Vibʼanoʼm inqʼa Apoostol 21
21
Uvaʼs taqʼbʼ vet Paʼp tu tenam Sesareea, tul ex iqʼexsa Agaavo viyol quBʼaal Tiuxh tiʼ kam uvaʼ saʼich palk Paʼp tu tenam Jerusaleen
1Qujatxetz vet qibʼ tuchʼ inqʼa iqʼonaq iviʼ, tul ok vet bʼen oʼ tuul vaarko viʼ maar. Tul aqʼbʼal el vet bʼen oʼ. Tul ech qubʼen titziʼ val u txʼavaʼ uvaʼ Koos ibʼij, uvaʼ at okaʼp tuul u maar. Echetz vet eqal, tul bʼen vet oʼ tu txʼavaʼ Roodas, uvaʼ at okaʼp tuul u maar. Eletz vet bʼen oʼ t-Roodas, tul yekich vet oʼ tu tenam Paatara. 2Atichetz vet oʼ tu tenam Paatara, yaʼne qutxhok vaʼt u vaarko uvaʼ aʼlich ibʼen tuulbʼal Feniisia. Oketz vet bʼen oʼ tu vaarko, tul bʼen vet oʼ. 3Tul ech qupal vet txala u txʼavaʼ Chiipre, uvaʼ at okaʼp tuul u maar, een t-qumax uvaʼ aʼl qubʼen tuulbʼal Siiria. Yaʼne opoon vet oʼ tu tenam Tiiro tuulbʼal Feniisia, tan tzitzi laʼich elk tiqatz u vaarko.
4Kuʼetz kuxh vet ul oʼ tu vaarko, tul ex qukʼul vet qibʼ tuchʼ inqʼa qumol s-niman tetz Jesuus tu tenam Tiiro. Tul juqvaʼl qʼij atin oʼ tzitzi. Tul tal vet viTiuxhil Tiuxh te inqʼa niman tetz Jesuus uvaʼ yeʼl Paʼp laʼich bʼen jaʼ tu tenam Jerusaleen. 5Eletz vet juqvaʼl qʼij qatin tu tenam Tiiro, tul bʼen vet oʼ. Poro ex iqʼexsa ka oʼ inqʼa qumol s-niman tetz Jesuus tuchʼaq tixqel, atz tuchʼaq initxaʼa tiʼeʼl u tenam. Tul qajeʼv vet oʼ viʼ inqʼa musan tziʼ maar. Tul qunatxh vet Tiuxh s-qukaqaayil.
6Yaʼne motx qujele vet qibʼ s-quvatzaq tiʼ qujatxt qibʼ. Tul bʼen vet jaʼ oʼ tuul u vaarko. Pet inqʼa qumol s-niman tetz Jesuus, tan qʼaʼvaq vet t-totzotz. 7Eletz vet bʼen oʼ tu tenam Tiiro, tul opoon vet oʼ tu tenam Tolemaaida tal uvaʼ yaʼk vet quxaon viʼ maar. Echetz pal qusolite inqʼa niman tetz Jesuus. Tul atin vet oʼ tuulbʼal invaʼl qʼij tu tenam Tolemaaida.
8Echetz vet eqal, tul el vet bʼen oʼ tu tenam Tolemaaida, tul aqʼbʼ vet oʼ tu tenam Sesareea. Tul yekich vet oʼ t-totzotz Piʼl uvaʼ atich ok s-tatxhul juqvaʼl inqʼa chʼexex taʼn inqʼa apoostol, Piʼl uvaʼ nikich alon viyolbʼal quBʼaal Tiuxh tiʼ Jesuus. Tul tzitzi vatk vet oʼ xeʼ Piʼl.#Vibʼanoʼm inqʼa Apoostol 6.5; 8.5 9Atichetz kajvaʼl imeʼal Piʼl, inqʼa aʼxh yeʼxnaqich tzaqʼbʼen invaʼq vinaq. Tul qʼexsanich tetz iyol quBʼaal Tiuxh inqʼa ixvaak inqʼae.
