Malakaus 2
2
Yexus Kho Tus Txivneej Uas Tuagtes Tuagtaw
(Mathais 9:1-8; Lukas 5:17-26)
1Tau ob-peb hnub tomqab ntawd Yexus rovqab los txog rau hauv lub nroog Kapena-us, sawvdaws hnov tias Yexus rov los tsev lawm. 2Muaj neeg coob-coob tuaj nyob puv tsev tas, txawm yog ntawm qhovrooj los twb tsis tau chaw li thiab. Ces Yexus txawm qhia Txoj Moo Zoo rau lawv mloog. 3Muaj plaub leeg kwv ib tug txivneej tuagtes tuagtaw tuaj cuag Yexus. 4Tiamsis vim muaj neeg coob-coob, lawv tsis tau kev kwv nws mus cuag Yexus, yogli lawv thiaj tho saum rutsev, txheej tsev lastshav, thiab rhuav ib qho ncaj ntawm Yexus rau saud. Thaum lawv qhib tau lawm, lawv thiaj muab hlua khi daim lev uas pua nws thiab tso dauv mus rau hauv. 5Thaum Yexus pom tias lawv muaj kev ntseeg heev, Nws txawm hais rau tus txivneej uas tuagtes tuagtaw ntawd hais tias, “Metub 'e, koj lub txim twb raug zam lawm.”
6Cov xibhwb uas qhia Kevcai qeeleej uas nyob ntawd txawm xav tias, 7“Ua licas Nws yuav hais li ntawd? Nws hais li ntawd, kuj yog Nws saib tsis taus Vajtswv! Tsis muaj leejtwg zam tau neeg lub txim, tsuas yog Vajtswv tibleeg xwb thiaj zam tau!”
8Tamsim ntawd Yexus twb paub tej uas lawv xav lawm, Nws thiaj hais rau lawv tias, “Uacas nej yuav xav li ntawd? 9Lolus uas hais rau tus txivneej tuagtes tuagtaw no hais tias, ‘Koj lub txim twb raug zam lawm,’ lossis lo uas hais tias, ‘Ciali sawvtsees, nqa koj daim lev thiab mus tsev.’ Ob lolus no lo twg yoojyim hais dua? 10Kuv yuav ua li no qhia rau nej paub tias Neeg Leejtub muaj hwjchim nyob hauv ntiajteb zam tau neeg lub txim.” Yexus thiaj hais rau tus txivneej tuagtes tuagtaw hais tias, 11“Kuv hais rau koj hais tias, koj ciali sawvtsees, nqa koj daim lev thiab mus tsev!”
12Thaum sawvdaws tabtom ntsiantsoov nws, nws txawm sawvtsees, nqa hlo nws daim lev thiab tawm nrawm nroos mus lawm. Lawv sawvdaws ciali xav tsis thoob li, lawv qhuas Vajtswv hais tias, “Peb tsis tau pom dua li no ib zaug li!”
Yexus Hu Levis
(Mathais 9:9-13; Lukas 5:27-32)
13Yexus rovqab mus nram ntug Hiavtxwv Kalilais. Muaj ib pab neeg coob-coob tuaj cuag Nws, ces Nws txawm pib qhia lawv. 14Thaum Yexus tabtom taug kev mus, Nws pom ib tug txivneej sau se hu ua Levis uas yog Alafais tus tub, zaum ntawm lub rooj sau se. Yexus hais rau nws tias, “Koj ciali nrog Kuv mus.” Ces Levis txawm sawvtsees nrog Nws mus.
15Dhau ntawd Yexus mus noj mov hauv Levis tsev.#2:15: hauv Levis tsev; lossis hauv Nws lub (uas yog Yexus lub) tsev. Muaj cov neeg sau se thiab cov neeg muaj txim ntau leej nrog Yexus mus, thiab muaj coob leej nrog Yexus thiab Nws cov thwjtim noj mov uake. 16Qeeleej hauv cov xibhwb uas qhia Kevcai uas yog cov Falixais, pom Yexus nrog cov neeg muaj txim thiab cov neeg sau se noj mov uake, lawv txawm nug Yexus cov thwjtim hais tias, “Uacas Nws nrog cov neeg sau se thiab cov neeg muaj txim noj mov uake?”
17Yexus hnov lawv nug li ntawd, Nws txawm teb tias, “Cov neeg tsis muaj mob yeej tsis cheemtsum kws-khomob, tsuas yog cov muaj mob thiaj cheemtsum xwb. Kuv tsis yog los hu cov neeg ncajncees, tiamsis yog los hu cov neeg muaj txim.”
Nug Txog Kevcai Yoo Mov
(Mathais 9:14-17; Lukas 5:33-39)
18Muaj ib zaug Yauhas tus uas muab neeg ua kevcai rausdej cov thwjtim thiab cov Falixais tabtom ua kevcai yoo mov, txawm muaj neeg tuaj nug Yexus hais tias, “Vim licas Yauhas cov thwjtim thiab cov Falixais cov thwjtim ua kevcai yoo mov, tiamsis Koj cov tsis ua?”
19Yexus teb tias, “Nej xav tias thaum tus nraugvauv tseem nrog nws cov phoojywg noj tshoob uake, lawv yuav yoo mov no lov? Yog tus nraugvauv tseem nrog lawv nyob, lawv yeej yuav tsis yoo li. 20Tiamsis yuav muaj ib lub sijhawm uas luag tuaj coj tus nraugvauv tawm ntawm lawv mus, thaum ntawd lawv mam yoo mov.
21“Tsis muaj leejtwg yuav muab daim ntaub tshiab los ntxiv rau lub tsho qub, rauqhov thaum daim ntaub tshiab txoom, yuav ua rau lub tsho qub yimhuab ntuag loj dua qub ntxiv. 22Lossis tsis muaj leejtwg yuav muab cov cawv txivhmab tshiab ntim rau hauv lub hnabtawv qub, rauqhov cov cawv txivhmab tshiab yuav ua rau lub hnabtawv qub tawg, thaum ntawd cov cawv txivhmab thiab lub hnabtawv qub yuav tsis zoo siv lawm. Yogli ntawd, cov cawv txivhmab tshiab yuavtsum muab ntim rau hauv lub hnabtawv tshiab.”
Nug Txog Hnub Xanpataus
(Mathais 12:1-8; Lukas 6:1-5)
23Muaj ib zaug uas yog hnub Xanpataus, Yexus tau taug kev hla hauv ib daim teb nplej mus. Nws cov thwjtim uas nrog Nws taug kev mus ntawd, lawv txawm de tej hnab nplej los tev noj. #2Kev 23:25 24Cov Falixais thiaj hais rau Yexus tias, “Koj saib seb, hnub Xanpataus Koj cov thwjtim ua li ntawd, mas yog lawv ua txhaum peb txoj Kevcai lawm.”
25Yexus teb tias, “Nej tsis tau nyeem txog zaj uas Daviv ua thaum nws thiab nws cov neeg tshaib plab es lawv xav tau mov los noj lov? 26Daviv mus rau hauv lub Tuamtsev thiab muab tej ncuav uas twb muab fij rau Vajtswv lawm los noj. Thaum ntawd yog lub sijhawm uas Anpiyathas ua tus Tuam Povthawj Hlob. Rawsli peb txoj Kevcai, tsuas yog cov povthawj hlob thiaj noj tau tej ncuav ntawd xwb, tiamsis Daviv noj thiab muab faib rau nws cov neeg noj huv tibsi.” #1Xamu 21:1-6
27Yexus xaus lus hais tias, “Vajtswv tsim hnub Xanpataus los rau neeg; tsis yog tsim neeg los rau hnub Xanpataus. 28Yogli ntawd, Neeg Leejtub yog tus Tswv ntawm hnub Xanpataus.”
ទើបបានជ្រើសរើសហើយ៖
Malakaus 2: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.