Acts 26
26
Paul Patchisaiññiruq Inmiñi Agrippa-mun
1Agrippa-m uqallautiŋagaa Paul, Uqaġumiñaqsipkaqtaurutin uqautigilutin iliŋnik. Tavra Paul isaaqługich argagni uqarraqsiŋaruq patchisaiññiġmigun inna. 2Umialiik Agrippa, Isummatigiruŋa uvamnik piḷḷuataġasugaluŋa sivuġaŋiutiyumiñaġniqama iliŋnun uvlupak, uqautigiyumiñaqługu patchisaisilaaġa iluqaisigun Jew-guruat pasikkutiŋisigun uvamnun. 3Qanukkiataŋ iḷisimmaaġiksutin iluqaiññik Jew-guruat piḷġusiŋiññik uqaġlaqutigisuukkaŋiññiglu. Taamna pisigivlugu apiġigikpiñ naalaġnitquvlutin uvamnik qiñuiġḷutin.
4Iluqaġmiŋ Jew-guruat iḷisimagaat qanuq iñuuniaġusiġa nutaġaunnamniñqaŋa. Iḷisimarut isuaniñqaŋa iñuuŋatilaamnik uvaŋa nanmiñiq nunamni Jerusalem-miḷu. 5#Ac 23.6; Phil 3.5.Uqaġutuaġumiŋ nalaullugu iḷisimakkaqtiŋ, iḷisimaŋammiut isuaniñqaŋa iḷautilaamnik kipuqłayunaitchuanun Pharisee-ñun piḷġusivsiŋñi. 6Aasiuvva paŋmapak makitaruŋa uvani qanuqitilaaqtauvluŋa pisigivlugu aŋŋiñ niġiuqsruutaa God-im maŋŋuuptiŋnun. 7Taavrumiŋa qulit malġuk maŋŋuuvut niġiuktuat kipiġniuqłutiŋ tikiutisukłutiŋ, aŋaiyyuuqłutiŋ God-mun unnuamiḷu uvlumiḷu. Taavrumuunaasiuvva Umialiik, Jew-guruat pasigaanŋa. 8Suvlusiasiuvva ilivsi siġḷiġnaġivisiuŋ ukpiġniksraq God-mun aŋipkaġumiñaqtilaaŋat tuquŋaruat? 9#Ac 8.3; 22.4, 5.Uvamniḷiuvva isumapiaġataŋagaluaqtuaŋaa taimani qanusiġairuksraunasugaluŋa ukpiqtuanik Jesus-mun Nazareth-miumun. 10Tainnaasii piŋaruŋa Jerusalem-mi. Aitchuusiaqaqłuŋa ataniġnaqunmik aŋaiyyuliqsiqpaŋniñ, God-im iñuŋi iñugiaktuat tigutaaŋagitka, suli tuqutauruksraġuġmata iḷaalliqsuutimmiraqtuŋa piyuaqłiqsuanun. 11Tatavsaġayuŋagitkalu iñugiaktuani Jew-guruat aŋaiyyuvipayauraŋiññi, piiḷaaġipkaġniaqługu ukpiġutaat, suli suammautivaił̣ł̣ugich aullaġaqtuŋa uŋasiksuanun iniqpaŋnun nagliksaaqtitchukługich.
Paul Quliaqtuaġigaa Isumalitqigñini
(Acts 9.1-19; 22.6-16)
12Tainna piyaqtuqłuŋa, Damascus-mun aullaŋaruŋa ataniġnaqusiraqłuŋa piraksriusiaqaqłuŋalu aŋaiyyuliqsiqpaŋniñ. 13Umialiik, uvluq qitiqqaġman tautuŋagiga iglaullapta qaumaniq qiḷaŋmiñ, qaummaġił̣haaġniqsuaq siqiñiġmiñ, qaummatittuaq avatimnun taapkunuŋalu iglauqatimnun. 14Tavra iluqata ulġuanikapta nunamun, tusaaŋaruŋa nipimik uqaqtuamik uvamnun Jew-guruat uqausiatigun, Saul, Saul, summan nagliksaaqtitpiŋa? Nagliksautiksriuqsiññaqtutin iliŋnun akiḷḷiḷiqsuqamŋa qimuktitun tukkaqtuatun qimuguksaaġunmun. 15Tavra uqallaŋaruŋa, Kiuvich ququularuatiin uvamnik? Aasii Ataniq uqallaŋaruq, Jesus-guruŋa nagliksaaqtitan. 16Aasii makittin, niptaġvigiŋagikpiñ kivgaksraqtaaġisukłutin; quliaqtuaġutiniaġitin iñuich tautuŋaniḷuŋa uvlupak, suli quliaqtuaġutilugich sunik iḷitchuġipkaġumaakkamnik iliŋnun. 17Qaunaginiaġikpiñ pisaġitquŋiḷḷutin Israel-guruanun, Jew-guŋitchuanullu, iliŋiññun tiliñiaġikpiñ. 18Tavra iḷisautiniaġitin tusaayugaaġiksuanik mumikkumiñaqsiḷugich taaqtuamiñ qaummaġiksuamun, aŋalatinŋaiġḷutiŋ Satan-mun aglaan God-mun, ukpiliġḷutiŋ piḷuutitiŋ suliqutigiŋaiqsautqulugich, suli iḷaliutiyumiñaqsiḷutiŋ God-im iñuksraqtaaŋiñun.
