Vibʼanoʼm inqʼa Apoostol 22
22
Uvaʼs iyolon Paʼp xoʼl u tenam tiʼ ikolt tibʼ, atz tal Paʼp kam ibʼan quBʼaal Jesuus te Paʼp uvaʼs aʼlich ibʼen Paʼp tu tenam Damaasko
1—Jankʼal ex qumol s-tijaq imam Israeel tuchʼ ex inqʼa iqʼesal u qutenam, abʼitaq vinyol uvaʼ toq val inuqul sexoʼl tiʼ inkolt vibʼ vatz inqʼa yol uvaʼ nik talax s-viʼ, —xeʼt Paʼp.
2Tabʼietz vet inqʼa xaol iyolon Paʼp tu yolbʼal evreeo, tul aʼlatxh iyaʼ vet iyolon inqʼa xaol. Tan ech tal Paʼp s-xoʼl s-eche: 3—Nik val inuqul sete uvaʼ in tij imam Israeel. Tul een alamal in tu tenam Taarso uvaʼ at tuulbʼal Siliisia. Poro aʼ chʼijnaʼq in tzitza tu tenam Jerusaleen. Tul tira aʼ chʼijk in kʼatz Gamalieel tiʼ itxhusux inqʼa bʼekʼbʼal uvaʼ itzʼibʼa ka Moisees. Tul tira txhabʼamal vaʼn, atz ech nikich inbʼan tiʼ innimataʼ, eche nikich ibʼan inqʼa kʼuy qumam tiʼ inimal u quBʼaal Tiuxh. Tul tira atich vaanima tiʼ inimal u quBʼaal Tiuxh, eche uvaʼ nik motx ebʼan s-txheel.#Vibʼanoʼm inqʼa Apoostol 5.34-39
4Jitetz kuxh taʼn nikich innimae, pet motx vojqeʼla inqʼa niman tetz Jesuus, tetxhal ikameʼ, inqʼa nikich tok bʼen tiʼ u ‹Bʼey Tetz Jesuus,› chich eʼli. Tul nikich motx intxeyeʼ, kʼuxh ixoq, atz kʼuxh vinaq. Tul tetxhal nikich vaqʼ jaʼ t-tzeʼ. 5Tul tootzaq u mam iqʼesal oksan yol vatz Tiuxh inqʼa nikich inbʼaneʼ. Atz tootzaq jolt inqʼa iqʼesal xoʼl u tenam, inqʼa at tzitza. Tan taqʼaq bʼen jolol uʼ s-viʼ, tiʼ uvaʼ laʼich bʼen inkʼaxbʼisa inqʼa niman tetz Jesuus. Yaʼne bʼen vet in tu tenam Damaasko, aʼetz kʼaqich vaʼn itxeyp tzaan inqʼa niman tetz Jesuus uvaʼ vala. Tul qitzel laʼich viqʼotaq tzaan. Tul laʼich ul kʼaxbʼisaloq tzitza tu tenam Jerusaleen uvaʼ nikich valeʼ.#Vibʼanoʼm inqʼa Apoostol 8.3
6Pet echetz ibʼan s-eche: Atich ok in tiʼ bʼey, tul bʼiitich kuxh vaqʼbʼ tu tenam Damaasko. Kamal aʼxh itxhaqʼaan vet qʼij. Tul ajtxh vil insutil taʼn val u xamal uvaʼ litzʼel ikuʼl t-amlikaʼ sinkʼatza. 7Tul joqel inkuʼ t-txʼavaʼ. Yaʼne vabʼi val u qul uvaʼ ech tal s-ve s-eche: «¡Saaulo, Saaulo, kam s-tiʼil nik ojqeʼla in!» xeʼt s-ve.
8Yaʼne ech val s-eche: «¿Jaʼletz axhe, inbʼaal?» xeʼt in.
Tul ech tal s-ve s-eche: «Ine u Jesuus, u aj Nasareet, uvaʼ nik oojqeʼla in,» xeʼt s-ve. 9Tul ant inqʼa vinaq ilon u xamal, inqʼa txhʼuyich s-viʼ. Tul samunyichaqxh veteʼ. Poro yeʼ motx bʼen s-te jaʼl uvaʼ yolon tzaan s-ve. Tul nuqxh uvaʼ nik valeʼ.
10Echetz val vet s-eche: «¿Kametz toq inbʼaneʼ bʼa, inbʼaal?» xeʼt vet in.
