MHATHOKO 27
27
Paul ru thopü Rome lü vo keta
1Hako ru thopü Italy lü vo keto mepeyi ketace, Paul mu thejümi hu khapü Julius zitipü melüsü, pü Augustus kefümipü. 2Hako ta rulü lü Adramytium thethilü, side ta shudüsü, Asia khükolü, Aristarchus hako zü ketala pü Macedonia mipü Thessalonia lü. 3Süsanha tavo Sidon tsoyi, Julius püzho veshude Paul po tavo püzümiko züde pü nüyi no sü. 4Süsa hako ta sü Cyprus lü vota, kekrelamori tükhra hako vo ketoco vamo ketala. 5Hako rulü ta Cilicia mu Pamphylia kolü vo de tasü Myra lü tsoyi Lycia lü nadepü. 6Sülü hako füketao rupü ngoyi Alexandria lü ta Italy lü lüto kezü pü, sülü hako khasü. 7Rele shude hako ru thopü tüsozho kekrosa tavo Cnidus tsoyi, tükhra hako metsu ketala hako ru thopü Crete khrilü ta Salmone lü vo. 8Rüshude ruthopü tavo thethipü Fair Haven (kerelüthethi) tsoyi, süo Lasea nade zü kemeno ba. 9Rutho keta pütü kekro mediva, mu hicehi rutho keti kemeche bashuta, mevo keti (Yon Kippur) vota, Paul uko tarhosü. 10Uko cepoti, kezhoko, I sekeba ruketho lü kempe bate mu mhako ka keta zü kesüto, ruyo keta mhanyoko lebimo vele thüma sheri. 11Vele hako kefüo Paul fü kereniceri ruketho kezhoo, mu ru niepoo fü reni kuta. 12Ru relüthi sülü tüsütü cela thethi pütükemopü, süla makro kono rulü tavo Phoenix tsoyi ri ve tila, sülü uko tüsüce ba ketola. Thethi süo rurelü thipü Crete, meso mu mekhro nakro kevaco.
Jükezholü khrade
13Mekhroco tükhra mehiba, uko kelüce uzhotülü uko ruthoyi keve thita lizu, uko ru phrüsü de ruthopü Crete kemenoce jükhüce keba thethilüvo. 14Vele pütü choba kemolü khradepü vorita, Euroclydon khrade süo uko ru hüta. 15Ruo hüyi ketala uko tükhra süo metsu yihota de tükhrapo pühüpü tata. 16Cejü rethitso kemo kenipü Clauda khrilü ruthopü vozü, kedopüce hako ruyoketa büfüruko yo kuyi. 17Ru fühako ha keyice rulü rophako pha kemetüyi, kemosa ru ta Syrtis (tesünyo) lü vo keta mpe tila; side tüsümethakeyi thegiro (anchor) phrü kerechusü de tasü. 18Tükhrapo hako hüshupütata, süla süsanha mhakhapü kegüdüva depüpü thi kemejosü. 19Zhosünha hakotho hako bepü ru kenhipü tata. 20Tüsozho kekro nace mori thenyü kori ngo mota, tükhra hako kehü ketsapü thimo, rhüyi keto kemeri sheri bamota. 21Vele pütü kecho ketico bamo ketala, Paul süthayi de poti, kezhoko, neko afü reniyi ti mesü, Crete lü ru phrü kesü mesümo, size mhapüri medi vaho mu kemezhe ri taho. 22Tsüsahi, neko nüyite, neko mipüri kesakedi thi saho ruo zo kemosa. 23Tsüzi tüyo Jihova choyimipü azü ketao, mu I pü choyi thi ketao acepoti, 24Mpe hite, Paul, no Caesar mhüjülü voto, Hihe, nzü revü ketako kelapü ntsü süto. 25Süla kezhomiko, neko nüyite, kekrelamori I Jihova kemelümi, acepokesübi sübi thisü zo ketola. 26Kehothi sheri uko kelhoupü cejü rethitsokemo pülü süvatoho. 27Tüsozho keridazi Adria jükezholü ruthokho thoki kebace, rukethoko lükeba tavo rünahu tsota zütho ziba. 28Jülüfü sekeyice botho (fathom) mecü keta lüba, süsa zace thefü ketsüsala sü, ziri keripüngu zota. 29Tavo ketsüro thoyi keta mpe tila ru tüsü ketola tsahu (anchor) da kehüsü, side sünha sülü relüta ketola. 30Ru kethomiko ukodo thide ru metha keyice büfüruko phrü kerenu süta, tsahuko kelhu kesüzhü. 31Paul uko kefüo mu thipaheko cepoti, Thüma hiko rulü ba kemosa neko kelayi hote. 32Süsa thipaheko kero dathüsü de rupo tata. 33Tüso prari kezüce Paul uko cepoti, neko mhati yite, tha tüsozho kerida teneko mhati kemo, khüta keta. 34Süla I nekoce posüyo mhahu tiyi te, kekrlemori neko sürhola, kekrelamori neko mipü pithari retu tahote. 35Pü jü sübi po kesüsa tsükhri tiyi, uko mhüjülü Jihova kemeza posü, pü tsükhri cephro süde khi tiyi. 36Süsa uko unüyi de mhatiyi. 37Hako rulü ketako thüma krakena mu hethüna shurü ta. 38Uko mhati keyi sa rupü thikemejova, ata kori kegüdüpü jükezholü süva.
Ru pro keta
39Keshulü uko cejü dipülü vota sheri semo, vele uko jükhü cejü kewhipü ngoba süla ru thopü sülü vo keto lüsü, mhace thiyi ve lizo. 40Uko rulü kero khiyita süce side füha pümesüsü, ru thopü kerelü thethi lü kebalü phe ketola. 41Jükezho kena vo kesü kebalü lüta side uko ru cejülü bata, uvade taki cejülü thoyita de melü yi hota, vele ru saco thophrova jü rüphüpo. 42Thipaheko kelüce thejümiko dokhri va keto rhüta, motisa uko jüvü de ta keta mpe ketala. 43Vele kefü kezhoo Paul kelakesü lüba tila uko khameta, ukopo jüvü kevemi jüvüpü cejü kesolü prata no posü. 44Humipo büfü rukolü tavo, mu kekre miko ru kepro kolü ta sizi. Sübide uko metü cejü kesolü pra tsoyi.
ទើបបានជ្រើសរើសហើយ៖
MHATHOKO 27: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
