Vibʼanoʼm inqʼa Apoostol 26
26
Uvaʼs iyolon Paʼp vatz Agriipa tiʼ ikolt tibʼ
1Yaʼne ech tal Agriipa te Paʼp s-eche: —Laʼ utxhi uvaʼ antxh axh laʼ alon inuqul u yol seʼe, —xeʼt Agriipa.
Yaʼne taqʼ jaʼ Paʼp iqʼabʼ tiʼ ixeʼt yolon. Tul ech tal Paʼp tiʼ ikolt tibʼ s-eche: 2—Nimla vatz quqʼesal Agriipa, nik inchiibʼeʼ uvaʼ il in at in savatz. Tul toq aabʼi vinyol tiʼ inkolt vibʼ vatz jankʼal inqʼa yol uvaʼ nik ixotxh in inqʼa iqʼon iviʼ s-tiʼ, inqʼa inmol s-tijaq imam Israeel. 3Tul tira ootzaqle kam uvaʼ nik quqejeʼ, oʼ inqʼa tij imam Israeel. Atz kam uvaʼ nik quyoj qibʼ s-tiʼ. Atz ootzaqlat kam yol nik qubʼan s-quvatzaq. Echetz s-tiʼile nik injaq kuybʼal see uvaʼ josqʼil koq laʼ aabʼit vatz inyol.
Uvaʼs talt Paʼp yol te Agriipa tiʼ u Kriisto
4Tul tootzaq jankʼal inqʼa inmol s-tijaq imam Israeel kame vinchʼiebʼal uvaʼs txulich kuxh in. Tan bʼaxa atin in t-vintenam. Yaʼne atin in tu tenam Jerusaleen. 5Tul yekich ok in xoʼl inqʼa fariseeo. Tul tootzaq jankʼal inqʼa inmol, inqʼa nik iqʼon iviʼ xoʼl inqʼa tij imam Israeel. Tul tira tijxh nik tilixeʼ kam nik tulbʼel inimal inqʼa bʼekʼbʼal viʼ jolt inqʼa uqʼeʼybʼal s-quxoʼl, tan atich ok in xoʼl inqʼa fariseeo. 6Pet aʼetz vet uvaʼ s-txheel, tan aʼ vet nik intxʼebʼ inqʼa kam uvaʼ alel ka taʼn quBʼaal Tiuxh te inqʼa kʼuy qumam tiʼ vitxʼebʼex u tulebʼal u Kriisto. Aʼetz s-tiʼile nik xotxhoxik in. 7Tul antxh uvaʼe nik itxʼebʼ kabʼlaval tanul inqʼa qutenam, inqʼa ixaʼnil Jakoov. Tan sebʼtaq kuxh tiʼ inimal s-qʼiil s-aqʼbʼal. Echetz ant kuxh tiʼ vintxʼebʼon tiʼ u tulebʼal u Kriisto nik motx ixotxhvat in inqʼa iqʼon iviʼ xoʼl inqʼa tij imam Israeel, quqʼesal Agriipa. 8¡Kametz veteʼ! ¡Maqetz mam vet paʼv chi, uvaʼ ant kuxh nik innima u titzʼeʼv inqʼa kamnaʼq inpaqte taʼn quBʼaal Tiuxh!
