Uchokholha 46
46
Nayakhobo anoorwaa Umisri
1Paahi Nayakhobo ahochokholha nkwaha wo uthama vamoka ni mihakhu chaya chonkhaye. Vaaphilhe aya Ubeer Sheba, ahokumiha isadaka yo ummaha Nlhuku a Naisaka, athumwanaya. 2Nlhuku nkoolhumana Nayakhobo ntorani uhiyu, vehanne awe, “Nayakhobo! Nayakhobo!”
Ni ayo nkayaakhulha, “Aah, mii va.”
3Nlhuku nkeerelha, “Mii phi Nlhuku, Nlhuku a athumwaninyu. Nhoove urwaa Umisri, ukhalhawaya kinokowaapanga achishaana inyu ukhalha nikosho nulhupalhe wowo. 4Mii kimwanene kinouttukanani Umisri uwo, ni uhokolhoshani uno tho. Vanohalha inyu urimelha, Nayusufu phi nohalha uwa uphilhihani miitho inyu.”
5Paahi etu Nayakhobo nkayaathama Ubeer Sheba. Achishaana aya yahaawelhiha Nayakhobo, athumwanaya, achishaana aya ashinkani, ni manyaahanu aya mmikukutani chopurulhiya ni afarasi yaarwehelhiye aya ni Nafarao wiira chaakushe. 6Tho, ahokushacha mihuwo ni mihakhu chaya chonkhaye chaapattilhe aya Ukanaani, nkawaarweiya Umisri. Nayakhobo yaathamme vamoka ni iyari aya yonkhaye, 7achishaana aya, ashichulhu aya ashilhopwana ni ashithiyana, onkhaye nkayaawiihacha Umisri.
8Achishaana a Nayakhobo yaarweelhe Umisri vamoka ni athumwanaya yaari, Narobeni, nttara naya, 9vamoka ni achishaana a Narobeni, yaani Henoko, Palu, Hesroni ni Karmi. 10Achishaana a Nasimeoni yaari, Yemueli, Yamini, Ohadi, Yakini, Sohari ni Shauli, annyanre aya ni nthiyana Nkanaani. 11Achishaana a Nalawi yaari Gershoni, Kohathi ni Merari. 12Nayuda ni achishaana aya, Eri, Onani, Shela, Peresi ni Zera. Nansho Eri ni Onani yaarimenlhe vaari aya Ukanaani. Achishaana a Naperesi yaari Hesroni ni Hamuli. 13Achishaana a Naisakari yaari, Tola, Puva, Yashubu ama nchina nikina Yobu, ni Shimroni. 14Nazabuloni ni achishaana aya yaari, Seredi, Eloni ni Yaleeli. 15Yayo phi achishaana ayanre aya Nalea waayarelha Nayakhobo Upadan aramu ulhe, tho ni mwaamwanaya nkina mwanthiyana Dina. Attu onkhaye, achishaana aya ashilhopwana ni ashithiyana ni ashichulhu yaakhumme wa Nalea yaari attu makhumi mararu ni araru.
16Achishaana a Nagadi yaari, Sifioni, Hagi, Shuni, Esboni, Eri, Arodi ni Areli. 17Achishaana a Naasheri yaari, Imna, Ishva, Ishvi, Beriya ni Sera, mwanrokoraya. Beriya ni achishaana awe, Heberi ni Malkieli. 18Yalha attu khumi ni sita alha, phi ashaana ni uchuulhu wa Nayakhobo ni Nazilpa, namitheko nthiyana Nalaabani avanhe aya anaaya, Nalea.
19Naraheli aayarenlhe Nayakhobo achishaana elhi ashilhopwana, Yusufu ni Benyamini. 20Umisri uwo, Nayusufu ahaayara ashaana elhi ashilhopwana, Manase ni Efraimu. Anumwanaya yayo achishaana ayo yaari Naasenathi mwaamwana a Napotifera, opochera ishaani olhupalhe o iwani yo Uoni. 21Achishaana a Nabenyamini yaari, Bela, Bekeri, Ashbeli, Gera, Naamani, Ehi, Roshi, Mupimu, Hupimu ni Adi. 22Yayo attu khumi ni acheshe ayo phi ashaana ni uchuulhu wa Nayakhobo ni ahanu aya, Naraheli.
23Mwaamwana a Nadani aari Hushimu. 24Achishaana a Nanaftali yaari, Yaseeli, Guni, Yeseri ni Shilemu. 25Yayo attu saba ayo yaari phi achishaana ni uchuulhu wa Nayakhobo ni Nabilha, namitheko nthiyana Nalaabani avanhe aya anaaya, Naraheli.
26Attu onkhaye yaarwelhe ni Nayakhobo Umisri, wo uhalhakelhiya manyaahanu a achishaana aya, yaari attu makhumi sita ni sita. 27Umisri uwo Nayusufu ahaapatta ashaana ashilhopwana elhi. Paahi etu attu onkhaye o nlhoko wa Nayusufu Umisri uwo, yaari attu makhumi saba.
Nayakhobo anoophiya Umisri
28Nayakhobo nkayaahoolhelhiha Nayuda yaalhepelhe Nayusufu wiira yeekamelhe Ugosheni, ni ayo vaaphilhe aya Ugosheni, 29Nayusufu ahowelha munkukutani mwaya mwaapurulhiya ni ifarasi, nkayaarwaa uwekamelhani Nayakhobo, athumwanaya, Ugosheni uwo. Vaaphilhe aya vawo, yahaakumbatira athumwanaya, nkayonlha chinene. 30Nayakhobo nkayeerelha Nayusufu, “Ata khakhwaaka vano, khave ittu ukhalhawaya kihoona ikhove inyu, ni uchuwelha wiira bado mwa akumi!”
31Nayusufu nkayeerelha manyonnaya aya, “Kinokelha uwahimeriani Nafarao wiira, manyonnaka aka ni ashilhoko aya athumwanaka yaakhalhacha Ukanaani, ahowaacha uwannyaka. 32Kinokowaahimeria wiira, mwaati mwa attu o uhuwa mihuwo, yoyo phi ntheko unopanga inyu, ni waahimeria wiira mmwiilhe vamoka ni ipuri, ikhondoro, ing'ope ni mihakhu chinyu chonkhaye. 33Paahi Nafarao yowiihanakani ni ukohani, ‘Ntheko waani nnopanga inyu?’ 34Mmweeke mwaakhulha, ‘Pwiiya, hii ntheko ihu uhuwa mihuwo, toka unamwane ihu mpaka nna, ukhalhawaya phi ntheko waavara aya manyaapwiiya ihu.’ Mweereke chiicho wiira nvahiye mapuro o ukhalha wi ilhapo yo Ugosheni.” Nayusufu yolhumacha chiicho ukhalhawaya attu o Umisri, yaari yaavehachaka attu o uhuwa ikhondoro.
ទើបបានជ្រើសរើសហើយ៖
Uchokholha 46: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.