Vibʼanoʼm inqʼa Apoostol 24
24
Uvaʼs iyolon Paʼp vatz Feeliks tiʼ ikolt tibʼ
1Oʼvaʼlichetz vet qʼij taqʼbʼ Paʼp tu tenam Sesareea, tul aqʼbʼ vet Ananiias, u mam iqʼesal inqʼa oksan yol vatz Tiuxh tuchʼ jolt inqʼa iqʼesal tijaq imam Israeel. Atz aqʼbʼat val u vinaq uvaʼ Teertuloich ibʼij, oksanich yol, tul telabʼalichxh ibʼen tiʼ yol. Ayaʼletz inqʼae motx aqʼbʼ vet vatz Feeliks tiʼ ixotxhox Paʼp.
2Yaʼne ex eloq vet Paʼp. Tul xeʼt vet Teertulo tiʼ ixotxhox Paʼp te Feeliks. Tul ech tal Teertulo s-eche: —Taʼntiuxh see, quqʼesal Feeliks uvaʼ yeʼl lako ibʼ nik tutxh aaʼn. Atz taʼntiuxh te vatxumbʼal uvaʼ nimax bʼaʼnil qil ibʼanax tuulbʼal u qutenam aaʼn. 3Nimla vatz vinaq Feeliks, ayaʼl kuxh qukʼuul laʼ qukʼul axh s-quxoʼl kamxh qʼiilil, atz ayaʼl qukʼuul laʼ qukʼul axh kʼuxh talxh tenam laʼ aqʼbʼik axh. Tul ayaʼl qaanima nik qaqʼ taʼntiuxh see tiʼ vabʼaʼnil.
4Yeʼletz axh laʼ qubʼal axh, pet laʼ koq abʼan bʼaʼnil. Tul laʼ aabʼi kaʼl vatz quyol uvaʼ txhʼoj kuxh tuul, tan yeʼl txhʼoj yeʼl nim savatz. 5Pet toq val see uvaʼ paxsan tetz yaabʼla yol kuxh naq u Paʼp. Tan aʼ nik iyakʼinsa Paʼp val u palsa yolil, tiʼ uvaʼ yeʼ laʼ nimal u qubʼekʼbʼal, oʼ inqʼa tij imam Israeel kʼuxh tzitza, atz kʼuxh s-naatxh uvaʼ nik tal Paʼp. Tul aʼ Paʼp iqʼon iviʼ xoʼl inqʼa xaol inqʼa nik niman val u txhulimla uqʼeʼybʼal, uvaʼ ‹tuqʼeʼybʼal aj Nasareet,› chich eʼli. 6Tul aʼ titzʼabʼal Paʼp teesal iqʼij u qutostiuxh. Pet qutxey vet Paʼp. Tul kol qaqʼ vet kuʼ yol tinuqul tiʼ Paʼp, uvaʼ qala, tiʼ kam uvaʼ nik tal u qubʼekʼbʼal. 7[Pet aʼe tan, aʼ naq u mam iqʼesal sol, u Liisias, ex maon el Paʼp t-quqʼabʼ tuchʼ mam yakʼil.] 8Iletz oʼ qat txhaqax tzaan oʼ taʼn Liisias tiʼ ul quxotxht Paʼp savatz.
Antetzxh vet axh toq txhʼotin inuqul te Paʼp jankʼal inqʼa yol inqʼa nik quxotxh Paʼp s-tiʼ. Aʼetz vet axh toq ilon nuq kolxh uvaʼ nik qaleʼ. Atz aʼetz toq tzajk vet tatziʼ kam toq aaleʼ, —xeʼt Teertulo.
9Jankʼaletzxh u yol uvaʼ tal Teertulo, tul: —Echxhte uvaʼ nik tal naq, —xeʼt itzʼeqsat inqʼa iqʼon iviʼ tiʼ u yol uvaʼ tal Teertulo.
10Yaʼne ibʼan vet Feeliks, iqʼabʼ vatz Paʼp uvaʼ laʼich yolon Paʼp. Tul ech tal Paʼp s-eche: —Vootzaqle uvaʼ naʼy tzaan avok s-aqʼol kuʼ yol tinuqul tu tenam uvaʼa. Echetz ayaʼlxh inkʼuul toq val inuqul inqʼa yol see tiʼ inkolt vibʼ. 11Tul yek toq bʼenoqe see uvaʼ yaʼnxh kabʼlavax qʼij s-txheel vopoon tu tenam Jerusaleen tiʼ inatxhkʼuulal Tiuxh. 12Tan yeʼxhabʼil xaol inyaj vibʼ s-tuchʼ. Atz yeʼl xaol nik inlakeʼ. Atz jitoq tuulbʼal u tostiuxh, atz jitoq tuul tal uvaʼ nik ikʼulvat tibʼ inqʼa tij imam Israeel. Tul yeʼl tenam nik inlak tu tenam Jerusaleen. 13Echetz yeʼl paqul laʼ txhej ixeʼ inqʼa yol uvaʼ nik ixotxh in txhaqnaq s-tiʼ. 14Bʼantan aʼetz nik innima qʼaoq, u Bʼey Tetz Jesuus. Aʼ uvaʼe ‹txhulim uqʼeʼybʼal,› chich txhaqnaq s-tiʼ. Pet aʼ u quBʼaal Tiuxh nik innima uvaʼ nikich inima inqʼa kʼuy inmam. Tul aʼ nik innima kam uvaʼ nik tal inqʼa bʼekʼbʼal, atz kam uvaʼ tzʼibʼamal ka taʼn inqʼa qʼexsanich tetz viyol quBʼaal Tiuxh. 15Tul nik innima inqʼa yol uvaʼ tetxhal laʼ itzʼeʼv inqʼa kamnaʼq inpaqte taʼn quBʼaal Tiuxh, eche uvaʼ nik motx inima txhaqnaq. Tan tetxhal kuxh laʼ itzʼeʼv inqʼa laʼ niman quBʼaal Tiuxh, atz kʼuxh inqʼa yeʼ laʼ niman quBʼaal Tiuxh. 16Echetz s-tiʼile nik inbʼan yaʼl, tiʼ uvaʼ jikxh u vitzʼabʼal laʼ inbʼan vatz quBʼaal Tiuxh, atz vatz inqʼa xaol. Yeʼxhabʼiletz laʼ txhej iyol s-viʼ tiʼ inbʼant invaʼq paʼv.
