Vibʼanoʼm inqʼa Apoostol 6
6
Uvaʼs ichʼexex juqvaʼl niman tetz Jesuus tiʼ ilotxhon tiʼ ijatxax el inqʼa etxhbʼubʼal
1Tuulbʼaletz vet inqʼa qʼij inqʼae, tul naʼ vet tatxhul inqʼa niman tetz Jesuus. Atichetz jolol inqʼa xaol s-xoʼl uvaʼ taʼnxh u yolbʼal grieego nikich motx iyolbʼe. Yaʼne xeʼt vet yol xoʼl inqʼa niman tetz Jesuus tiʼ teesal iqʼij inqʼa tij imam Israeel uvaʼ evreeo viyolbʼal.{*}#6.1 Kʼuxhetz aʼ nik tal u versiikulo uvaʼ ‹evreeo› nikich iyolbʼe inqʼa tij imam Israeel, pet aʼ u yolbʼal arameeo nikich motx iyolbʼe uvaʼs atich quBʼaal Jesuus vatz txʼavaʼ. Tan aʼ u yolbʼal evreeo nikich iyolbʼe inqʼa tij imam Israeel uvaʼs yeʼnaqich motx txeypoq bʼen tu mam tenam Vaviloonia tu yaʼbʼ 586 y.u.J. Pet tuulbʼaletz uvaʼs maʼtich itxeyp vet bʼen inqʼa tij imam Israeel tu mam tenam Vaviloonia, uvaʼs eenichaq vet s-pereexhoil, tul qʼoon motx isotz vet viyolbʼal s-kʼuul, aʼe u yolbʼal evreeo. Pet taʼn kuxh vet inqʼa iqʼesal tuqʼeʼybʼal inqʼa tij imam Israeel nikich yolbʼen u yolbʼal evreeo s-vatzaq, atz nikich motx itxʼol isikʼleleʼ. Tan jankʼal inqʼa yol uvaʼ motx iqʼexsa inqʼa qʼexsanich tetz viyol quBʼaal Tiuxh, tan aʼ tzʼibʼamich tu yolbʼal evreeo. Atz kʼuxh inqʼa txhusbʼal tiʼ u yolbʼal evreeo, tan antichxh tzʼibʼamal tu yolbʼal evreeo. Pet qʼaʼvetz vet jolol inqʼa tij imam Israeel tu tenam Jerusaleen inpaqte tu yaʼbʼ 538 y.u.J., tul yeʼetz vet nikich iyolbʼe u yolbʼal evreeo; pet aʼ vet nikich motx iyolbʼe u yolbʼal arameeo. Pet aʼxh ibʼant u yaʼbʼ 330 y.u.J., tul ok inqʼa tij imam Israeel jaqʼ vibʼekʼbʼal inqʼa Greesia. Tul taqʼ vet inqʼa Greesia yaʼl tiʼ itxhusux viyolbʼal te inqʼa tij imam Israeel. Echetz qʼoon isotz vet u yolbʼal arameeo s-kʼuul inqʼa tij imam Israeel. Pet aʼetz motx itxhabʼa vet u yolbʼal grieego. Xaʼtetze aʼ vet u yolbʼal grieego txakunsal vet tiʼ itzʼibʼal viyolbʼal quBʼaal Tiuxh inpaqte uvaʼ evreeo tzʼibʼamiche. Pet ant kuxh nikich iyolbʼet inqʼa tij imam Israeel u yolbʼal arameeo uvaʼs atich quBʼaal Jesuus vatz txʼavaʼ. Aʼetz nikich motx taleʼ uvaʼ yeʼ nikich itzʼeqsal el taqʼax lotxhbʼal tetz inqʼa txakay ixoq, inqʼa niman tetz Jesuus uvaʼ grieego viyolbʼal, u lotxhbʼal uvaʼ nikich taqʼax te inqʼa txakay ixoq jun qʼij.
2Yaʼne imol vet kabʼlaval inqʼa apoostol jankʼal inqʼa niman tetz Jesuus. Tul ech motx tal vet s-xoʼl s-eche: —Yeʼ laʼ isaʼa uvaʼ laʼ qutanbʼa ipaxsal viyolbʼal quBʼaal Tiuxh, tul laʼ bʼen txhan oʼ tiʼ ijatxax el inqʼa lotxhbʼal sexoʼl. 3Ex inmol s-niman tetz Jesuus, bʼaʼn uvaʼ, aʼl laʼ etxhok juqvoʼq vinaq sexoʼl uvaʼ jikxh itxumbʼal, atz uvaʼ, aʼ vet viTiuxhil Tiuxh nik bʼanon iqʼesalil t-taanxelal. Aʼetz inqʼae laʼ qaqʼ ka u aqʼon tiqʼabʼ tiʼ tilix ijatxpeʼl inqʼa lotxhbʼal. 4Echetz yeʼ laʼ qutanbʼat inatxhax Tiuxhe; atz yeʼat laʼ qutanbʼa ipaxsal viyolbʼal quBʼaal Tiuxh, —xeʼt inqʼa apoostol.