10Atinetz vet oʼ kaʼoxvaʼl qʼij t-totzotz Piʼl, tul kuʼl vet val u qʼexsan tetz viyol quBʼaal Tiuxh uvaʼ Agaavoich ibʼij, een tzajnaʼqich t-Judeea. Poro aʼ viTiuxhil Tiuxh txhaqon.#Vibʼanoʼm inqʼa Apoostol 11.28 11Yaʼne ijetxh vet ok tibʼ Agaavo s-qukʼatza, tul itxey tzaan Agaavo u qitzbʼal xeʼ tuul Paʼp. Tul iqitz Agaavo toq tuchʼ iqʼabʼ tuchʼ u qitzbʼal. Tul ech tal Agaavo s-eche: —Ech nik tal viTiuxhil Tiuxh s-eche: «U vinaq, u aj etz u qitzbʼal, tan ech toq iqitzix s-eche, taʼn inqʼa iqʼesal inqʼa tij imam Israeel tu tenam Jerusaleen. Tan antxh inqʼa iqʼesal toq oksan u vinaq tiqʼabʼ inqʼa jit tij imam Israeel,» chich viTiuxhil Tiuxh, —xeʼt Agaavo tiʼ Paʼp.
12Qabʼietz vet u yol tuchʼ inqʼa aj tenam Sesareea uvaʼ tal Agaavo tiʼ Paʼp, tul jatpaqul qal vet te Paʼp uvaʼ yeʼl koq Paʼp laʼich bʼen jaʼ tu tenam Jerusaleen.
13Yaʼne ech tal Paʼp s-eche: —Yeʼ kuxh oqʼ ex s-viʼ, tan nik etxumunsa in. Pet kʼuxh toq qitzpoq in, atz kʼuxh tira toq yatzʼaxoq el in tu tenam Jerusaleen, tan kʼayimal vet vibʼ kʼuxh kamxh kʼaxbʼichil bʼen inkʼul tiʼ inbʼant u taqʼon quBʼaal Jesuus, —xeʼt Paʼp.
14Poro yeʼxh oʼ oleʼv oʼ tiʼ iyaʼsal vatz Paʼp. Pet qutzaqʼbʼe kuxh veteʼ. Tul ech qal vet te Paʼp s-eche: —Koʼ bʼa. Tul quBʼaal Jesuus laʼ bʼanon kam uvaʼ itzʼamal seʼe taʼn, —xeʼt vet oʼ te Paʼp.
15Paletz vet paʼl jolol qʼij, tul motx qubʼan vet qutxheʼ. Tul el vet bʼen oʼ t-qoq tu tenam Sesareea, tul ok vet bʼen oʼ tiʼ u bʼey uvaʼ yek tu tenam Jerusaleen. 16Tul aʼich qumol kaʼl inqʼa niman tetz Jesuus, inqʼa tzajnaʼqich tu tenam Sesareea. Tul Mnasoonich ibʼij vaʼl inqʼa txhʼuyich s-qiʼ. Aʼetz vet yekich oʼ t-totzotz Mnasoon, val u aj Chiipre uvaʼ jeqlich tu tenam Jerusaleen. Tul naʼynaqich vet tok Mnasoon s-niman tetz Jesuus. Tan aʼ tok Mnasoon uvaʼs nikich ipaxsal inqʼa bʼaʼnla txhaq yol tiʼ Jesuus s-bʼaxa.
Uvaʼs itxeyp Paʼp tu nimla atibʼal tuulbʼal u tostiuxh tu tenam Jerusaleen
17Aqʼbʼetz vet oʼ tu tenam Jerusaleen, tul chiibʼiyichxh inqʼa qumol s-niman tetz Jesuus tiʼ qukʼuluxeʼ. 18Echetz vet s-eqal, tul bʼen vet oʼ tuchʼ Paʼp tiʼ isolil Jakoovo, u iqʼon iviʼ xoʼl inqʼa niman tetz Jesuus. Tul kʼulelich vet tibʼ inqʼa iqʼon iviʼ xoʼl inqʼa niman tetz Jesuus t-totzotz Jakoovo uvaʼs qaqʼbʼeʼ. 19Tul motx qaqʼ vet bʼaʼnil ikʼuul inqʼa iqʼon iviʼ. Tul junun talt vet Paʼp kam uvaʼ motx ibʼan quBʼaal Tiuxh xoʼl inqʼa jit tij imam Israeel tuulbʼal uvaʼs ex ipaxsat Paʼp viyolbʼal quBʼaal Tiuxh tiʼ Jesuus. 20Tabʼietz vet inqʼa iqʼon iviʼ u yol uvaʼ tal Paʼp, tul toksaaq vet iqʼij quBʼaal Tiuxh s-tiʼ.
