MHATHOKO 28
28
Paul cejü rethi tsokemo Malta lü vo keyi
1Hako tapra tso keyisa sekeyi cejü rethi tsokemo süo Malta le ziti seyi. 2Sülü kehüko hakoyo merhe dapü thimo. Türü vorita mu meko phita vele uko me thipü jükhü metülü hako meso shusü. 3Paul methi ketola süpa kevoce tenhi nhibüpü melü vori mu süo pübe mereyita. 4Thüma sülü kehüko süo ngode uko dolü kepo keba thüma hio mikedokhri pütazo metse pütho jülü taprari tazo sheri, khüpo sazho sü pü merhü süho. 5Pü khonu süo keshüpü melü süva mu mhapüri pü methi mota. 6Kehothi sheri reme vori metse siziba, mori saretu ta keto lüba; vele uko pütü kecho peba sheri püyo mhapüri thi mo ketala uko kelü redeta, side püpü therü mipü le sizita. 7Thethi süce kehü mipü thüma kemele mipü püza Publius hako mesoyi mu hako thekü shusü, tüso zho sü merhe shude. 8Publius po mhathi shu mu thüza bü de püzilü zü, Paul pücelü de kecho thisü, pübe chopü püyosü, side püthi kesürho sü. 9Sü thi kesüla thüma sülü kehümiko mhathi kebako tavori de uko thi kesürhoyi. 10Uko hakoyo therho mhathoko thi shupü hako tsüsü, hako rulü tata ketoce hakola khimo kesuko metü khapü hako tsüsü.
Paul tavo Rome tso keyi
11Hako tekhri sü sa tavo cejü rethi tsokemo pülü voyi Alexandria ru nube za Castor mu Pollux thopü meta. 12Tavo Syracus lü zho sü relüyi. 13Sülü mede tipü mhanyo (compass) püyi de tavo Rhegium tsoyi, zhopü sülü ba de sülü mekhroco tükhra vorita, süsanha tavo Puteoli tsoyi. 14Hako tavo sülü kemelümiko ba ngoyi, de zho thüna sülü banota, süsa ta Rome kevaco tavota. 15Kemelü miko hako tavo kezü sesü, de uko Appius ketso Resoce sülü ta vori hako züyi, Paul süko ngokesüce Jihova meza ti posü, mu thepuyi. 16Hako tavo Rome tsokeyice kefüo thejüko khapü sülü kefüko tsüva, vele Paul khapü thipahe mipüpo uni bata.
Paul mu Jews krütako Rome lü
17Zhosü sa Paul Jews krüta sülü kebako cüsü, uko tavori ti salü Paul uko cepoti, thümako mu sazüjürako, I thümako nümo thimo mori upotsaneko zho sheri varhümo, sizo sheri Jerusalem lü atüyi de akhapü Roman miko belü süvele. 18Uko aju keti kevoce ayo kejo sa keshü ngoyi mo tila uko akhasüva nyüsü. 19Vele Jews miko süo metsude jüpo ketala apo Caesar ce cho sala moze suta. I ashuye zü kenyo nyümo zo sheri. 20Kekrelamori mha hiohila I neko cüsü, neko zü kesüsü mu neko ceposü kenyüla; kekrelamori Israel miko kemerila thegi ropü aphapü tatele. 21Hako njula Judea lü lesipüri ngomo zolu, mori sazüjüra celü mipüri vori de mhapopü nmetsu ti bamo. 22Vele hako nju senyüba no dipü lü ba sheri, hako kese thethi metülü kro hio metsu ti se süte.
Paul Rome lü zhopo kethi
23Tüso zhopü chepü pü tsüsü, thüma kekro ta pü keba thethilü vobayo; pü süko ce Jihova kede kethi zhopo thi bayo, Jisu ju pü uko ce po, Moses thezhoko sheri, mu saju kepoko sheri sa de keshulü vo theva ketso po bayo. 24Humi po kesüko melüyi vele humi melü mota. 25Uko dolü umedo kemetha mo ketala kekhota, süsalü Paul jüpü poti, Kemesa Rüpü Isaiah saju kepoo talü po meve shu pü upotsa neko ce süzo. 26Pokesü, Ta thüma hikoce vote, de posüte, kereni sü neko renito, vele seyiho; kepesü neko peto vele mhalü yiho. 27Thüma hiko melü revote, mu uko ni sheri kenibite; uko mhüma tate mhangomo ketola, mu unipü reni mo ketola. Uko melüpü mhalüyi mu redeyi lize I uko thi kesürho süto vele. 28Neko hihi seyite, Jihova kelakeyi kha kesü khipü Gentiles miko tsü vato, size uko melü yito. 29Pü jü hiko po kevasa Jews miko tata, uko dolü mha kepo shuta. 30Paul cepü nyepü hü kebalü tütse kena photü sülü ba, püce kevoriko metü zü kesü. 31Jihova kede kethi zhopothi mu Niepo Jisu Khrista jupü mi metha, kemelü kene mu mipüri pü kha kemo thi.
ទើបបានជ្រើសរើសហើយ៖
MHATHOKO 28: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
