Acts 27
27
Paul Rome-muksaqtuq
1Tavra sivunniutaumman umiaqpagaqtuksraġuqłuta Italy-mun aitchuutigiŋagaat Paul iḷaŋiḷḷu allat tigutaaqtat Julius-mun, atanauraŋannun Rome-miut aŋuyaktiŋisa atiqaqtuat Augustan-gum aŋuyaktiŋiñik. 2Ikuŋarugut umiaqpaŋmun Adramyttium-miŋŋaqtuamiñ aullaqsiññaaġuġman nutqaaġaġviŋiññun nunaaqqiŋiñi Asia-m, aasii tiŋinnaarraqsivḷuta. Aristarchus, Macedonia-ġmium Thessalonica-miñ, piqasiŋagaatigut. 3Uvlaakumman tikiñŋarugut Sidon-mun. Julius-gum aŋalalluataŋagaa Paul piaqłuktautaitchuakun, suli aullaqtinŋagaa tautugiaquvlugich avilaitqatiŋi aitchuquvlugu sunik pigiraksraġikkaŋiñik. 4Aullaŋarugut tavraŋŋa, aasii anuġi arguġiannaqłuni tiŋilġaiŋarugut qamanġagun qikiqtam Cyprus. 5Tavraasii tiŋilġaiganikapta ikaaqługu taġiuq akianiittuaq Cilicia-m Pamphylia-vlu, tikiñŋarugut Myra-mun Lycia-miittuamun. 6Tavrani aŋuyaktit atanauraŋat iḷitchuġiŋaruq umiaqpaŋmik qairuamik Alexandria-miñ aullaqsaġumaruamik Italy-mun, aasii ikipkaqłuta taavrumuŋa umiaqpaŋmun.
7Tiŋilġaqsiŋarugut sukaiḷaamik anuqłiqpaił̣ł̣uni uvluni iñugiaktuani, arguġianniuqłuta tikiḷġiñaŋarugut akianun nunaaqqim Cnidus. Aasii anuġim sivunmuktuqtitchumiñaiñmatigut nalimun, tiŋilġaiŋarugut qamanġagun qikiqtam Crete, uivvaqługu nuvuġaq Salmone. 8Siñiqsraqtuaqługu nunam siñaa siġġaġnaġaluaŋŋaan, tikiñŋarugut inimun atiqaqtuamun Qamannirviŋmik, qaniŋani iniqpak inmiruaq Lasea.
9Taavrumani nunaaqqimi uvliuŋarugut iñugiaktuanik, navianaqsiḷġataqtillugu iglauniksraq ukiaqłuni Jew-guruat uvluq niġiḷairviat qaaŋianiŋavluni. Tavra Paul uqallautiŋagaluaġai inna, 10Aŋutiit, iḷitchuġiruŋa aullaġupta uvaŋŋa navianaġniaqtuq iglauniqput, maqutauniaqtut usiavullu umiaqpaglu, iḷaanniḷu suksraunniksraqput. 11Tavra aŋuyaktit atanauraŋata kamagiłhaaŋagik umiaqpaum umialgatalu iñuatalu uqaluŋik, kamagigaluaġnagu Paul uqalua. 12Tavra qamannisimavik umiaqpaŋmun nayukkaŋat ukiiviksraġiiñŋaruq, iñugiagniqsrat ayaksaaġuŋarut taġiumun tavraŋŋa, tikiḷaiñmagaaqsaġukługu Phoenix piyumiñaġumiŋ. Taamna qamannisimavik Crete-miittuaq sanmiruaq uŋallavlu kanagnavlu tuŋaaŋnun, aasii tavrani ukiiḷutiŋ.
Qaggaġuqtuq Taġiuq
13Tavra uŋallaaġuġman isumavlutiŋ sivunniurriŋ nalaunniaġasugalugu, kisaq nuqinŋagaat aasii tiŋilġaigaqsivḷutiŋ siñiqsraqługu Crete, siñiqsraurapiaġataqługu nunam siñaa. 14Tavra akuniḷitchiaŋitchuq anuġiqpak nigiqłuk, anuqqałłaŋaruq qikiqtam tuŋaaniñ. 15Tavra umiaqpak anuġiqpaum nalaunmagu arguġumiñaiñŋarugut sanmiḷugu anuġi, iḷatchiŋarugut tiksiqł̣uta. 16Aasii iglauŋarugut qamanġagun qikiqtauram atiqaqtuam Cauda-mik. Tavra siġġaqivluta anayanaiyaŋagikput umiaqpaum umiuraŋa. 17Ikuaniŋmarruŋ umiuraq, anniqsuġniḷuksaaqsiŋagaat payaŋaiyaqsaavlugu akłunaanik umiaqpak. Tavraasii anayasuliqł̣utiŋ ikkalġiññasugalutiŋ mauyaqiññamun siñaani Libya-m, tiŋilġautaiyaŋarut aasii tiksiaqsivḷuta. 18Tavra anuġi suamaruaq anuqłiqsillugusuli, uvlutqiŋman siqqairraqsiŋarut umiaqpaum usiaŋiñik. 19Uvluk piŋayuagniasii siqqarraqsiŋagaich saatqutiŋi umiaqpaum. 20Tavra uvluni iñugiaktuani tautulaiñŋagivut siqiñiġlu uvluġiallu, anuġi anuqłipiaġataqłuni. Kiisaimmaa iñuuyumiñaiġasukkiutivugut.
