Vibʼanoʼm inqʼa Apoostol 5
5
Uvaʼs ikam Ananiias tuchʼ Safiira tiʼ itzʼeqtaq tzij vatz quBʼaal Tiuxh
1Pet koq vaʼt u vinaq, uvaʼ Ananiiasich ibʼij, uvaʼ ibʼan eela iyol tuchʼ Safiira, u tixqel, tiʼ ikʼayil inseʼtel vitxʼavaʼ. 2Tan teesa ka Ananiias tanul u puaq te vijaʼmil vitxʼavaʼ. Tul ant Safiira, u tixqel Ananiias, ootzaqinich tetz. Tul tant kuxh vet u puaq ex taqʼ Ananiias te inqʼa apoostol.
3Yaʼne ech tal Luʼ te Ananiias s-eche: —Ananiias, tira kantxhaq uvaʼ nik abʼaneʼ. Tan qat akuy aveesal t-bʼey taʼn Satanaas tiʼ atzʼeqt tzij te viTiuxhil Tiuxh. Tan aʼ nik aaleʼ uvaʼ ayaʼl u puaqe qat bʼenk vatxʼavaʼ. Tul tzʼeqo tzij kuxh nik abʼaneʼ. Tan tanul kuxh vijaʼmil u txʼavaʼ qat ul aaqʼeʼ. 4Tul bʼane jitetz koq eetz u txʼavaʼ. Pet atz eetz s-kaqaayil. Atz bʼane jit koq eetz u puaq, vijaʼmil u txʼavaʼ. Atz antxh eetz. Pet ¿kametz s-tiʼil qat akuy tok u tzʼeqo tzij tavaanima? Tan jit te invaʼq xaole qat atzʼeqvat tzij, pet te quBʼaal Tiuxhe qat atzʼeqvat tzij, —xeʼt Luʼ te Ananiias.
5Tabʼietz kuxh Ananiias inqʼa yol uvaʼ tal Luʼ, tul pakʼel ibʼen Ananiias t-txʼavaʼ. Tul yekich el ikʼuul Ananiias. Tul mam xoʼval ok vet tiʼ jankʼal inqʼa xaol, inqʼa motx abʼin vikam Ananiias.
6Yaʼne txakp tzaan kaʼl inqʼa chelem xaak tiʼ ibʼenaq ok kʼatz vitxhiʼoʼl Ananiias. Tul motx isuti vet ok bʼuʼq tiʼ vitxhiʼoʼl Ananiias. Tul tiqʼoaq vet el vitxhiʼoʼl Ananiias, atz exaq imuq veteʼ.
7Kamaletz oxvaʼlich vet oora ikam Ananiias, tul aqʼbʼ Safiira, u tixqel Ananiias. Tul tira yeʼlich s-kʼuul Safiira kam uvaʼ maʼtich tutxheʼ.
8Yaʼne ikʼutxh Luʼ u puaq te Safiira. Tul ech tal Luʼ s-eche: —Al s-ve: ¿Ayaʼl u puaqe qat ekʼul tiʼ vetxʼavaʼ? —xeʼt Luʼ.
Tul ech tal Safiira s-eche: —Ee, ayaʼl qat qukʼule, —xeʼt Safiira.
9Yaʼne ech tal vet Luʼ s-eche: —¡Tira kantxhaq uvaʼ qat ebʼan tiʼ ebʼant eela eyol tiʼ itzʼeqex tzij te viTiuxhil Tiuxh! Il vet inqʼa chelem xaak tukuʼl tziʼ jubʼal, inqʼa qat ex muqun ka vatzumel, tul txheel toqat tiqʼo el inqʼa chelem xaak vatxhiʼoʼl, —xeʼt Luʼ.
10Taʼnetz kuxh tal Luʼ u yol uvaʼe, tul pakʼel ibʼen Safiira t-txʼavaʼ vatz Luʼ. Tul kam vet Safiira. Yaʼne okaʼp vet inqʼa chelem xaak. Tul tilaq veteʼ uvaʼ kamnaʼqich vet Safiira. Tul tiqʼoaq vet el vitxhiʼoʼl Safiira. Tul antxh ex imuqvataq ka Safiira kʼatz Ananiias, vitzumel. 11Tul mam xoʼval ok vet tiʼ inqʼa niman tetz Jesuus tuchʼ inqʼa xaol s-kaqaayil, inqʼa motx abʼin vet vitziulal vikam Ananiias, atz vikam Safiira.