Uvaʼs talt Paʼp te Agriipa uvaʼ nikich tojqeʼla Paʼp inqʼa niman tetz Jesuus
9Pet tuubʼal uvaʼ iqʼomich u fariseeoil vaʼn, tul tira nikich vitzʼa uvaʼ viqatzich ikʼaxbʼisal inqʼa niman tetz Jesuus, u aj Nasareet. Tul tira kam kuxh txumbʼal nikich inbʼan tiʼ ikʼaxbʼisaleʼ. 10Tul echatxh uvaʼe inbʼan tu tenam Jerusaleen. Tan atich vet viqleʼm, atz atich vet t-inqʼabʼ taʼn inqʼa iqʼesal oksan yol vatz quBʼaal Tiuxh taqʼaxaq jaʼ inqʼa niman tetz Jesuus t-tzeʼ. Echetz s-tiʼile nikich motx ex vojqeʼla. Tul nikich injup t-tzeʼ. Oqetz nikich talax iyatzʼax el inqʼa niman tetz Jesuus, tul ant in nikich alon yol tiʼ iyatzʼax el. 11Atz nima paqul kuxh motx inkʼaxbʼisa inqʼa niman tetz Jesuus tuulaq junun inqʼa kʼulbʼal ibʼ. Tul tetxhal kuxh nikich motx inyaʼlu, tiʼ uvaʼ laʼich motx teesa iqʼij Jesuus. Tan tira lakpinaʼqich inviʼ s-tiʼ. Xaʼtetze tetxhal kuxh nikich motx ex intxhokeʼ talxh tenam nikich motx ikʼaqeʼ, kʼuxh tal uvaʼ jeqlich inqʼa jit tij imam Israeel.
Uvaʼs talt Paʼp uvaʼ ikʼutxh tibʼ quBʼaal Jesuus te Paʼp
Vibʼanoʼm inqʼa Apoostol 9.1-19; 22.6-16
12Antetzxh kʼaqich vaʼn vikʼaxbʼisal inqʼa niman tetz Jesuus tu tenam Damaasko. Tan atich vet viqleʼm, atz atich vet t-inqʼabʼ taʼn inqʼa oksan yol vatz Tiuxh. Tul iqʼomalichxh inyakʼil vaʼn uvaʼs aʼlich inbʼenaʼ, tan iqʼomalich vet vaʼl uʼ vaʼn uvaʼ aqʼelich tzaan taʼn inqʼa oksan yol tiʼ itxeyp inqʼa niman tetz Jesuus. 13Atichetz ok in tiʼ bʼey, mam quqʼesal, tul aʼxh itxhaqʼaan qʼij, tul vil itxiqun kuʼl val u xamal t-amlikaʼ uvaʼ palnaʼqich itxiqun viʼ u qʼij. Tul tira kuʼl val u xamal s-viibʼa, atz tiibʼa inqʼa vinaq inqʼa txhʼuyich s-viʼ. 14Tul yekich motx joqel qukuʼ t-txʼavaʼ s-qukaqaayil. Tul vabʼi val u qul t-quyolbʼal evreeo, u quyolbʼal, oʼ inqʼa tij imam Israeel. Tul ech tal u qul s-ve s-eche: «¡Saaulo, Saaulo, kam s-tiʼil nik ojqeʼla in! Poro txumlebʼal kuxh avatz, tan junt kuxh nik akʼaxbʼisa eebʼ, eche invaʼq u vaʼk uvaʼ sebʼt kuxh tel ka toq tiʼ itzeqʼex ka invaʼq u txhʼitxhʼ uvaʼ tzʼuqel ijuʼ,» xeʼt s-ve.
15Yaʼne ech val s-eche: «¿Jaʼletz axhe, InBʼaal?» xeʼt in.
Tul ech tal s-ve s-eche: «Ine u Jesuus uvaʼ nik ojqeʼla in. 16Pet lakpen, tul nal atxakpeʼ. Tan qat inkʼutxh vibʼ see tiʼ uvaʼ toq vaqʼ eeqatzi ibʼanax u vaqʼon tiʼ vinyolbʼal. Tul toq aaqʼ ootzaqiloq inuqul inqʼa yol s-viʼ xoʼl inqʼa tenam tiʼ kam inqʼa qat eela, atz kam inqʼa qat aabʼi. Tul laʼ aaqʼ ootzaqiloq kam tel inqʼa toq inkʼutxh see. Aʼetz vet eeqatze vaʼn. 17Tul txheel toq intxhaq bʼen axh xoʼl inqʼa jit tij imam Israeel. Tul in toq kolon axh vatz inqʼa amol s-tijaq imam Israeelil, atz vatz inqʼa jit tij imam Israeel. 18Toqetz intxhaq bʼen axh tiʼ bʼen aaqʼt tootzaqi vinuqul tiʼ tootzaqit in, echetz laʼ motx ijalpute inqʼa itxumbʼal tiʼ innimaleʼ, atz tiʼ yeʼ taqʼt tibʼ bʼekʼloq taʼn Satanaas. Tul laʼ ok vet tiqʼabʼ quBʼaal Tiuxh, eche vaʼq tzot uvaʼ at kuxh bʼen tu tokto. Ajtetz laʼ ilon veteʼ, tul aʼ vet u qʼij saq laʼ tila. Tiʼetz vet vijalput vitxumbʼal, atz tiʼ ikʼuqbʼat ikʼuul s-viʼ, tul laʼ inkuy inqʼa ipaʼv. Tul antaq vet tiʼ ikʼulux u nimla tatin sinkʼatza tuchʼ inqʼa in laʼ motx chʼexon,» xeʼt Jesuus s-ve.
