Levis Kevcai 5
5
Tej Uas Yuavtsum Muaj Fij Khoom Daws Kev Txhaum
1“Kev fij khoom daws kev txhaum yog muaj li nram no:
“Yog leejtwg raug hu mus ua timkhawv rau hauv tsev tu plaub, es nws npog tsis qhia tej uas nws tau pom lossis tau paub lawm, nws yuav tau ris lub txim txhaum ntawd.
2“Txawm yog leejtwg tsis tau txhobtxwm mus kov tej uas tsis huv, xwsli tej tsiaj tuag los xij, tus ntawd yog neeg tsis huv thiab yog neeg muaj txim lawm.
3“Txawm yog leejtwg tsis tau txhobtxwm mus kov ib yam khoom tsis huv uas yog los ntawm ib tug neeg twg los xij, thaum nws paub lawm ces nws yog neeg muaj txim lawm.
4“Yog leejtwg lam tau lam coglus, txawm yog coglus zoo lossis phem, thaum nws paub lawm ces nws yog neeg muaj txim lawm.
5“Thaum leejtwg tau ua txhaum ntawm ib yam uas hais no lawm, nws yuavtsum lees lub txim ntawd; 6vim nws yuav tau raug teemtxim, yogli ntawd nws yuavtsum coj ib tug maum yaj lossis maum tshis mus tua fij rau tus TSWV. Tus povthawj hlob mamli muab coj mus ua khoom fij daws nws lub txim.
7“Tiamsis yog nws fabpeem tsis tau ib tug yaj lossis ib tug tshis, nws yuavtsum nqa ob tug nquab taug lossis ob tug nquab nyeg mus fij rau tus TSWV daws nws lub txim, muab ib tug fij daws txim, thiab muab ib tug hlawv ua khoom fij. 8Nws yuav tau nqa ob tug nquab ntawd mus rau tus povthawj hlob, mas tus povthawj hlob mamli muab tus nquab uas daws txim fij uantej. Nws muab tus nquab ntawd lov cajdab kom tuag, tiamsis tsis txhob ua kom lub taubhau tu 9thiab muab ib qho ntshav nchos rau ib sab ntawm lub thaj. Muab cov ntshav uas seem coj mus tso rau ntawm lub taw thaj. Qhov no yog kev fij khoom daws txim. 10Ces nws mamli muab tus nquab thib ob los hlawv ua khoom fij rawsli txoj kevcai. Qhov no yog tus povthawj hlob fij khoom theej txhoj daws tus neeg ntawd lub txim, kom nws lub txim thiaj yuav raug zam.
11“Tiamsis yog nws fabpeem tsis tau ob tug nquab taug lossis ob tug nquab nyeg, nws yuavtsum tau nqa 1 kilus hmoov nplej mus fij daws nws lub txim. Tiamsis nws tsis txhob hliv roj txivntoo lossis hmoov tshuaj tswqab xyaw cov hmoov nplej ntawd, rauqhov yog yuav coj mus fij daws txim, tsis yog fij qoobloo. 12Nws nqa cov hmoov nplej ntawd mus rau tus povthawj hlob, ces tus povthawj hlob mamli muab tes yawm ib phoovtes ua kev nco txog fij rau tus TSWV, thiab mam coj mus tso rau saum lub thaj ua khoom noj fij hlawv rau tus TSWV, uas yog ua khoom fij daws txim. 13Qhov uas tus povthawj hlob ua li no twb yog nws muab tej khoom theej txhoj los fij daws tus neeg ntawd lub txim, kom nws lub txim thiaj yuav raug zam. Cov hmoov nplej uas seem cia ua tus povthawj hlob tug, ib yam li tej qoobloo coj tuaj fij thiab.”
Kevcai Fij Khoom Daws Kev Txhaum
14Tus TSWV hais rau Mauxes tias, 15“Yog muaj leejtwg ua txhaum uas tsis yog txhobtxwm ua rau tus TSWV tej khoom uas dawbhuv los xij, nws yuavtsum coj ib tug laug yaj lossis laug tshis uas tsis muaj ib qho phem li mus fij rau tus TSWV daws nws lub txim. Tus tsiaj ntawd yuavtsum ntaus nqi kom rawsli nomtswv kevcai. 16Nws yuavtsum them rau tej khoom dawbhuv uas nws tau ua txhaum tag los lawm thiab yuavtsum muab neesnkaum feem pua ntxiv rau tus TSWV. Nws yuav tau muab cob rau tus povthawj hlob, ces tus povthawj hlob mam muab tus laug yaj lossis tus laug tshis ntawd fij daws tus neeg ntawd tej kev txhaum, kom nws lub txim thiaj yuav raug zam.
17“Yog muaj leejtwg ua txhaum uas tsis yog txhobtxwm ua hla tus TSWV tej lus xaaj ib nqe twg, nws muaj txim thiab yuav tau them nqi rau lub txim ntawd. 18Nws yuavtsum coj ib tug laug yaj lossis laug tshis uas tsis muaj ib qho phem li mus rau tus povthawj hlob fij daws nws lub txim. Tus tsiaj ntawd yuavtsum ntaus nqi kom rawsli nomtswv kevcai. Tus povthawj hlob yuavtsum muab tus tsiaj ntawd fij daws tus neeg ntawd tej kev txhaum uas nws tsis tau txhobtxwm ua, kom nws lub txim thiaj yuav raug zam. 19Qhov no yog fij khoom daws nws lub txim uas nws tau ua txhaum rau tus TSWV.”
ទើបបានជ្រើសរើសហើយ៖
Levis Kevcai 5: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.