MHATHOKO 4
4
Peter mu John ni methi kehu mhüjülü tha
1Uni thümako ce jüpo kebalü thevoko, kereshüce kekha ketiko, mu Sadducees uni cevori. 2Jisu kesalü rhüla sü keta uni popü thümako metha ba keta sepü uko nümo shuta. 3Uko tavori de uni tüpü tüso süsanha ketso khapü bata, kekrelamori theva ketala. 4Vele thüma jüo reni keyiko melüyita, piphi thüma süko nye püngu. 5Sü sanha uko mipi kekha ketiko, mehimiko, mu mhakeseko tavo Jerusalem lü kenguyi. 6Anna pethi kezhoo, Caiaphas, John, mu Alexander, mu thevoo cekroko. 7Uni khapü uko dolü metsulü sü, de uni ketsoti, neni kedipü kekulü mori sopü zalü mhatho hihi thisüta? 8Süsa Peter Kemesa Rüpü po püchu püde poti, ne thüma kekhayo tiko mu Israel mehi miko. 9Mhace neko tha tüso hilü hani mhatho keve thi pü renga keta thüma hiyo kesü senyü lize, dipü colü pü thimeve süta sheri. 10Neko metü seyite, mu Israel miko metü, Jisu Khrista Nazareth mi zalü ho, neko püpü gu kevao, Jihova püphü merhü süte, pü zalü thüma hio neko dolü vede tha bate. 11Jisu hio neko cekethiko pü kha keva tsüo süo khipü pükülü tsüo thiketao. 12Kelakeyi mharapüri ta mozo, kekrelamori tükhro thüma dolü kelakeyi thüza kekrepüri tamo zo tila. 13Tsühi uko Peter mu John ni kethepu ngo de lükeyi uni mhasemo mu maho mizo side uko ngo bata, uko sekeyi uni Jisu zütayo. 14Kerenga thümao uni zü tha ketha pe de uko mhapüri pü uni mejo keto thiyi suta. 15Vele uko po kesü unipo kehu khü prata no sü, side utho uko dolü kerethi bata. 16Uko kepode uko uniyo kedipü thita? Kekrelamori ungo mhatho kemelepü thipü Jerusalem lü kehüko mese mengo süte; mu uko süo mole sizi yi hote. 17Vele süo keyepü thüma dolü süsa mo ketola, uko uni kethi kedü va khe; unipo thüza hio posapü mipü ceri sümo ketola. 18Uko uni cüsü de unice poti Jisu za posa ho mu pü mi metha ri hino sü. 19Vele Peter mu John ni ukofü kelasü de poti Jihova mhüjülü püfü kereni ceri nekofü kezü pütüku tome moshi, nekotho lü phite. 20Kekrelamori ha zowe ha kese kengo mhathoko pomo taho. 21Uni kethikedü kevasa uni kha süva, uniyo kemejo thiyi su ketala, kekrelamori thüma krokola; thümako metü Jihova chu zapozale thibata, mhatho thi kesüo la. 22Kekrelamori kerenga thüma süo püyo zasi mu ungo mhatho thi kesürho kesüo pü kehüzho tütse heda ketala ri sa.
Kemelümiko kethepu la kecho kethi
23Uko khasü kevasa uni ta ukromice vota, de tavo ukoce thevoko mu mehiko unice dipü pota sheri metüpü posü. 24Uko süko sekeyice metü lüpü thide se Jihova ce süta, uko poti, Niepoo no Jihova zo, tü mu cejü thi kesüo, jü kezho mu sükolü ketako metü. 25No nthekü David talü kepo, dipüla therüna miko ulü reda baya, mu thümako kemethu lü baya? 26Cejülü kedemiko uthalü tha, mikekha ketiko vo kebupü, uko Niepoo metsu toli, mu pü Khristao (Messiah) sheri. 27Kekrelamori nade hilü Herod mu Pontius Pilate-e kenani, Judah kemoko pü Israel thümako sa, uko kezüde ntheküo Kemesa Jisu metsu, no kenhü keyio. 28Kekrelamori nbepü thisü toli süculü lü mu rhüpü ketako. 29Tsühi Niepoo uko thedü füko pe süte, thepu de poyi keto khapü ntheküko tsü süte. 30Nbe chopü thi kesürho keyi zasiko mu ungo mhathoko nnu kemesa Jisu zalü thisü ketola. 31Uko side kecho thi kebace uko keba thethilü renata, uko metü Kemesa Rüpü po uchu de uko thepulü Jihova jü po tata.
Kemelümiko umha uzhü kha zhürhü thita
32Melü keyi makro kezüde thipü phopü mu lüpü thita, mori uko mhakebakopü utho uzhüle siti pori mota; vele mhakebako khipü zhürhü thita. 33Apostleko keku kezhopü Niepo Jisu rhülasüketa zhopo thita, ngokemezhe uko metüyo ba shuta. 34Mori uko dolü kedi ketsakhu basa mota, kekrelamori uce mu ucejü kebamiko zhuyi ta, mha zhu keyiko presa pü vori. 35Süko püvo apostleko phelü sü, kezapü mipüpü khimo kesubi uko tsüsü. 36Joses püza tho kedepü Barnabas thi kesüo, (püco thelü tho kemenü nu); pü Levi mipü, pü Cyprus rünalü vori. 37Pü cejü kebao zhuyi de presa pü vori de pü apostleko phelü sü.
ទើបបានជ្រើសរើសហើយ៖
MHATHOKO 4: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