5Tul yekich motx chiibʼ vet inqʼa niman tetz Jesuus s-kaqaayil tiʼ u yol uvaʼ motx tal inqʼa apoostol. Tul ichʼex vet inqʼa niman tetz Jesuus jolol inqʼa vinaq s-xoʼl, aʼetze inqʼaa: Ixh, uvaʼ kʼuqlichxh ikʼuul tiʼ quBʼaal Tiuxh, atz aʼ vet viTiuxhil Tiuxh nikich bʼanon iqʼesalil t-taanxelal, yaʼne Piʼl, tuchʼ Prookoro, tuchʼ Nikanoor, tuchʼ Timoon, tuchʼ Parmeenas, tuchʼ Nikolaas, uvaʼ jitich tij imam Israeel, pet een tzajnaʼqlich Nikolaas tu tenam Antiokiia. Tul oknaʼqich vet tiʼ inimal u tuqʼeʼybʼal inqʼa tij imam Israeel.
6Yaʼne iqʼolaq vet ok s-juqvaʼl vatz inqʼa apoostol. Tul taqʼaq vet jaʼ inqʼa apoostol iqʼabʼ tiviʼ inqʼa chʼexexi tiʼ inatxhax Tiuxh s-tiʼ. Tul oksal vet vatz u aqʼon.
7Tul aʼlxh nikich iyakʼin talax viyolbʼal quBʼaal Tiuxh xoʼl inqʼa xaol. Tul mamala tel xaol nikich tok s-niman tetz Jesuus tu tenam Jerusaleen. Atz mamalaat inqʼa oksan yol vatz quBʼaal Tiuxh motx ok vet s-niman tetz Jesuus.
Uvaʼs itxeyp Ixh
8Echetze Ixh, tan tira atich itial; atz tira atich tiqleʼm taʼn viTiuxhil Tiuxh. Tul mamala kam uvaʼ mam yol tilixeʼ, tuchʼ inqʼa etxhlal nikich ibʼan Ixh xoʼl u tenam.
9Yaʼnetze xeʼt jolol inqʼa vinaq kʼatz Ixh tiʼ iyajt tibʼ s-tuchʼ tiʼ viyolbʼal quBʼaal Tiuxh. Aʼ jolol inqʼa tij imam Israeel, inqʼa nikich motx imol tibʼ t-val u kʼulbʼal ibʼ uvaʼ; ‹Tetz Inqʼa Chitpinaʼq,› chichich eʼli. Tan aʼ inqʼae motx txhaqpul el s-pereexhoil tinjolol inqʼa tenam. Atetz inqʼa een tzajnaʼqich tu tenam Sireene, Alejandriia, tuulbʼal Siliisia, tuulbʼal Aasia. 10Poro yeʼ nikich toleʼvaq tiʼ tel iqʼij Ixh, tan atichxh itxumbʼal Ixh s-bʼaʼn. Tan aʼ viTiuxhil Tiuxh nikich bʼanon iqʼesalil t-taanxelal Ixh.
11Yaʼne aʼl ijutxi vet itxhoox kaʼl inqʼa vinaq uvaʼ laʼich tzʼeqon tzij tiʼ Ixh. Tul ech laʼich motx tal vet inqʼa tzʼeqol tzij s-eche: —Qat qabʼi teesal iqʼij quBʼaal Tiuxh taʼn Ixh. Atz qat qabʼi teesat Ixh iqʼij inqʼa bʼekʼbʼal uvaʼ itzʼibʼa ka Moisees, —chaqiche.
12Tul motx xeʼt vet tiʼ itxhaqtziil u tenam, atz tiʼ itxhaqtziil inqʼa aqʼol kuʼ yol tinuqul xoʼl inqʼa tij imam Israeel. Atz motx itxhaqtzii inqʼa nikich txhusun ibʼekʼbʼal inqʼa tij imam Israeel. Yaʼne lakp vet iviʼ u tenam, tul motxaq vet ok tiʼ itxeyex Ixh. Tul iqʼol vet ok Ixh xoʼl jankʼal inqʼa iqʼesal aqʼol kuʼ yol tinuqul.
13Yaʼne iqʼol vet ok inqʼa txhulin yol tiʼ itzʼeqt tzij tiʼ Ixh. Tul echaq tal s-eche: —Yeʼ kuxh nik iyaʼ naq uvaʼe tiʼ iyoqʼox u Tiuxhla Atibʼal, u qutostiuxh, atz tiʼ teesal iqʼij inqʼa bʼekʼbʼal uvaʼ itzʼibʼa ka Moisees. 14Tul qat qabʼi talt naq uvaʼ, aʼ naq u Jesuus, u aj tenam Nasareet, toq jinpun u qutostiuxh. Atz aʼat nik tal naq uvaʼ toq ijalpu naq kamxh inqʼa nik motx quqejeʼ, inqʼa alel ka taʼn Moisees, —xeʼt inqʼa txhulin yol te inqʼa iqʼesal.
15Jankʼaletzxh vet inqʼa iqʼesal, inqʼa kʼuqinyiche, tan ajt tabʼi vet inqʼa yol inqʼae, tul itzʼtichaq kuxh vet ivatz tiʼ Ixh. Tul tilaq veteʼ uvaʼ echichxh vete ikaʼy invaʼq iaanxel quBʼaal Tiuxh ikaʼy Ixh.
ទើបបានជ្រើសរើសហើយ៖
Vibʼanoʼm inqʼa Apoostol 6: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
