Loos 9
9
Vajtswv Thiab Nws Haivneeg
1Kuv nyob rau hauv Khetos, tej uas kuv hais yog hais tseeb xwb kuv tsis dag. Vaj Ntsujplig tus Dawbhuv yog tus kav kuv lub siab, ua rau kuv paub tias kuv tsis dag 2thaum kuv hais tias kuv nyuajsiab npaum licas, mob kuv lub siab npaum licas vim kuv txhawj txog 3kuv haivneeg, uas yog kuv roj kuv ntshav! Txawm yog kuv yuav raug foom phem thiab raug muab txiav tawm ntawm Khetos mus los kuv yeej txaussiab, tsuav yog kuv pab tau lawv xwb. 4Lawv yog neeg Yixalayees, Vajtswv tau xaiv lawv los ua Nws cov menyuam thiab qhia Nws tus tshwjchim rau lawv; Nws tau coglus ntau yam#9:4: coglus ntau yam; tej phau ntawv qub uas xuas tes sau, muaj coglus. rau lawv thiab muab txoj Kevcai rau lawv, lawv paub pehawm Vajtswv thiab lawv tau txais tej uas Vajtswv tau coglus tseg lawm; #Khiav 9:4 5lawv yog cov Henplais tej yawgkoob uas nto moo lug tej cajces; thiab Khetos, tus uas los yug ua neeg, Nws yog lawv haivneeg. Thov kom Vajtswv tus uas kav ibpuas tsavyam tau txais kev qhuas mus ibtxhis li!#9:5: Thov kom Vajtswv tus uas kav ibpuas tsavyam tau txais kev qhuas mus ibtxhis li! lossis Thiab thov kom Nws, tus uas yog Vajtswv uas kav ibpuas tsavyam tau txais kev qhuas mus ibtxhis li! Amees.
6Kuv tsis tau hais tias Vajtswv tsis ua rawsli Nws tej lus cogtseg; rauqhov tsis yog txhua tus uas yug los ntawm cajces Yixalayees es txawm yuav yog Vajtswv haivneeg huv tibsi. 7Thiab tsis yog txhua tus uas yog Anplahas cajces txawm yuav yog Vajtswv cov menyuam huvsi. Vajtswv tau hais rau Anplahas hais tias, “Tsuas yog los ntawm Ixaj xwb, koj thiaj yuav muaj cov cajces uas Kuv tau coglus rau koj lawm.” #Chiv 21:12 8Qhov no txhais tau hais tias, cov menyuam uas yug los ntawm sab nqaijtawv,#9:8: cov menyuam uas yug los ntawm sab nqaijtawv: No yog hais txog Anplahas cajces uas muaj los ntawm nws tus tub Yisamayees, uas yog Hankas tus (saib Kalat 4:22-23). cov ntawd tsis yog Vajtswv li menyuam; tsuas yog cov uas Vajtswv xub coglus tseg lawm thiaj suav tau hais tias yog Anplahas cajces no xwb. 9Rauqhov Vajtswv cov lus cogtseg hais li no: “Thaum txog sijhawm lawm#9:9: Thaum txog sijhawm lawm; lossis Lwm xyoo txog lub caij no. kuv yuav rov tuaj, thiab Xalas yuav yug tau ib tug tub.” #Chiv 18:10
10Tsis tas li ntawd xwb, Lenpekas ob tug tub muaj tibleeg txiv xwb, uas yog peb yawgkoob Ixaj. 11-12Tiamsis uantej uas nkawd yug, lossis uantej uas nkawd ua ib yam dabtsi li, txawm yuav ua tau zoo thiab phem los xij, Vajtswv twb hais rau Lenpekas lawm hais tias, “Tus hlob yuav ua tus yau qhev.” Qhov uas Vajtswv xaiv li ntawd yog raws nraim li Nws lub homphiaj, tsis yog rawsli tes haujlwm uas nkawd ua. #Chiv 25:23 13Rawsli Vajtswv Txojlus hais tias, “Kuv hlub Yakhauj, tiamsis kuv ntxub Exaus.” #Mlakis 1:2-3
14Yogli ntawd, peb yuav hais licas? Peb yuav hais tias Vajtswv ua tsis ncaj no lov? Tsis yog li ntawd! 15Rauqhov Vajtswv hais rau Mauxes hais tias, “Kuv pomzoo tabncuab tus twg, Kuv yuav tabncuab tus ntawd, thiab Kuv pomzoo hlub tus twg, Kuv yuav hlub tus ntawd.” #Khiav 33:19 16Yogli ntawd, txhua yam uas Vajtswv ua ntawd, tsis yog ua rawsli neeg txoj kev ntshaw lossis rawsli tej uas neeg ua, tiamsis yog ua los ntawm Vajtswv txoj kev tabncuab xwb. 17Rauqhov Vajtswv Txojlus hais rau Falaus hais tias, “Kuv lub homphiaj uas tsa koj ua vajntxwv, yog kom sawvdaws pom Kuv lub hwjchim nyob rau hauv koj, thiab kom Kuv lub koob lub npe nrov-ncha mus thoob qabntuj.” #Khiav 9:16 (LXX) 18Yogli ntawd, yog Vajtswv pomzoo tabncuab tus twg, Nws yeej tabncuab tus ntawd, thiab Nws pomzoo kom tus twg tawv ncauj, Nws yeej ua kom tus ntawd tawv ncauj.
