Vibʼanoʼm inqʼa Apoostol 25
25
Uvaʼs talt Feesto taqʼax kuʼ yol tinuqul tiʼ Paʼp tu tenam Jerusaleen, pet aʼ ijaq Paʼp ibʼen vatz Seesar tu mam tenam Rooma
1Oxvaʼlichetz vet qʼij tok Feesto siqʼesalil tu tenam Jerusaleen, tul opoon vet Feesto tu tenam Sesareea tuulbʼal Judeea. 2Yaʼne aqʼbʼ vet inqʼa iqʼesal oksan yol vatz Tiuxh tuchʼ jolt inqʼa iqʼesal inqʼa tij imam Israeel vatz Feesto. Tul xeʼtaq vet xotxhon te Feesto tiʼ Paʼp. Tul ijaq inqʼa ataqich tiqleʼm xoʼl inqʼa tij imam Israeel bʼaʼnil te Feesto. 3Tul laʼich txhaqpul tzaan Paʼp t-Jerusaleen taʼn Feesto. Tul eche bʼaʼnil nikich motx isaʼeʼ tabʼileʼ, pet atz maʼtaqich iyoltaʼ uvaʼ laʼich bʼen kʼuluxoq Paʼp taʼn. Tul laʼich yatzʼax ka Paʼp tiʼ bʼey.
4Yaʼne ech tal Feesto s-eche: —Kam koq saʼ ul ibʼan Paʼp tzitza, tan il Paʼp bʼeenoxh xeemal tu tenam Sesareea. Pet yeʼxh jatvaʼt qʼij laʼ qʼaʼv in tu tenam Sesareea inpaqte. 5Aʼletz laʼ bʼen ex s-viʼ, ex inqʼa iqʼesal, tul aʼl laʼ bʼen exotxh Paʼp tzitzi, oq at invaʼq ipaʼv sevatz, —xeʼt Feesto.
6Kamal vajxaqt kuxh qʼij, atz maq lavat kuxh qʼij ibʼan Feesto tu tenam Jerusaleen, tul bʼen vet Feesto tu tenam Sesareea. Eutalichetz vet taqʼbʼ Feesto tu tenam Sesareea, tul ex vet Feesto tu tabʼibʼal. Tul ibʼekʼ vet Feesto taqʼbʼ Paʼp s-vatz. 7Okaʼpetz vet Paʼp vatz Feesto, tul nalxh imolaq vet ok tibʼ inqʼa iqʼesal inqʼa tij imam Israeel tiʼ Paʼp, inqʼa een tzajnaʼqich tu tenam Jerusaleen. Tul tzaʼlichxh inqʼa ipaʼv Paʼp, tul sibʼalich kuxh ipaʼv Paʼp nikich motx taloʼk inqʼa iqʼesal te Feesto. Poro yeʼl ixeʼ inqʼa ipaʼv Paʼp nikich itxhejaʼ.
8Yaʼne xeʼt Paʼp tiʼ taqʼax ichʼexel u yol tiʼ ikolt tibʼ. Tul ech tal Paʼp s-eche: —Yeʼl in nik inpaʼvin tiʼ teesal iqʼij inqʼa bʼekʼbʼal uvaʼ itzʼibʼa ka Moisees s-qe, oʼ inqʼa tij imam Israeel. Atz yeʼl u tostiuxh nik veesa iqʼij. Atz jitoq nik inpaʼvin vatz u mam iqʼesal tu Rooma, —xeʼt Paʼp.
9Aʼichetz isaʼ Feesto toksal iqʼij taʼn inqʼa tij imam Israeel, tul ech tal Feesto te Paʼp s-eche: —¿Maq laʼ asaʼa uvaʼ een laʼ bʼen vaqʼvat kuʼ yol tinuqul seʼe tu tenam Jerusaleen? —xeʼt Feesto te Paʼp.