Uvaʼs talt Paʼp tiʼ vinimat viyol quBʼaal Jesuus tiʼ vibʼen tiʼ ipaxsal viyol quBʼaal Jesuus
19Pet toqetz val see mam iqʼesal, uvaʼ qat innima kam uvaʼ ikʼutxh quBʼaal Tiuxh s-ve tu amlikaʼ. Echetz yeʼxhkam qat veesa iqʼij viyol Jesuus. 20Pet aʼxh bʼaxich ex inpaxsavat u yol xoʼl inqʼa tij imam Israeel tu tenam Damaasko. Yaʼne ex inpaxsa paqte xoʼl inqʼa tij imam Israeel tu tenam Jerusaleen. Yaʼne ex inpaxsa t-jolt inqʼa tenam tuulbʼal Judeea. Yaʼne ex inpaxsa paqte xoʼl inqʼa jit tij imam Israeel. Tul aʼ motx ex val s-xoʼl uvaʼ laʼ motx ijalpu inqʼa itxumbʼal tiʼ yeʼ ipaʼvineʼ, tul aʼ laʼ motx ikʼul vibʼant quBʼaal Tiuxh viqʼesalil t-taanima tiʼ inimal quBʼaal Tiuxh. Echetz laʼ motx ibʼante inqʼa bʼaʼnla txhaq bʼanoʼm tiʼ ikʼutxhtaʼ uvaʼ nuqxhtuʼ qat titzʼal tibʼ.
21Tiʼetz kuxh inqʼa yol inqʼa nik val sete s-txheel, tul itxey in inqʼa inmol s-tijaq imam Israeel tuulbʼal u tostiuxh. Tul aʼ kʼaqichaq vet taʼn inyatzʼax el. 22Pet quBʼaal Tiuxh qat lotxhon in. Tul il in sebʼt ilotxht tel in quBʼaal Tiuxh tiʼ taqʼax ootzaqiloq vinuqul inqʼa yol tiʼ Jesuus s-txheel te inqʼa xaol, kʼuxh at tiqleʼm, atz kʼuxh yeʼl tiqleʼm. Tul taʼn kuxh nik val kam telaʼpun inqʼa yol uvaʼ tzʼibʼamal ka taʼn Moisees tuchʼ jolt inqʼa qʼexsanich tetz viyol quBʼaal Tiuxh. Tan motx tal ka kam uvaʼ laʼ utxhi, atz kam inqʼa laʼ ul s-qiibʼa taʼn quBʼaal Tiuxh. 23Atz motx tal ka uvaʼ laʼ kam u Kriisto. Tul laʼ itzʼeʼv u Kriisto inpaqte xoʼl inqʼa kamnaʼq. Aʼetz Kriistoe, u bʼaxa Kʼaola, uvaʼ qat iqʼon bʼey tiʼ u itzʼeʼvchil. Tul antxh u Kriisto ul paxsan inqʼa bʼaʼnla txhaq yol s-quxoʼl, oʼ inqʼa tij imam Israeel, atz xoʼl inqʼa jit tij imam Israeel. Tul ech qat topoon u chitpichil xoʼl inqʼa xaol taʼn u Kriisto, eche itxiqun invaʼq txiqubʼal, —xeʼt Paʼp te Agriipa.#Isaiias 42.6; 49.6
Uvaʼs iyaʼlut Paʼp Agriipa tiʼ iqejex viyolbʼal quBʼaal Tiuxh
24Sebʼtichetz talt Paʼp inqʼa yol inqʼae tiʼ ikolt tibʼ vatz u yol, tul jankʼalxh tiʼ iqul Feesto sichʼin tiʼ iyoloneʼ. Tul ech tal Feesto s-eche: —¡Paʼp, tira bʼak yany aviʼ! Tan antxh inqʼa mamala txhusbʼal uvaʼ nik abʼaneʼ qat yansan aviʼ! —xeʼt Feesto.
