Vibʼanoʼm inqʼa Apoostol 2
2
Uvaʼs tul vet viTiuxhil Tiuxh
1Opoonetz vet viqʼiil u nimla qʼij Pentekostees, tul vaʼl kuxh molich tibʼ inqʼa niman tetz Jesuus s-kaqaayil tiʼ ibʼant vaʼl iyol tiʼ inatxhax Tiuxh tu tenam Jerusaleen.
2Tul yeʼ kuxh taqla tabʼi ivulun itzaj val uvaʼ tu amlikaʼ, eche ijuman ipal mam kaqiqʼ uvaʼ oqxh iyakʼile. Tul tira noj vet u otzotz taʼn tal uvaʼ kʼuqlich inqʼa niman tetz Jesuus. 3Tul motx txhej vet, eche taqʼ xamal tiibʼa junun niman tetz Jesuus. 4Tul tira ok vet viTiuxhil Tiuxh s-bʼaʼn t-taanxelal jankʼal inqʼa niman tetz Jesuus. Tul xeʼtaq vet yolon t-joltaq yolbʼal uvaʼs tok viTiuxhil Tiuxh t-taanxelal. Tul aʼ nikich tal vet kam uvaʼ nikich ijaʼ vet ul t-taanima taʼn viTiuxhil Tiuxh.
5Tul atich jolol inqʼa tij imam Israeel tu tenam Jerusaleen tiʼ tilix u nimla qʼij. Tan aʼ nikich motx itxhok ijetxhtaq ok tibʼ kʼatz quBʼaal Tiuxh tiʼ inimal inqʼa bʼekʼbʼal. Tul talaq kuxh mam tenam tzajnaʼqich tuulbʼal u vatz txʼavaʼ. 6Tabʼiaqetz vet ivulun tul viTiuxhil Tiuxh, uvaʼ eche kaqiqʼ, tul tal uvaʼ molelich tibʼ inqʼa niman tetz Jesuus, tul nal kuxh motx imol vet tibʼ. Tul ulaq vet tiʼ tilixeʼ kam uvaʼ motx tabʼi. Tul motx tabʼi vet iyolon inqʼa niman tetz Jesuus t-junun inqʼa iyolbʼal. Tul tira sotzaq kuxh vet ikʼuul s-te. 7Atz kaayaqichxh vet taanima tiʼ kam uvaʼ motx til tabʼi.
Tul ech nikich motx talaq vet s-vatzaq s-eche: —Poro ¡jankʼalxh inqʼa xaol inqʼae, inqʼa nik motx iyolon veteʼ, tan aj Galileeae! 8Tul ¡jikxh vet nik qabʼit iyolon t-junun yolbʼal, u alabʼxh qetz! 9Tul at oʼ, aʼ quyolbʼal viyolbʼal aj Paarto, viyolbʼal aj Meedo, viyolbʼal aj Elaam, atz t-inqʼa yolbʼal uvaʼ nik iyolbʼel tuulbʼal Mesopotaamia, atz tuulbʼal Judeea, atz tuulbʼal Kapadoosia, atz tuulbʼal Poonto, atz tuulbʼal Aasia, 10atz tuulbʼal Friijia, atz tuulbʼal Panfiilia, atz tuulbʼal Ejiipto, atz tuulbʼal inqʼa mam tenam tuulbʼal Aafrika uvaʼ vatz opoon Sireene, atz ant inqʼa xaol, inqʼa aj Rooma, inqʼa aqʼon nik motx ibʼan tzitza, atz inqʼa tij imam Israeel, atz kʼuxh inqʼa xaol, inqʼa jit tij imam Israeel, inqʼa motx toksa tibʼ tiʼ inimal u quqʼeʼybʼal, oʼ inqʼa tij imam Israeel. 11Atz at oʼ, inqʼa aj Kreeta, aj Araavia, tul ¡ile nik motx qabʼi talt t-quyolbʼal tiʼ inqʼa mamala kaebʼal aanima qat ibʼan quBʼaal Tiuxh! —chichich vet inqʼa xaol s-vatzaq, inqʼa motx imol tibʼ.
12Echetz tira motx kajaq vet taanima, atz motx kuxh sotzaq vet ikʼuul. Tan ech kuxh nikich talaq vet s-vatzaq s-eche: —¡Kamebʼ kuxh vet talax inqʼa nik tutxheʼ! —chichichaq kuxh veteʼ.
