Uttawa 1
1
Aisraeli anootwarushiya Umisri
1Machina a achishaana ashilhopwana a Nayakhobo aarwelhe Umisri, kila mmoka ni manyaahanu awe ni achishaana awe aari, 2Narobeni, Nasimeoni, Nalawi, Nayuda, 3Naisakari, Nazabuloni, Nabenyamini, 4Nadani, Nanaftali, Nagadi ni Naasheri. 5Iyari yonkhaye i Nayakhobo yaari attu makhumi saba. Yeyo ikatema iyo Nayusufu aari anaholhenlhe ukhalha Umisri uwo. 6Chavireke iyaakha chinchi, Nayusufu ahorimeelha, chiichammo ashilhoko aya ni iyari ilhe yonkhaye yahorimeelha. 7Nansho iyari ya Aisraeli yahonchereria chinene, nkayaakhalha attu enchi ni o machiri chinene, nkayaawanelha kila vakittu mwiilhaponi Umisri.
8Paahi baada yo uvira iyaakha chinchi, ahokhalha mwene nkina Umisri uwo ahachuwenlhe Nayusufu ni wala uchuwelha mitheko chaapangilhe aya. 9Yoyo aheerelhacha attu awe wiira, “Mwooneke Aisraeli chinre aya wo ukhalha enchi chiyo, ni ukhalha attu o machiri unipwaha hii. 10Naavieke etu iphiro iriyoothe yo waawukulha, ahunchererie, ahiwe aanittawa. Ukhalhawaya yawaaka ikhoto anowa aalhutaana ni amalhaponi ihu ni waatakana ni hii mwiilhaponi mwihu mu.” 11Paahi, attu o Umisri nkayaathanlha manyapara owemelhelha Aisraeli wiira yaatwarushe wo waavaha ntheko wo ulhipa. Aisraeli nkayaavara ntheko wo utheka makhupi o ushungelha chittu cha amwene Nafarao, Upithomu ni Uramesesi. 12Nansho Aisraeli vaathepa aya utwarushiya, phi vavawo vaathepa aya wunchereria ni uthepa uwanelha velhaponi. Paahi attu o Umisri nkayoova chinene Aisraeli. 13Paahi, attu o Umisri nkayaapangiha Aisraeli ntheko wo ushilhilhi. 14Nkayaakhalha wo urikarika ni uvara ntheko wo ulhipa wo ukoorosha ichokaa ni ukoorosha matofali, ni mitheko chonkhaye cho mmamatani, wo uhoonelhiya ikiriri.
15Yamalheke, amwene o Umisri yahaalhehera Nashifra ni Napua, manyoopani o uyariha, yaayarihacha manyoopani Aebraniya, 16wo wiira, “Vanaayariha inyu manyoopani Aebraniya, mwaana noyaria uyo akhalhaka mwanlhopwana, mmwiiveke. Nansho akhalhaka mwaana mwanthiyana munhiyeke akhalheke nkumi.” 17Nansho ukhalhawaya manyoopani o uyariha ayo yaari attu o unthimicha Nlhuku, khayaapangilhe thoko chaalheheriye aya ni amwene o Umisri, nansho nkayaahiya achishaana ashilhopwana a Aisraeli akhalhe akumi. 18Paahi, amwene o Umisri nkayeehanacha manyoopani o uyariha alhe, ni waakoha, “Nlhatuni no upanga chiicho? Chani woonaka nnowaahiya achishaana ashilhopwana akhalhe akumi?”
19Manyoopani ayo nkayaakhulhacha, “Manyoopani Aebraniya kharii thoko manyoopani o Umisri. Ukhalhawaya yayo anoyaracha wo uhihuvahuva, nihinaya uphiya, ayo anokhalha anamanlhe wiithaphulha.”
20Paahi Nlhuku ahaavahera mirima choombone yayo manyoopani o uyariha ayo. Aisraeli nkayonchereria ni ukhalha ni machiri chinene. 21Ni ukhalhawaya manyoopani o uyariha ayo yaari attu o unthimicha Nlhuku, Nlhuku ahaavahera ibarakha yo waayaracha achishaana aya ashinene. 22Yamalheke Nafarao nkayaalhehera attu aya onkhaye, yiiraka, “Kila mwaana mwanlhopwana nohalha uyaria mwa Aebraniya arihelhiyeke umwoolhokoni Unaili, ni kila mwaana mwanthiyana nohalha uyaria, ahiiyeke nkumi.”
ទើបបានជ្រើសរើសហើយ៖
Uttawa 1: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.