21Tavra aŋutit sivisuruamik niġiḷaitkaluaġmata, Paul makinŋaruq sivuġaannun, aasii uqallautivlugich, Aŋutiit, kamagiyumiñaŋagaluaġivsiŋa aullaqusaaŋiññavsi Crete-miñ aasii siqqaiŋiḷḷuta iluqaiññik usiaptiŋnik. 22Aasii paŋmapak ipiqtusuŋaiqugivsi, qanuq iḷaŋiġñiaŋitchusi atausiuramik-unnii, aglaan umiaqpaiyaġniaqtugut. 23Qanuq unnuapak makitaŋaruq saniqqamni isaġulga God-im ukpiġikkaġma, aŋaiyyuvigisuukkaġmalu, 24aasii uqallautivluŋa, Iqsiñak Paul, qanuq tikitchuksraurutin Rome-mun, aasii Caesar-m isivġiġḷutin. Aasii pisigivlutin, God-im iñuuliñiaġai iluqaisa umiaqpagaqatitin. 25Ipiqtusuŋaiġitchiasii, aŋutiit, qanuq ukpiġutiqaqtuŋa God-mun nalaupiaġataġniaqtilaaŋa kilgusiaġa. 26Aglaan tipiniaġaatigut qikiqtamun.
27Akimiaġuutaiḷaŋŋuġmata unnuat tiksiġñivut anuqłiuqłuta taġiumi Mediterranean-mi, unnuaq qitiqqaqpalliġman sivuqłich iḷimatchaŋarut qalliñasugalutiŋ nunamun. 28Tavra kiviuqsraŋarut aasii iḷitchuġivlutiŋ iñuiññaqtun isaŋniqtun ititilaaŋanik, ayuuqtaallaqqaaqłutiŋ kiviuqsravsaaŋarut aasii akimiaq isaŋniqtun ititilaanikłuni. 29Tavra anayatchakłutiŋ umiaqpakput apuġasugalugu uyaġagruanun, niŋinŋagaich sisamat kitchat aquagun, aasii uvluqsiigaqsivḷutiŋ. 30Tavra sivuqłich pigruġumavlutiŋ umiaqpaŋmiñ, niŋinŋagaat umiuraq immamun, kisaġniaŋŋuaqsaqłutiŋ umiaqpaum sivuagun. 31Paul uqallautiŋagai aŋuyaktit atanauraŋat aŋuyaktillu, Ukua aŋutit umiaqpaŋmiinŋisuaqpata iñuulirauyumiñaitchusi. 32Tavrani aŋuyaktit kivluŋagaich akłunaaŋi umiuram aasii saġvaqtiłługu.
33Tavra uvluq qausaaqsivalliġman, Paul niġiḷḷaqupiaŋagai umiaqpagaqtit uqallakłuni, Uvlupak akimiaġuutaiḷaŋŋuqtut uvlut, aasii iluqasi tainnatun sivisutigiruamik niġiuraŋaitchusi. 34Tavra niġiḷḷaqupiaġivsi, sayaniktaaġumausi iñuullasisaġlusi. Atausiuraq-unnii nusaqsi niaquvsiññi tammaġniaŋitchuq.
35Taamna uqallausiġianikamiuŋ, Paul-gum tiguŋagaa punniq, aasii quyyavigiqqaaqługu God takkuanni, avikługu niġirraqsiŋaruq. 36Tavrani iluqaġmiŋ qapiŋaisaaqtauŋarut aasii niġivḷutiktauq iliŋich. 37Iluqata katiłłuta iñugiaktilaaqput 276 umiaqpaum iñuŋi. 38Tavra niġisuiġataqamiŋ, uqigḷiḷiŋagaat umiaqpak igiłługich palauvaksrat taġiumun.
Umiaqpaiyaqtut
39Tavra uvluġman, umiaqpagaqtit iḷisaġiŋaitkaat nuna, aglaan nalunaigiŋagaat puviaq naqittuamik siñilik, sivunniutiŋagaat piñaġumiñaqpan umiaqpaŋmik apuġaksaaġvigisaġukługu. 40Tavra ilaisa kivluŋagaich kitchat akłunaaŋich qimakługich kitchat immamun. Aasiisuli tavrani aŋivraaqługich akłunaat qiḷiġutigikkaŋi aquutim. Aasii nuqiłługu sivulliq tiŋilġautaq apuġaksaaqsaŋarut nunamun. 41Tavra nalaułługu ikkalġuq ikkalġisinŋagaat umiaqpak, sivua kaliviłłuni aulayyallaiŋaruq, aasii aqua siquminŋagaa ulivrigaqtuam taġium.
42Aŋuyaktit sivunniŋarut tuquġaġukługich tigutaaqtapayaurat, iḷaanni nalliŋich puumillutiŋ annakkasugalugich. 43Tavra aŋuyaktit atanauraŋata annautiyumavlugu Paul, taŋŋiqsinŋaitkaa sivunniutaat. Ilaan piraksriŋagai iñupayaat puuvrallaruat nautkiaquvlugich umiaqpaŋmiñ aasii tulaksaquvlugich. 44Aasiiḷi iḷakutat ikiaqtatigun naagga umiaqpaviñiqtigun tulaquvlugich. Tavra iluqata annaŋarugut nunamun.
ទើបបានជ្រើសរើសហើយ៖
Acts 27: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