Yaʼne tal vet te Paʼp kam uvaʼ nikich motx tutxh s-xoʼl tu tenam Jerusaleen. Tul ech motx tal te Paʼp s-eche: —Txa qumol s-niman tetz Jesuus, ile nik eeleʼ uvaʼ tiʼ mil (1,000) qat tok vet inqʼa qumol, inqʼa tij imam Israeel s-niman tetz Jesuus s-quxoʼl. Tul tira aʼ txabʼamal tokaq tiviʼ inimal inqʼa bʼekʼbʼal uvaʼ itzʼibʼa ka Moisees. 21Pet qatetz motx tabʼi seʼe uvaʼ, aʼ nik atxhus uvaʼ laʼ motx itanbʼa inqʼa tij imam Israeel inimal inqʼa bʼekʼbʼal. Aʼ inqʼa tij imam Israeel, inqʼa yaʼnaq kuxh tok tiʼ inimal Jesuus, inqʼa at xoʼl inqʼa jit tij imam Israeel. Tul aʼ nik motx atxhus paqte s-te uvaʼ yeʼ laʼ motx iqol vet el inbʼiil te vitxhiʼoʼl inqʼa ikʼaol. Atz yeʼat laʼ motx iqej inqʼa quqejoʼm, oʼ inqʼa tij imam Israeel. ¡Echetz kolxhte inqʼa yol! 22Tul ¿kamebʼ toq yaʼk vet oʼ savuchʼ? Tan kamal toq motx imol tibʼ jankʼal inqʼa qumol s-tijaq imam Israeel seʼe s-txheel. Tan qat tabʼil veteʼ uvaʼ uy vet axh tzitza.
23Pet aʼ toq abʼan kam uvaʼ toq qal see tiʼ ikʼutxhuxeʼ uvaʼ nik anima inqʼa bʼekʼbʼal. Tan il kajvaʼl inqʼa vinaq at s-quxoʼl uvaʼ qat tal vaʼl iyol vatz Tiuxh. Tul ile toq motx inima s-txheel vatz Tiuxh. 24Iqʼoaqetz seʼe, tul nimavaq u bʼekʼbʼal tetz u txʼajo ibʼ vatz Tiuxh uvaʼ itzʼibʼa ka Moisees. Laʼetz tzoqp vet viyol inqʼa vinaq uvaʼ alel vet taʼn, tul aʼ, axh laʼ txhoon vet jankʼal vijaʼmil inqʼa oya uvaʼ laʼ tzʼeʼsal vatz Tiuxh tiʼ vitʼoril el inqʼa xeʼaq iviʼ tiʼ ikʼutxhtaʼ uvaʼ qat motx oleʼvy vet tiʼ itzoqpisal viyol uvaʼ alel taʼn vatz Tiuxh. Echetz toq ibʼene te jankʼal inqʼa xaol tu tostiuxh uvaʼ tzʼeqo tzij kuxh inqʼa yol uvaʼ nik talax seʼe, tiʼ uvaʼ yeʼ nik anima inqʼa bʼekʼbʼal. Echetz toq motx tilte uvaʼ antxh txhʼuyel axh tiʼ inimal inqʼa bʼekʼbʼal uvaʼ itzʼibʼa ka Moisees.
25Pet inqʼa xaol, inqʼa jit tij imam Israeel, inqʼa qat motx toksal vet tibʼ s-niman tetz Jesuus, tan qat motx qutzʼibʼal bʼen s-te kam inqʼa yol qat motx qujeqbʼa, tiʼ uvaʼ jit tetxhal koqxh laʼ inima inqʼa bʼekʼbʼal. Pet taʼn laʼ motx inima uvaʼ yeʼ laʼ tetxhbʼu inqʼa oya, inqʼa maʼtaq toksal vatz inqʼa bʼitichla tiuxh. Atz jitoq laʼ motx tukʼa kaq. Atz yeʼ laʼ motx itxhiʼ itxhibʼil invaʼq txoo uvaʼ yeʼ laʼ el vikaqal. Tul jitoq laʼ motx iyansa tibʼ tiʼ ijalput ikʼulel —xeʼt inqʼa iqʼon iviʼ te Paʼp.#Vibʼanoʼm inqʼa Apoostol 15.29
26Echetz vet eqal, tul tiqʼo vet Paʼp inqʼa vinaq s-tiʼ, tul motx bʼen vet tu nimla tuulbʼal u tostiuxh tiʼ inimal vet u bʼekʼbʼal tetz txʼajo ibʼ vatz Tiuxh uvaʼ itzʼibʼa ka Moisees. Echetz txhan vet vaʼt qʼij, tul bʼenaq vet ok tuulbʼal tal uvaʼ atil u tatibʼal inqʼa oksan yol vatz Tiuxh tiʼ talax te u oksan yol kam qʼiil laʼ motx tzʼeq inqʼa qʼij tetz u txʼajo ibʼ vatz Tiuxh. Atz kam qʼiil laʼich motx tiqʼo vet inqʼa txoo tiʼ itzʼeʼsal vatz Tiuxh. Tul motx tal vet kaj inqʼa vinaq kam qʼiil laʼ motx tzʼeʼsal vet inqʼa txoo tiʼ junun.#Nuumeros 6.1-21 27-29Iletzxh vet u juqvaʼl qʼij nikich itzoqpeʼ, tul ilix ixaon Paʼp tuulbʼal u tenam Jerusaleen taʼn jolol inqʼa tij imam Israeel, inqʼa tzajnaʼqich tuulbʼal Aasia. Tul imolich tibʼ Paʼp tuchʼ Troofimo, val uvaʼ jitich tij imam Israeel, tul aj Eefesoiche.
Yaʼne motx lakpaq vet iviʼ tiʼ Paʼp. Tul xeʼtaq vet tiʼ itxhaqtziil u tenam. Tul aʼ motx titzʼa uvaʼ tiqʼo ok Paʼp Troofimo s-tiʼ tuulbʼal u tostiuxh. Atz yeʼ nikich ikuyuxeʼ uvaʼ laʼich paloʼk invaʼq xaol uvaʼ jit tij imam Israeel. Tul echaq motx tal vet isichʼin xoʼl u tenam s-eche: —¡Jankʼal ex qumol s-tijaq imam Israeel, qulotxhvaq qibʼ tiʼ itxeyp u vinaq uvaʼe! Tan aʼ, uvaʼe jun tenam kuxh ipal tiʼ itxhusuxeʼ uvaʼ laʼ ixval oʼ, oʼ inqʼa tij imam Israeel, taʼn inqʼa jit qumol s-tijaq imam Israeelil. Atz vaʼt ipaʼv uvaʼ, aʼ nik taleʼ uvaʼ yeʼ laʼ nimal inqʼa bʼekʼbʼal uvaʼ itzʼibʼa ka Moisees. Atz vaʼt ipaʼv uvaʼ, tira yeʼ nik motx inima inqʼa bʼekʼel tiʼ kam uvaʼ laʼ qubʼan tiʼ qatin tuulbʼal u tostiuxh. Tan qat tiqʼo tzaan kaʼl inqʼa xaol uvaʼ jit tijaq imam Israeel, tul qat motx paloʼk tuulbʼal u atibʼal tetz inqʼa oksan yol vatz Tiuxh. Qatetz motx teesal vet iqʼij u Tiuxhla Atibʼal, —xeʼtaq isichʼineʼ.
Echetz imotx vet ok u tename tiʼ itxeyp Paʼp.#Vibʼanoʼm inqʼa Apoostol 20.4 30Tabʼietz vet inqʼa xaol u yol, inqʼa tu tenam Jerusaleen, tul nal kuxh motx ilakaq vet tibʼ. Tul bʼenaq vet ok tu nimla atibʼal tuulbʼal u tostiuxh tiʼ tilixeʼ kam nikich motx tutxheʼ. Tul motx lakpaq vet iviʼ, atz motxaq ok tiʼ itxeyp Paʼp. Tul juxumichxh tel vet ul Paʼp tiʼ el u tostiuxh tu nimla atibʼal taʼn inqʼa xaol. Tul nal kuxh ijupaq vet ka inqʼa palebʼalaq ok tu nimla atibʼal tuulbʼal u tostiuxh. 31Tuulbʼaletz uvaʼs nikich iqʼosox Paʼp, tul tzʼeʼyichxh vet inqʼa xaol tiʼ iyatzʼax el Paʼp. Yaʼne nalxh ex altxhoq vet te u mam iqʼesal sol, tiʼ uvaʼ mam tenam vavalkabʼinyichxh vet tu nimla tuulbʼal u tostiuxh.