13Pet jolt inqʼa xaol, tan aʼl kuxh nikich motx teesat iqʼij inqʼa niman tetz Jesuus. Tul ech nikich motx tal s-eche: —Aʼaqe qat motx pal iviʼ tukʼat qʼuʼich taʼl uuva, —chichichaqe.
Uvaʼs talt Luʼ inuqul u yol uvaʼ tal ka Joeel, u qʼexsanich tetz viyol quBʼaal Tiuxh, tiʼ u tul viTiuxhil Tiuxh
14Yaʼne txakp Luʼ tuchʼ junlavat inqʼa apoostol. Tul sichʼin Luʼ xoʼl inqʼa xaol, inqʼa motx aqʼbʼ saqin. Tul ech tal Luʼ s-eche: —Jankʼalxh ex inqʼa inmol s-tijaq imam Israeel, atz jankʼalxh ex inqʼa at ex tzitza tu tenam Jerusaleen, bʼenoq sete, tul abʼivaq kam uvaʼ toq val tiʼ uvaʼ nik tutxheʼ. 15Inqʼa xaol, inqʼa nik motx iyolon t-jolt yolbʼal, tan jitaq aʼe qʼabʼareel, eche uvaʼ nik etitzʼa. Tan yaʼn qʼalaʼmna, atz yaʼn bʼelval oora s-txheel. 16Pet aʼ vet inqʼa yol nik telaʼpun, inqʼa alel ka taʼn Joeel, u qʼexsanich tetz viyol quBʼaal Tiuxh, inqʼa iyol quBʼaal Tiuxh uvaʼ ech nik tal s-eche:
17«–Tuulbʼal vimotxtebʼal
inqʼa qʼij,
tan ayaʼlxh inkʼuul
laʼ vaqʼ vinTiuxhil
t-taanxelal
jankʼal inqʼa xaol.
Laʼetz motx tal elaʼp
inqʼa ekʼaol vinyol.
Atz laʼ motx tal elaʼp
inqʼa emeʼal vinyol.
Tul laʼ til
inqʼa chelem vinaq
kam uvaʼ,
in laʼ kʼutxhun s-te.
Atz laʼat til inqʼa qʼes
vatzikʼ
uvaʼ, in laʼ kʼutxhun s-te.{*}#2.17 Eche u yol u ‹motxebʼal qʼij› uvaʼ nik tal tzitza, tan aʼe, uvaʼ nikich tal inqʼa qʼexsanich tetz viyol quBʼaal Tiuxh tiʼ u tulebʼal u Mesiias, tan vatz inqʼa tij imam Israeel uvaʼ, aʼich vet vimotxebʼal u qʼije. Tan aʼ laʼich ul ibʼan u Mesiias s-vatz uvaʼ laʼich ul imaq inqʼa nikich itxhiʼan s-tiʼ, atz laʼich ok u Mesiias siqʼesalil uvaʼ nikich motx taleʼ, eche uvaʼ nik tal t-Danieel 2.44.
18Atz kʼuxh inqʼa vinaq,
atz kʼuxh inqʼa ixoq,
inqʼa loqʼel nik motx tok
tiʼ aqʼon,
tan ayaʼlxh inkʼuul
laʼ vaqʼ vinTiuxhil
t-taanxelal
tiʼ iqʼexsat vinyol
xoʼl inqʼa xaol
tuulbʼal vimotxtebʼal
inqʼa qʼij inqʼae.
19Tul laʼ inkʼutxh
uvaʼ mam yol laʼ tilix
vatz u amlikaʼ,
atz tuchʼ inqʼa etxhlal
vatz u txʼavaʼ
tuchʼ u nimla viqleʼm.
Tan aʼetz inqʼa etxhlal
uvaʼ laʼ ibʼan vatz u txʼavaʼ;
aʼe, uvaʼ laʼ ilix iyatzʼax
inqʼa xaol
tuulbʼal u txhʼaʼo.
Tul laʼ ilix ixaon ikaqal.
Tul mam xamal,
atz mam sibʼ laʼ ilix tel
taʼn u txhʼaʼo.
20Pet u etxhlal
uvaʼ laʼ ibʼan
vatz u amlikaʼ,
tan aʼe, uvaʼ laʼ bʼen u qʼij
s-tokto;
atz laʼ bʼen u ichʼ s-kaq.
