MHATHOKO 13
13
Barnabas mu Saul ni ketsü kesü
1Tsühi, Antioch kehulü sajukepo mu kemetha sheri ba, hiko biti: Barnabas, Simeon pücüpü Niger siyo, Lucius Cyrenemi, Manaen Herod kede balü kebamipü, mu Saul. 2Uko Niepoo zhopo thi mu mevo kebace, Kemesa Rüpü poti, Saul mu Barnabas ni kho kekre vate alano, mhatholü achoyi thi ketola I uni cüyi. 3Uko kecho thi mu mevo bade ube chopü uniyo sü, side uni ketsü süva.
Apostleko Cyprus lü zhopo kethi
4Kemesa Rüpülü uni ketsü kesüsa uni ta Seleucia lüvo de rutho khi Cyprus lü vota. 5Uni ta Salamis lü vori tice, uni Jews kehuce Synagogues kolü Jihova jü zhopo thivo, uni yitholü John (Mark) ri züta. 6Uni tavo cejü rethi tsokemo Paphos lü vori, mipüza Bar-jesus Jewmi zü kesüyi, kemedasaju kepo thenyümi. 7Pü Sergius Paulus khro kezho mipü, mhakese mipü, pü Barnabas mu Saul ni cüsü de unice Jihova jü reni nyüde. 8Kemedu keti mipü Elymas (pü zatho cebi) vori uni zü thatha, kekrelamori kezhoo (pro-consul) po unifü reni mo mu kemelü lü vori mo ketola. 9Süsa Saul (püza thopü Paul thi ketao) Kemesa Rüpü pü chupü pümhüpü püpe türüsü. 10Kedove medamedu keta, no therü kesuo nu, no kemezi metsu mu ngomu ketao, no Niepoo cho kemezi mu keveko thi mesu ketalü ukethüyi ho zome? 11Hihe, tsühi Niepoo be n yo kutato, no nmhü cetato, pütühu no nace ngomo tato. Sizisü metha kemhü mu kezü püyo vota; humipo pübece püchotha de püzü votano phuta. 12Süsa kezhoo sü süo ngode püngo thita mu Niepoo zhoko kengola melü ri yita.
Paul mu Barnabas ni ta Antioch lü Pesidia lü vota
13Paul mu püzüko Paphos lü reyipra ketasa ta Perga lü Pamphylia lü vota. Vele John (Mark) ta sala Jerusalem lü vota. 14Vele uni Perga lü ta Antioch lü Pisidia lü vorita. Uni deoba nha ta kereshücelü lü de bayi. 15Thezho lesiko mu saju kepoko phri kevasa kereshücelü kezhoko uni ketsode poti, Ne usazüjüramiko mhace ketarho ti jühu thümako ce posü nyü ba tisa po süri veho. 16Süsa Paul süthayi, pübepü ukoce chosü de poti, Ne Israel thümako, ne Jihova reshü ketako, neko afü reni süte. 17Jihova thüma hiko potsa neko kedayi, uko Egypt lü sekemo thüma thi ketace pü uko phu rekrüsü, pübo kerekrü khipü uko zü prasü. 18Tütse heda mesüpü uko nhatsalü kemezhe. 19Pü rüna thüna meka va Canaan lü, pü cejü süko kezapü uko tsüsü, heshe heve kethilü. 20Süsalü tütse krada mu hepüngupü copemi khapü ukotsü, tavo Samuel saju kepoo ketso. 21Süsalü uko kedepü menyüta, Jihova Saul, Kishmi pü uko tsüsü, Benjamin shuye, tütse hedapü püpo kede thi. 22Pü kha kevasalü David po uko kede thi; zhopo kha kesü I David ngo yite, Jesse nu amelü bi ketipü, pü akelüko thikhrü yito. 23Hio salü Jihova Jisu kha Israel mi Kelakeyio thisü, pü hijü popü kemeta bi. 24Pü kevori mhüjü John thelü redekeyi jülo pü Israel thümako tsü. 25John püthoko tso ketasa, neko apü sopüle lüba? I püo mo. Vele Hihe, mipü asaco vorizüho, I pü pheku sheri phrüyi sümo le. 26Thümako, sazüjürako, mu Abraham nuneko, neko dolü somi Niepoo khri mpe tayo sheri, neko ce kelakeyi jü hio khasü züho. 27Kekrelamori Jerusalem lü kehüko mu kezhoko püse kemola, mori saju kepoko jü deoba metsü phri kebako sekemola, thajü popü kemeta thitsü sü ketola pü mejova. 