Loos 10
10
1Cov kwvtij, kuv lub siab ntshaw thiab kuv txoj kev thov Vajtswv ces yog xav kom kuv haivneeg Yixalayees dim lawv lub txim. 2Kuv ua tau timkhawv hais tias lawv yeej kubsiab lug rau Vajtswv, tiamsis qhov uas lawv kubsiab ntawd tsis yog rawsli txoj kev txawjntse uas tseeb. 3Vim lawv tsis paub tias txoj kev ncajncees yog los ntawm Vajtswv los, lawv thiajli nrhiav kev ua kom lawv ncajncees, yogli ntawd lawv thiaj tsis kam txais yuav Vajtswv txoj kev ncajncees. 4Khetos yog tus uas ua rau txoj Kevcai ntawd xaus lawm, kom txhua tus uas ntseeg thiaj tau ua neeg ncajncees.
Kev Dim Txim Yog Rau Txhua Tus
5Mauxes sau txog tus ncajncees uas coj rawsli txoj Kevcai, nws sau hais tias, “Tus uas coj rawsli txoj Kevcai tej lus qhia, tus ntawd yuav muaj sia nyob.” #Levi 18:5 6Tiamsis txoj kev ncajncees uas los ntawm txoj kev ntseeg, yog hais li no: “Tsis txhob hais hauv koj lub siab hais tias, ‘Leejtwg yuav mus rau saum ntuj ceebtsheej?’ ” (uas yog mus coj Khetos los). #2Kev 30:12-14 7“Lossis hais tias, ‘Leejtwg yuav mus rau hauv lub qhov tob-tob?’ ” (uas yog mus coj Khetos hauv qhovtuag rovqab los.) 8Tseeb tiag, txoj kev ncajncees yog hais li no: “Vajtswv Txojlus nyob ze koj, nyob hauv koj lub qhovncauj thiab hauv koj lub siab” (uas yog txojlus uas hais txog txoj kev ntseeg uas peb qhia). 9Yog koj lub ncauj lees hais tias Yexus yog tus Tswv thiab koj lub siab ntseeg tias Vajtswv twb tsa Nws sawv hauv qhovtuag rovqab los lawm, ces koj yuav dim. 10Rauqhov tus uas ntseeg hauv nws lub siab, Vajtswv suav hais tias nws yog neeg ncajncees, thiab tus uas lees ntawm nws lub ncauj, tus ntawd yog tus uas dim txim. 11Vajtswv Txojlus hais tias, “Txhua tus uas ntseeg Nws, tus ntawd yuav tsis poob ntsejmuag.” #Yaxaya 28:16 (LXX) 12Qhov no yog hais rau txhua tus, rauqhov cov Yudais thiab Lwm Haivneeg yeej zoo tibyam nkaus; Vajtswv yog sawvdaws tus Tswv thiab Nws yeej foom koobhmoov nplua-mias rau txhua tus uas thov txog Nws. 13Vajtswv Txojlus hais tias, “Txhua tus uas thov txog tus Tswv lub npe, tus ntawd yuav dim.” #Yau 2:32
14Tiamsis lawv yuav ua licas thov tus uas lawv twb tsis tau ntseeg? Thiab lawv yuav ua licas ntseeg tus uas lawv twb tsis tau hnov dua? Thiab lawv yuav ua licas hnov yog tsis muaj neeg qhia lawv? 15Thiab lawv yuav ua licas qhia yog tsis muaj leejtwg xa lawv mus? Vajtswv Txojlus thiaj sau tseg hais tias, “Cov neeg uas xa Txoj Moo Zoo mas lawv txhais kotaw zoonkauj kawg li!” #Yaxaya 52:7 16Tiamsis tsis yog txhua tus yuav kam ntseeg Txoj Moo Zoo ntawd. Yaxayas hais tias, “Tus Tswv, leejtwg twb ntseeg tej uas peb qhia ntawd lawm?” #Yaxaya 53:1 (LXX) 17Yogli ntawd, kev ntseeg yog los ntawm qhov uas hnov Txoj Moo Zoo, thiab kev hnov Txoj Moo Zoo yog los ntawm qhov uas qhia txog Khetos.
18Tiamsis kuv nug hais tias, lawv tsis tau hnov Txoj Moo Zoo lov? Qhov tseeb tiag, lawv yeej hnov lawm, rauqhov Vajtswv Txojlus hais tias:
“Lawv lub suab twb nrov mus thoob ntiajteb,
thiab lawv tej lus twb ncha mus txog qabntuj kawg lawm.” #Nnkauj 19:4 (LXX)
19Kuv rov nug dua hais tias, puas yog cov neeg Yixalayees tsis totaub? Mauxes twb xub hais lawm hais tias:
“Kuv yuav ua kom nej khib
cov neeg uas tsis muaj tebchaws;
thiab Kuv yuav ua kom nej chim
rau haivneeg ruam.” #2Kev 32:21 (LXX)
20Thiab Yaxayas tseem muaj siab tawv hais tias:
“Cov neeg uas tsis nrhiav Kuv,
lawv twb ntsib Kuv lawm,
cov neeg uas tsis nug txog Kuv,
Kuv twb los tshwm rau lawv pom lawm.” #Yaxaya 65:1 (LXX)
21Tiamsis nws hais txog cov Yixalayees hais tias, “Vajtswv hais tias, ‘Kuv tsa Kuv ob txhais tes tashnub tostxais cov neeg uas tsis mlooglus thiab cov neeg uas ntxeevsiab.’ ” #Yaxaya 65:2 (LXX)
ទើបបានជ្រើសរើសហើយ៖
Loos 10: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