Aʼetz uvaʼe, laʼ utxhi,
tul laʼ opoon vet viqʼiil
vaqʼt kuʼ
inqʼa yol tinuqul.
Poro mam yol laʼ tilixeʼ,
atz mam yol laʼ ikʼutxhuxeʼ.#Apokaliipsis 6.12-14
21Pet jatvaʼletzxh
inqʼa xaol
uvaʼ laʼ qʼiilan in,
tul aʼetz uvaʼe, laʼ inkoleʼl
vatz u kʼaxkʼo,
–chich quBʼaal Tiuxh,»
chich u yol uvaʼ tzʼibʼamal ka.#Joeel 2.28-32
22Jankʼalxh ex inqʼa inmol s-tijaq imam Israeel, abʼivaq kam uvaʼ nik valeʼ. Tan tuulbʼal uvaʼs atich Jesuus sexoʼl, Jesuus u aj Nasareet. Tan veqlelichxhtuʼ uvaʼ quBʼaal Tiuxh txhaqon Jesuus. Tan motx ibʼan Jesuus inqʼa mam kaebʼal aanima, atz motx ibʼan Jesuus inqʼa kam uvaʼ mam yol tilixeʼ, atz motx ibʼan Jesuus inqʼa etxhlal sexoʼl. Tul etootzaql kam uvaʼ nik valeʼ, 23kʼuxh antxh ex kuyun toksal Jesuus tiqʼabʼ inqʼa nikich itxhiʼan tiʼ Jesuus, inqʼa bʼanolaq tetz yeʼbʼaʼn, inqʼa alonaq ijaʼ Jesuus vatz kurus. Kʼuxhetz echxh uvaʼe palk Jesuus, poro tira ootzaqimich taʼn quBʼaal Tiuxh. 24Kʼuxhetz mamala txhoʼm palk Jesuus tiʼ ikameʼl, poro itzʼeʼv Jesuus inpaqte. Tan quBʼaal Tiuxh yeʼ kuyun uvaʼ laʼ atin Jesuus xoʼl inqʼa kamnaʼq. Tan jit aʼ u kamchil palnaʼq iyakʼil tiibʼa quBʼaal Tiuxh. Echetz itxhaqpul el Jesuuse tiqʼabʼ u kamchil taʼn quBʼaal Tiuxh.
25Tan ech val u yol itzʼibʼa ka Daviid s-naʼya tiʼ u Kriisto s-eche:
«–InBʼaal, vootzaqle
uvaʼ atxh axh sinkʼatza
bʼenamen.
Echetz, tiʼ uvaʼ atxh axh
sinkʼatza,
tul yeʼl inbʼeeq in laʼ xoʼv in
te inqʼa nik saʼon
inkʼaxbʼisaleʼ.
26Tiʼetz uvaʼ atxh axh
sinkʼatza,
tul nik ichiibʼ u vaanima,
tul nik inbʼitzle axh
tuchʼ vaqʼ.
Kʼuxhetz maʼt inkam veteʼ,
tan nik inkʼuqbʼa inkʼuul
uvaʼ laʼ itzʼeʼv in inpaqte.
27Tul yeʼl u vaanxelal
laʼ aaqʼ ka
tu tatibʼal inqʼa kamnaʼq.
Atz yeʼl vintxhiʼoʼl laʼ akuy
iqʼaj ka tu jul,
tan tira txʼakel ok vaanima
seʼe tiʼ animaleʼ.
28Tul axh qat alon,
tul laʼ bʼen vil
u qʼij insaq inpaqte.
Tul axh laʼ bʼanon,
tul yeʼl iyaʼebʼal imotxebʼal
laʼ inbʼen chiibʼoq sakʼatza,
–chich u Kriisto,»
xeʼt itzʼibʼat ka Daviid.#Saalmo 16.8-11
29Jankʼalxh ex inqʼa inmol s-tijaq imam Israeel, nik val inuqul u yol sexoʼl tiʼ Daviid, u kʼuy qumam. Tan ootzaqimal uvaʼ kam Daviid, tul muqux vitxhiʼoʼl. Tul il u atibʼal ant atil s-txheel s-quxoʼl tal uvaʼ muqlika. 30Tul qʼexsanich iyol quBʼaal Tiuxh Daviid. Pet aʼ talvat Daviid inqʼa yol tiʼ u titzʼeʼv u Kriisto inpaqte. Tul tootzaqlich Daviid uvaʼ tetxhal laʼich inima quBʼaal Tiuxh viyol uvaʼ talka te Daviid, tiʼ uvaʼ antxh laʼich txhejk u Kriisto xoʼl ixaʼnil Daviid. Echetz aʼ vet u Kriisto laʼich bʼanon iqʼesalil s-quxoʼl, oʼ inqʼa tij imam Israeel, eche uvaʼ ibʼan Daviid.