10Yaʼne ech tal Paʼp s-eche: —Yeʼle. Kam koq saʼ bʼen inbʼan tu tenam Jerusaleen. Tan il in at ukuʼl in tu atibʼal tetz aqʼbʼal kuʼ yol tinuqul uvaʼ aqʼel tiqleʼm taʼn Seesar, u mam iqʼesal tu Rooma. Echetz antxh laʼ aqʼaxik kuʼ yol tinuqul s-viʼ tzitza. Tul antxh axh ootzaqin tetz s-bʼaʼn uvaʼ yeʼxhkam invaʼq nik vulbʼe inqʼa inmol s-tijaq imam Israeel. 11Pet oqetz at invaʼq inpaʼv uvaʼ tijxhtuʼ uvaʼ laʼ yatzʼax el in s-tiʼ, tul yeʼletz in laʼ xoʼv in tiʼ inkameʼl. Pet yeʼl ixeʼ u yol nik itxhejaʼ uvaʼ nik inxotxhox s-tiʼ, tul yeʼ laʼ utxhi laʼ oksal in tiqʼabʼ inqʼa inmol s-tijaq imam Israeel. Pet aʼ insaʼ uvaʼ, aʼ Seesar, u mam iqʼesal tu Rooma, laʼ aqʼon kuʼ u yol tinuqul s-viʼ, —xeʼt Paʼp te Feesto.
12Yaʼne iyol vet Feesto u yol tuchʼ inqʼa aqʼolaq itxumbʼal. Tul ech tal vet Feesto te Paʼp s-eche: —Aʼ qat ajaq abʼen vatz Seesar, u mam iqʼesal tu Rooma. Echetz aʼ toq intxhaqvat bʼen axh vatz Seesar, —xeʼt Feesto te Paʼp.{*}#25.12 Aʼich elnaʼq tuʼal Paʼp tu tenam Rooma, xaʼtetze aʼ ijaqvat Paʼp taqʼax kuʼ yol tinuqul s-tiʼ tzitzi. Pet eche uvaʼ jitich koq aʼ elnaʼq tuʼal Paʼp tu tenam Rooma, tul yeʼ laʼ utxhi laʼich tabʼi Paʼp taqʼax kuʼ yol tinuqul s-tiʼ tzitzi. Atz echiche tatin Jakoovo uvaʼ yatzʼax el taʼn Eroodes, tan jitich aʼ elnaʼq tuʼal Jakoovo tu tenam Rooma, xaʼtetze yeʼxhal tzaj itziʼ s-tiʼ. Tan yeʼlich tokebʼal Jakoovo uvaʼ laʼich aqʼax kuʼ yol tinuqul tiʼ Jakoovo tzitzi, ech uvaʼe nik tal tu uʼ Vibʼanoʼm inqʼa Apoostol 1.2.
Uvaʼs tiqʼol Paʼp vatz Agriipa, viqʼesal, atz vatz ixoq, u Vereniise
13Eletz vet inbʼiil s-qʼij, tul aqʼbʼ Agriipa, vaʼt viqʼesal, tuchʼ ixoq u Vereniise tiʼ isolil Feesto, atz tiʼ taqʼax bʼaʼnil ikʼuul Feesto tu tenam Sesareea. 14Atinetz vet Agriipa tinjolol qʼij tzitzi tuchʼ Vereniise, tul tal vet ok Feesto inqʼa yol tiʼ Paʼp te Agriipa. Tul ech tal Feesto s-eche: —Il naq val u vinaq at tzitza uvaʼ atichxh jaʼ t-tzeʼ taʼn naq u Feeliks. 15Pet exetz in tu tenam Jerusaleen, tul aqʼbʼ vet inqʼa iqʼesal oksan yol vatz quBʼaal Tiuxh sinvatz tuchʼ jolt inqʼa iqʼesal inqʼa tij imam Israeel. Tul aʼ motx ex tal s-ve uvaʼ laʼ inbʼekʼ iyatzʼax el naq tiʼ vipaʼv.
