Levis Kevcai 16
16
Hnub Ua Kevcai Theej Txhoj
1Tus TSWV hais rau Mauxes tomqab uas Aloos ob tug tub raug tua tuag thaum nkawd coj cov hluavtaws uas tsis dawbhuv mus fij rau tus TSWV. 2Tus TSWV hais rau Mauxes tias, “Koj hais rau koj tus tijlaug Aloos tias tsis yog nws yuav lam tau lam mus rau tomqab daim ntaub uas quas Chav Dawbhuv Kawg Nkaus thaum twg los tau, rauqhov Kuv tshwm hauv tauv huab los nyob rau saum daim hau npog lub Phijxab Lus Cogtseg. Yog nws tsis mlooglus, nws yuav tuag. #Henpl 6:16 3Nws muaj cai mus tau rau hauv Chav Dawbhuv Kawg Nkaus, tsuas yog thaum nws coj tus ntsuag nyuj mus tua fij daws txim thiab tus thav yaj mus tua hlawv fij nkaus xwb. #Henpl 9:7
4“Uantej Aloos yuav mus rau hauv Chav Dawbhuv Kawg Nkaus, nws yuavtsum da dej thiab hnav cev tsoostsho povthawj hlob uas yog lub tsho ntaub mag ntev, lub ris luv, sia txoj hlab ntaub mag, thiab ntoo txoj phuam.
5“Cov neeg Yixalayees yuavtsum muab ob tug laug tshis rau Aloos coj mus tua fij daws txim thiab ib tug laug yaj coj mus tua hlawv fij. 6Nws yuavtsum muab ib tug txiv nyuj coj mus fij ua khoom theej txhoj daws nws thiab nws tsev neeg lub txim. 7Ces nws yuavtsum coj ob tug laug tshis ntawd mus rau ntawm lub qhovrooj uas mus rau hauv lub Tsevntaub Sibntsib. 8Aloos yuav tau muab ob lub pobzeb los ua kev rho twv saib seb yuav muab tus twg rau tus TSWV thiab tus twg rau Axaxees.#16:8: Axaxees: Tsis paub xyov lolus Henplais no txhais licas; tejzaum yog ib lub npe rau ib tug dab uas nyob tom tiaj suabpuam. 9Aloos yuavtsum muab tus tshis uas rho tau rau tus TSWV, tua theej txhoj thiab muab fij daws txim. 10Thiab muab tus tshis uas rho tau rau Axaxees fij ciaj rau tus TSWV thiab muab tso mus rau Axaxees tom tiaj suabpuam, kom ris sawvdaws tej kev txhaum mus povtseg.
11“Thaum Aloos muab tus txiv nyuj los tua fij daws nws thiab nws tsev neeg lub txim, 12nws yuavtsum mus muab ib lub tais rau ncaigtaws uas cov ncaigtaws tseem cig ntsaj thuav ntawm lub thaj los, thiab yawm ob phoovtes hmoov tshuaj tswqab coj mus rau hauv Chav Dawbhuv Kawg Nkaus. 13Nws muab cov hmoov tshuaj tswqab tso rau saum cov ncaigtaws tabmeeg tus TSWV, kom cov pa hmoov tshuaj tswqab ncho tuaj roos lub hau Phijxab Lus Cogtseg kom Aloos tsis txhob pom lub hau Phijxab, kom nws thiaj tsis tuag. 14Nws yuavtsum nqa ib co ntshav nyuj mus thiab muab nws tus ntivtes tub cov ntshav ntawd nchos rau tom hauvntej lub hau thiab muab mentsis nchos xya zaus rau tom hauvntej lub Phijxab Lus Cogtseg.
15“Tomqab ntawd, Aloos yuav tau muab tus laug tshis uas fij daws cov pejxeem lub txim tua, thiab nqa cov ntshav mus rau hauv Chav Dawbhuv Kawg Nkaus; muab cov ntshav ntawd nchos rau tom hauvntej lub hau thiab tom hauvntej ntawm lub Phijxab Lus Cogtseg, ib yam li nws nchos cov ntshav nyuj. #Henpl 9:12 16Qhov uas Aloos ua li no, yog nws ua kevcai ntxuav Chav Dawbhuv Kawg Nkaus kom huv thiab dim ntawm tagnrho tej kev phem kev qias thiab tej kev txhaum uas cov Yixalayees tau ua los. Nws yuavtsum ua kevcai ntxuav li no rau lub Tsevntaub Sibntsib, rauqhov lub Tsevntaub ntawd nyob rau hauv lub plawv yeej uas yog qhov chaw tsis huv.
17“Thaum Aloos mus rau hauv Chav Dawbhuv Kawg Nkaus, uas yog mus ua kevcai ntxuav nws tuskheej, nws tsev neeg, thiab cov Yixalayees kom huv, mas tsis pub ib tug neeg nyob hauv lub Tsevntaub Sibntsib mus txog thaum uas nws tawm rov los. 18Nws yuavtsum mus hlawv khoom fij ntawm lub thaj thiab ua kevcai ntxuav lub thaj. Nws yuavtsum muab mentsis ntshav nyuj thiab ntshav tshis pleev rau plaub tug kub saum plaub cegkaum thaj. 19Thiab nws yuavtsum muab nws tus ntivtes tub cov ntshav ntawd nchos rau lub thaj xya zaus. Qhov uas nws ua li no yog nws ua kevcai ntxuav lub thaj kom huv thiab dim ntawm cov Yixalayees tej kev txhaum thiab ua kom lub thaj dawbhuv.
Tus Tshis Uas Ris Kev Txhaum Tawm Mus
20“Thaum Aloos ua kevcai ntxuav Chav Dawbhuv Kawg Nkaus, ntxuav lub Tsevntaub Sibntsib, thiab lub thaj tag lawm, nws yuav tau muab tus tshis uas tau xaiv tseg cia rau Axaxees#16:20: Axaxees: Saib 16:8. los fij ciaj rau tus TSWV. 21Nws yuavtsum tsa nws ob txhais tes rau saum tus tshis ntawd lub taubhau thiab lees tagnrho cov Yixalayees tej kev phem kev qias, tej kev txhaum, thiab tej kev ntxeevsiab, muab tej ntawd xa mus kom tag rau saum tus tshis lub taubhau. Ces kom tus neeg uas twb npaj tau lawm cab tus tshis ntawd mus tso rau tom tiaj suabpuam. 22Tus tshis ntawd yuav ris lawv tej txim saum nws lub taubhau nrog nws mus rau tom thaj chaw uas tsis muaj neeg nyob hlo li.
23“Ces Aloos yuavtsum rov mus rau hauv lub Tsevntaub Sibntsib, muab cev tsoostsho povthawj hlob uas nws hnav uantej nws mus rau hauv Chav Dawbhuv Kawg Nkaus hle thiab muab tso rau hauv. #Exek 44:19 24Nws yuavtsum mus da dej hauv ib chav dawbhuv thiab muab nws cev ristsho los hnav. Tomqab ntawd, nws mamli tawm los thiab muab khoom mus hlawv fij daws nws thiab cov Yixalayees lub txim. 25Nws yuavtsum muab cov nqaij rog mus hlawv rau saum lub thaj fij daws txim.
26“Tus neeg uas cab tus tshis mus rau Axaxees tom tiaj suabpuam, yuavtsum muab nws cev ristsho ntxhua thiab da dej uantej uas nws rov los rau hauv lub yeej. 27Tus txiv nyuj thiab tus laug yaj uas muab tua fij daws txim, uas twb muab cov ntshav nqa mus ua kevcai daws txim rau hauv Chav Dawbhuv Kawg Nkaus lawm, yuavtsum coj mus rau sabnraum ntug yeej; ob daim tawv, cov nqaij thiab cov plab hnyuv yuavtsum muab hlawv kom tag huv tibsi. #Henpl 13:11 28Tus uas mus hlawv tej ntawd, nws yuavtsum muab nws cev ristsho ntxhua thiab da dej uantej uas nws rov los rau hauv lub yeej.
Ua Rawsli Hnub Ua Kevcai Theej Txhoj
29“Tej kevcai no yog tej uas nej yuavtsum coj ua mus ibtxhis. Lub xya hli ntuj hnub xiab kaum, cov Yixalayees thiab cov neeg txawv tebchaws uas nrog nej nyob uake, yuavtsum ua kevcai yoo mov thiab tsis txhob ua ib yam haujlwm li. 30Rauqhov hnub ntawd yuav muaj ua kevcai theej txhoj, uas yog ntxuav tagnrho nej tej kev txhaum, nej thiajli yuav ua tau neeg huv. 31Hnub ntawd yog hnub Xanpataus uas yog hnub so, hnub ntawd nej yuavtsum yoo mov thiab tsis txhob ua ib yam haujlwm dabtsi li. Tej no yog tej kevcai uas nej yuavtsum coj thiab ua mus ibtxhis li. 32Tus povthawj hlob uas tau raug tsa los ua tus Tuam Povthawj Hlob hloov nws txiv chaw, yog tus uas ua kevcai ntxuav rau sawvdaws kom huv. Nws yuavtsum hnav cev tsoostsho povthawj hlob 33thiab ua kevcai ntxuav Chav Dawbhuv Kawg Nkaus, ntxuav lub Tsevntaub Sibntsib, lub thaj, cov povthawj hlob, thiab cov Yixalayees sawvdaws.
34“Tej kevcai no yog tej uas nej yuavtsum coj thiab ua mus ibtxhis. Yuavtsum ua txoj kevcai no ntxuav tagnrho cov Yixalayees tej kev txhaum ib xyoos ib zaug.” #Levi 23:26-32; Teev 29:7-11
Yogli ntawd Mauxes#16:34: Mauxes; lossis Aloos. thiaj ua rawsli tej uas tus TSWV tau xaaj tseg rau nws lawm.
ទើបបានជ្រើសរើសហើយ៖
Levis Kevcai 16: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.