Marko 16
16
Dunnooda Yeesu
(Mat 28:1-8; Luk 24:11-12; Yoh 20:1-10)
1Ng'atta ghwelmeeda Sabatto ghang'eat geaba Mariyaayda suguura Magadaleena ea Saloome ea Mariyaayda was gheamatta Yakkobo gaweay ghwasha nagheeda ng'andit jea ghwayeasha musta Yeesu. 2Hean imuchchu nea gudugorearu aseetta eaweeda jumwappiili gaweay Gadeemsu ea ghwahitta heeda bung'eeda. 3Gaweay nea gabaloleada aba naweeda nea gwayeeshsha geat, “Ghamneawa gayghoarakghrakghtaang'a lagheaneetta haw bea ghuutta shoomanda bung'eedean?” 4Ghoang'wearda ak ghwadaa lagheaneedida nea sigeanda, (Nea mii laghaana gil gidahaw muuchchi.) 5Duugwasik ghuutta shoomanda bung'eeda ghwadaa Ghearemaneeni akkwa hang'deesh nea goopteada aba meatkweeda geattinda dugwa, Ghahamng'eanyi muuchchi. 6Hean gwayeeshsha Ghearemaneeni gadeemgiga, “Ada ghahameegwa ng'eanyi. Ghanalli beadi ogaseadayyi Yeesuuyda Nasareetti, singoorsa uhuuda behiida. Siisi nuduudu eara hiji mudugwanda. Ang'ulla heeda siyiin. 7Asi agooga aweayeena oattawa iidi ginealangiga ikkaschiin ea Betro gideaba nisheedeawaneegwa gawa Galilaaya. Iyoahitti hoowa gajadaakta gidaghayi rukutteayda.” 8Ng'atta Ghabeawa hoowa bea bung'edean nea gwasalda, aba gideaba nubwaadan ak ea nung'ut muuwda nea ghahamng'eanyi. Eamudu gwarukusa sih ng'ashaan aba gideaba nibeal muuchchi.
Yeesu gwaroonnyi Mariyaayda suguura Magadaleena
(Mat 28:9-10; Yoh 20:11-18)
[ 9Ng'atta dunnooda Yeesu nea beashatta eaweetta jumapiili gil gohiimsa geaw Mariyaayda suguura Magadaleena, was gatmooda ghayi arutteawa Yeesu saseeda meangeeniga assispwa. 10Gawa Mariyaayda Magadaleena, ak gawa gwarukusa fuga easuju mideaydooschi Yeesu, nea abeeda aba damandida Fukka goyyeawda nea gaguttu heareega. 11Iiduw nea Ghwayiiy gideaba Yeesu ea majeek ea gideaba nidaah Mariyaayda Magadaleena ea meamwasa.
Yeesu gwaroonnyi ginealan iyyeenya
(Luk 24:13-35)
12Hean imuchchu gohiimsa geaw Yeesu ginealan iyyeenya nea niyamwa deakta. Abeeda Ginealang'su gaweay madamnyeanda. 13Eara Saawa gaweay ak gwarukusa suurja. Earappeadi surukusean ghanyea mwamwasa.
Yeesu gwaroonnyi ginealan damwanagi
(Mat 28:16-20; Luk 24:36-49; Yoh 20:19-23; Gadi 1:6-8)
14Iiduw aba huydeanda gohiimsa geaw Yeesu ginealan damwanagi hitta Yeesu nea gweagiischi. Gowoowsa Yeesu saawa muuchchi aba hang'ooynachcheekka iheenga nyaawa, ea gideaba mwamwasa ng'asheegiga bea fugeadu iitta dunnoadannyyin. 15Hean gabiissa Gwayeeshsha, “Aweayeena ng'eanyiissean ak gorukkwiidi Giijasta Miy aba heeda buneassean. 16Nea siida mwas ak geppattiisan gayghaghu, nea siida mwamwasa gajergweaksa. 17Ak abeeda eara gwadeagooda gaygodeaydooschi Fukka mideawa masawegean, aba gheawungeasu gaygoruutta meangeeniga ak gaygabaloola iit nuut. 18Nea eara ghoang'ng'waany ichchipkeega ghana eara eabiiw siida gichchea ghabwar, ea manda gili jea gwahissa. Nea inyeessa Gayghoang'ng'waay iheenga fuga miyeani ak gaheaba.”
Yeesu gawa humng'eeda
(Luk 24:50-53; Gadi 1:9-11)
19Iiduw Ng'uttamiida was Yeesu gobalool saawa amahit, geanung' gawa humng'eeda gobiida meatkweeda geattinda dugwa bea Aseetta. 20Hean gaweay Ginealanga ng'eanyiissean nea gwarukkwiida Giijasta Miy. Gwasin Ng'uttamiida gadiyeeda sea saawa ak gomajeek Giijasi aba gwadeagooda adeaydooschi saawa.]
ទើបបានជ្រើសរើសហើយ៖
Marko 16: DTGANT09
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Datooga New Testament © Bible Society of Tanzania, 2009.