17Nimalichetz vet yaʼbʼ vel tzaan tu tenam Jerusaleen, yaʼne qʼaʼv vet in inpaqte tiʼ taqʼax inbʼiil oya te inqʼa meebʼaʼ, atz tiʼat vaqʼt oya vatz quBʼaal Tiuxh. 18Atichetz vet in tzitzi tiʼ vaqʼt vinoya, tul sebʼtich in tiʼ inimal u txʼajo ibʼ vatz Tiuxh tuulbʼal u tostiuxh. Tul til in jolol inqʼa inmol s-tijaq imam Israeel, inqʼa jeqlich tuulbʼal Aasia. Tul jitoq atich mam xaol sinkʼatza, atz jitoq nikich inlak xaol. 19Aʼetz koq inqʼa ilon in qat ul savatz tiʼ ixotxht in oq kam vaʼq inpaʼv s-vatz. 20Pet antxh txhaqnaq inqʼae alon oq kam inpaʼv txheji uvaʼs vok vatz txhaqnaq inqʼa aqʼol kuʼ yol tinuqul tu tenam Jerusaleen. 21Pet maq aʼ kuxh inpaʼv vatz txhaqnaq, tiʼ uvaʼ vaqʼ jaʼ tiʼ inqul, tul ech val xoʼl txhaqnaq s-eche: «Tiʼ kuxh vinqejt u titzʼeʼv inqʼa kamnaʼq inpaqte, tul nik emol etibʼ tiʼ taqʼax kuʼ yol tinuqul s-viʼ,» xeʼt in, —xeʼt Paʼp te Feeliks.
22Tabʼietz vet Feeliks inqʼa yol uvaʼ tal Paʼp, tul yekich itanbʼa vet ka Feeliks u yol. Tan ootzaqimalich vet u Bʼey Tetz Jesuus taʼn Feeliks. Tul ech tal Feeliks s-eche: —Laʼ naletz ul Liisias, u mam iqʼesal sol uvaʼ een tu tenam Jerusaleen, yaʼne laʼ intzoqpisa taqʼax kuʼ inqʼa yol tinuqul seʼe, —xeʼt Feeliks.
23Yaʼne ibʼekʼ vet Feeliks vaʼl qʼesal sol, tiʼ uvaʼ laʼich kuxh xeel Paʼp. Tul yeʼl Paʼp laʼich jaʼ t-tzeʼ. Atz yeʼlich laʼ maqax inqʼa xaol uvaʼ laʼich aqʼbʼ tiʼ isolil, atz tiʼ ikʼuulal Paʼp.
24Eletz kuxh inbʼiil s-qʼij, tul imolich tibʼ Feeliks tuchʼ tixqel, uvaʼ Drusiilaich ibʼij, u tijich imam Israeel. Yaʼne ibʼekʼ Feeliks tul Paʼp s-vatz inpaqte. Tul tabʼi vet Feeliks u yol uvaʼ nikich tal Paʼp tiʼ vinimat inqʼa xaol JesuKriisto. 25Tul motx tal Paʼp inqʼa yol te Feeliks tiʼ kam nik tulbʼe quBʼaal Tiuxh ibʼen inqʼa xaol s-jik, atz, tiʼ uvaʼ laʼ imaq tibʼ inqʼa xaol tiʼ ibʼanax u paʼv, atz, tiʼ uvaʼ tetxhal laʼ opoon val u qʼij uvaʼ laʼ taqʼ kuʼ quBʼaal Tiuxh yol tinuqul tiʼ inqʼa xaol tiʼ inqʼa ipaʼv. Tul yekich samun vet Feeliks.
Tul ech tal vet Feeliks s-eche: —¡Bʼaʼnixy veteʼe! ¡Quxh vet el! Pet jatu laʼ isaʼ tokeʼ, tul insaʼen txhan ukuʼl axh inpaqte. Pet atoq kuxh axh tzi, —xeʼt vet Feeliks.
26Poro atich vaʼt titzʼabʼal Feeliks tiʼ Paʼp, tan aʼ nikich itxʼebʼ Feeliks taqʼt Paʼp puaq tiʼ itxhaqpeʼl. Tan jatpaqul kuxh nikich isaʼax Paʼp taʼn Feeliks tiʼ tul s-vatz.
27Tul yeʼl Paʼp itxhaqpu ka Feeliks, tan aʼich isaʼ Feeliks toksal iqʼij taʼn inqʼa tij imam Israeel. Paletz vet kaʼvaʼl yaʼbʼ itxeyp Paʼp, yaʼne jalp vet Feeliks. Tul aʼ vet Poorsio Feesto ok sivatzil Feeliks.
ទើបបានជ្រើសរើសហើយ៖
Vibʼanoʼm inqʼa Apoostol 24: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