Uvaʼs ikʼutxht inqʼa apoostol inqʼa etxhlal, atz inqʼa kaebʼal aanima xoʼl inqʼa xaol, tul mamala xaol ok s-niman tetz Jesuus
12Tul mamala etxhlal ibʼan inqʼa apoostol xoʼl inqʼa xaol tuchʼ uvaʼ mam yol tilixeʼ. Tul vaʼlaqichxh iyol inqʼa niman tetz Jesuus s-vatzaq tiʼ ikʼultaq tibʼ tu palebʼal ok uvaʼ atich ok ibʼij Salomoon s-tiʼ. 13Pet inqʼa xaol, inqʼa jitich niman tetz Jesuus, tan mij nikich ijetxhaq vet ok tibʼ kʼatz inqʼa niman tetz Jesuus, inqʼa molelichaq tibʼ. Pet tira nikich toksa inqʼa xaol iqʼij inqʼa niman tetz Jesuus. 14Poro aʼlxh nikich inaʼ vet tatxhul inqʼa niman tetz Jesuus. Tan mamala ixoq s-vinaq nikich toksaaq vet tibʼ s-niman tetz Jesuus. 15Atz mamala kaebʼal aanima nikich ibʼan inqʼa apoostol. Tan aʼl kuxh nikich taqʼ eluʼl inqʼa xaol inqʼa iyaabʼ tziʼ bʼey, tul ataqich kuxh kuʼ viʼ txʼatxh tzeʼ, atz ataqich kuʼ viʼ txʼatxh. Aʼetz nikich itxʼebʼ inqʼa xaol vipal paʼl Luʼ tiʼ ibʼanax bʼaʼn inqʼa yaabʼ. Tan kʼuxh aʼich kuxh vicheonal Luʼ nikich ipal paʼl tiibʼa inqʼa yaabʼ, tul yek nikich ibʼan bʼaʼn. 16Atz kʼuxh jetxhel alich inbʼeeq inqʼa xaol kʼatz u tenam Jerusaleen, tan nikich motx tiqʼo tzaan inqʼa iyaabʼ, tul nikich tul tu tenam Jerusaleen tiʼ taqʼaxeʼ. Atz nikatich tiqʼo tzaan inqʼa nikich motx ikʼaxbʼ taʼn demoonio. Tul jankʼalxh inqʼa yaabʼ nikich motx ibʼan bʼaʼn.
Uvaʼs itxeyp vet Luʼ tuchʼ Xhun taʼn inqʼa iqʼesal
17Tul txhoʼn vet te viqʼesal inqʼa oksan yol vatz Tiuxh tuchʼ kaqaayil inqʼa eelaich iyol s-tuchʼ, inqʼa saduseeoich u tuqʼeʼybʼal. 18Tul ibʼekʼ vet inqʼa iqʼesal itxeyp inqʼa apoostol. Tul palsalaq vet jaʼ t-tzeʼ uvaʼ tetz u tenam.
19Yaʼne ul val viaanxel quBʼaal Tiuxh s-aqʼbʼal tu tzeʼ. Tul ijaq u tzeʼ. Tul itxhaqpu eluʼl inqʼa apoostol tu tzeʼ. Tul ech tal u aanxel s-eche: 20—Bʼenoq ex; tul bʼenoq etxakbʼa etibʼ paqte tu nimla atibʼal tuulbʼal u tostiuxh xoʼl inqʼa xaol. Tul bʼenoq epaxsa inuqul inqʼa bʼaʼnla txhaq yol tiʼ u qʼij saq uvaʼ yeʼl iyaʼebʼal imotxebʼal, —xeʼt u aanxel te inqʼa apoostol.
21Tabʼietz vet inqʼa apoostol viyol u aanxel, tul ech eqal s-qʼalaʼm, palaq vet ok tu nimla atibʼal tuulbʼal u tostiuxh tiʼ itxhusux inqʼa xaol tiʼ inqʼa bʼaʼnla txhaq yol tiʼ Jesuus.
Sebʼtichetz itxhusun vet inqʼa apoostol tu nimla tuulbʼal u tostiuxh, tul ibʼekʼ vet viqʼesal inqʼa oksan yol vatz Tiuxh tutxh val u kʼulu ibʼ tuchʼ kaqaayil inqʼa iqʼesal; aʼe kaqaayil inqʼa aqʼolaq kuʼ yol tinuqul xoʼl inqʼa tij imam Israeel. Maʼtichetz ikʼult vet tibʼ inqʼa iqʼesal, tul ibʼekʼaq vet teesal tzaan inqʼa apoostol t-tzeʼ tiʼaq tul s-xoʼl. 22Aqʼbʼetz vet inqʼa pol tu tzeʼ, tul ¡tilaq veteʼ uvaʼ yeʼlich vet inqʼa apoostol atiche! Yaʼne qʼaʼv kuxh vet inqʼa pol. Tul ulaq tal vet u yol te inqʼa iqʼesal. 23Tul echaq tal vet s-eche: —Bʼantan bʼeenoxh katxʼumal u tzeʼ qʼaoq s-qat qaqʼbʼeʼ. Tul txakuny inqʼa xeen tetz u tzeʼ vatz vijubʼalil. Qatetz qujaq vet u tzeʼ, tul ¡yeʼxhabʼil vet at s-tuul! —xeʼt taqʼbʼ inqʼa pol.
