MHATHOKO 5
5
Ananias mu Sapphira ni ju
1Vele mipü za Ananias mu pücemi za Sapphira uni mhapü zhuyi. 2Püma hu sipü mezüta, pücemi sheri süo sezo, kedopü pü vori, süo khapü apostleko phelü sü. 3Vele Peter unice poti, Ananias no dipüla Satan po nmelü thipü Kemesa Rüpü kedo tole zita, side yimako hu mesho khapü mezüta? 4Hijü nbelü ketace nzhüzo mome? Yi süo zhu keyice ri süsü nza zo mome, mo ntho nmedo zo mome? Ditole nmelülü mha hiziti medo yita? No thümace meda keba zo mori Jihova ce meda bate. 5Ananias süo sesü mu metha retu tsüta, de pü rüpü kha süva; theju süo keseko metü mpe shuta. 6Khresako tavo süo juyi de pütata, de pü püvo chozu khrüva. 7Bavüdo sü vo ketasa, pücemi sübi ketako semode tavori. 8Peter theno süpüce poti, Cejü zhu keyi ma tsüko zome? Ace posüte, Thenopü poti ile, tsüzu zole. 9Süsa Peter püce pode, Kedipü bide neni kenani medo kerhüde Kemesa Rüpü Niepoo medo phi tole zita? Hihe, nnopu püvo khrü kevako phezi cekhalü lürizü, mu uko npüvo tato. 10Sisücu thenopü retu püphelü kita de sata, khresako talü püngo de sa ketala püpü tata, de püvo pü nopu kekhrü thice khrüva. 11Kehucelü metü mpe phita, mu süo kesekhü mi metü meche phita.
Apostleko mithi kesürho kesüko
12Mu apostleko belü zasi mu ungo mhatho thipü thümako dolü sü shuta, uko metü kezü pü thide Solomon cehükhro bazo. 13Kekremiko uko zü kemekro mpeta, vele thümako uko pomeve phita. 14Sizo sheri kemelümiko pü Niepoo krolü sayi bazo, thepu miko sheri mu theno miko sheri thüma kekro. 15Side kethi miko püvo chopü kolü, thezi koyo, theba koyo, khapü mezü, ketsatho lüri Peter khri po sükoyo va sü ketola, pü ta kevoce. 16Jerusalem khü mhüko lü nadekolü makro tavorita, kethi miko züde, mu therü kesupo ukebü ketako sheri, uko mipüpü ti thi kesürho sü.
Apostleko methi shudüta
17Süsa thevo kezhoo uko mejo sürita, mi püzü kebako metü, Saduceeko uko krünyü süta. 18Uko tüpü thejüce kolü süta. 19Vele tüyo Niepoo choyi miko tüzülü thejüceko cekha khri süta, de uko zü prarita; 20Side uko cepoti, ta kereshücelü vote mu thümako ce kehü hio po süte. 21Uko süo seyi metha keshu rüna ta kereshücelü vota, side mi metha bata. Vele thevo kezhoo mu püzü kebako tavori de kehuko cüsü, mu Israelmi kekha ketako ketsüpü thejücelü sü de uko tüyi ketola. 22Vele thejücelü kezhoko tavori tice thejücelü uko phu medita, uko bamote side pota. 23Thejüce khapü meta zole, mu cekha kefüko tha bazo; vele hako cekha khrilü tice uko mipüri ba mote. 24Kereshücelü kezhoko mu thevo kezhoko süo seyi tice uko lü tsakhuta kedipü bitü ta sheri. 25Süsa mipü tavori de poti, Hihe, neko tüpü thejücelü kesü thümako tavo kereshücelü sütha de mi metha bate. 26Kereshücelü kezhoo mu kefüko tavo uko züyi, uko kehi kemu thi mode, kekrelamori thüma kekro ba tila süko mpe tade, ketsüpü uko vata yive tila. 27Uko tüzüvo methi kehu mhüjülü sü de thevo kezhoo uko ketso. 28Pü poti, hako nekoce posü mome? Nekopo thüma hio zalü mi metha hite sizide, vele Hihe, neko kemethajü khipü Jerusalem chu süte, thüma hio zapü hakoyo sü keto nekelü bate. 29Süsa Peter mu apostleko po kelakesü, Hako thüma jü kezüo ceri Jihova jüzü thimo suku. 30Upotsaneko Rüo Jisu phü merhü süte, neko püpü süyo gude dokhri kevao. 31Jihova püthi kerekrüpü püzaco Kede mu Kelakeyio thi süte, Israel mikopo thelü redeyi ketola, de kephoma vayi ketola. 32Hako hio kese kengo zhopoko zo, mu Kemesa Rüpü sheri, Jihova khapü püfü kezüko tsü kesü. 33Uko süo sekesüce uko melü thishuta side uko dokhri va keto lü rhüta. 34Süce Pharisee mipü Gamaliel, thezho kesemi, miri pürho phiyo, tha de poti, apostleko khapü dopü bate. 35Ukocepoti, Ne Israel thümako neko menu yite, neko thüma hiko pü kedipü thenyü ba sheri. 36Kekrelamori hijü vapü Theudas tasüri, püri mipü zoleti kemüha sü; thüma krada mesüpü püzü kesajita; süo dokhri ve, mu thüma püsa meji ketako phova side süko ba mote. 37Thüma süo salü Judas süri Galilee lü khazhonu kekhrü tüce, thüma kekro püsa meji ta; pü sheri dite, thüma dithedü püsaji thita sheri süko metü pre dite. 38Tsühi, I nekoce po keto süze, nekobe kelayite thüma hikoyo, uko khasü vate, mhace mharhü mori mhatho hio thüma celü vori tisa ditato. 39Vele mhace Jihova celü vori tisa, neko süo meniyiho; neko Jihova züde kemetsu tazo to tila. 40Uko pükepo züta, side uko apostleko cüpü vüva, side ukopo Jisu zapü posa hino kekhava, de uko kha süva. 41Uko methi kehulü ta prata, uko püzalü kemenga keti thizüzo tila uko rethu de tata. 42Tüsonha kereshücelü mu celükolü Jisu Khrista pü mimetha keti tümo zo bata.
ទើបបានជ្រើសរើសហើយ៖
MHATHOKO 5: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
