Mark 3

3
Iñuk Argakisuuraq
(Matthew 12.9-14; Luke 6.6-11)
1Tavra Jesus isitqiŋaruq aŋaiyyuviŋmun, tavra tavraniinniqsuq iñuk argakisuuraq. 2Tavra Jesus naipiqtuŋagaat, iluaqsiriñiaqtilaaŋanik Jew-guruat Savaiññiŋanni, pasisukługu. 3Tavra Jesus uqallautiŋagaa iñuk argakisuuraq, Qaiñ uvuŋa. 4Tavra Jesus uqallautiŋagai iñuich, Pitquratiguaŋava Savaiññiġmi nakuurualiqiruni naagga pigiitchualiqiruni? Ikayugaksraġivisigik iñuich naagga iḷatchiġḷugich Savaiññiġmi? Tavra nivliŋiḷḷaŋarut. 5Tavra Jesus qiñiġaallakługich qinnaliŋaruq pisigivlugu sivunmuuniŋat killukuaġniŋallu, aglaattauq iḷunŋutchautigiŋagai. Ilaan uqallautiŋagaa iñuk, Isaakkich argaktin. Tavra isaaŋagai, aasii argaŋi iłuaqsirauŋarut igḷumiktun. 6Tavra Pharisees aniŋarut, aasii tavrauvvaa sivunniuqatigiaqsivḷugich Herod-kuayaat Jesus-kun, qanuġlugu tuqutchukługu.
Iñusalaich Tatchim Siñaani
7Tavra Jesus aullaŋaruq iḷitchitquraniḷu tatchimun, aasii iñusalaich maliŋagaat Galilee-miñ Judea-miḷḷu, 8Jerusalem-miḷḷu, Idumea-miḷḷu uŋataaniḷḷu kuugum Jordan, avataanniḷḷu Tyre-vlu Sidon-lu. Iñusalaich ullaaŋagaat tusaaŋavlutiŋ sunik kamanaqtuanik savaaŋiñik. 9#Mk 4.1; Lk 5.1-3.Iñusalaich iñugiaksivaił̣ł̣utiŋ, Jesus uqallautiŋagai iḷitchitqurani umiamik itqanaiqsitquvlugich, iñuŋnun saqigruginasugaluni. 10Ilaan iluaqsiŋagai iñugiaktuat iñuich, aasii taamna pisigivlugu iluqaġmiŋ naŋittuat saqiraqłiŋarut tikiutiniatakłutiŋ ilaanun aksiḷḷasiñiatakługu. 11Suli ilitqusiqł̣uqaqtuat, tautukamirruŋ, sitquġaqtut sivuġaanun, aasii nipaalavlutiŋ, Ilivich Iġñiġigaatin God-im. 12Tavra piraksripiaŋagai quliaqtuaġitquŋił̣ł̣ugu iliŋiññun kiutilaani.
Jesus Piksraqtuq Qulit Malġugnik Iḷitchitquranik
(Matthew 10.1-4; Luke 6.12-16)
13Tavra Jesus mayuŋaruq iġġimun, aasii ququaqługich ilimiñun iñuich pigisukkani, aasii ullaŋagaat. 14Tavra piksraqtaaġiŋagai qulit malġuk, iliŋiññun piqatigitquvluni, suli ilaan tilisukługich alġaqsruitquvlugich, 15suli suaŋŋatiqaquvlugich iłuaqsiyumiñaġlugich naŋirrutit, suli anitchumiñaġlugich ilitqusiqł̣uich. 16Ukua piksraqtaaġiŋagai Simon atchikługu Peter-mik, 17aasiiḷi James iġñiŋa Zebedee-m, John-lu aniqataa James, atchikł̣ugik Boanerges-mik, sivuniqaqtuamik kalluktun iññuk, 18aasii Andrew-lu, Philip-lu, Bartholomew-lu, Matthew-lu, Thomas-lu, James-lu iġñiŋa Alpheus, Thaddaeus-lu, Simon-lu Zealot-guruaq, 19Judas-lu Iscariot, aitchuutiginniktuaq ilaanik.