25Yaʼne ech tal Paʼp s-eche: —Yeʼle. Jit ine yannaʼq inviʼ, nimla vatz vinaq Feesto. Pet antxhte inqʼa yol uvaʼ nik valeʼ. Tul inuqulxhte. 26Tan tootzaql Agriipa, u quqʼesal, uvaʼ jankʼalxh inqʼa yol uvaʼ nik valeʼ, tan echxhte. Tul yeʼl in nik inxoʼv tiʼ talax inqʼa yol vatz Agriipa. Atz yeʼl vaʼq yol nik valeʼ uvaʼ yeʼl koq s-kʼuul Agriipa. Tan tira ech ivatz kaqaayil xaol ul ibʼan Kriisto inqʼa kam vatz u txʼavaʼ, pet bʼane muqel koq ul ibʼant Kriisto, —xeʼt Paʼp te Feesto.
27Yaʼne ech tal Paʼp te Agriipa s-eche: —Mam quqʼesal, Agriipa, ¿nik aqej inqʼa yol uvaʼ itzʼibʼa ka inqʼa qʼexsanich tetz viyol quBʼaal Tiuxh s-naʼya? Vootzaqle uvaʼ nik anima, —xeʼt Paʼp te Agriipa.
28Yaʼne ech tal Agriipa s-eche: —Aʼetzebʼ nik aaleʼ uvaʼ nal txhan kuxh laʼ inbʼen s-niman tetz Jesuus, —xeʼt Agriipa.
29Tul ech tal Paʼp s-eche: —¡QuBʼaal Tiuxh laʼ bʼanon bʼaʼnil, quqʼesal, kʼuxh s-txheel, atz kʼuxh xamel uvaʼ jit koq kuxh axh, pet jankʼal koqxh inqʼa xaol uvaʼ nik abʼin in s-txheel laʼ toksa tibʼ s-niman tetz Jesuus, eche uvaʼ inbʼana! Tul ¡jit koq vet ech laʼ eqitzix s-kadeena, eche vinqitzixeʼ! —xeʼt Paʼp.
30Yaʼetz kuxh vet Paʼp tiʼ talax u yol uvaʼe, tul motx txakeʼvaq veteʼ. Txakeʼv u mam iqʼesal Agriipa tuchʼ Feesto, u aqʼol kuʼ yol tinuqul. Tul txakeʼv Vereniise tuchʼ jolt inqʼa xaol, inqʼa imolich tibʼ s-tuchʼ. 31Tul ijetxhaq vet el tibʼ s-junal. Tul ech motx iyol vet s-vatzaq s-eche: —Yeʼl invaʼq ipaʼv naq uvaʼe nik itxhejaʼ, tul laʼ qaqʼ jaʼ naq t-tzeʼ s-tiʼ, atz laʼ quyatzʼeʼl naq, —xeʼtaq veteʼ.
32Yaʼne ech tal Agriipa te Feesto s-eche: —Laʼ utxhi laʼ qutxhaqpu el naq uvaʼ yeʼ koq tal naq ibʼen tu tenam Rooma vatz naq u mam quqʼesal, —xeʼt Agriipa.
ទើបបានជ្រើសរើសហើយ៖
Vibʼanoʼm inqʼa Apoostol 26: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