Paul Quliaqtuaġigaa Savaani
19Tavra Umialiik Agrippa, kamagiŋagiga qiḷaŋmiŋŋaqtauruaq qiñiqtuuraaġa. 20#Ac 9.20, 28, 29.Aasii isagutiŋaruŋa Damascus-miñ Jerusalem-miḷḷu suli nunaaqqiñiñ iluqaani Judea-miittuani, akunġanniḷu Jew-guŋitchuat alġaqsruiŋaruŋa isumalitqiksuksraunivḷugich iñuich aasii mumigḷutiŋ God-mun, suli iñuuniaqtuksraunivḷugich iḷisimanaqsiḷugu allaŋŋuqtautilaaqtiŋ. 21Taamna pisigivlugu Jew-guruat tigguġluŋagaanŋa aŋaiyyuvikpaŋmi aasii tuqunnialaaqsivḷuŋa. 22Uvlupaŋmun-aglaan God-im ikayuŋagaaŋa, aasiuvva makitaruŋa uvani quliaqtuaġivlugu iḷisimakkaġa iḷumun ittuaq, iñupayaanun kamanaitchuallu kamanaqtuallu ativlugich. Uqautigikkaġa tainnatupiaġataq ittuq uqaqtiŋisa God-im Moses-lu uqautigikkaŋatitun piyumaaġnivḷugu, 23#1 Co 15.20; Is 42.6; 49.6.taamna Christ-guruaq nagliksaaqtuksraunivḷugu, suli sivulliuluni aŋiruaniñ tuqqunmiñ, iḷitchuġipkaġlugulu annaun iluqaiññun Jew-guruanun Jew-guŋitchuanullu.
24Tavra Paul uqaġniaqtillugu patchisairrunmigun, Festus-gum nipatusivḷuni uqallautiŋagaa, Paul kinnaġuqtutin uvva, iḷitchivaiñŋavlutin kinnaġuutigiaqsigiñ. 25Paul-gum kiuŋagaa, Kinnaġuŋitchuŋa, kamanaqtuatiin Festus, uvvaaglaan uqautiqaqtuŋa isumalaaġutiksraupiaqtuamik iḷumun ittuamiglu. 26Umialiik Agrippa, uqautiyumiñaġikpiñ taluqsrautaiḷḷuŋa qanuq iḷisimagitin tamatkua iluqaisa. Nalupqisuŋitchuŋa iḷisimammiutin iluqaiññik, qanuq taamna piŋaitchuq nalunautchiaġilugu. 27Umialiik Agrippa, ukpiġivigich God-im uqaqtiŋi? Iḷisimaruŋa ukpiġigitin. 28Tavra Agrippa uqallaŋaruq Paul-mun, Akkupauraq Christ-miuġuqtitchukłuŋa isumavich? 29Tavrali Paul-gum kiuŋagaa, Sivikitkaluaqpan naagga sivisunaaġaluaqpan, aŋaiyyutigigaluaġiga God-mun iliviḷḷu iluqaġmiglu naalaġniruat uvamnik uvlupak ukpiliqugaluaqługich uvaptun, tigutaaqtauŋisiññaġlusi uvaptun.
30Tavrani umialik kavanauruaġlu Bernice-lu iluqaġmiglu allat iñuich makinŋarut, 31aasii anianikamiŋ uqaurrutiŋarut avanmun, Iñuk iŋña piŋitchuq sumik tuqurrutauyumiñaqtuamik naaggaunnii tigutaaqsimmatiksramik. 32Tavra Agrippa uqallaŋaruq Festus-mun, Taamamna iñuk tigutaaqtauŋaiqsiññaġayaqtuq apiqsriŋaitpan Caesar-mugugluni.
ទើបបានជ្រើសរើសហើយ៖
Acts 26: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