Jesus-lu Beelzebul-lu
(Matthew 12.22-32; Luke 11.14-23; 12.10)
20Tavraasii tavrani Jesus aiŋaruq. Aasii iñusalaich katitqiŋarut atautchimun niġiñiayunaiqsaallaisa Jesus-lu iḷitchitquraniḷu. 21Tavra nanmiñiq iḷaŋisa tusaakamirruŋ taamna, aullaqiŋarut aggisiyaqtuqługu Jesus, qanuq iñuich uqautigivlugu kinnaġuġnivḷugu.
22 # Mt 9.34; 10.25. Tavrali iḷisaurrit pitquranik qairuat Jerusalem-miñ uqaŋarut, Ilaa aŋalatiqaqtuq Beelzebul-mik, umialgannik ilitqusiqł̣uich, aasii taavrumuuna anittairuq ilitqusiqł̣uŋnik. 23Tavra iḷisaurrit pitquranik ququaŋagai ilimiñun, aasii uqautiaqsivḷugich uuktuutitigun, Qanuġluni Satan anitchumiñaqpa inmiñik? 24Nunat iñuŋich atinġiġḷutiŋ inmikkuaŋasiḷutiŋ piyuutiaqsikpata, nunauniŋat siammayaaġniaqtut. 25Tainnatuttauq nanmiñiġiich atinġiġḷutiŋ piyuutiaqsikpata, taapkua nanmiñiġiikkaluat siammayaaġniaqtut. 26Tainnatuttauq Satan ilitqusiqł̣uŋi atinġiġumiŋ piyuutilutiŋ avanmun, ilaan suaŋŋataa isukłiññayaqtuq.
27Iñuk suaŋarualuk qiḷiqsruiqqaaġlugu, iglua pakagnaġniaqtuq suġauttaiġḷugulu. Tainnatuttauq Satan payariraksrauqqaaġniaqtuq ilitqusiqł̣uŋi anitauniaqpata.
28Iḷumun uqallautigivsi. God-im suliqutigiŋaiġumiñaġai itqaumayumiñaiġḷugich iluqaisa iñuich piḷuutiŋich, iluqaisalu pigiitchuat uqallautiŋich, 29#Lk 12.10.aglaan iñuk uqaqtuaq pigiitchuanik Ilitqusiġiksuaq sivuniġilugu sumikunnii suliqutigiŋaiqsauyumiñaitchuq, qanuq pisigilugu taamna piḷuun, ilaa pasirauniaqtuq isuitchuamun. 30Jesus taamna uqallausiġiŋagaa qanuq iñuich uqallausiġiŋagaat inna, Ilaa Jesus ilitqusiqł̣uqaqtuq.
Jesus Aakaŋalu Aniqatiiŋiḷu
(Matthew 12.46-50; Luke 8.19-21)
31Tavra nukaaluŋi aakaŋalu qaiŋarut tavruŋa, aasii qikaqłutiŋ siḷami, tilisiŋarut ilaanun qaitquvlugu. 32Tavra iñusalaich aquppiruat avataani Jesus, uqallautiŋagaat, Qaŋma, aakaviḷḷu nukaaluuviḷḷu pisukkaatin. 33Tavra Jesus kiuŋagai, Kiuva aakaga aniqatiitkalu? 34Tavra qiviaŋaruq tamatkunuŋa aquppiruanun avanmiñi, aasii uqallakłuni, Marra makua aniqatigimmatun aakagimmatullu itkitka. 35Qanuq kiñaliqaa nalautchiruaq pisuutaanik God-im, taamna aniqatigigiga, aakagigigalu.

ទើបបានជ្រើសរើសហើយ៖

Mark 3: INUPIAQ

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល