Vibʼanoʼm inqʼa Apoostol 3
3
Uvaʼs ibʼant val u vinaq bʼaʼn uvaʼ tira yeʼ nikich ixaoneʼ
1Echetz ibʼane, tuulbʼal uvaʼs aʼlich ibʼen Luʼ tuchʼ Xhun tu nimla atibʼal tuulbʼal u tostiuxh uvaʼs ibʼant oxvaʼl oora s-kuʼebʼal qʼij, uvaʼs nikich tutxh natxho Tiuxh.{*}#3.1 Tuulbʼal uvaʼ s-naʼya, tan kaʼpaqlen nikich tutxh natxhkʼuulaʼm s-kuʼebʼal qʼij tu tostiuxh tu Jerusaleen. Paqul nikich tutxh s-qʼalaʼm; nik ibʼant bʼelval oora. Paqtetz nikich tutxh s-kuʼebʼal qʼij; nik ibʼant oxvaʼl oora. Tul mam xaol nikich ikʼul tibʼ tu nimla atibʼal tuulbʼal u tostiuxh. Tul txhaqpaq nikich itzʼeʼsal invaʼl txoo s-qʼalaʼm, atz s-kuʼebʼal qʼij s-jaqbʼal kuybʼal paʼv. Kʼuxhetz yeʼ nikich tutxh ibʼen inqʼa xaol tu nimla atibʼal tuulbʼal u tostiuxh, poro tetxhal kuxh nikich motx inatxh Tiuxh t-inqʼa tatibʼal t-inqʼa oora inqʼae, kʼuxh talxh tenam atilaqiche. Danieel 6.10 2Atichetz val u vinaq uvaʼ aʼxh yeʼ nikich ixaoneʼ s-talaleʼ, tul jun qʼij nikich ex aqʼloq ka tziʼ val u palebʼal ok uvaʼ, aʼich ibʼij Josqʼilxhtuʼ, tal uvaʼ nikich palkoʼk inqʼa xaol. Tul nikich kuxh ijoy u vinaq ipuaq te inqʼa xaol. 3Tiletz vet u vinaq uvaʼ aʼlich ipal vet ok Luʼ tuchʼ Xhun tu nimla atibʼal tuulbʼal u tostiuxh, tul kuykunyichxh u vinaq tiʼ tabʼil ipuaq te Luʼ, atz te Xhun.
4Yaʼne itiila saqi Luʼ tuchʼ Xhun ivatz u vinaq. Tul ech tal Luʼ te u vinaq s-eche: —Saqi oʼ, —xeʼt Luʼ. 5Tul isaqi vet u vinaq ivatz Luʼ tuchʼ Xhun. Poro aʼ nikich itxʼebʼ vet u vinaq taqʼt Luʼ ipuaq, atz taqʼt Xhun ipuaq.
6Yaʼne ech tal Luʼ s-eche: —Yeʼl inpuaq ati, kʼuxh plaata, atz kʼuxh ooro. Pet aʼ toq vaqʼ see vibʼaʼnil quBʼaal Tiuxh uvaʼ aqʼel s-ve taʼn. Toqetz val see tuchʼ u viqleʼm uvaʼ aqʼel taʼn u quBʼaal JesuKriisto, u aj Nasareet: ¡Txakpen! Tul ¡xaon! —xeʼt Luʼ te u vinaq.
7Tul aʼ itxey Luʼ viqʼabʼ u vinaq, visebʼal, tiʼ ilotxhox u vinaq tiʼ itxakpeʼ. Tul yekich txheaq iyakʼil inqʼa toq u vinaq tuchʼ inqʼa qul toq.
8Yaʼne yuqel ijaʼ u vinaq. Tul txakeʼvi. Atz xaon veteʼ. Tul pal vet ok tiʼ Luʼ tuchʼ Xhun tu nimla tuulbʼal u tostiuxh. Poro oqxhich vet iyuqpe. Atz sebʼtich vet toksat iqʼij quBʼaal Tiuxh.
9Tul mamala vet xaol motx ilon u vinaq uvaʼ nikich ixaon veteʼ, atz nikich toksa vet iqʼij quBʼaal Tiuxh. 10Tan bʼen vet te inqʼa xaol uvaʼ, aʼich u vinaq uvaʼ nikich kuxh ikʼuqeʼv tiʼ ijoyox ipuaq tziʼ u palebʼal ok uvaʼ aʼich ibʼij Josqʼilxhtuʼ. Tul yekich kaj vet taanima inqʼa xaol s-tiʼ. Atz yekich motx samun veteʼ uvaʼs tiltaʼ uvaʼ bʼaʼnich vet u vinaq. 11Txeyelichetz kuxh vet Luʼ tuchʼ Xhun taʼn u vinaq uvaʼ ibʼan bʼaʼn, tul kaʼyaqichxh vet taanima jankʼalxh inqʼa xaol, inqʼa kʼulich tibʼ tu nimla atibʼal tuulbʼal u tostiuxh. Tul motx txhʼuyeʼvaq vet eluʼl paqte tiʼ Luʼ, atz tiʼ Xhun tiʼ eluʼl u palebʼal ok uvaʼ atich ok ibʼij Salomoon s-tiʼ. Tul atinaq vet tiʼ vitiʼ otzotzil inqʼa otzotz uvaʼ sutimich ok tiʼ u nimla atibʼal tuulbʼal u tostiuxh.
Uvaʼs iyolon vet Luʼ xoʼl inqʼa xaol, inqʼa motx ex ilon u vinaq uvaʼ ibʼan bʼaʼn
12Tiletz vet Luʼ uvaʼ molich vet tibʼ inqʼa xaol, tul ech tal Luʼ s-xoʼl s-eche: —Jankʼal ex qumol s-tijaq imam Israeel, ¡yeʼ kuxh kaj etaanima tiʼ vibʼant u vinaq bʼaʼn! Atz ¡yeʼ kuxh kaj etaanima tiʼ qusaqileʼ! Atz ¡yeʼ kuxh etoksa quqʼij! ¿Maqetz aʼ nik etale uvaʼ tuchʼ qiqleʼm, atz, tiʼ uvaʼ, oʼ jikla vinaq, tul qat xaonk u vinaq uvaʼe? Yeʼle. 13Pet toq val sete: Aʼ u quBʼaal Tiuxhe qat bʼanon uvaʼ inatxhkʼuula Avraʼaam, u kʼuy qumam, inatxhkʼuula Isaak, atz inatxhkʼuula Jakoov. Tan aʼ isaʼ quBʼaal Tiuxh toksal iqʼij viKʼaol; aʼe Jesuus, u quBʼaal. Pet aʼe tan, ekuy toksal Jesuus tiqʼabʼ inqʼa iqʼesal u qutenam, tan yeʼ ekuy itxhaqpul el, kʼuxh maʼtich itxhokt Pilaato txumbʼal tiʼ itxhaqpul el. 14Pet yeʼ ekuy itxhaqpul el Jesuus, uvaʼ jikxh tatin vatz quBʼaal Tiuxh, atz uvaʼ loqʼola vinaq tatineʼ. Pet aʼl aʼ ekuy itxhaqpeʼl val u yatzʼol aanima. 15Taʼnetz koqe, pet tetxhal etal ikameʼl Jesuus, u aqʼol qʼij saq uvaʼ yeʼl iyaʼebʼal imotxebʼal. Pet quBʼaal Tiuxh itzʼeʼvsan inpaqte tiʼ toksal iqʼij. Tan tira qootzaqle, tul tira qila uvaʼ itzʼeʼvxh Jesuus inpaqte xoʼl inqʼa kamnaʼq.
16Tul tiʼetz uvaʼ qat qukʼuqbʼa qukʼuul tiʼ Jesuus, tul qat ibʼan u vinaq bʼaʼn tiʼ ikʼutxhuxeʼ uvaʼ, aʼ Jesuuse uvaʼ at tiqleʼm. Tul iletze nik etil s-txheel vibʼant u vinaq bʼaʼn. Tul ootzaqimal etaʼn uvaʼ aʼxh u vinaq yeʼ nikich ixaoneʼ. Tul ile nik ixaon veteʼ. Tiʼetz u kʼuqlebʼ kʼuul tiʼ Jesuus, tul tira qat ibʼan u vinaq bʼaʼn ech evatz sekaqaayil.
17Poro vootzaqle uvaʼ, ex sotznaʼqich ekʼuul, atz yeʼich etootzaql u Kriisto tul etal ikamsal el. Tul sotznaʼqichat ikʼuul inqʼa mam quqʼesal setuchʼ. 18Pet aʼetz inqʼa iyol quBʼaal Tiuxh qat ex tzoqpoq tiʼ ikamsal el u Kriisto, uvaʼ alel ka taʼn inqʼa qʼexsanich tetz viyol quBʼaal Tiuxh s-naʼya. 19Echetz toq val sete uvaʼ: Itzʼavaq etibʼ t-inqʼa epaʼv. Tul qʼaʼvoqvaq etitzʼabʼal tiʼ ibʼanax u bʼaʼn vatz quBʼaal Tiuxh. Tul toq sotzsaloq el vepaʼv taʼn quBʼaal Tiuxh. Echetz toq tule viqʼiil vichiibʼisal u qaanima taʼn quBʼaal Tiuxh. 20Tul antxh u quBʼaal Tiuxh toq bʼanon. Tul laʼ txhaqax tzaan u Kriisto inpaqte. Tan alelxh vet ka taʼn quBʼaal Tiuxh uvaʼ tetxhal laʼ ul u quBʼaal Jesuus inpaqte.
