MHATHOKO 12
12
James dokhri keva mu Peter tüpü thejü kethi
1Pütü süce Herod kedeo pübe kemethi chopü thüma humi kehulü ketako yo süta. 2Zechopü James John jürao dokhriva. 3Jews miko süola uko nü keta pü ngo, side pü Peter ri tüyita. Hitüce khre khasü kemo tsükhri nye thiba. 4Peter tüpü thejü celü khapü mezüva, cebü hadalü thipahemi po fü bata, pükelü cukevo nye nha püpüvo thümako mhüjülü sü keto lüba. 5Sülano Peter khapü thejü celü kha mezü, vele kehuko tümozode pula Jihova ce kecho thi zoba.
Thejü celü Peter kelakeyi
6Herod püzü prari ketonha, süzi tüzülü Peter thipahemi kena dolü zü kebalü, thegi ropha kenapü pha mezü, thejü kefüko cekha kolü fütha. 7Rekri tüyo choyi mipü ta püce lüri de thejüce va vekrüta, side Peter kekhusü, pükhüco, de püce poti, Tamha süte! Pü bekhani pübeyo rezüta. 8Tüyo choyio püce pode, nchepha yite, mu npheku pü yite. Pü sübi thiyi. Nfü be yite de asa meji yite. 9Pü tapra de püsa meji vota, tüyo choyio dipü thisü sheri pü mhapüri lü vorimozo, pü kelüce zümhopü makeba bizo. 10Uni ta cepra kenalü cuprata, side ta nadelü thegi kharü lü vota; cekha süo pütho khripü uni tsüsüta: sizi ketasa tüyo choyio pü khava. 11Süsa Peter püsa lüvorita, tsüsahi asa setüyite, Niepoo pü choyimi ketsü atsü süte, Herod belü akela süte, Jews miko kemerilü ri akela süte. 12Pü chota kezhu mha süko lü kebalü ta John zu Mary celü vorita, John püza thopü Mark thi ketao, thüma kekro sülü kecho thiba. 13Peter tavo cekha ketusü. Reli mipü püza Rhoda tavo püfü renisü. 14Theno süpü Peter fü sesü, reli süpü pükenüpü cekha khrisü mota, vele ta rekri ukocevo, Peter cekha ce tha keba posü. 15Uko püpü no nyo bate sita. Vele relipü poti sizo kethozole zita, uko puce pode, pükhri zole sita. 16Vele Peter cekha kedü zo bata, uko tavo cekha khri kesüce püngoyi de uko ngo phita. 17Vele pübe chopü ukoce pode füphra hino posü, Niepoo kedipü bide püü thejü celü prasü shi tiko posü. Pü ukoce poti, “mha hiko pü James ce mu usazüjürako ceri posüte.” Pü redekhi thethi kekrelü vota. 18Tüso prari ta metha thipaheko dolü mha kebu shuta, Peter yo dipü thita sheri. 19Herod püphu medi kevasa püfü kebako pü dokhri vano posü. Pü Judea lü tasü Caesarea lü vo bata.
Herod sü
20Tyre mu Sidon koyo Herod pü nümo shuta, uko füpü thide ta püce vori; kedeo cene kekhio Blastus zü khretho thiyi, side püzü vethori thiyita; kekrelamori uko kedeo rünalü cene khipü uko rüna khrühi yo tila. 21Tüso khimekre keti pünha Herod kede füne khipü keretsoyi, de kedebayo bayi, thüma koce pü jüposü. 22Thümako semeto de püchu keti, “süsü therümi füphra zole, thüma fü mole” sisü. 23Rekri Niepoo tüyo choyimi püvüva, kekrelamori pü zapozale pü Jihova tsü kemola; sathi po pütiva de sata. 24Vele Niepoo jü ma keye mu kroku ta. 25Barnabas mu Saul nit a sala Jerusalem lü vorita, uni zhopo thi ketoko tso kevasa, uni John püza thopü Mark thi ketao zü tavori.
ទើបបានជ្រើសរើសហើយ៖
MHATHOKO 12: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