32Tul nal kuxh ibʼekʼ vet u mam iqʼesal sol tul nima tant sol tuchʼaq iqʼesal. Tul nal kuxh motx ibʼen tal uvaʼ vavalkabʼinyich inqʼa xaol. Tiletz vet inqʼa xaol taqʼbʼ mamala sol tuchʼ inqʼa iqʼesal, tul yekich yaʼaq vet tiʼ iqʼosox Paʼp. 33Aqʼbʼetz vet u mam iqʼesal sol, tul tal vet itxeyp Paʼp. Atz ibʼekʼ vet iqitzix Paʼp tuchʼ kaʼvaʼl kadeena. Tul tabʼi vet u mam iqʼesal sol inuqul te inqʼa xaol uvaʼ jaʼlich Paʼp, atz kamich ipaʼv Paʼp. 34Poro mam sichʼiʼm nikich ibʼan inqʼa xaol tiʼ talax vipaʼv Paʼp. Tan vaʼlen yol nikich tal jolol, tul vaʼten nikich taltxha jolte. Tiʼetz uvaʼ mam sichʼiʼm nikich ibʼan inqʼa xaol, tul yeʼ nikich tabʼi vet viqʼesal sol kam vipaʼv Paʼp nikich tal inqʼa xaol. Echetz ibʼekʼt vete u mam iqʼesal sol tiqʼol Paʼp tu tatibʼal inqʼa sol.
35Aqʼbʼetz vet Paʼp t-vikumukil u tatibʼal sol, tul aʼl viʼtxhelbʼal vet Paʼp taʼn inqʼa sol. Tan oqxhich vet ivavut ok tibʼ inqʼa xaol tiʼ iqʼosox Paʼp. 36Tan jankʼalxh u tenam uvaʼ txhʼuyich tzaan tiʼ Paʼp sebʼtichaq isichʼineʼ. Tul ech nikich motx tal s-eche: —¡Kamoq el Paʼp! —chichichaqe.
Uvaʼs ijaqt Paʼp bʼaʼnil te u qʼesal sol tiʼ iyoloneʼ
37Iletzxh vet Paʼp saʼich palsal ok t-tatibʼal inqʼa sol, tul iyolbʼe Paʼp u mam iqʼesal sol t-yolbʼal grieego. Tul ech tal Paʼp s-eche: —Kuy inpaʼv, ¿maq laʼ utxhi laʼ val kaʼl vinyol see? —xeʼt Paʼp.
Yaʼne ech tal u mam iqʼesal sol s-eche: —¡Niketz bʼak atxhabʼa u yolbʼal grieego! 38Tul eche axh naq val u aj Ejiipto, uvaʼ xeʼtisan val u txhʼaʼo s-jatxhaq tzaane. Tan tiqʼo el naq kajvaʼl mil (4,000) vinaq bʼanolaq txhʼaʼo, tul een ex imuqvataq tibʼ tu tzaqa txʼavaʼ, —xeʼt viqʼesal sol.
39Tul ech tal Paʼp s-eche: —¡Yeʼle! ¡Jit ine! Pet in invaʼl tij imam Israeel. Tul een alamal in tu tenam Taarso uvaʼ at tuulbʼal Siliisia. Tul aʼ vintenam Taarso palnaʼql viʼ jolt inqʼa tenam. Pet bʼan bʼaʼnil s-ve, tul toq yolonoq in xoʼl u tenam, —xeʼt Paʼp te viqʼesal sol.
40Yaʼne ikuy vet viqʼesal sol iyolon Paʼp. Tul txakeʼv vet tzaan Paʼp viʼ u kumuk. Tul taqʼ jaʼ Paʼp iqʼabʼ vatz u tenam tiʼ imaqax iyoloneʼ. Tul yekich yaʼ vet inqʼa xaol. Yaʼne xeʼt vet Paʼp yolon xoʼl inqʼa xaol tu yolbʼal evreeo, t-viyolbʼal inqʼa tij imam Israeel. Tul ech tal Paʼp s-eche:
ទើបបានជ្រើសរើសហើយ៖
Vibʼanoʼm inqʼa Apoostol 21: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
