Romans 4
4
Abraham Tuvraaksriutaa
1Abraham, maŋŋuuruaq Jew-payauranun, uuktuutigilakput iñuŋmun ukpiġunmigun nalaunŋasipkaqtauruamun sivuġaani God-im. 2Abraham piḷġusiḷḷuataŋisa nalaunŋasipkallakparruŋ sivuġaani God-im, uqavigaaġutiksraqaġayaqtuq. Aglaan uqavigaaġutiksraitchuq piḷġusiġiksuanik sivuġaani God-im, 3#Gn 15.6; Ga 3.6.qanuq Bible uqaqtut, “Abraham ukpiġiŋagaa God, aasii taavruma nalaunŋasiŋagaa sivuġaani God-im.” 4Tavra iñuk nalaunŋasipkaqtaullakpan pisigilugich piḷġusiḷḷuataŋi akiññaktaaġiniġaa nalaunŋasisiñi, iñuktun savakłuni akiññaktuatun. Aitchuusiaġiŋitkaa, aglaan akiḷiusiaġigaa. 5Aasiiḷi iñuk nalaunŋasiñiataŋitchuaq piḷġusiḷḷuatamigun aglaan ukpiqtuaq God-mun, nalaunŋarualigaa God-im ukpiġutaa pisigivlugu. God-im nalaunŋasiḷḷagai piḷuusiqirit ukpiliġmata. 6Taamna uvva David uqautigiŋagaa Bible-ni uqallakami, iñuk quviasuguuruq God-im nalaunŋasipkaġmani piqutigiŋaiqł̣ugich piḷġusiḷḷuataŋi. David uqallaŋaruq inna,
7 #
Ps 32.1, 2. “Quviasuglich iñupayaat piḷuutipayauraŋich
suliqutigiŋaiqsauruat itqaumayumiñaiqł̣ugich.
8Quviasugli iñuk Atanġum akiḷiipkaġniaŋisaŋa piḷuutiŋiñik.”
9Taapkua David uqaluŋi quviasaaġusiat inŋitchut kisiŋiññun tamatkunuŋa nalunaiñŋutchiqsauŋaruanun God-mun piksraqtaaguniŋatigun, aglaallu Jew-guŋitchuanun. Qanuq Bible uqaqtut Abraham nalaunŋasipkaqtaunivḷugu pisigivlugu ukpiġutaa. 10Abraham nalaunŋasiŋagaa God-im nalunaiñŋutchiqsauŋaiñŋaan timimiñi. 11#Gn 17.10.Abraham nalunaiñŋutaŋa iḷitchuqqutauŋaruq ilaa God-mun nalaunŋasipkaqtauganiŋatilaaŋanik pisigivlugu ukpiġutaa. God sivunniŋaruq tainna, malġuk sivuniġivlugik. Sivulliġmi, Abraham aapatun ittuq iluqaiññun Jew-guŋitchuanun, tuvrautiruanun tuvraaksriutaanun, ukpiġunmikkun nalaunŋasipkaqtauruanun God-im sivuġaani. 12Igḷuani, ilaa aapauruq iluqaiññun Jew-guruanun kisian pisigisuŋaġnagu nalunaiñŋutaŋat God-mun iñuginiḷugich, aglaan ukpiqtuanun God-mun, Abraham-tun ukpiġutiqaqtuatun God-mun nalunaiñŋutchiŋaiñŋaġmi.
God-im Unniqsuqłiisaa Taŋŋiḷḷaruq Ukpiġiruni
13 #
Gn 17.4-6; 22.17, 18; Ga 3.29. God-im unniqsuqłiiŋagaa Abraham kiŋuniŋiḷu kiŋuvaannagniaġnivḷugich nunamik. Taamna unniqsuqłiiñ unniqsuqłiisauŋaitchuq God-im qaiñmagich aglausimaruat pitqurani Moses-kun, aglaan unniqsuqłiisauŋaruq Abraham-mun God-im nalaunŋasipkaġmagu ukpiġutaa pisigivlugu. 14#Ga 3.18.Tavra kisimiŋ piqaqtuat God-im pitquraŋiññik kiŋuvaannakkumaaqpata nunamik, ukpiġun anniqsuutauŋitchuq, unniqsuqłiiñ anniqsuutauŋiñmiuq. 15Qanuq uqallautianiŋagivsi, God-im pitquraŋisa tatavsaqtitchuugaich iñuich qanuq kamagilaitkaich. Iñuich pitquraiññamiŋ kamagiŋisaksraitchut pitquranik.
16 #
Ga 3.7. Tavra iḷitchirugut iñuich ukpiġutiqaqtuksraupiaqtut aitchuusiaġiniaġumirruŋ God-im unniqsuqłiisaa. Aasii iñuich ukpiliqamiŋ, Abraham-mun kiŋuniḷiutisuurut, aasiiḷi God nagliktuutiqpaŋmigun nalupqinaiġuugaa unniqsuqłiisini iliŋiññun, tamatkunuŋa pitquramiñik piqaqtuanun, tamatkunuŋalu ukpiġutiqaqtuanun Abraham-tun. Tavraasii Abraham aapagigikput iluqata, 17#Gn 17.5.aglausimaniŋatun Bible-ni, God uqallaŋaruq, “Uvaŋa aapaliutiŋagikpiñ iñugiaktuanun nunauruanun.” Tavraasii God-im akuqtuŋagaa Abraham aapaliutivlugu iluqaptiŋnun, qanuq ilaan ukpiġiŋagaa God iñuupkaiḷḷaruaq tuquŋaruanik, suli uqautiqallaruaq sivunniuġunmiñik taŋŋiŋaitchuanik taŋŋianiŋaruatun iḷivḷugich. 18#Gn 15.5.Abraham, niġiunaiġaluaqtillugu timimiñi, niġiuŋaruq suli aapaġuġniaġnivḷuni iñugiaktuanun nunauruanun, uqallausiaqaŋavluni, “Iñugiaktuanik kiŋuniqaġniaqtutin.” 19#Gn 17.17.Nalupqitchauraŋitchuq ukpiġunmiñi isummatigikami utuqqalivḷuni miqłiqsiñiksramigun tallimakipiatun ukiunikami. Nalupqitchauraŋiñmiuq isummatigikamiuŋ Sarah miqłiqsiḷaitchuaq. 20Arguagiŋaitkaa God-mun taŋŋiġñiaqtilaaŋa unniqsuqłiisaa, aglaan nanġaqługu God ukpiliqsaiññaŋaruq. 21Abraham ukpipiallaŋaruq God-mun taŋŋiġumiñaqtilaaŋanik unniqsuqłiisaa. 22Abraham ukpiġutaa pisigivlugu God-im nalaunŋasipkaŋagaa sivuqqamiñi. 23Taapkua uqaluich Bible-niittuat quliaqtuaqaqtuat Abraham nalaunŋasipkaqtaunivḷugu ukpiġutaa pisigivlugu, anniqsuġmigaatigut uvagut. 24Qanuq ukpiġupta God-mun aŋipkaiŋaruamun Jesus-mik Ataniptiŋnik tuqqunmiñ, God-iptauq nalaunŋasipkaġniaġmigaatigut sivuqqamiñi. 25#Is 53.4, 5.God-im nalaunŋarualiyumiñaġaatigut, qanuq Jesus tuqqutiŋagaatigut aŋivḷuniḷu tuqqunmiñ, akiḷiqł̣ugich piḷuutivut nalaunŋasivḷutalu sivuġaani God-im.
ទើបបានជ្រើសរើសហើយ៖
Romans 4: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
