼ tzaan niman tetz xoʼl jankʼal inqʼa jit tij imam Israeel. Echetz laʼ inimal vete u quBʼaal JesuKriisto taʼn. 6Tul ant ex, saʼel vet tzaan ex taʼn quBʼaal Tiuxh. Atz antetz vet ex, atoʼk ex xoʼl inqʼa qat motx niman Jesuus.
7Echetz nik intzʼibʼat bʼene u uʼ sete, jankʼal ex inqʼa een ex tu tenam Rooma, atz jankʼal ex inqʼa at taanima quBʼaal Tiuxh setiʼ, atz qat isaʼ tzaan ex, tiʼ uvaʼ tira laʼ ejetxheʼl etibʼ kʼatz u paʼv.
Tul aʼ u quBʼaal Tiuxh tuchʼ u quBʼaal JesuKriisto laʼ aqʼon vibʼaʼnil sete, tul aʼ vibʼaʼnil laʼ atin tetaanima.{*}#1.7 Txhaq paqetz taqʼt bʼen Paʼp bʼaʼnil ikʼuul inqʼa niman tetz Jesuus, tul nik tal Paʼp u yol ‹gracia.› Aʼetz nik tal tiʼ vibʼaʼnil quBʼaal Tiuxh tiʼ ikuyux ipaʼv inqʼa niman tetz Jesuus. Aʼetz u bʼaʼnile uvaʼ jit ikʼulel inqʼa niman tetz Jesuus laʼ ikʼula. Yaʼne nik tal Paʼp tiʼ u yol ‹paz.› Aʼ nik tal Paʼp u bʼaʼnil laʼ atin tu taanima inqʼa niman tetz Jesuus. Tan junal kuyel vet inqʼa ipaʼv. Tan at vet bʼaʼnil tu taanima taʼn quBʼaal Tiuxh. Echetz yeʼxhkam nik titzʼa vet ibʼen tu kʼaxkʼo tiʼ inqʼa ipaʼv. Echetz jatvatzul kuxh nik elkaʼpun u yol ‹bʼaʼnil› t-quyolbʼal.
Uvaʼs talt Paʼp uvaʼ nik isaʼ Paʼp laʼ bʼen isoli inqʼa niman tetz Jesuus tu mam tenam Rooma
8Bʼaxaetz toq val sete, uvaʼ nik vaqʼ taʼntiuxh te quBʼaal Tiuxh setiʼ, jankʼal ex inqʼa niman tetz Jesuus tu mam tenam Rooma. Tan tiʼ uvaʼ qat palk u quBʼaal JesuKriisto, echetz nik tutxh vet qaqʼt taʼntiuxhe te u quBʼaal Tiuxh. Niketz vaʼq taʼntiuxh te quBʼaal Tiuxh setiʼ, tan nik vabʼi uvaʼ talaq kuxh tenam vatz txʼavaʼ nik alaxik bʼaʼnla yol setiʼ, tiʼ etok s-niman tetz Jesuus. 9Tul tootzaql quBʼaal Tiuxh uvaʼ bʼenamen nik tulsa sinkʼuul tiʼ voksat tzaan ex tuul vinyol uvaʼs nik innatxht Tiuxh, quBʼaal Tiuxh uvaʼ ayaʼlxh inkʼuul nik inbʼan u taqʼon tiʼ inpaxsat inqʼa bʼaʼnla txhaq yol tiʼ Jesuus, viKʼaol. 10Tul nik injaq te quBʼaal Tiuxh txhaq paq uvaʼ, tetxhal koqxh laʼ opoon invaʼq qʼij, tul laʼ nal bʼen insoli ex.
11Tan tira nik insaʼeʼ laʼ bʼen vil ex. Tan nik insaʼe uvaʼ laʼ tel bʼen val inuqul jolt txumbʼal sexoʼl uvaʼ nik taqʼ viTiuxhil Tiuxh s-lotxhbʼal etetz tiʼ echʼij s-bʼaʼn kʼatz quBʼaal Tiuxh. 12Tul aʼ nik vale uvaʼ laʼ qulotxh qibʼ s-quvatzaqil tiʼ taqʼt tibʼ qutial tiʼ inimal quBʼaal JesuKriisto.
