Levis Kevcai 17
17
Tsis Txhob Noj Ntshav
1Tus TSWV hais rau Mauxes 2kom hais rau Aloos thiab Aloos cov tub thiab cov Yixalayees sawvdaws tias: 3-4“Yog cov Yixalayees leejtwg tua ib tug nyuj, lossis ib tug yaj, lossis ib tug tshis fij rau tus TSWV nyob rau qhovtwg los xij, yog nws tsis coj tuaj tua rau ntawm lub qhovrooj uas mus rau hauv lub Tsevntaub Sibntsib, tus ntawd muaj txim vim nws tau ua rau ntshav nrog lawm; yuav muab nws rho tawm ntawm Vajtswv haivneeg mus. 5Lub ntsiab ntawm lolus xaaj no yog qhia hais tias nimno cov Yixalayees coj tau tej tsiaj uas lawv txeev coj mus tua tom tej tiajnrag tuaj fij rau tus TSWV lawm. Txij no mus lawv yuavtsum coj tej tsiaj ntawd tuaj rau tus povthawj hlob ntawm lub qhovrooj uas mus rau hauv lub Tsevntaub Sibntsib thiab muab tej tsiaj ntawd tua fij rau tus TSWV ua kev sib raugzoo. 6Tus povthawj hlob yuav tau muab cov ntshav nchos puagncig lub thaj uas nyob ntawm lub Tsevntaub Sibntsib lub qhovrooj, thiab muab cov nqaij rog hlawv kom tswqab ntxiag ua rau tus TSWV txaussiab. 7Cov Yixalayees yuavtsum tseg tsis txhob ua tsis ncaj rau tus TSWV los ntawm qhov uas lawv pheej tua tej tsiaj fij rau tej dab tshis tom tej tiajnrag. Cov Yixalayees yuavtsum coj txoj kevcai no ib tiam rau ib tiam mus li.”
8“Thiab koj hais rau lawv tias, cov Yixalayees lossis cov neeg txawv tebchaws txhua tus uas nrog nej nyob uake, yog leejtwg tua tsiaj hlawv fij lossis fij theej txhoj 9uas yog muab fij rau tus TSWV, tiamsis tsis coj tuaj tua rau ntawm lub qhovrooj uas mus rau hauv lub Tsevntaub Sibntsib, yuavtsum muab tus ntawd rho tawm ntawm Vajtswv haivneeg mus.
10“Yog cov Yixalayees lossis cov neeg txawv tebchaws uas nrog nej nyob uake, noj tej nqaij uas txheem ntshav, tus TSWV yuav tawmtsam tus ntawd thiab yuav muab nws rho tawm ntawm Vajtswv haivneeg mus. #Chiv 9:4; Levi 7:26-27; 19:26; 2Kev 12:16, 23; 15:23 11Txojsia ntawm txhua yam uas ciajsia yog nyob hauv cov ntshav, vimli ntawd tus TSWV thiaj xaaj kom muab tagnrho tej ntshav hliv rau saum lub thaj ua kev daws neeg tej kev txhaum. Ntshav yog txojsia, thiaj daws tau kev txhaum. #Henpl 9:22 12Vimli ntawd tus TSWV thiaj xaaj rau cov Yixalayees tsis pub lawv lossis cov neeg txawv tebchaws uas nrog lawv nyob uake noj ib qho nqaij uas txheem ntshav li.
13“Yog cov Yixalayees lossis cov neeg txawv tebchaws uas nrog nej nyob uake, leejtwg mus tua ib tug tsiaj lossis ib tug noog uas yog yam tsiaj huv los noj, yuavtsum muab cov ntshav hliv rau hauv av thiab muab av npoog rau. 14Txojsia ntawm txhua yam uas ciajsia yog nyob hauv cov ntshav. Yogli ntawd, tus TSWV thiaj hais rau cov Yixalayees kom tsis txhob noj tej nqaij uas txheem ntshav, yog leejtwg noj, yuavtsum muab tus ntawd rho tawm ntawm Vajtswv haivneeg mus.
15“Txhua tus, tsis hais cov Yixalayees lossis cov neeg txawv tebchaws, yog leejtwg noj tej tsiaj uas ciali tuag lossis tej uas raug tsiaj qus tom tuag, nws yuavtsum muab nws cev ristsho mus ntxhua, da dej, thiab nyob tos txog thaum tsausntuj mas nws thiaj yuav huv. 16Yog nws tsis ntxhua nws tej ristsho thiab tsis da dej, nws yuavtsum ris nws lub txim.”
ទើបបានជ្រើសរើសហើយ៖
Levis Kevcai 17: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.