28Uko pü mesa keshü ngoyi mo zo sheri püpü Pilate-e mhüjülü dokhri vano sita. 29Uko thajü popü kemeta jüko thitso kevasa, süyo pü pükiri, püvo mhakhre pülü khrüva. 30Vele Jihova kesalü püphü merhü süte. 31Tüsozho kekro pü minhüngo thisü, Galilee lü püzü Jerusalem lü kevoriko, pü kengo zhopo kethiko zo. 32Hani neko ce kenü theju keve pü po süyo, thajü upotsa neko ce popü kemetako. 33Jihova u uko nuneko ce posüze, popü kemeta jüko thi kesü Jisu phü merhü süte; Cheleko kenalü thopü metati bi, “No anu, tha yowilü I nmenu sü teho.” 34Kesalü püphü merhü sü ketasü, sasa hote, hioju thopü metati “I David kekhrüpü nkhrü süto.” 35Chele lesida kekrelü poti, “No n Kemesao po kesa ngoho.” 36Kekrelamori David Jihova medolü pütülü kehüko choyi thi, zü züte, püponeko züde züte, kecekere thite. 37Vele Jihova püphü merhü kesüo kece kere ngomo. 38Süla asazüjürako, mu thümako neko seyite, thüma hio yono kejo vakeyi khapü neko tsüsüte. 39Pü melü keyiko metü mha metülü thi kemezi yito, Moses zholü uthi kemezi yiho ta ketalü. 40Süla menu yite, saju kepoko dipü popü meta sheri neko yo vori mo ketola. 41Pete, ne mhalü kerejo ketoko, nengo thiba ka tate, kekrelamori netüce I mhatho thisü, mhatho süo neko püri melü mote, humi nekoce posü zo sheri. 42Paul mu Barnabas ni tata kezüce thümako unipo theju süo deoba nha posasü no zita. 43Kehu lata kezüce Jews miko mu Judahmi kemoko nani zü ketako Paul mu Barnabas ni sameju ta; side uni ukopo Jihova ngokemezhelü tha metüyi no uko tarho sü. 44Süsanha nadelü thüma metü tavori kenguyi de Jihova jü renita. 45Vele Jews miko makro tavori ketala uko rota, jü süko Paul pokesüko metsuta, ketherüti po mu zho shüta. 46Siri Paul mu Barnabas ni thepu shude poti, Jihova jü popü neko ce sü mera ti mesüzo, vele neko se mu ngo zori melümo ta lize neko tho lüyi tate, kechothe kehü ngoyi shümo ta tisa, hani ta Gentiles (Jews kemoko) ce vo tato. 47Kekrelamori Niepoo hani cepoti, nekopo Gentileko mhüjülü kevepü thi tato, nepo cejü valakolü kelakeyi thi ketola. 48Gentileko hio sekeyi ce uko nüta, uko Niepoo jü thi mele melu süta, kechothe kehü kedapü kemeta kekro kemelümi thiyi. 49Niepoo jü keyepü sükhü sümhü metüko süva. 50Vele Jewko kemelü keve mu ukhakesü thenopüko lü tho mesu süta, nadelü thüma kemele miko Paul mu Barnabas ni methi to süta, mu uni hupü jükezho khü kolü süva. 51Vele uni pheziyo renyoko kekhupü süko metsu sü, mu uni ta Iconium lü vorita. 52Sajiko kenüpo uchupü mu Kemesa Rüpü lü hüta.
ទើបបានជ្រើសរើសហើយ៖
MHATHOKO 13: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