Tul ech tal quBʼaal Jesuus s-ve s-eche: «Txakeʼven, tul quxhoʼk tu tenam Damaasko. Tul een toq altxhik see tzitzi s-kaqaayil kam uvaʼ toq abʼaneʼ,» xeʼt s-ve. 11Poro yekich tzott in taʼn ilitzʼkabʼin u xamal. Tul txhʼiqimich vet vok tu tenam Damaasko taʼn inqʼa inmol, inqʼa txhʼuyich s-viʼ.
12Atichetz kuxh vet in tu tenam Damaasko, tul ex til vet in val u vinaq uvaʼ Ananiiasich ibʼij. Tul aʼxh nikich inima Ananiias inqʼa bʼekʼbʼal uvaʼ itzʼibʼa ka Moisees. Atz bʼaʼnich iyol jankʼal inqʼa qumol s-tijaq imam Israeel tu tenam Damaasko tiʼ Ananiias. 13Exetz til vet in Ananiias, tul ech tal vet Ananiias s-ve s-eche: «Txa Saaulo, txheelaʼ toq saqinoq vet axh inpaqte,» xeʼt Ananiias s-ve. Taʼnetz kuxh tal Ananiias u yol s-ve, tul yekich ilon vet inqʼa bʼaqʼ invatz. Tul vil vet Ananiias.
14Yaʼne ech tal Ananiias s-ve s-eche: «Aʼ u quBʼaal Tiuxh, uvaʼ nikich inatxhkʼuula inqʼa kʼuy qumam qat chʼexon axh. Tul toq taqʼ ootzaqi kam uvaʼ nik isaʼeʼ laʼ abʼana. Echetz laʼ eelte u quBʼaal Jesuus, u Jikla Vinaq, tul laʼ aabʼi inqʼa yol uvaʼ laʼ tal see.{*}#22.14 Aʼ nikich iyolbʼe inqʼa tij imam Israeel val u yol ‹Jikla Vinaq› tiʼ u Mesiias uvaʼ yaʼn laʼich uli. Tan jikxh laʼich ul taqʼt kuʼ u Mesiias inqʼa yol tinuqul nikich tal inqʼa tij imam Israeel. Tul echat kuxh u yole tal Luʼ, tan ‹u Jikla Vinaq,› xeʼte, eche uvaʼ nik tal tu uʼ Vibʼanoʼm inqʼa Apoostol 3.14. 15Tan aʼ vet axh toq aqʼon ootzaqiloq viyol Jesuus xoʼl inqʼa tenam s-kaqaayil, kam uvaʼ qat eela, atz kam uvaʼ qat aabʼi. 16Kametz koq vet saʼ atxʼebʼa, pet jaq akuya s-te tiʼ inqʼa apaʼv. Tul nal akuʼ vet xeʼ aʼ,» xeʼt Ananiias s-ve.
Uvaʼs talt Paʼp keʼch itxhaqax Paʼp xoʼl inqʼa jit tij imam Israeel
17Xamteletz veteʼ, tul qʼaʼv vet tzaan in tu tenam Damaasko, tul ul vet in tzitza t-Jerusaleen. Tul bʼen vet in tiʼ inatxhax Tiuxh tu nimla atibʼal tuulbʼal u tostiuxh. Tul innatxh vet val u chiibʼichil t-vaanima tiʼ inatxhax Tiuxh. Tul vil vet val uvaʼ ikʼutxh quBʼaal Tiuxh s-ve. 18Tul vila uvaʼ ech nikich tal quBʼaal Jesuus s-ve s-eche: «¡Nal kuxh axh! Elen el tzitza tu tenam Jerusaleen. Tan laʼ koq motx inima inqʼa xaol inqʼa yol uvaʼ toq motx aal s-te s-viʼ,» xeʼt s-ve.
19Yaʼne ech val s-eche: «InBʼaal, poro ootzaqimal vet in, uvaʼ nikich vex t-junun inqʼa kʼulbʼal ibʼ tiʼ itzʼuʼmal inqʼa xaol, inqʼa niman eetz. Tul nikich motx vaqʼ jaʼ t-tzeʼ. 20Kʼuxh uvaʼs iyatzʼax el Ixh uvaʼ, aʼ inqʼa yol nikich taqʼ ootzaqiloq seʼe, tan antich in tiʼ talax iyatzʼax el Ixh. Tul aʼ in xeen ka toksaʼm inqʼa motx yatzʼon el Ixh,» xeʼt in.#Vibʼanoʼm inqʼa Apoostol 7.58
21Yaʼne ech tal quBʼaal Jesuus s-ve s-eche: «Quuxh, tan in toq txhaqon bʼen axh s-txheel xoʼl inqʼa xaol, inqʼa jit tij imam Israeel, inqʼa naatxhen atila,» xeʼt s-ve, —xeʼt Paʼp xoʼl u tenam.