31Maʼtichetz tootzaqit Daviid u yol tiʼ u titzʼeʼv u Kriisto inpaqte, kʼuxh yeʼxnaqich ibʼaneʼtaʼ, echetz talt vet Daviide u yol tiʼ titzʼeʼv u Kriisto inpaqte. Atz talat Daviid uvaʼ yeʼl u taanxelal u Kriisto laʼich kaj tu tatibʼal inqʼa kamnaʼq. Tul yeʼl vitxhiʼoʼl laʼich qʼai. 32Tiʼetz Jesuuse nik talvat u yol uvaʼe, Jesuus uvaʼ titzʼeʼvsa quBʼaal Tiuxh inpaqte. Niketz qal u yol uvaʼe, tan oʼ ilon uvaʼ echxh ibʼane. 33Taʼnetzxh aqʼbʼ Jesuus inpaqte kʼatz quBʼaal Tiuxh tu amlikaʼ, tul oksal vet iqʼij Jesuus, atz aqʼax vet tiqleʼm Jesuus tiʼ tatin tisebʼal quBʼaal Tiuxh. Yaʼne aqʼax vet tiqleʼm Jesuus, tiʼ uvaʼ, aʼ Jesuus laʼ aqʼon vet tzaan viTiuxhil Tiuxh. Iletze qat taqʼl vet tuchʼ ayaʼl ikuul, tul aʼetz vet uvaʼe, qat etabʼi, atz nik etil vet s-txheel.
34Tul antxh tiʼ Jesuus talvat Daviid vaʼt u yol. Aloq jit Daviid koq nik tal u yol tiʼ vibʼen jaʼ tu amlikaʼ, pet aʼ nik talvat tiʼ u Kriisto. Tul ech u yol itzʼibʼa Daviid s-eche:
«Ech tal quBʼaal Tiuxh
te vinBʼaal Kriisto s-eche:
–Kʼuqeʼven tinsebʼal
tiʼ abʼant vaqʼesalil,
35tan tira laʼ veesa iqʼij
inqʼa nik itxhiʼan seʼe,
tul eche tzeqʼbʼal,
toq bʼenk vaʼn,
–xeʼt quBʼaal Tiuxh,»
chich vaʼt u yol uvaʼ tzʼibʼamal ka taʼn Daviid.#Saalmo 110.1
36Echetz bʼenoqxh inuqul u yol sete s-bʼaʼn, jankʼal ex inmol tijaq imam Israeel, tiʼ uvaʼ, aʼ Jesuuse u Bʼaala, atz aʼ Jesuuse u Kriisto taʼn quBʼaal Tiuxh, kʼuxh antxh ex alon ijaʼ vatz kurus tiʼ ikameʼl, —xeʼt Luʼ xoʼl inqʼa xaol.
37Taʼnetzxh motx tabʼi vet inqʼa xaol u yol uvaʼ tal Luʼ, tul motx inatxhbʼeaq vet tibʼ uvaʼ antaqich tiʼ talax ikameʼl Jesuus. Atz motx inatxha uvaʼ aj paʼvomich veteʼ. Tul echaq motx tal vet te Luʼ, atz te jolt inqʼa apoostol s-eche: —Txa qumol s-tijaq imam Israeel, ¿kametz toq qubʼan veteʼ, tul laʼ kuyux inqʼa qupaʼv? —xeʼtaqe.
38Yaʼne ech tal vet Luʼ s-eche: —Itzʼavaq etibʼ t-inqʼa epaʼv. Tul jaqvaq ekuya tiʼ inqʼa motx ebʼana. Tul laʼ eqej u tiqleʼm JesuKriisto tiʼ ikuyux inqʼa epaʼv. Tul laʼ aqʼax kuʼ ex xeʼ aʼ junun ex tuchʼ ibʼij JesuKriisto. Echetz laʼ ikuyuxe inqʼa epaʼv taʼn u tiqleʼm JesuKriisto. Tul laʼ ekʼul vibʼaʼnil viTiuxhil tetaanxelal. 39Tan alel ka taʼn quBʼaal Tiuxh uvaʼ laʼ taqʼ viTiuxhil sete, atz te inqʼa kʼaol emeʼal, atz te jatvaʼtel toq alaloq vatz u txʼavaʼ, atz te jankʼal inqʼa quBʼaal Tiuxh toq oksan t-taanima vinimal taʼn, —xeʼt Luʼ te inqʼa xaol.
40Tul mamala tel yol nikich tal Luʼ inuqul; atz nikich iyaʼlu Luʼ inqʼa xaol. Tul ech nikich tal Luʼ s-eche: —Kolvaq etibʼ vatz inqʼa kʼaxkʼo uvaʼ toq taqʼ kuʼl quBʼaal Tiuxh tiibʼa inqʼa xaol, inqʼa palsan yol, inqʼa itzʼlel s-txheel, atz inqʼa nik ixvan Jesuus, —chichich Luʼ.
41Tul sibʼal xaol motx niman inqʼa yol uvaʼ tal Luʼ. Tul motx aqʼaxaq vet kuʼ xeʼ aʼ. Tul kamal oxvoʼq mil (3,000) tatxhul ex ibʼan veteʼ. Tan naʼ vet tatxhul inqʼa niman tetz Jesuus tuulbʼal u qʼij uvaʼe.
Uvaʼs vaʼlichxh iyol inqʼa niman tetz Jesuus s-vatzaq
42Tul mij nikich motx iyaʼ vet tiʼ itxhustaq tibʼ tiʼ inqʼa txhusbʼal uvaʼ nikich tal inqʼa apoostol. Tul bʼiitxhaqul kuxh tuul nikich motx imoltaq tibʼ s-vatzaq. Tul nikich motx itxʼaʼonaq s-vatzaq, atz nikich motx ipixheʼl u paan s-xoʼl s-vatzaq tiʼ tulsataq vikamebʼal Jesuus s-kʼuul. Atz bʼiitxhaqul tuul nikich motx inatxht Tiuxh inpaqte.
43Yaʼne mam kaebʼal aanima tuchʼaq etxhlal motx ibʼan vet inqʼa apoostol vatz inqʼa xaol. Ajtetz til vet inqʼa xaol, tul tira bʼen vet te inqʼa xaol uvaʼ mam yol tatin quBʼaal Tiuxh. 44Tul vaʼlichxh iyol inqʼa xaol s-vatzaq tiʼ inimal Jesuus. Atz vaʼl kuxh vet nikich motx ibʼanbʼet inqʼa kamaq tetz s-vatzaq. 45Tul at inqʼa nikich kʼayin itxʼavaʼ. Atz at inqʼa nikich kʼayin kamaq tetz. Tul antxh nikich jatxaxik u puaq xoʼl inqʼa niman tetz Jesuus. Poro aʼ nikich bʼenk taqʼax u puaq tiʼ kam uvaʼ nikich isaʼon te junun. 46Tul ant kuxh vaʼlaqich iyol tiʼ imolt tibʼ jun qʼij tu nimla tuulbʼal u tostiuxh. Tul nikich motx itxʼaʼonaq s-vatzaq t-inqʼa otzotz. Tul nikich motx ipitxheʼl u paan s-xoʼl s-vatzaq tiʼ tulsataq vikamebʼal Jesuus s-kʼuul. Tul chiibʼebʼalichxh tatinaqe, atz ayaʼlaqichxh bʼaʼn s-te s-vatzaq. 47Tul vaʼlaqxh nikich toksat iqʼij quBʼaal Tiuxh. Tul mam yol tatinich vet inqʼa niman tetz Jesuus vatz jankʼal inqʼa xaol, inqʼa yeʼnaqich motx okoq s-niman tetz Jesuus. Tul aʼlxh nikich tok vet inqʼa xaol s-niman tetz Jesuus jun qʼij taʼn quBʼaal Tiuxh, jaʼl inqʼa nikich isaʼ ikolt tibʼ vatz u kʼaxkʼo tiʼ inqʼa ipaʼv.
ទើបបានជ្រើសរើសហើយ៖
Vibʼanoʼm inqʼa Apoostol 2: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