24Tabʼietz vet u qʼesal oksan yol vatz Tiuxh uvaʼ ul alaxoq, atz tabʼiat jolt inqʼa iqʼesal oksan yol vatz Tiuxh, atz tabʼiat vet viqʼesal u xeen tetz u nimla tuulbʼal u tostiuxh, tul tira kuxh motx sotzaq vet ikʼuul. Tul nikich kuxh motx iyolaq vet s-vatzaq kam laʼich yaʼk vet inqʼa yol.
25Tul ajtxh motx til taqʼbʼ val u vinaq tiʼ talax u yol. Tul ech tal s-eche: —¡Il naq inqʼa vinaq, inqʼa etaqʼ jaʼ t-tzeʼ, nik itxhusun xoʼl inqʼa xaol tu nimla atibʼal tuulbʼal u tostiuxh! Tul aʼ nik motx itxhus inqʼa yol tiʼ Jesuus, —xeʼte.
26Yaʼne bʼen viqʼesal xeen tetz u nimla atibʼal tuulbʼal u tostiuxh tuchʼ inqʼa pol. Tul yekichaq tiʼ tiqʼol vet tzaan inqʼa apoostol. Tul jik kuxh motx tiqʼotaq tzaan, tul ex taqʼ tal uvaʼ kʼulich tibʼ inqʼa aqʼolaq kuʼ yol tinuqul, tan nikich motx ixoʼva ikʼonilaq s-sivan taʼn u tenam.
27Iqʼoletz vet tzaan inqʼa apoostol, tul oksal vet xoʼl inqʼa aqʼol kuʼ yol tinuqul. Tul ijotxhʼi vet viqʼesal oksan yol vatz Tiuxh val u yol te inqʼa apoostol. 28Tul ech tal s-eche: —¡Yeʼetz kol nik enatxheʼ, atz tira qutiila bʼekʼu sete uvaʼ yeʼl inpaqt laʼ etxhus inqʼa xaol tiʼ iqeex u vinaq uvaʼe! Yetz qal sete, tul aʼl qat epaxinsat vet inqʼa yol tuulbʼal u tenam Jerusaleen. Tul jitetz kuxh taʼne, pet ¡aal nik etaqʼt jaʼp s-qiibʼa viyatzʼax el u vinaq uvaʼe! —xeʼt viqʼesal.#Tio 27.28
29Yaʼne tzaqʼbʼ Luʼ tuchʼ jolt inqʼa apoostol. Tul ech motx tal s-eche: —Aʼ u quBʼaal Tiuxh nik qunima. Pet jit aʼ nik qunima kam uvaʼ laʼ tal invaʼq vinaq s-qe. 30Tan antxh u quBʼaal Tiuxh, viTiuxh inqʼa kʼuy qumam, itzʼeʼvsan Jesuus inpaqte, Jesuus uvaʼ etaqʼ jaʼ vatz kurus, atz eyatzʼeʼl. 31Aʼetz quBʼaal Tiuxh qat oksan iqʼij Jesuus, tan aʼ Jesuuse uvaʼ qat iqʼol jaʼ t-amlikaʼ. Tul qat taqʼ quBʼaal Tiuxh tisebʼal. Tul quBʼaal Tiuxh qat oksan Jesuus siqʼesal, atz Chitol qetz, tiʼ toksat oʼ s-tuul tiʼ qujalput u qutxumbʼal, atz tiʼ ikuyux inqʼa qupaʼv, oʼ inqʼa tij imam Israeel. 32Aʼetz vet oʼ, nik aqʼon ootzaqiloq vinuqul inqʼa yol tiʼ Jesuus, inqʼa qat motx qila. Atz nikat qaqʼ ootzaqiloq kam uvaʼ nik ibʼan viTiuxhil Tiuxh, uvaʼ qat taqʼ quBʼaal Tiuxh s-qe, oʼ inqʼa niman tetz, —xeʼt inqʼa apoostol te inqʼa iqʼesal.
33Tabʼietz vet inqʼa iqʼesal aqʼol kuʼ yol tinuqul u yol uvaʼ tal inqʼa apoostol, tul motx lakpaq vet iviʼ s-tiʼ. Atz tzʼeʼyichaqxh vet tiʼ iyatzʼax el inqʼa apoostol. 34Yaʼne txakeʼv val u vinaq s-xoʼl, uvaʼ Gamalieelich ibʼij, fariseeoiche, atz txhusulich tetz ibʼekʼbʼal inqʼa tij imam Israeel. Tul atich ok xoʼl inqʼa aqʼolaq kuʼ yol tinuqul. Tul oksamalich iqʼij taʼn u tenam. Tul ibʼekʼ Gamalieel tiqʼol el inqʼa apoostol inbʼiil tiʼeʼl tal uvaʼ kʼulichaq tibʼ.
35Yaʼne ech tal Gamalieel xoʼl inqʼa imol siqʼesalil s-eche: —Jankʼal ex, inmol s-tijaq imam Israeel, itzʼavaqxh s-bʼaʼn kam uvaʼ toq etulbʼe naq inqʼa vinaq inqʼae. 36Tan ate sekʼuul kam uvaʼ ibʼan naq u Teuudas s-naʼya, tan junt kuxh nikich taqʼ bʼen tibʼ naq s-nim. Tul ok vet bʼen kajvaʼl sieen (400) tatxhul xaol tiʼ Teuudas. Pet yatzʼaxetz vet el Teuudas, tul talaq kuxh motx ikʼaq vet inqʼa xaol inqʼa txhʼuyich s-tiʼ. Tul yeʼxh elaʼpun kam uvaʼ kʼaqich taʼn.
37Xamtichetz txhan veteʼ, tul echatxh ibʼan Juudase, val uvaʼ, aʼ atilich tuulbʼal Galileea, tuulbʼal uvaʼs nikich tel tatxhul inqʼa xaol. Tul okat bʼen mamala tenam tiʼ Juudas. Pet yatzʼaxatetz vet el Juudas, tul talaq kuxh motx ikʼaq vet inqʼa xaol inqʼa txhʼuyich s-tiʼ. 38Echetz nik valte sete, atz nik val vaʼl etxumbʼal, tiʼ uvaʼ yeʼxhkam laʼ etulbʼe naq inqʼa vinaq inqʼae. Pet aʼl etxhaqpu el txhaqnaq. Tan oq itxhusbʼal, atz oq titzʼabʼal kuxh vinaq uvaʼ nik motx ibʼan txhaqnaq, tul yeʼletzxh txhaqnaqe laʼ elaʼpun. 39Pet oqetz tetzxh quBʼaal Tiuxh uvaʼ nik motx ibʼan txhaqnaq, tul yeʼletz exe laʼ oleʼv ex tiʼ imaqaxeʼ. Pet itzʼavaqxh s-bʼaʼn, tan avoqe te quBʼaal Tiuxh nik ebʼanvat txhʼaʼo, —xeʼt Gamalieel xoʼl inqʼa imol.
40Tul motx inima vet inqʼa iqʼesal kam uvaʼ tal Gamalieel. Yaʼne bʼekʼex vet tiqʼol ukuʼl inqʼa apoostol inpaqte taʼn inqʼa iqʼesal. Tul motx tzʼuʼmal vet inqʼa apoostol. Atz motx xoʼvisal vet tiʼ talax inqʼa yol tiʼ Jesuus. Yaʼne motx txhaqpul vet el.
41Eletz vet ul inqʼa apoostol xoʼl inqʼa iqʼesal, tul chiibʼiyichaqxh veteʼ uvaʼ motx kuxh kʼaxbʼisal tiʼ vinimal Jesuus. Tan eche iqʼij oksal taʼn inqʼa iqʼesal motx inatxha. Tan nuqxhtuʼ uvaʼ, tiʼ kuxh uvaʼ niman tetz Jesuus tul motx kʼaxbʼisalika. 42Tul jun qʼij nikich motx itxhus inqʼa apoostol inqʼa bʼaʼnla txhaq yol, tiʼ uvaʼ, aʼ Jesuuse u Kriisto. Atz jun qʼij nikich motx ipaxsa inqʼa bʼaʼnla txhaq yol kʼuxh tu nimla tuulbʼal u tostiuxh, atz kʼuxh tuulbʼal otzotz, tan yeʼ nikich motx iyaʼ s-tiʼ.
ទើបបានជ្រើសរើសហើយ៖
Vibʼanoʼm inqʼa Apoostol 5: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
