MHATHOKO 18
18
Paul Corinth lü kevo
1Hisalü Paul Athens lü ta Corinth lü vota. 2Sülü mipüza Aquila tipü Pontus lü menuyi, sümhüjüce pücemi Priscilla zü Italy lü voriba. Kekrelamori Claudius Jews metüpo Rome lü tata no po ketala, Paul süla tavo püni zü kesü. 3Pü hetho kerhü tila pü tavo uni celü bata, kezüde mhatho thibata; uko mhatho lizo jüfü ce kethimi. 4Pü sabath tüsonha Synagogues kolü Jews mu Greek miko zü kemeli de uko rethibayo. 5Silas mu Timothy ni Macedonia lü tavori, Paul Jews koce Jisu sü Messiah zoketi posüba. 6Uko pümetsu ketala mu püzhoshu ketala püfüyo keta kerhoko kekhusü de ukoce poti, Neko zapo neko piyo, I zono mesazo, hisaco I Gentiles koce votato. 7Pü sülü (synagogue) tata, mipüza Titius Justus lizitio celü vo bata, pü Jihova kereshü mipü tila, puce synagogue zü keduba. 8Crispus synagogue lü kezhoo, pü cekro züde Niepoo melüyi, Corinth mi thüma kekro melüyi mu jülo püyi. 9Niepoo tüzülü zümholü Paul cepode, Mha mpe hite, vele jüpo süte mu kemekre ta hite. 10Kekrelamori I nzü bazoho, mipüri nmethi meni vaho, nade hilü athüma kekro ba tila. 11Pü sülü tütsepü mu pütsü bata, uko dolü Jihova jüko pü uko metha sü. 12Gallio Achaia lü kezho (proconsul) thiba, Jews miko Paul metsu sürita side pütüzü sheco kezhoo cevo. 13Thüma hio mishupü Jews mi zho kemolü Jihova reshüno sizi tate. 14Hice Paul püta chopü posü to kezüce, Gallio Jews koce poti, mhace kekri keti thezho kevarhü mhatho kesü hu lize, I neko Jewko züde mha ketito. 15Vele jükola mori theza kola, ne thezho rele kola zono nekotho peyite; kekrelamori I sübi ti kola sheco thiho. 16Side pü sheco balü uko huva. 17Süsa Greek miko Sosthenes, synagogue lü kezhoo tüpü shecoba mhüjülü vüva. Gallio mhapüri süo la pülüni mota. 18Paul pütühu sülü ba side süsalü pükroko khava, ru thopü Syria lü vota, Priscilla mu Aquila ni sade; Cenchrea lü püpi thava kekrelamori pü reshupü thi meta tila. 19Pü ta Ephesus lü vori, side sülü uni khamezüva, vele pü ta synagogue lülü, de Jews kozü mhakepovo. 20Uko püpo pütühu uko zü mha kepo süno choba, vele pü basa mota. 21Vele pü uko zü kekhota sürho bate side, ukoce poti, thenye hio I Jerusalem lü ba moze su; vele I sala tavorito nekoce, mhace Jihova medo lize. Süsa pü Ephesus lü ru thopü tata. 22Pü tavo Caesarea tsoyi de ta Jerusalem lü kho tavo kehucelü kebako kelüsü, side ta Antioch lü kita. 23Pütühu sülü ba, süsa ta Galatia mu Phrygia rünako lü vo, side kemelü miko thi kethepu shusü.
Apollo yitho
24Jew mipü püza Apollo, Alexandria lü pümenuyi, jüpo kese shupü, ketho lesi se meve shu, ta Ephesus lü vori. 25Thüma hio Niepoo zhorele kolü metha pü ketamipü, pülüni kene shupü, pü kepo keti kolü metsü mu Niepoo zhüko metha menu shuyo, pü John jülo kepüo zhoko kese lebi. 26Pü thepu shude Synagogue lü jüpo sü, Aquila mu Priscilla ni püfü renisü, uni püzü unice voriyi, side Jihova choko povacho pü pücesü mesa meshosü. 27Pü ta Achaia cholü vota ketoce, kemelü kroko lesi thopü sajiko tsüsü, püzüyi node; Pü ta kevorice tavo uko khrühi shusü, ngokemezhelü melü keyiko. 28Kekrelamori pü methi mhüjülü Jewko hüpü ketho lesiko popü uko mekasü, Jisu sü Khristao (Messiah) zo.
ទើបបានជ្រើសរើសហើយ៖
MHATHOKO 18: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
