Marko 15
15
Yeesu gwanda madeeda Bilatto
(Mat 27:1-2, 11-14; Luk 23:1-5; Yoh 18:28-38)
1Iimuchchu nea gudughaghar gayeew gabalool Ashohoodiga hees sea gweargwa, ea ginealshoodiga diineeda Yahuudi ea girgweageeda sean, ak ghwarat Yeesu aba biingu, ak ghwaat ea ghwayiin geattinga Bilatto. 2Ghoanyaash Bilatto Yeesu nea gwayeeshsha, “Assang'iing'i guwosi sugoochcheanda Yahuudi?” Ghwalamda Yeesu ak gwayeeshsha Bilatto, “Girgu ang'iing'i.” 3Ghoahaktaawa ashoohoodiga hees Yeesu ng'asheega duguuga saang'a. 4Gabiikta Bilatto ghoanyaash Yeesu nea gwayeeshsha, “Anda ang'iing'i mirukuni gil? Iinya ng'asheega surukuna badaydaang'u gitteenna.” 5Amwaasha Yeesu ng'ashaan ea ghwanung' ghahamng'eanyi Bilatto.
Yeesu gergweaksiina miyeeda
(Mat 27:15-26; Luk 23:13-25; Yoh 18:39—19:16)
6Abeeda iissa iinyoo ghwahitta damanda ghwelmeeda Basakka inyeessa Bilatto gwasiksa siyagi aba fuga mida ghealooniga gasa buuneeda. 7Abeeda damandida gwanda ghealooniga siisi suguura Baraba nea geeraduudayi fii suuk ghayi nuseada buuneeda nea ghwanung' ghaghoakghoayda emeeda. 8Ghaghoayda Emeeda gaweay heeda Bilatto ama sihitta geyeeshsha, Aniyean sinneasa gidagweannyekka sean. 9Ghoanyaashta Bilatto nea gwayeeshsha saawa, “Heappi googasayi deattinneegwa sugoochcheanda Yahuudi?” 10Abeeda niny ghwanyaashtunu aba gideaba ashoohoodiga hees ghoahaktaawa Yeesu sichcheeda. 11Nea ashoohoodiga hees saawa ghoang'waalng'waal buuneeda nea gagasa gideaba gaygamus buuneeda gwasiksa Baraba. 12Hean ghoanyaash Bilatto buuneeda gichcha nea gwayeeshsha, “Googasayi dahinndaan siisi oguuri sugoochcheanda Yahuudiin?” 13Gabiikta Buuneessean gojuur nea gwayeeshsha, “Angoorsiina uhuuda behiida.” 14Gwayeeshsha Bilatto aba girrukusa buuneeda, “Nea gidinyeandeaba siisi ea naaha gil?” Gabiikta Buuneeda gojuur muuchchi nea gwayeeshsha, “Angoorsiina uhuuda behiida!” 15Hean Bilatto aba gassooda gasa ghoammiidu gheanyanga emeeda, gageanu ak gwasiksa Baraba. Hit ghwanung' egeanu mughowooda ak geabwar Yeesu amahit geayaat enngoorsa uhuuda behiida.
Shirikkara gwajuuga Yeesu
(Mat 27:27-31; Yoh 19:2-3)
16Ghwaat Shirikkareedida Yeesu ea eahhiitta heeda suguura Braytoriyo was seammooda gheeda sugoochcheanda. Hean ghapka eara Shirikkara suurja ak gabassa geat hoowa.
17Gegeanu ak gekkwealsa Yeesu hang'da oomu. Gegeanu ng'oroorga eanaaw ak geayiin uhuuda eanung' ghoaw shiipka uhuudaannyi. 18Hean Geguursa nea geyeeshsha, “Seayuu sugoochcheanda Yahuudi!” 19Gealas uhuuda Yeesu aba digheechcheanda nea gong'urriisa ng'usheaga. Geetkuy aba madeadaannyi ehinda gili siittaw mureeda. 20Ng'atta jukkooda gegeanda hang'da ghwanyawa oomu sikkwealsa ak gekkuumsa hang'weakkiga ikkaschiin. Ng'atta Geayaat engoorsa uhuuda behiida.
Yeesu gengoorsa uhuuda behiida
(Mat 27:32-44; Luk 23:26-43; Yoh 19:17-27)
21Geweay aba naweeda ea eroonnyi siisi suguura Simoneeda ng'eanyiida Girene. Niny ghweanda geaba Aleksanda bea geaba Rafo gil, nea aba damani gwaleabu madamnyeanda. Gediing'sa aba uurda ghwasar behiida Yeesu.
22Geayaat Yeesu ea eahhiitta hiji suguura Golgootta nea ghwanyawa isiyam ghuut gajeguura, “Deageapkeeda uhuuda.” 23Gegeanu difaayi ak geng'ng'olng'olsiinnyi sea manemane. Geattaw nea geyeeshsha leaha. ak ghaheawa ghwali. 24Ng'atta hean Gengoorsa uhuuda behiida, ama hit gegeanu hang'waakkaaschi ak geelaja, nea geng'alealleesa hang'daannyi eadaa siida jea gageanda. 25Gengoorsa uhuuda behiida nea gaba aseetta samwagu. 26Nea gissihaktaawa geang'waar gideaba, “Nii sugoochcheanda Yahuudi.” 27Gengoorsa iheenga beehajeega eara fii iyyeenya abeeda was mareannghooga. Dea meanung' ghwalaabwa Yeesu meatkweeda geattinda dugwa niirja ghwalaabwa meatkweeda geattinda ghadaam. [ 28“Ak gwasa gidaghayi nyaah Ng'ooruutka Ghaydit nea gwayi, ‘Sinung' gwandeayi sea fuga munyas.’”]