16Yaʼne ech motx val te inqʼa iqʼesal s-eche: «Yeʼle. Tan jit nal koq kuxh laʼ iyatzʼax el invaʼq xaol qaʼn, oʼ inqʼa aj Rooma, oq yeʼnaq txheoq ixeʼ vipaʼv; atzoq yeʼnaq ibʼaneʼt kʼula vatz tuchʼ inqʼa nik xotxhon. Pet laʼ nal qabʼi viyol naq tiʼ vikolt tibʼ vatz u yol,» xeʼt in. 17Yekichetz motx tzaj vet kaʼl inqʼa vinaq s-viʼ, tul ulaq vet oʼ tzitza tu tenam Sesareea. Echetz vet eqal, tul nal kuxh vul vet tu vabʼibʼal, tul inbʼekʼ vet tul naq u vinaq sinvatz. 18Txakpetz vet inqʼa nikich xotxhon naq u vinaq tiʼ iyoloneʼ, tul yeʼl invaʼq ipaʼv naq alaxi, eche uvaʼ nikich vitzʼa. 19Pet aʼ bʼak kuxh txhejk ipaʼv naq tiʼ u tuqʼeʼybʼal. Tan nikich tal naq jolol u yol tiʼ naq val u Jesuus uvaʼ kamnaʼql veteʼ. Tul aʼ nik tal naq uvaʼ itzʼeʼv Jesuus inpaqte. 20Poro yeʼichetz vootzaqle kame inqʼa laʼich vabʼi te naq tiʼ u tuqʼeʼybʼal. Echetz vabʼit vete te naq uvaʼ maq een laʼich aqʼaxik kuʼ u yol tinuqul tiʼ naq tu tenam Jerusaleen. 21Poro yeʼetz isaʼ naq, tan aʼ tal naq uvaʼ, aʼ u mam iqʼesal tu Rooma, laʼ aqʼon kuʼ u yol tinuqul tiʼ naq. Echetz inbʼekʼt ixeel naqe tu tzeʼ inpaqte. In naletz laʼ alon ibʼen naq vatz u mam iqʼesal t-Rooma, —xeʼt Feesto.{*}#25.21 Echiche u yol Seesar tuchʼ u yol Auguusto, tan ibʼijich iqleʼm, jankʼal eche nik qalt presideente tiʼ u mam iqʼesal u qutenam; pet jit uvaʼ ibʼijich koq invaʼq xaol.
22Yaʼne ech tal Agriipa te Feesto s-eche: —Poro nik insaʼeʼ laʼ vabʼi viyol naq u vinaq uvaʼ nik aaleʼ, —xeʼt Agriipa.
Tul ech tal Feesto s-eche: —Ape. Qaloq aabʼi iyol naq bʼa, —xeʼt Feesto.
23Echetz vet eqal, tul mam yol taqʼbʼ vet Agriipa tuchʼ Vereniise. Tul bʼen vet ok tu abʼibʼal tuchʼ mamala txhaq iqʼesal sol, atz tuchʼ inqʼa iqʼesal u tenam. Yaʼne ibʼekʼ vet Feesto tiqʼol Paʼp.
24Tul ech tal Feesto s-eche: —Axh nimla vatz quqʼesal Agriipa, tuchʼ jankʼal ex, inqʼa at ex s-txheel s-qukʼatza, iletz naq u vinaq ila, uvaʼ mamala tijaq imam Israeel, inqʼa tu tenam Jerusaleen, atz inqʼa at tzitza tu tenam Sesareea, inqʼa sichʼiʼmxh nik motx ibʼan s-ve tiʼ tabʼil ikameʼl naq. 25Poro yeʼl ipaʼv naq nik itxhej sinvatz uvaʼ laʼ quyatzʼeʼl naq s-tiʼ. Tul antxh naq jaqon s-ve uvaʼ, aʼ u mam iqʼesal tu Rooma laʼ aqʼon kuʼ yol tinuqul tiʼ naq. Echetz toq vaqʼt opoon naqe vatz u mam quqʼesal uvaʼ tu Rooma. 26Poro yeʼ nik itxhej inyol tiʼ intzʼibʼat opoon u yol te naq u mam quqʼesal tu Rooma. Echetz qat viqʼot tzaan naqe sevatz, atz savatz, axh mam quqʼesal Agriipa, tiʼ uvaʼ laʼ aabʼi inuqul te naq. Atetz vet inyol laʼ ibʼana, yaʼne laʼ intzʼibʼa u yol. 27Tan yeʼ laʼ utxhi uvaʼ laʼ kuxh intxhaq bʼen invaʼq pereexho xeʼ naq u mam quqʼesal oq uvaʼ yeʼ laʼ val bʼen inuqul kam s-tiʼil nik xotxhlik naq, —xeʼt Feesto te Agriipa, atz te inqʼa iqʼesal.
ទើបបានជ្រើសរើសហើយ៖
Vibʼanoʼm inqʼa Apoostol 25: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