21Aloq tetxhal laʼ atin ka quBʼaal Jesuus tu amlikaʼ, tetxhal opoon nal u qʼij uvaʼs laʼ itxhaqt tzaan quBʼaal Tiuxh u quBʼaal Jesuus tiʼ ibʼanax bʼaʼn tatin jankʼal inqʼa kam s-kaqaayil vatz u txʼavaʼ. Tan tiʼ vibʼant bʼaʼn tatin inqʼa kam, tul tal ka quBʼaal Tiuxh inqʼa iyol te inqʼa qʼexsanich tetz viyol s-naʼya.
22Tul ech tal Moisees te inqʼa kʼuy qumam tiʼ u tulebʼal u Kriisto s-eche: «Laʼ toksa quBʼaal, veTiuxh vaʼt qʼexsan tetz viyol sexoʼl, ex inqʼa tij imam Israeel. Tan ech laʼ itxhaqt tzaan quBʼaal Tiuxh, eche uvaʼ toksat ka in. Tul laʼ motx enima jankʼal inqʼa yol uvaʼ laʼ ul tal sexoʼl. 23Jatvaʼletz ex uvaʼ yeʼ laʼ niman u qʼexsan tetz viyol quBʼaal Tiuxh uvaʼ laʼ toksa sexoʼl, tul yeʼletz ex ant ex xoʼl vitenam quBʼaal Tiuxh laʼ ibʼana,» xeʼt ka Moisees.#Deuteronoomio 18.15-16, 19
24Tul nima tel kuxh qʼexsanich tetz viyol quBʼaal Tiuxh nik alon tiʼ u qʼij uvaʼs tul Jesuus vatz txʼavaʼ. Tan talat Samueel paqte, tul yek kuxh vet s-tiʼ. Tul junun inqʼa qʼexsanich tetz viyol quBʼaal Tiuxh, tan nik motx tal bʼiitxhaqul inqʼa yol tiʼ u tulebʼal Jesuus. 25Tul iletze nik etil vitzoqpebʼal inqʼa yol uvaʼ alel ka taʼn inqʼa qʼexsanich tetz viyol quBʼaal Tiuxh.#Jeenesis 22.18{*}#3.25 Kʼuxhetz aʼ nik tal tu kastiiya uvaʼ: —Ex kʼaol imeʼal inqʼa qʼexsanich tetz viyol quBʼaal Tiuxh, —chiche, pet aʼ nik taleʼ uvaʼ: —Ex ilol tetz vitzoqpebʼal inqʼa yol uvaʼ alel ka taʼn inqʼa qʼexsanich tetz viyol quBʼaal, —chich telaʼpun. Tul ilatetze nik etil vet ibʼaʼnil s-txheel kam inqʼa yol uvaʼ ijeqbʼa ka quBʼaal Tiuxh te Avraʼaam. Tan ech tal quBʼaal Tiuxh te Avraʼaam s-eche: «Tiʼ vaʼl vavij amam, tul jankʼalxh inqʼa tenam uvaʼ at vatz u txʼavaʼ laʼ ilon vinbʼaʼnil,» xeʼt quBʼaal Tiuxh te Avraʼaam. 26Xaʼtetze aʼ itxhaqvat tzaan quBʼaal Tiuxh Jesuus s-quxoʼl s-bʼaxa, oʼ inqʼa tij imam Israeel, tiʼ taqʼt quBʼaal Tiuxh u bʼaʼnil s-qiibʼa. Qatetz taqʼ quBʼaal Tiuxh, viKʼaol s-quxoʼl, tan aʼ titzʼabʼal s-qiʼ uvaʼ laʼ motx qujalpu inqʼa qutxumbʼal jununil oʼ tiʼ yeʼ qubʼant u paʼv s-vatz, —xeʼt Luʼ xoʼl inqʼa xaol.
ទើបបានជ្រើសរើសហើយ៖
Vibʼanoʼm inqʼa Apoostol 3: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