Vajtswv Txoj Kev Chim Thiab Kev Tabncuab
19Nej ib tug yuav hais rau kuv tias, “Yog muaj li ntawd, uacas Vajtswv tseem hais tias muaj tus ua txhaum thiab? Leejtwg tseem yuav tawv dhau Vajtswv?” 20Phoojywg, koj yog leejtwg, es tseem yuav nrog Vajtswv sibcav thiab? Lub laujkaub av yeej tsis hais rau tus uas puab laujkaub hais tias, “Uacas koj puab kuv zooli no?” #Yaxaya 29:16; 45:9 21Tus uas puab laujkaub nws tsis muaj cai siv tib thooj av los puab ob lub laujkaub rawsli nws lub siab nyiam lov? Txawm nws yuav puab ib lub los siv rau thaum muaj tej yam tshwjxeeb xwb, thiab puab dua ib lub los siv ua haujlwm txhua hnub los nyob ntawm nws pomzoo.
22Vajtswv los ua ib yam nkaus li ntawd. Nws xav qhia Nws txoj kev chim thiab Nws lub hwjchim rau sawvdaws pom. Tiamsis Nws ua siabntev heev rau cov neeg uas Nws chim rau, cov neeg ntawd yog cov uas Nws twb npaj txhij rau kev puastsuaj lawm; 23thiab Nws xav kom sawvdaws pom Nws tus tshwjchim ci ntsa-iab, uas Nws muab pub rau peb cov uas Nws tabncuab, thiab yog cov uas Nws tau xaiv tseg cia txais Nws tus tshwjchim. 24Peb yog cov uas Vajtswv tau hu los, tsis yog los ntawm cov Yudais los xwb, tiamsis los ntawm Lwm Haivneeg los thiab. 25Vajtswv hais nyob rau hauv phau Hauxeyas hais tias:
“Cov neeg uas tsis yog Kuv cov,
Kuv yuav hu ua ‘Kuv Cov Neeg.’
Haivneeg uas Kuv tsis hlub,
Kuv yuav hu ua ‘Cov Uas Kuv Hlub.’ #Hauxe 2:3
26Thiab nyob hauv qhov chaw uas muaj tus hais rau lawv hais tias, ‘Nej tsis yog Kuv haivneeg,’
nyob rau qhov chaw ntawd lawv yuav raug hu ua Vajtswv tus uas muaj sia nyob cov menyuam.” #Hauxe 1:0
27Thiab Yaxayas hais txog cov Yixalayees hais tias, “Txawm yog cov Yixalayees coob ib yam li tej xuabzeb ntawm ntug hiavtxwv los, tsuas muaj qeeleej thiaj yuav dim xwb; 28rauqhov tus Tswv twb yuav txiavtxim rau lub ntiajteb no sai-sai.” #Yaxaya 10:22-23 (LXX) 29Muaj li Yaxayas twb hais uantej ntawd lawm hais tias, “Yog tus Tswv uas muaj Hwjchim Loj Kawg Nkaus tsis tseg kom peb muaj cajces, ces peb yeej yuav zoo ib yam li lub nroog Xaudoos thiab lub nroog Kaumaulas.” #Yaxaya 1:9 (LXX)
Cov Yixalayees Thiab Txoj Moo Zoo
30Yogli ntawd, peb yuav hais tias Lwm Haivneeg, uas yeej tsis nrhiav txoj kev ncajncees li, tiamsis los ntawm txoj kev ntseeg, lawv ciali tau ua neeg ncajncees; 31cov Yixalayees nrhiav ib txoj kevcai kom lawv ua tau neeg ncajncees, tiamsis nrhiav tsis tau. 32Vim licas? Vim tias lawv tsis vamkhom txoj kev ntseeg, tiamsis lawv vamkhom tes haujlwm uas lawv ua. Yogli ntawd lawv thiaj dawm lub pobzeb 33uas Vajtswv Txojlus hais tias:
“Saib maj, Kuv muab ib lub pobzeb tso rau hauv lub nroog Xi-oos,
uas yuav ua rau neeg dawm,
lub pobzeb ntawd yuav ua rau lawv ntog.
Tiamsis tus uas ntseeg Nws, tus ntawd yuav tsis poob ntsejmuag.” #Yaxaya 28:16 (LXX)
ទើបបានជ្រើសរើសហើយ៖
Loos 9: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
