Khiav Dim 22
22
Kevcai Hais Txog Kev Them Rovqab
1“Yog leejtwg nyiag luag ib tug nyuj lossis ib tug yaj thiab muab tus tsiaj ntawd tua lossis muab muag lawm, nws yuavtsum them tsib tug nyuj pauj ib tug nyuj, thiab plaub tug yaj pauj ib tug yaj. 2-4Nws yuavtsum them rau tej uas nws mus nyiag los. Yog nws tsis muaj nyiaj them, nws yuavtsum muab nws muag mus ua luag qhev thiab muab cov nyiaj los them tej nqi uas nws nyiag ntawd. Yog tus tubsab ntawd nyiag tsiaj, txawm yog nyuj, neesluav, lossis yaj, uas mus nrhiav tau tseem ciajsia thiab nws cab rawv ntawm nws tes, mas nws yuavtsum them ob tug pauj ib tug.
“Yog muaj tubsab tuaj tsoo tsev hmontuj thiab raug tua tuag, tus uas tua tus tubsab ntawd tsis muaj kev txhaum. Tiamsis yog nws tua thaum nruabhnub, ces nws muaj kev txhaum.
5“Yog leejtwg tso nws tej tsiaj mus noj zaub hauv teb lossis vaj txivhmab, thiab cov tsiaj ntawd ciali mus noj luag lwmtus tej qoob#22:5: Yog … qoob; lossis Yog leejtwg hlawv ib daim teb lossis ib lub vaj txivhmab, thiab cia hluavtaws kis mus kub luag tej qoob. hauv luag thaj teb, nws yuavtsum muab tej qoob uas zoo tshajplaws hauv nws thaj teb lossis hauv nws lub vaj txivhmab mus them.
6“Yog leejtwg hlawv nws thaj teb thiab kis mus kub luag tej pawg nplej hauv luag tej teb, thiab kub luag tej nplej uas tsis tau siav lossis twb hlais tag thiab muab sau ua pawg lawm, tus uas ua hluavtaws kub ntawd yuavtsum them tej uas raug puastsuaj tag lawm.
7“Yog leejtwg zoosiab khaws lwmtus tej nyiaj lossis tej khoom muajnqis cia rau hauv nws tsev thiab muaj tubsab tuaj nyiag tej ntawd hauv nws tsev lawm, yog nws ntes tau, mas tus tubsab ntawd yuavtsum them ob npaug. 8Tiamsis yog ntes tsis tau tus tubsab ntawd, mas yuav tau coj tus uas cia cov nyiaj ntawd mus rau ntawm qhov chaw pehawm Vajtswv, thiab kom nws tsa tes twv hais tias nws yeej tsis tau nyiag cov nyiaj ntawd.
9“Txhua rooj plaub uas yog sibtxeeb tej cuabtxhiaj cuabtam, xwsli: nyuj, neesluav, yaj, ristsho lossis lwmyam uas ploj lawm, yuavtsum coj ob tug uas sibtxeeb tej ntawd mus rau ntawm qhov chaw pehawm Vajtswv. Yog Vajtswv txiavtxim rau tus twg swb, tus ntawd yuavtsum them ob npaug rau tus uas yeej.
10“Yog leejtwg txaussiab tu lwmtus tej neesluav, nyuj, yaj lossis lwmyam tsiaj, yog tus tsiaj ntawd tuag lossis raug mob lossis muaj lwmtus muab raws khiav lawm, thiab tsis muaj neeg ua timkhawv pom, 11ces nws yuavtsum mus rau ntawm qhov chaw pehawm Vajtswv thiab tsa tes twv hais tias nws tsis tau nyiag. Yog tsis muaj neeg nyiag tus tsiaj ntawd, ces tus tswv tsiaj yuavtsum zoosiab cia tus tsiaj ntawd ploj mus, thiab tus uas saib tus tsiaj ntawd tsis tas yuav them rovqab; 12tiamsis yog muaj neeg nyiag tus tsiaj ntawd lawm, nws yuavtsum them rau tus tswv tsiaj. 13Yog muaj tsiaj qus tom tus tsiaj ntawd lawm, tus uas saib tus tsiaj ntawd yuavtsum coj tus tsiaj uas raug tom ntawd lub cev mus ua puavpheej rau tus tswv paub, yog tias tus tsiaj ntawd yeej raug tsiaj nyaum tom tuag tiag, ces nws tsis tau them.
