Levis Kevcai 4
4
Fij Khoom Ua Kevcai Daws Tej Kev Txhaum Uas Tsis Yog Txhobtxwm Ua
1Tus TSWV hais rau Mauxes tias, 2“Koj qhia rau cov Yixalayees paub tias yog leejtwg ua txhaum thiab hla tus TSWV tej lus xaaj uas tsis yog nws txhobtxwm ua, yuav tau ua rawsli tej kevcai nram qab no.
3“Yog tus Tuam Povthawj Hlob yog tus ua txhaum es nws tej kev txhaum ntawd tau poob los rau cov pejxeem, nws yuavtsum tau coj ib tug ntsuag nyuj uas tsis muaj ib qho phem li tuaj tua fij rau tus TSWV daws nws lub txim. 4Nws yuavtsum coj tus nyuj ntawd mus rau ntawm lub qhovrooj uas mus rau hauv lub Tsevntaub Sibntsib, tsa nws txhais tes rau saum tus nyuj taubhau thiab muab tua tabmeeg tus TSWV rau ntawd. 5Ces tus Tuam Povthawj Hlob yuavtsum nqa tus ntsuag nyuj ntawd cov ntshav ib qho mus rau hauv lub Tsevntaub Sibntsib. 6Nws yuavtsum muab nws tus ntivtes tub cov ntshav ntawd coj mus nchos xya zaug rau ntawm hauvntej daim ntaub uas quas Chav Dawbhuv. 7Thiab nws yuavtsum muab ib co ntshav pleev cov kub saum plaub cegkaum thaj hlawv hmoov tshuaj tswqab uas nyob hauv lub Tsevntaub Sibntsib. Nws yuavtsum muab cov ntshav uas seem coj mus hliv rau lub taw thaj uas hlawv tej khoom theej txhoj ntawm lub Tsevntaub Sibntsib lub qhovrooj. 8Nws yuavtsum muab tus nyuj ntawd tej roj luas tawm kom tag huv tibsi nrog cov npluag roj uas npog tej plab hnyuv thiab siab-ntsws, 9Ob lub raum thiab tej npluag roj uas npog ob lub raum, thiab nplais siab uas zoo tshajplaws.
10“Ces tus povthawj hlob mamli muab cov nqaij rog no coj mus hlawv rau saum lub thaj uas hlawv tej khoom fij, ib yam li nws muab tej tsiaj uas tua fij ua kev sib raugzoo tej nqaij rog coj mus hlawv thiab. 11Tiamsis nws yuavtsum muab daim tawv, cov nqaij, lub taubhau, plaub ceg, thiab tej hnyuv huv tibsi, 12nqa tawm mus rau sabnraum ntug yeej ntawm qhov chaw dawbhuv uas pheej coj cov tshauv mus nchuav rau, muab tej ntawd tso rau saum pawg taws thiab muab hlawv.
13“Yog tagnrho haivneeg Yixalayees tau ua txhaum uas yog txhaum tus TSWV tej lus xaaj ib nqes twg uas tsis yog txhobtxwm ua, 14thaum sawvdaws paub lawm, cov pejxeem yuavtsum coj ib tug ntsuag nyuj mus tua fij daws kev txhaum rau ntawm lub Tsevntaub Sibntsib; 15cov thawjcoj ntawm cov pejxeem los tsa tes rau saum tus nyuj ntawd taubhau thiab muab tus nyuj tua rau ntawd. 16Ces tus Tuam Povthawj Hlob mamli nqa ib co ntshav nyuj mus rau hauv lub Tsevntaub Sibntsib, 17muab nws tus ntivtes tub cov ntshav ntawd, thiab muab nchos xya zaug rau ntawm hauvntej daim ntaub uas quas Chav Dawbhuv. 18Thiab nws yuav tau muab ib co ntshav coj mus pleev cov kub saum plaub cegkaum thaj uas hlawv hmoov tshuaj tswqab uas nyob hauv lub Tsevntaub Sibntsib thiab muab cov ntshav uas seem hliv rau lub taw thaj uas hlawv tej khoom fij ntawm lub Tsevntaub Sibntsib lub qhovrooj. 19Nws yuav tau muab tagnrho tej nqaij rog coj mus hlawv rau saum lub thaj.
