Uchokholha 45
45
Nayusufu anowiichuwelhiha
1Vavawo Nayusufu nkayoochelha wiikaya umihoolho wa attu onkhaye yaari vavawo ayo, nkayoomolhacha akhuwelhaka wiira, “Ukhumachiye vathe.” Paahi Nayusufu vaari vekha aya aheehimiacha wa manyonnaya. 2Nansho yaari onlhaka wo ukhuwelha mpaka anenchi o Umisri nkayeewa, mpaka ata Nafarao yaheewa yoyo mwaha uyo. 3Nayusufu nkayeerelha manyonnaya wiira, “Mii Yusufu. Chani athumwanaka akumi nanlhelho?” Nansho manyonnaya ayo nkayaahalha anoomiye uwanoni, yoochelhaka nlhove no waakhulha. 4Phi vavawo Nayusufu veerenlhe aya manyonnaya, “Nchushereke wono uri aka va.” Vaachusheranche aya nkeerelhacha, “Mii, Yusufu, mwanhima inyu mwanthumihilhe inyu wa attu o Umisri ulhe. 5Nansho vano nhikelhiye nipampa wala wiichukulhelha wo nlhatu no ukithumiha uwo. Nlhuku phi kiwiihilhe uno kuholhelheni, wiira kokholhe ukumi wa attu. 6Ilha iyaakha yo nayelhi yo ikuruna velhaponi va, nansho bado iyaakha nthanu chikina, attu vahinowa aya wooria ulhima mena uruweria choolhia. 7Nlhuku aakiwiihilhe uno wiira kiholhelhe, kookholhe ukumi inyu, wo iphiro yo ushangiha ilha, ikhalhe wiira, mwaattiva ni iyari chinyu nkhalhe akumi velhaponi. 8Paahi etu, mwaatti kanhii nkiwiihilhe uno, nansho Nlhuku. Phi yoyo kipannge mii ukhalha ntu o waakavihera ntheko Nafarao, kikhalhe ntu o wemelhelha inupa aya yonkhaye ni utawara ilhapo yonkhaye yo Umisri.
9“Paahi mwaakuviheke, nrweeke wa athumwanaka ni weerelha wiira, ‘Mwaamwaninyu Yusufu neera, Nlhuku hokipanga ukhalha nkavihi a amwene o ilhapo yo Umisri. Paahi, nhicherewe uwa uwannyaka. 10Nnookhalha ilhapo yo Ugosheni, uhiri utayi ni mii. Inyuva mwaanene, achishaana inyu ni ashichulhu inyu, mihuwo chinyu ni nhakhu inyu wonkhaye. 11Vanohalha inyu ukhalha Ugosheni vawo, mii kinoushungani inyuva, ashilhoko inyu onkhaye vamoka ni mihuwo chinyu nhiwe mwaakhwa ithalha, kwaani bado chihohalha iyaakha nthanu chikina cho ikuruna.’ ” 12Nayusufu amalhihekeru wulhumacha, nkayeera, “Mwaattiva nhoonechesha mwaashinene wo miitho inyu, ni ata nhima aka Benyamini, hoona mwanene wiira, phi mii Yusufu kinowulhumanani mwaatti. 13Mwaahimiachereke athumwanaka mwaha wo ikuru irinaka Umisri uno, ni chittu chonkhaye chonne inyu mwaashinene. Paahi etu, mwaakuviheke, nrwe mwaawihe athumwanaka uno.” 14Yamalhekeru, Nayusufu yahonkumbatira Benyamini, nhima aya, nkayonlha, Benyamini ni uyo nkonlha, uno anakumbatiranne. 15Tho, ahaakumbatiracha manyonnaya, uno yonlhaka. Baada yo vavawo nkoopana mwaha manyonnaya ayo.
16Yoyo mwaha uyo vaaphilhe aya wa amwene wiira ashilhoko aya Nayusufu ahowaacha, wahaateelhiha Nafarao chinene, vamoka ni anamitheko aya. 17Paahi etu Nafarao nkayeerelha Nayusufu, “Mwaahimerieke ashilhoko inyu ayo athatheke iphuta chaya chiyo misigo, ahokolhiache Ukanaani, 18yaakushe athumwaninyu ni ashilhoko inyu onkhaye, awaache wono. Mii kinowaavaha ilhapo yoombone chinene yo ukhalha Umisri uno, vakittu vanohalha aya ukhalha wo upuha chittu chonkhaye cho mwiilhaponi mu. 19Mwaahimerieke wiira awiacheke mikukuta cho upurulhiya ni ashinama, yaakusheke achishaana aya ashinkani ni manyaahanu aya, mena ahilhiyalhe waawiiha athumwanaya. 20Ahilhohe chittu chinohalha aya uhiya wowo, ukhalhawaya ilhapo yoombone phi nowa ukhalha yawaya Umisri uno.”
21Paahi achishaana a Nayakhobo nkayaapanga thoko chenre aya wo ulheheriya. Nayusufu nkayaavahacha mikukuta thoko chaalheheriye aya ni Nafarao, ni yolhia aya yo ulhia munkwahani. 22Ahaavahacha kila mmoka ikuwo chikina cho uwara munkwahani, nansho Benyamini ammanhe ikuwo nthanu cho uwara mphironi ni nchurukhu makhobilhi imia ttaru. 23Tho, aharwehelha athumwanaya misigo cho izawadi yo chittu chorera cho Umisri, wo nlhatu wo nkwaha aya uyo. Izawadi chaakushihiye iphuta khumi, ni iphuta chithiyana khumi chaakushihiye choolhia, mikatte ni choolhia chikinachikina. 24Paahi Nayusufu nkaalhehana ni manyonnaya. Vaathamacha aya ahaamukacha yeeraka, “Nhaanache indewo mphironi mmo!”
25Paahi, nkayaathamacha Umisri ni uhokolhia uwani Ukanaani, wa athumwanaya. 26Vaaphilhe aya, nkayaahimeria athumwanaya wiira, “Yusufu, nkumi! Yoyo phi vahiye ikuru yo utawara ilhapo yonkhaye yo Umisri!” Vavawo athumwanaya ahoomiya uwanoni, kwaani khayonrie urumelhelha malhove yaahimiacha aya yayo manyaattu ayo.
27Nansho vaahimeriye aya mwaha wonkhaye ulheheriye aya ni Nayusufu, ni vonne aya mikukuta chaarwehelhiye aya wiira chaakushe chiyo, nrima aya wahokhalha mmapuroni, nkayaateelhiya wo upwaha chinene. 28Nkayeera, “Vano nrima aka uhokhalha rata, wo ikekhiaye mwaamwanaka Yusufu, nkumi! Kinoorwa wowo, kamwoone kihinaya ukhwa.”
ទើបបានជ្រើសរើសហើយ៖
Uchokholha 45: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.