14“Yog leejtwg mus qiv lwmtus ib tug tsiaj los ua raug mob lossis ua tuag thaum tus tswv tsis nyob ntawd pom, ces tus qiv yuavtsum them tus tsiaj ntawd. 15Tiamsis yog tuag thaum tus tswv pom ntsoov, ces tus qiv tsis tas them. Yog tus tsiaj ntawd yog tsiaj xauj, ces tsuas them cov nqi xauj ntawd xwb.
Hais Txog Kev Ncajncees Thiab Kev Ntseeg
16“Yog ib tug txivneej twg mus ntxias ib tug nkaujxwb uas tsis tau muaj neeg qhaib thiab mus nrog nws pw lawm, tus ntawd yuavtsum them tus ntxhais ntawd nqi tshoob thiab yuav nws ua pojniam. 17Tiamsis yog leejtxiv tsis kam muab nws tus ntxhais rau tus ntawd yuav ua pojniam, los nws yuavtsum them nyiaj rau leejtxiv kom txaus nkaus tus ntxhais ntawd cov nqi tshoob vim nws tseem yog tus nkaujxwb. #2Kev 22:28-29
18“Tus pojniam twg uas ua khawvkoob thiab yeessiv, yuavtsum muab nws tua kom tuag. #2Kev 18:10-11
19“Tus txivneej twg deev tsiaj, yuavtsum muab nws tua kom tuag. #Levi 18:23; 20:15-16; 2Kev 27:21
20“Yog leejtwg fij khoom rau lwmtus nyuag vajtswv uas tsis yog tus TSWV, yuavtsum muab nws ua kom puastsuaj mus. #2Kev 17:2-7
21“Nej tsis txhob tsimtxom lossis caijtsuj ib tug neeg txawv tebchaws twg, rauqhov thaum nej nyob hauv tebchaws Iziv, nej twb yog neeg txawv tebchaws thiab. 22Nej tsis txhob tsimtxom ib tug pojntsuam lossis ib tug menyuam ntsuag twg. #Khiav 23:9; Levi 19:33-34; 2Kev 24:17-18; 27:19 23Yog nej tsimtxom lawv, Kuv, uas yog tus TSWV, yuav teb lawv tej suab quajntsuag thaum lawv hu txog Kuv. 24Kuv yuav npautaws rau nej thiab yuav tua nej hauv tshavrog. Nej cov pojniam yuav dhau mus ua pojntsuam thiab nej cov menyuam yuav tsis muaj txiv.
25“Yog nej txais nyiaj rau Kuv cov neeg uas yog cov pluag, tsis txhob ua li nej yog lub chaw qiv nyiaj es yuav tsub paj rau lawv them. #Levi 25:35-38; 2Kev 15:7-11; 23:19-20 26Yog leejtwg muab nws lub tsho ntev tuaj yuam nqi rau koj thiab nws coglus hais tias nws yuav txhiv rovqab, koj yuavtsum xa rovqab rau nws uantej hnub poobqho, 27rauqhov nws tsuas muaj tiblub tsho ntawd hnav kom sov xwb. Nws yuav ua licas pw tsaugzog? Thaum nws quaj thov Kuv, Kuv yuav teb nws tej lus thov rauqhov Kuv yog tus uas muaj lub siab tabncuab. #2Kev 24:10-13
28“Nej tsis txhob haislus saib tsis taus Vajtswv,#22:28: Vajtswv; lossis cov txiavtxim. thiab tsis txhob foom phem rau nej ib tug nomtswv twg. #Teshl 23:5
29“Muab nej tej qoobloo, nej tej txivhmab, thiab nej tej roj txivntoo, coj tuaj fij rau Kuv thaum uas tej ntawd siav lawm.
“Muab nej cov tub hlob fij rau Kuv. 30Muab nej tej nyuj thiab tej yaj thawjtug menyuam uas yog tus txiv coj tuaj fij rau Kuv. Thawjtug menyuam uas yog tus txiv, mas cia nrog tus niam nyob xya hnub xwb, hnub thib yim yuavtsum coj tuaj fij rau Kuv.
31“Nej yog Kuv haivneeg uas dawbhuv, yogli ntawd, nej tsis txhob noj tej nqaij tsiaj uas raug tsiaj qus tom tuag, ciali muab pov rau dev noj xwb. #Levi 17:15
ទើបបានជ្រើសរើសហើយ៖
Khiav Dim 22: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.