COLOSSAEKO 4
4
1Mi kemethamiko, ketü lü zhokhro kha thekümiko tsüte; neko Niepoo kemetha pü bati sekeba bi. 2Kecholü thisü ba zote (metüva hite) mu kethezü kha kesü fü mu la ba zote. 3Kecho kethilü hako la sheri choba zote, side Jihova po cekha khripü hako tsüsü jü poyi keve thi ketola, Khrista ketekhri ti po ketola, mha süola atüpü pha püta. 4Apo süo thi mese mengoyi ve ketola, I jüposü kezüce. 5Ketsükevelü chota vote chozulü ketakola, pütü rhayi te. 6Ne jüpolü menünu, kekhrü kene, thisü tate, metsapü va kesü, side neko mifü kho kesü po kezü seyi ve ketola. 7I dipü bi ba sheri metü Tychicus kehala nekoce süto, pü ukekhrü sazü jüra mipü, mu yitholü kemelü kevepü, mu choyi kethi lü kezü keta Niepoo cetami pü. 8I pü ketsü pü neko ce sü züho, mhaco süo la, püpo neko dipü biba sheri sesü ketola, side pü neko melü thomelu sü ketola. 9Onesimus, usazüo kekhrü kemelü kene pü neko mipü zü vori to. Uni tavori de hice dipü thiba sheri neko ce posüto. 10Aristarchus azü thejü thi kebao neko kelü süho, Marcus Barnabas lipü nu jü kha kesüko neko ngo keyi, mhace püta nekoce vori lize püzüyite. 11Mu Jisu, pü cüpü Justus kethio, pü yi kerü mipü. Hiko lebi azü mhathothi kebako zo, Jihova kederevü la, mu alü thomelu kebako. 12Epaphras, pü neko dolü mipü, Khrista choyi kethimi, neko kelü süho, pü kecholü püyhe thi keba mipü nekola; neko po mesatso mu zhochü de Niepoo medolü thayi ketola. 13Kekrelamori I püju kevekesu metü seba, pü neko la pü rha thi tazo, mu Laodocea lü keba uko sheri. Mu Hierapolis lü kebako sheri. Luke, ukekhrü daru keseo, m Demas neko kelusü. 14Laodicea, Nymphas lü keba kehuko sazüjürako kelü kesü, pü celü kehu kebako. 15Neko lesitho kesü hio phri kesüce, neko dolü, Laodocea lü sheri phri süte, kehulü; sübi lesitho kesü phripü Laodocea lüri süte. 16Archippus ce posüte, yitholü menuyite, no Niepoo celü ngokeyi thitso sü zote. 17I Paul abe pü neko kelü süzüho, A phapü keta rekra sü zote, ngokemezhe po neko züba keyi thi. Amen.
ទើបបានជ្រើសរើសហើយ៖
COLOSSAEKO 4: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.