20“Nws ua tibyam nkaus li nws fij tus nyuj uas ntxuav tej kev txhaum ntag. Qhov uas nws ua li no twb yog nws fij khoom ntxuav cov pejxeem lub txim, kom lawv lub txim thiaj yuav raug zam. 21Ces nws mam coj tus nyuj mus hlawv rau sab ntug yeej nraud, ib yam li nws hlawv tus nyuj uas fij daws nws lub txim. Qhov no yog kev fij khoom ua kevcai tshem cov pejxeem tej kev txhaum.
22“Yog ib tug nomtswv tau ua txhaum uas yog txhaum tus TSWV tej lus xaaj ib nqes twg uas tsis yog nws txhobtxwm ua, 23thaum uas luag qhia nws txoj kev txhaum rau nws paub lawm, nws yuavtsum coj ib tug laug tshis uas tsis muaj ib qho phem li mus tua fij theej txhoj. 24Nws yuavtsum tsa nws txhais tes rau saum tus tshis ntawd taubhau thiab muab tus tshis ntawd tua rau ntawm lub thaj sab ped, qhov chaw uas tua tsiaj hlawv ua khoom fij. Qhov no yog fij khoom ua kevcai tshem nws tej kev txhaum. 25Tus povthawj hlob yuavtsum muab nws tus ntivtes tub cov ntshav tsiaj coj mus pleev cov kub saum plaub cegkaum thaj, thiab muab cov ntshav uas seem hliv ywg lub taw thaj. 26Ces nws yuav tau muab tagnrho tej nqaij rog coj mus hlawv rau saum lub thaj, ib yam li nws hlawv tej nqaij rog uas yog tej tsiaj uas tua fij ua kev sib raugzoo. Qhov no yog txoj kev uas tus povthawj hlob fij khoom theej txhoj tshem tus nom ntawd lub txim, kom nws lub txim thiaj yuav raug zam.
27“Yog cov pejxeem ib tug twg tau ua txhaum uas yog ua txhaum tus TSWV tej lus xaaj ib nqes twg uas tsis yog txhobtxwm ua, #Teev 15:27-28 28thaum uas luag qhia nej txoj kev txhaum rau nej paub lawm, nej yuavtsum coj ib tug maum tshis uas tsis muaj ib qho phem li mus tua fij theej txhoj. 29Nej yuavtsum tsa nej txhais tes rau saum tus maum tshis ntawd taubhau, thiab muab tus maum tshis ntawd tua rau ntawm lub thaj sab ped, qhov chaw uas tua tsiaj hlawv ua khoom fij.
30“Ces tus povthawj hlob mamli muab nws tus ntivtes tub cov ntshav tshis coj mus pleev rau saum cov kub plaub cegkaum ntawm lub thaj, thiab muab cov ntshav uas seem hliv ywg lub taw thaj. 31Ces nws yuav tau muab tej roj luas tawm tagnrho ib yam li luas tej tsiaj uas tua fij ua kev sib raugzoo tej roj, thiab nws mamli muab coj mus hlawv rau saum lub thaj kom tswqab ntxiag ua rau tus TSWV txaussiab heev. Qhov no yog tus povthawj hlob fij khoom theej txhoj daws tus neeg ntawd lub txim, kom nws lub txim thiaj yuav raug zam.
32“Yog nej coj ib tug yaj tuaj tua daws nej lub txim, tus yaj ntawd yuavtsum yog tus maum, thiab tsis muaj ib qho phem li. 33Nej yuavtsum tsa nej txhais tes rau saum tus maum yaj ntawd taubhau, thiab muab tus maum yaj ntawd tua rau ntawm lub thaj sab ped, qhov chaw uas tua tsiaj hlawv ua khoom fij. 34Tus povthawj hlob mamli muab nws tus ntivtes tub cov ntshav tsiaj coj mus pleev rau saum cov kub plaub cegkaum ntawm lub thaj, thiab muab cov ntshav uas seem hliv ywg lub taw thaj. 35Ces nws yuav tau muab cov roj luas tawm kom tag, ib yam li nej luas cov roj tawm ntawm tus yaj uas coj mus tua fij ua kev sib raugzoo, thiab muab coj mus hlawv saum lub thaj nrog rau cov khoom noj fij rau tus TSWV. Qhov no yog tus povthawj hlob fij khoom theej txhoj daws nej lub txim, kom nej thiaj yuav raug zamtxim.
ទើបបានជ្រើសរើសហើយ៖
Levis Kevcai 4: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.