29Nea abeeda Fuga ng'atta aba naweeda gong'eawi nea godiindiil iheenga nea geyeeshsha, “Asi! Siida jea gwanyarja gheeda Sibatta Aseetta ak ghwadeas aba jeeda eawoojiga assamwagu! 30Asi ayyaawa geaw! Hing'aanana uhuuda behiida.” 31Eara ashohoodiga hees sea ginealshoodiga diineeda Yahuudi gwajuuga nea gwayi, “Ghoaghu buuneeda, ak ghwaraay ghoaghu geaw! 32Asi geeyi nii Gristoyda was sugoochcheanda Israeeli! Asi dahing'aana aba uhuuda behiida eadaaha ak geamwaschi.” Eara fukwachchi singoruudayi ninyiin earaga gong'eawi.
Miyeeda Yeesu
(Mat 27:45-56; Luk 23:44-49; Yoh 19:28-30)
33Hean iiduw nea ghabwarbwara aseetta gwaduk ng'anyiissean misaneeda ea gaba aseetta shageash. 34Gul aseetteaba shageash ghwanya ghuutta Yeesu nea gojuur nea gwayi, “Elooyi, Elooyi, laama sabatkaani?” Nea gideaba, “Ea Aseetteanyu, Ea Aseetteanyu, andang'iing'i ninung'usean heeda?” 35Fiisu ghwanyawa neekki iyiiy ghuutta Yeesu gwayi, “Ayiinya! Gaguursa Eliya.” 36Ghafwach Sih ak gageanu gili was ghabuschcheanda ak ghang'uda jeeda beega ng'weani bea haghweega geetta. Ghoahaaktaawa digheechcheanda ak ghoadaw Yeesu ghamit nea gwayeeshsha buuneeda, “Ommeasa eadaaha Eliya eajea ghwahidu ghoang'aamwa uhuuda behiida.” 37Ghwanya ghuutta Yeesu nea gagis daghatta muuchchi ak ghoabitta. 38Hean ghabwaasha bugusta hang'dida subwaasha jeeda Gheeda Sibatta Aseettean, ak ghoaw iyyeenya ghang'eada uhuuda ea gagul ng'eanyi. 39Abeeda Shirikkarajeanda haw ghwanyawa ghaminaada aba hiji gang'uleadayyi Yeesu. Daa gidabittaayda siida gwayi, “Siisi aba huumwa ghayi Balleanda Aseetta gil!” 40Gwanda eara Gadeemsu abeeda ang'weerru nea sheagi. Jeedeaba gadeemsu gaba geaba Mariyaayda suguura Magadaleena, ea Saloome, ea Mariyaayda was gheamatta geaba Yakkoboyda mwanang' ea Yose. 41Gadeemsu ghayi gabay godeaydooschi Yeesu damanda mideewa Galilaaya nea gagadiyeesa. Abeeda gwanda eara gadeem suuk saang'a adeana Yeesu Yerusaleemu.
Bunyitta Yeesu
(Mat 27:57-61; Luk 23:50-56; Yoh 19:38-42)
42Damanda huweewa shing'ada bea eaweettida, nii abeeda eaweeda sitting'ding'deawa gil nea imuchchu ea eaweetta Sabattohi.#15:42 Sabatto: Eawetteaba ispwa fuuffa fuga Yahuudi nea ghamwaash Aseetta. (Eaweetta ghayi fuufa Aseetta) 43Ghang'eat nisiih Yoseefu was siida ng'eanyiida Arimattayu. Niny abeeda gaba gweargwa girgweageeda nea geawwal gheang'da muuchchi. Easuju eara niny goolla gafurriida Gheambalmeeda Aseetta. Siisi ghang'eat ak ghabwadakta ak gawa heeda Bilatto ghang'al musta Yeesu. 44Ghahamng'eanyi Bilatto iyiiy gideaba Yeesu nigeawiit ghami. Gaguursa shirikkarajeanda haw ak ghoanyaash Yeesu ea nigeawiit ghami. 45Iiduw nea ghwanyas Bilatto iitta aba heeda shirikkerajeanda gideaba Yeesu nigeawiit ghami, gwayeeshsha Yoseefu aada musta Yeesu. 46Gawa Yoseefu ak ghwasha hang'deesh, hit gawa ama hitta goorareang'u musta. Gokkwealsa hang'dida eeshiin akghwaat ea ghwayiin jeemba bung'eeni ghayi sighurghur nihit mida jeemba laghaana. Hean gooreakreaksa lagheaneeda haw ghuutta shoomanda. 47Abeeda Mariyaaydida suguura Magadaleena sea Mariyaaydida was gheamatta Yosehiin abeeda saawa ghwadahaada heeda siyiin musta Yeesu.
ទើបបានជ្រើសរើសហើយ៖
Marko 15: DTGANT09
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Datooga New Testament © Bible Society of Tanzania, 2009.