Khiav Dim 21
21
Kev Saib Cov Qhev
(2 Kevcai 15:12-18)
1“Muab cov kevcai nram no rau cov pejxeem Yixalayees: 2Yog nej yuav ib tug neeg Henplais los ua qhev, nws tsuas ua nej qhev txog rau xyoo xwb. Xyoo thib xya, yuav tau tso nws nyob ywjsiab thiab tsis raug them nqi dabtsi. 3Yog nws tsis tau yuav pojniam thaum nws los ua nej qhev, thaum nws rovqab mus nws yuavtsum tsis txhob coj tus pojniam nrog nws mus, tiamsis yog nws twb muaj pojniam thaum nws los ua nej qhev lawm, thaum nws rovqab mus nws yuavtsum coj nws tus pojniam nrog nws mus. 4Yog tias nws tus tswv yuav pojniam rau nws thiab nws tus pojniam yug tau tub lossis ntxhais rau nws, mas tus pojniam thiab cov menyuam yog tus tswv li neeg, ces tus qhev nws tsuas tawm mus tibleeg xwb. 5Tiamsis yog tus qhev hais meej-meej tias nws hlub nws tus tswv, nws hlub nws tus pojniam thiab nws cov menyuam, thiab tsis xav tawm mus nyob ywjsiab, 6ces nws tus tswv yuav tau coj nws mus rau ntawm qhov chaw pehawm Vajtswv. Kom nws sawv npuab ntawm qhovrooj lossis ntawm tus puabrooj thiab muab nws lub nploojntseg tho qhov. Ces nws yuavtsum ua nws tus tswv qhev mus tag nws simneej. #Levi 25:39-46
7“Yog tus txivneej twg muab nws tus ntxhais muag mus ua luag qhev, mas tus ntxhais ntawd yuav tsis tau tawm mus ywjsiab li cov txivneej uas ua qhev. 8Yog muab tus ntxhais ntawd muag rau lwmtus uas xav yuav ua pojniam, tiamsis yog tus txivneej tsis nyiam tus pojniam ntawd, nws yuavtsum muab tus pojniam ntawd muag rov rau nws txiv; tus txivneej uas xav yuav nws ntawd tsis muaj cai muab nws muag rau cov neeg txawv tebchaws, rauqhov nws tau ua tsis ncaj rau tus pojniam ntawd lawm. 9Yog tus tswv twg yuav ib tug ntxhais los ua qhev thiab muab txis rau nws tus tub, nws yuavtsum saib taus tus ntxhais ntawd ib yam li yog nws yug.
10“Yog tus txivneej ntawd yuav niamyau, nws yuavtsum pub tus niamhlob kom muaj noj muaj hnav thiab pub rau nws muaj cai ib yam li yav tas los. 11Yog nws tsis ua li tej uas tau hais los saum no rau nws tus niamhlob, nws yuavtsum xa tus niamhlob ntawd rovqab thiab tsis pub kom them nyiaj rov rau nws li.
Kevcai Hais Txog Kev Ua Limhiam
12“Yog leejtwg ntaus ib tug neeg twg tuag, tus ntawd yuavtsum raug muab tua kom tuag. #Levi 24:17 13Tiamsis yog yuamkev es tsis yog txhobtxwm tua tus neeg ntawd, nws yuavtsum khiav mus nyob hauv qhov chaw uas Kuv teem cia rau nej lawm, nws thiaj yuav tsosiab tau. #Teev 35:10-34; 2Kev 19:1-13; Yaus 20:1-9 14Tiamsis yog ib tug twg chim thiab txhobtxwm tua lwmtus, txawm yog nws khiav mus nkaum rau ntawm Kuv lub thaj los nws yuavtsum raug muab tua kom tuag.
15“Yog leejtwg ntaus nws txiv lossis nws niam, yuavtsum muab tus ntawd tua kom tuag.
16“Yog leejtwg mus nyiag ib tug neeg coj mus muag lossis coj los ua nws qhev, nws yuavtsum raug muab tua kom tuag. #2Kev 24:7; 21:17; Levi 20:9; Math 15:4; Malak 7:10
17“Yog leejtwg foom phem rau nws txiv lossis nws niam, yuavtsum muab tus ntawd tua kom tuag.
18-19“Yog muaj ob tug neeg sibntaus, thiab muaj ib tug muab pobzeb txawb lossis xuas nrig rau ib tug, tiamsis nws tsis tuag, tus uas ntaus ntawd yuav tsis raug txim. Yog tus uas raug mob yuavtsum tau pw saum txaj xwb, tiamsis tomqab ntawd nws ho sawv taus nrig pas tawm mus rau nraumzoov, tus uas ntaus yuavtsum them nqi rau tus ntawd lub sijhawm uas nws raug mob thiab tu nws mus txog thaum nws zoo.
20“Yog tus tswv twg muab pas ntaus nws tus tubqhe lossis ntxhais qhev tuag tamsim ntawd, tus tswv ntawd yuavtsum raug txim. 21Tiamsis yog tus qhev ntawd tseem nyob tau ib hnub lossis ob hnub, mamli tuag, ces tus tswv yuav tsis raug txim; rauqhov nws twb poob qhov nyiaj uas mus yuav tus qhev ntawd los lawm.
22“Yog muaj tej txivneej sibcav sibceg es ntaus raug ib tug pojniam uas suab menyuam hauv plab, ua rau nws tus menyuam poob, tiamsis tus leejniam ntawd tsis raug mob, mas yuavtsum muab tus uas ntaus raug tus pojniam ntawd nplua rawsli nws tus txiv xav tau, thiab rawsli cov tu plaub pomzoo. 23Tiamsis yog tus pojniam ntawd raug mob txaus txhawj, mas yuavtsum rautxim siav pauj siav, 24qhovmuag pauj qhovmuag, hniav pauj hniav, tes pauj tes, kotaw pauj kotaw, #Levi 24:19-20; 2Kev 19:21; Math 5:38 25kubhnyiab pauj kubhnyiab, qhovtxhab pauj qhovtxhab, thiab qhov doog pauj qhov doog.
26“Yog leejtwg ntaus nws tus tubqhe lossis tus ntxhais qhev qhovmuag dig, nws yuavtsum tso tus qhev ntawd mus ywjsiab; qhov ntawd zoo ib yam li nws them tus nqi qhovmuag rau tus qhev ntawd. 27Yog nws ntaus nws tus qhev lov hniav, nws yuavtsum tso tus qhev ntawd mus ywjsiab; qhov ntawd zoo ib yam li nws them tus nqi hniav rau tus qhev ntawd.
Feemxyuam Ntawm Cov TSWV
28“Yog nyuj nrau ib tug neeg twg tuag, yuavtsum muab pobzeb txawb tus nyuj ntawd kom tuag, thiab tsis txhob noj tus nyuj ntawd tej nqaij; tiamsis tsis txhob rautxim rau tus tswv nyuj. 29Yog tus nyuj ntawd twb yeej txeev nrau neeg los lawm thiab twb muaj neeg mus hais rau tus tswv nyuj paub lawm, tiamsis nws tsis ceev tus nyuj ntawd rau hauv nkuaj, thiaj mus nrau neeg tuag, yuavtsum muab pobzeb txawb tus nyuj kom tuag, thiab tus tswv nyuj ntawd yuavtsum raug muab tua kom tuag ib yam nkaus.
30“Txawm li ntawd los, yog tus tswv txaussiab muab nyiaj txhiv nws txojsia, nws yuavtsum them rawsli tus nqi uas luag kom nws them. 31Yog tus nyuj ntawd nrau ib tug metub lossis ib tug mentxhais twg tuag, los yeej siv tib txoj kevcai no thiab. 32Yog tus nyuj ntawd nrau tus tubqhe lossis tus ntxhais qhev twg tuag, tus tswv nyuj yuavtsum them pebcaug lub txiajnyiag nqi taubhau rau tus qhev ntawd tus tswv, thiab yuavtsum muab pobzeb txawb tus nyuj ntawd kom tuag.
33“Yog leejtwg qhib daim uas npog lub qhovtshij lossis khawb ib lub qhovtshij cia tsis muab npog, es muaj ib tug nyuj lossis ib tug neesluav poob rau hauv lub qhovtshij ntawd, 34nws yuavtsum them tus nqi tsiaj ntawd. Nws them nyiaj rau tus tswv tsiaj thiab nws yuav tus tsiaj ntawd los kuj tau. 35Yog leejtwg tus nyuj mus nrau lwmtus tus nyuj tuag, mas nkawd yuavtsum muab tus nyuj uas tseem ciaj ntawd mus muag thiab muab cov nyiaj los faib sibnpaug zos rau nkawd, thiab muab tus nyuj tuag los faib ib leeg ib sab. 36Tiamsis yog tus tswv nyuj twb paub tias nws tus nyuj txeev nrau lwmtus los lawm, tiamsis nws tsis ceev tus nyuj ntawd rau hauv nkuaj, nws yuav tau muab ib tug nyuj los pauj tus nyuj uas tuag ntawd, thiab nws yuav tus nyuj uas tuag ntawd los kuj tau.
ទើបបានជ្រើសរើសហើយ៖
Khiav Dim 21: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.