13Ex, inmol s-niman tetz Jesuus, nik insaʼeʼ laʼ vaqʼ etootzaqi tiʼ bʼen vilt ex. Tul jatpaqx kuxh voksa tibʼeyil vinbʼen sexoʼl. Pet aʼe tan, nik inmaqtxʼ tiʼ inbʼen tiʼ esolileʼ. Tan aʼ vitzʼabʼal tiʼ vinbʼen sexoʼl uvaʼ laʼ tel chʼij ex kʼatz quBʼaal Tiuxh, eche ichʼij viʼoq tzeʼ. Tan aʼ vitzʼabʼal uvaʼ laʼ inlotxh ex tiʼ echʼij kʼatz quBʼaal Tiuxh, eche nik inlotxht jolt niman tetz Jesuus tiʼ ichʼij kʼatz quBʼaal Tiuxh, inqʼa t-jolt tenam, inqʼa jit tij imam Israeel.
14Poro ile nik innatxheʼ uvaʼ at viqatz tiʼ talax inqʼa bʼaʼnla txhaq yol tiʼ Jesuus te jankʼal inqʼa xaol, inqʼa yeʼx ootzaqinaʼq tetz quBʼaal Tiuxh. Kʼuxh inqʼa xaol, inqʼa nik yolbʼen u yolbʼal grieego, atz kʼuxh inqʼa yeʼ nik yolbʼen grieego; atz kʼuxh inqʼa ataqxh tootzaqibʼal, atz kʼuxh inqʼa yeʼl tootzaqibʼal. 15Echetz aʼ tzʼeʼy in tiʼ ipaxsal inqʼa bʼaʼnla txhaq yol sexoʼl, ex inqʼa een ex tu mam tenam Rooma.
Uvaʼs talt Paʼp uvaʼ, aʼ inqʼa bʼaʼnla txhaq yol tiʼ Jesuus laʼ oleʼv tiʼ ichitp inqʼa xaol tiʼ yeʼ ibʼen tu kʼaxkʼo, tul jit vet aj paʼvom laʼ ibʼan vatz quBʼaal Tiuxh tiʼ iqejt u quBʼaal Jesuus
16Tul nuqxhtuʼ, tan in yeʼ laʼ chʼixv in tiʼ ipaxsal inqʼa bʼaʼnla txhaq yol tiʼ Jesuus; pet aʼl tuchʼxh vaanima toq inpaxsavat. Tan aʼ inqʼae, sibʼ tiqleʼm qat itxakunsa quBʼaal Tiuxh tiʼ ichitp inqʼa xaol tiʼ yeʼ bʼen tilt u kʼaxkʼo tiʼ inqʼa ipaʼv, jatvaʼl inqʼa laʼ motx qeon quBʼaal Jesuus. Tul aʼxh inqʼa tij imam Israeel kʼaqel s-bʼaxa taʼn quBʼaal tiʼ ikʼulux viyolbʼal, yaʼne inqʼa jit tij imam Israeel.{*}#1.16 ¿Kam nik elkaʼpun u yol uvaʼ ech nik tal s-eche?: —...ichitp inqʼa xaol tiʼ yeʼ bʼen tilt u kʼaxkʼo tiʼ inqʼa ipaʼv, —chiche. Aʼ nik taleʼ uvaʼ jankʼal inqʼa xaol s-kaqaayil vatz u txʼavaʼ at vet jaʼp u yol s-tiibʼa taʼn quBʼaal Tiuxh tiʼ bʼen tilt u mam kʼaxkʼo tiʼ inqʼa ipaʼv. Poro jaʼletz u xaol uvaʼ laʼ jaqon ikuya tiʼ inqʼa ipaʼv tiʼ iqeex kam uvaʼ ibʼan quBʼaal JesuKriisto, tul aʼetz uvaʼe yeʼl vet tokebʼal tiʼ bʼen tilt u kʼaxkʼo tiʼ inqʼa ipaʼv. Tan tiʼetz jankʼal uvaʼ qat ibʼan u quBʼaal Jesuus, tul qat ikuy quBʼaal Tiuxh uvaʼ, aʼ vet u quBʼaal Jesuus qat okka tiqʼabʼ taqʼax kuʼ yol tinuqul tiʼ jabʼil laʼ jaʼp u yol s-tiibʼa tiʼ vipaʼvineʼ, atz jabʼil yeʼ laʼ jaʼp u yol s-tiibʼa. Echetz aʼ nik tal u quBʼaal Tiuxh uvaʼ jabʼil laʼ qeon u quBʼaal Jesuus, tul txhoeletz vet inqʼa ipaʼv. Tul yeʼl vet tokebʼal u yol s-tiibʼa taʼn quBʼaal Tiuxh. Pet: ‹u chitpichil tiʼ inqʼa paʼv,› nik tal viyolbʼal quBʼaal Tiuxh, tan jit aʼ talaxe uvaʼ tira koq vet yeʼl atxhaʼv tetz paʼv kʼatz u xaol, kʼuxh maʼt iqejt vet quBʼaal Jesuus. Tan atel atxhaʼv tu taanima tiʼ ibʼanax u paʼv. Tul kamal nik tal inqʼa xaol tiʼ ‹u chitpichil tiʼ inqʼa paʼv› uvaʼ kuyel vet inqʼa ipaʼv taʼn quBʼaal Tiuxh. Tul kʼuxhetz laʼ ibʼan vet invaʼq paʼv tuulbʼal uvaʼs maʼt tok vet s-niman tetz Jesuus. Tan yeʼ laʼ kʼaxbʼisal vet tiʼ itxhojt inqʼa ipaʼv, atz kuyel kuxh vet vipaʼv nik taleʼ. Poro jit eche. Tan tetxhal kuxh laʼ itxhoj vipaʼv oq laʼ paʼvini. Atz jankʼale eche laʼ taqʼt kuʼ u aqʼol kuʼ yol tinuqul tzitza vatz txʼavaʼ yol tiʼ vaʼq pereexho, tan tetxhal laʼ itxhoj u xaol vipaʼv, jabʼil uvaʼ at ipaʼv. Pet oq jabʼil uvaʼ yeʼl ipaʼv, tul yeʼletz laʼ kʼaxbʼisal taʼn u aqʼol kuʼ yol tinuqul. 17Echetz aʼ inqʼa bʼaʼnla txhaq yol tiʼ Jesuus nik aqʼon ootzaqiloq kame uvaʼ nik ikuyux vipaʼv inqʼa xaol, tiʼ uvaʼ jit vet aj paʼvom vatz quBʼaal Tiuxh laʼ ibʼana. Tiʼetz kuxh viqejt inqʼa xaol quBʼaal Jesuus, tul jit vet aj paʼvom vatz quBʼaal Tiuxh, atz tiʼ vikʼuqbʼat tel ikʼuul s-tiʼ. Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:
—Tiʼ vikʼuqbʼat inqʼa xaol ikʼuul
tiʼ quBʼaal Tiuxh,
tul jit vet aj paʼvom vatz quBʼaal Tiuxh.
Tul yeʼl vet iyaʼebʼal imotxebʼal qʼij isaq
laʼ ibʼan tiʼ vikʼuqbʼat ikʼuul,
—chich u yol.#Avakuuk 2.4
Uvaʼs talt Paʼp uvaʼ juntxh teesa tibʼ inqʼa xaol t-bʼey kʼuxh tootzaqliche uvaʼ kʼaʼn quBʼaal Tiuxh tiʼ inqʼa paʼv
18Tul alel tzaan t-amlikaʼ taʼn quBʼaal Tiuxh s-naʼya uvaʼ yeʼ nik isaʼ quBʼaal Tiuxh jankʼal inqʼa paʼv nik ibʼan inqʼa xaol, jankʼal eche uvaʼ yeʼ nik motx toksa inqʼa xaol quBʼaal Tiuxh s-tuul; atz inqʼa yaabʼla txumbʼal nik motx ibʼan inqʼa xaol. Tan yeʼ ibʼan vinuqul tiʼ viyaabʼla txumbʼal. Tan aʼetz inqʼae, at vet jaʼp vikʼaʼnal quBʼaal Tiuxh s-tiibʼa. Tul kʼuxhetz ootzaqimalxh vet tzaan taʼn inqʼa xaol, uvaʼ kʼaʼn quBʼaal Tiuxh tiʼ inqʼa paʼv, pet antetz kuxh vet inqʼa yeʼbʼaʼn, inqʼa nik motx ibʼaneʼ, nik maqon tootzaqit vinuqul tiʼ quBʼaal Tiuxh.{*}#1.18 Jankʼaletzxh inqʼa yol uvaʼ nik tal Paʼp nik ixeʼt tu versiikulo vajxaqlaval, tetxhal topoon tu versiikulo vinaq junlaval, tan aʼ nik talvat te inqʼa xaol inqʼa jit tij imam Israeel. Tan mamala kuxh kantxhaqla txumbʼal nikich motx ibʼan vatz quBʼaal Tiuxh uvaʼs yeʼnaqichaq okoq s-niman tetz Jesuus. Kʼuxhetz motx ok vet jolol inqʼa jit tij imam Israeel s-niman tetz Jesuus tu mam tenam Rooma, tan txhoʼn vet te jolol inqʼa tij imam Israeel, tiʼ uvaʼ tan, ant kuxh bʼiil viyaabʼla txumbʼal iqʼomalichaq taʼn uvaʼ nikich motx ibʼan s-naʼya. Tul motx xeʼt vet inqʼa tij imam Israeel, inqʼa niman tetz Jesuus, tiʼ ibʼekʼex inqʼa jit tij imam Israeel tiʼ inimal inqʼa bʼekʼbʼal uvaʼ itzʼibʼa ka Moisees. Tul mamala tel kuxh nikich motx tal inimaleʼ. 19Tan jankʼal inqʼa xaol nik ibʼen s-te uvaʼ at quBʼaal Tiuxh. Tan veqlelxhtuʼ uvaʼ antxh quBʼaal Tiuxh nik aqʼon tootzaqi inqʼa xaol. 20Tan kʼuxh yeʼ naʼl kam bʼanel taʼn, atz kam vitxumbʼal u quBʼaal Tiuxh, poro aʼ nik ikʼutxhvat kam bʼanel taʼn vitxumbʼal quBʼaal Tiuxh tiʼ tilix inqʼa kam, inqʼa viinqixsamal ka taʼn. Tul tira veqlelxhtuʼ uvaʼ sibʼ tatin u quBʼaal Tiuxh tuchʼ u tiqleʼm uvaʼ yeʼl iyaʼebʼal, atz tuchʼ vimam txumbʼal s-junalil. Echetz yeʼxhabʼil invaʼq laʼ txhej iyol uvaʼ: —Yeʼ vootzaqle oq at quBʼaal Tiuxh, —chaq koq.
21Kʼuxhetz ootzaqimalich vet quBʼaal Tiuxh taʼn inqʼa xaol, poro tira yeʼ motx toksa iqʼij quBʼaal Tiuxh sitiuxh. Atz jitoq motx taqʼ taʼntiuxh te quBʼaal Tiuxh. Pet aʼ motx toksavat vet bʼen inqʼa titzʼabʼal tiʼ inqʼa kam uvaʼ yeʼxhkam laʼ taqʼa. Tiʼetz viyaabʼla txumbʼal, tul jitoq motx bʼen vet s-te kame uvaʼ nikich isaʼ quBʼaal Tiuxh s-te, eche invaʼq xaol uvaʼ tira at tuul tokto. 22Kʼuxhetz nikich motx tal tibʼ s-aj txumbʼal, poro aʼl ipal iviʼ motx ibʼen vet s-bʼokkin tiʼ ipalsat yol. 23Tan aʼ motx tal vet sitiuxh ivatzibʼal xaol uvaʼ at ikamebʼal, atz aʼ tal vet sitiuxh ivatzibʼal txoo, atz ivatzibʼal tzʼichin, atz ivatzibʼal kalabʼaq txoo, inqʼa kajvaʼl toq, atz ivatzibʼal txoo, inqʼa aʼl nik ijuxu tibʼ vatz txʼavaʼ. Pet jitetz vet aʼ quBʼaal Tiuxh tal sitiuxh, uvaʼ sibʼ tatineʼ, atz uvaʼ mij paqul laʼ kami.
24Echetz vet s-tiʼile, tul antxh vet quBʼaal Tiuxh txhaqpun tiʼ ibʼant kam inqʼa paʼv nikich motx tatxhva tu taanima, inqʼa txoqebʼal kʼuulla atxhaʼv tetz yansa ibʼ, uvaʼ jit ikʼulel laʼich ibʼana. Tul tira kuxh motx ichʼixvisaaq vet inqʼa itxhiʼoʼl tiʼ ibʼant inqʼa kamaq kuxh paʼvil s-vatzaqil. 25Echetz aʼ vet ivatzil vinimal u quBʼaal Tiuxh uvaʼ inuqulxhtuʼ, motx ibʼana uvaʼ, aʼ motx inatxhkʼuula vet sitiuxh inqʼa bʼitichla tiuxh uvaʼ jitxh Tiuxh. Tan aʼ kuxh motx inatxhkʼuula, atz motx toksa vet iqʼij, inqʼa ivatzibʼal inqʼa iviinqixsaʼm quBʼaal Tiuxh. Tul jit aʼ quBʼaal Tiuxh, u viinqixsan inqʼa kam, motx toksa iqʼij, u quBʼaal Tiuxh uvaʼ ikʼulelxh laʼ oksal iqʼij s-txheel, atz t-inqʼa jattanulxh yaʼbʼ uvaʼ yaʼn tuleʼ. Tul echxh laʼ ibʼane.
26Echetz antxh vet quBʼaal Tiuxh kuyun tiʼ ibʼant inqʼa chʼixvebʼalla atxhaʼv tiʼ iyansat tibʼ. Echetze inqʼa ixoq, tan tira motx ijalpu vet titzʼal inqʼa atxhaʼv uvaʼ atxhka. Tan jit aʼ nikich ibʼan vet kam uvaʼ ibʼan ka quBʼaal Tiuxh, tiʼ uvaʼ vaʼl vinaq, vaʼt ixoq laʼ ikʼul tibʼ s-vatzaq. Pet ant kuxh vet ixoq tuchʼ vaʼt ixoq nikich ikʼul tibʼ s-vatzaq. 27Tul echat kuxh inqʼa vinaqe. Tan jitat aʼ titzʼa vet inqʼa atxhaʼv uvaʼ atxhka kam uvaʼ ibʼan ka quBʼaal Tiuxh, tiʼ uvaʼ vaʼl vinaq tuchʼ vaʼt ixoq laʼ ikʼul tibʼ s-vatzaq. Pet aʼl ipal vet iviʼ atxhaʼv s-kʼatza tiʼ imol s-vinaqil. Tul antxh vet vinaq tuchʼ vinaq nikich ikʼul tibʼ s-vatzaq. Tul tira chʼixvebʼal uvaʼ nikich ibʼan vet inqʼa vinaq. Tul tiʼ inqʼa itxoqebʼal kʼuulla bʼanoʼm, tul motx itxhok tul u kʼaxbʼichil s-tiibʼa uvaʼ ikʼulelxh vet motx tatxhi.
28Tan aʼl motx talt vet yol, tiʼ uvaʼ yeʼxhkam laʼ taqʼ u tootzaqil quBʼaal Tiuxh taʼn inqʼa xaol. Tiʼetz uvaʼ ech motx titzʼae, tul ikuy vet quBʼaal Tiuxh ibʼant inqʼa yanebʼal kʼuulla txumbʼal tetz inqʼa titzʼabʼal, atz tiʼ ibʼant vet inqʼa yeʼbʼaʼn, inqʼa jit ikʼulel laʼ bʼanaxi. 29Tul tira kuxh motx itxhaqpuaq vet tibʼ tiʼ ibʼanax kamaq kuxh yaabʼla txumbʼalil, inqʼa yeʼbʼaʼn. Tul tira kuxh motx teesaaq vet tibʼ t-bʼey tiʼ ibʼanax inqʼa yansa ibʼ, atz tiʼ ibʼanax jankʼale inqʼa jiqʼal, atz inqʼa kantxhaqla itzʼabʼal. Tul aʼ kuxh vet u txhiʼal kʼuul tiʼ imol nikich motx ibʼaneʼ, atz inqʼa yatzʼoʼm, atz inqʼa txhʼaʼo, atz inqʼa subʼuʼm, atz inqʼa yaabʼla yol laʼ tal tiʼ imol, atz kamaq tel kuxh yeʼbʼaʼnil, 30txhejsan yol tiʼ imol, eesan iqʼij quBʼaal Tiuxh, eesan iqʼij imol, oksanaq iqʼij s-junal, kʼaxbʼisan imol tuchʼ iyoloneʼ, txhulinaq tetz yeʼbʼaʼn, palsanaq iyol itxutx ibʼaal, 31yeʼlaq itxumbʼal tiʼ tatineʼ, nik kuxh ixaon titzʼabʼal, atz tira yeʼl taanima tiʼ titzʼin tatzik, yeʼxhabʼil kuxh at itxaʼk s-te, tira tij kuxh ikʼuul tiʼ ikʼaxbʼisal imol. 32Tul tootzaqlaqe uvaʼ, aʼ vet u kamchil ikʼulel inqʼa xaol, inqʼa laʼ bʼanon inqʼa yeʼbʼaʼn inqʼae. Atz tootzaqle uvaʼ ech uvaʼe bʼekʼel taʼn quBʼaal Tiuxh uvaʼ ikʼulelxhtuʼ. Kʼuxhetz tootzaq veteʼ, tul jitetz taʼn koq kuxh inqʼa paʼv sebʼt tiʼ ibʼanaxeʼ inqʼae, pet aʼl nik ichiibʼ tiʼ jaʼl inqʼa nik tok bʼen tiʼ ibʼanax inqʼa paʼv s-kʼatza.
ទើបបានជ្រើសរើសហើយ៖
Romaanos 1: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