Uvaʼs tiqʼol vet ok Paʼp xoʼl inqʼa sol
22Ajtetz tabʼi vet inqʼa xaol tok tzaan inqʼa jit tij imam Israeel tuul u yol, tul yeʼ motx itxʼol vet tabʼit jolt yol laʼich tal Paʼp. Tan aʼlatxh motx ixeʼt vet sichʼin. Tul ech motx tal vet tiʼ Paʼp s-eche: —¡Yeʼ qusaʼ laʼ qil vet ivatz naq uvaʼe! ¡Kamoq el naq! —xeʼt isichʼin u tenam.
23Nikichetz motx iqʼeqʼun u tenam, tul nikich kuxh motx ikʼoni jaʼ inqʼa toksaʼm. Atz nikich motx imakʼ jaʼ poqoq t-amlikaʼ t-kʼaʼnal.
24Yaʼne ibʼekʼ vet u mam iqʼesal sol tiqʼol ok Paʼp tu tatibʼal inqʼa sol. Tul ibʼekʼ vet tok itzʼuʼmal Paʼp tiʼ ijotxhʼil itziʼ Paʼp tiʼ tootzaqileʼ kam s-tiʼil nikich motx isichʼin u tenam tiʼ Paʼp.
25Yaʼne qitzix vet Paʼp taʼn inqʼa sol tiʼ itzʼuʼmaleʼ. Tul ech tal Paʼp te vaʼl viqʼesal sol, uvaʼ atich Paʼp s-vatz, s-eche: —¿Maqetz laʼ utxh iqʼosox invaʼq u aj Rooma uvaʼ yeʼnaq ootzaqimal kam ixeʼ vipaʼv? —xeʼt Paʼp.
26Taʼnetzxh tabʼi vet viqʼesal sol u yol uvaʼ tal Paʼp, tul nal kuxh ex tal te u mam iqʼesal sol. Tul ech ex tal s-eche: —¿Kam toq abʼaneʼ? Tan aj tenam Rooma bʼak naq uvaʼe, —xeʼte.
27Yaʼne bʼen vet ok u mam iqʼesal sol kʼatz Paʼp. Tul ech tal te Paʼp s-eche: —Al inuqul s-ve: ¿Axh kolxh aj tenam Rooma? —xeʼte.
Yaʼne ech tal Paʼp s-eche: —Ee. Nuqxhtuʼ. In aj tenam Rooma, —xeʼt Paʼp.
28Tul ech tal u mam iqʼesal sol s-eche: —Inatetz aj tenam Rooma. Poro elom koq puaq intxhojvat, —xeʼte.
Yaʼne ech tal Paʼp s-eche: —Ape, axhe bʼa. Pet koq in, tan in aj Rooma s-valaleʼ. Aʼ alamal in t-invaʼl tenam uvaʼ atoʼk jaqʼ iqʼabʼ Rooma, —xeʼt Paʼp.
29Tul yekich kuxh motx ijetxh vet el tibʼ inqʼa sol, inqʼa saʼich tzʼuʼman Paʼp. Atz kʼuxh u mam iqʼesal sol, tan yekich xoʼv veteʼ. Tan tabʼi veteʼ uvaʼ aj Roomaich Paʼp. Tul maʼtich ibʼekʼt iqitzix Paʼp.
Uvaʼs toksal Paʼp vatz inqʼa iqʼesal u tenam
30Echetz vet eqal, tul ibʼekʼ vet u mam iqʼesal sol ichitix vet el u kadeena tiʼ Paʼp. Tul imol vet u mam iqʼesal sol inqʼa iqʼesal tuqʼeʼybʼal u tenam tuchʼ jolt inqʼa aqʼol kuʼ yol tinuqul. Tan nikich isaʼ u mam iqʼesal sol tootzaqileʼ uvaʼ kam s-tiʼil nikich imolvat tibʼ inqʼa tij imam Israeel tiʼ Paʼp. Yaʼne iqʼol vet eluʼl Paʼp. Tul ex oksaloq vet Paʼp vatz jankʼal inqʼa iqʼesal oksan yol vatz Tiuxh tuchʼ inqʼa aqʼolaq kuʼ yol tinuqul.
ទើបបានជ្រើសរើសហើយ៖
Vibʼanoʼm inqʼa Apoostol 22: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
