1 Corinthians 12
12
Ilitqusiġiksuam Aitchuutiŋi
1Aniqatiit, tuyuġivsi paŋmapak apiqsruutisi sivuniġivlugich Ilitqusiġiksuam aitchuutiŋigun. Kaŋiqsimaqłuquŋitkivsi tamatkunuuna. 2Iḷisimarusi ukpiqtuaġuŋaiñŋavsi asiñuurrauŋarusi aŋaiyyusukłusi iñuuraqpaŋnun uqalaiḷanun, aasii tainna pikavsi aŋalatiłłusi tamatkunuŋa iñuuraqpaŋnun. 3Paŋmapak-aasii kaŋiqsitqugivsi taamna kiñaliqaa aŋalatittuaq Ilitqusiġiksuamun uqallakkumiñaipiaqtuq inna, Jesus suksraunġiqsauli. Suli kiñaliqaa uqallakkumiñaiñmiuq iḷumutun inna, Jesus Atanġuruq, Ilitqusiġiksuam pipkaŋisuaqpani.
4 #
Ro 12.6-8. God-im aitchuġaatigut iñugiaktuanik allakaaġiiñik ikayuqtiksraptiŋnik savautiguptiŋni, aglaan atautchim atiruam Ilitqusiġiksuam pigipkaġai iluqaisa uvaptiŋnun. 5Allakaaġiiksuat savaaksrat God-mun ittut, aglaan iluqata savautigikput atausiq Ataniq. 6Suli allakaaġiiksuat savaurriñġich inmiut savaaqaqtuni God-im savaaŋiñik, aglaan atausiuruam God-im iluqata savaktitkaatigut savaamiñik. 7Ilitqusiġiksuam iḷitchuġipkaġuugaa God-im suaŋŋataa atausiullaavluta uvaptigun, anniqsuqsaqługich aŋaiyyuliqiruat iluqaisa. 8Ilitqusiġiksuam uqaqtillagaa iñuk isumattutikun, allasuli iñuk uqaqtillavlugu iḷisimmatiqaqtiłługu atausiuruam Ilitqusiġiksuam. 9Atausiuruam Ilitqusiġiksuam allaptauq iñuk suaŋalluktuamik ukpiġutiqaqtillagaa, suli alla aitchuusiaqaqtillavlugu iłuaqsiriñiġmik atausiuruam Ilitqusiġiksuam. 10Suli Ilitqusiġiksuam allaptauq savaktillavlugu aliuġnaqtuanik, aasiisuli alla iñuk uqaqtaullavlugu God-mun, allasuli iñuk puttuqsrisiqaqtillavlugu nalliaŋnun Ilitqusiġiksuamullu naagga iḷumun ilitqusiuŋitchuamullu iñuk aŋalatilaaŋanik, allasuli uqaqtillavlugu iñugiaktuanik uqautchiñik naluraŋiñik, aasiisuli sut uqautigikkaŋi, allamun iñuŋmun mumiksillavlugich nalugaluaġmiruamun taavrumiŋa uqautchimik. 11Iluqaġmiŋ tamatkua ikayuusiat aitchuutaurut uvaptiŋnun atiruamiñ Ilitqusiġiksuamiñ atausisualuuruamiñ, aasii autaaqługich atausiullaavluta uvaptiŋnun, aitchuutit isummatigikkani pigiraksraġivlugich uvaptiŋnun.
Timi Atausiq Sulliñiqaqtuq Iñugiaktuanik
12 #
Ro 12.4, 5. Qanuq timitun atausiuruatun aasii iñugiaktuanik sulliñiqaqłuni, suli iluqaġmiŋ iḷaŋi timim iñugiakkaluaqtillugich atausiuvluni timi, tainnatuttauq atausiŋŋuqatigiŋagikput Christ, 13qanuq atausiullaavluta iḷaummatun ittugut Christ timaanun. Ilitqusiġiksuam atausiuruam iluqata atausiŋŋuŋagaatigut, atautchisun timitun, paptaiġutikun Jew-gugaluaġupta naagga Jew-guŋitkaluaġupta, kivgaugaluaġupta naagga kivgauŋitkaluaġupta. Aasii atausiuruaq Ilitqusiġiksuaq aitchuutauruq atausiullaavluta uvaptiŋnun.
14Timi sulliñiqaqtuq iñugiaktuanik. Atausił̣hiñauluni sulliñiġuŋitchuq. 15Isigaich uqallakkumiñaqpata inna, Uvaŋa argauŋił̣ł̣uŋa timim sulliñiġiŋitkaaŋa. Taavruma uqallautim iḷauŋaipayaaġumiñaitkaa timimun. 16Suli siun uqallallakpan, Qanuq irauŋił̣ł̣uŋa sulliñiġiŋitkaaŋa timim. Taavruma uqallautim iḷauŋaipayaaġumiñaiñmigaa timimun. 17Timi iluqani iraukpan, iñuk tusaallayumiñaitchuq. Timi-suli iluqani siutaukpan, iñuk naiḷaiññayaġmiuq. 18Aglaan God-im tainna savaŋaitkaatigut. God-im savaŋagai timivut iñugiaktuanik sulliñiqaqługich, aasii ilaisigullaa inillakługich timim sulliñillaaŋa sumun pisukamiuŋ. 19Timi iluqani atausił̣hiñauluni sulliñiġugaluaqpan timaunayaitchuq. 20Aglaan God-im savausiatun timimik, iñuk timiqaqtuq atautchimik sulliñiqaqtuamik iñugiaktuanik.
21Iri uqallakkumiñaitchuq argaŋnun, Anniqsuutigiŋitkikpiñ, naaggaunnii niaquq isigaŋnun, Anniqsuutigiŋitkikpiñ. 22Aglaan uvva, iḷaŋi timim qiññaqaqtuat anniqsuutauvigruaŋitchuatun piitchuipiaqtut. 23Aasiisuli tamatkua timim sulliñiŋi qiñiyunapiaŋitchuat isummatigilluataġuummigivut qanuq piitchuiñmiut. Suli sulliñiŋi timim kanŋugiravut taalutaqaġivut. 24Qaunagilluatałhaaġivut tamatkunaŋŋa timim sulliñiŋiñiñ kanŋugiŋisaptiŋniñ. God-im savaŋagai timivut, uvaptiŋnun qaunagilluatałhaaquvlugich timim iḷaŋi isummatigikkavut anniqsuutaupiaŋiññasugalugich. 25Tainna God-im sivuniqaŋagaa timi itquvlugu, sulliñipayauraŋi timipta atautchisun itquvlugich, qaunagilluataquvlugich iluqaisa atunim. Tainnatun God sivuniqaŋaruq iluqaisa ukpiqtuat iñuuniaqatigiiquvlugich atilutiŋ. 26Atausiq iḷauruaq isumaaluusiqpan, iluqaġmiŋ iḷauruat isumaaluutigigaat, naagga atausiq iḷauruaq isumakkusiaqaġluataqpan, iluqaġmiŋ quviatchaktaurut.
27Iluqavsi atausiurusi, iñullaaguvlusi sulliñiġimmatun Christ timaata itkaasi. 28#Eph 4.11.Aasii aŋaiyyuliqiruat akunġanni God piksraŋaruq sivulliġivlugu, iñuich tilirauvlugich alġaqsruitquvlugich, igḷuani uqaqtiksranik God-mun, piŋayuagni iḷisaurriksranik, maanna aliuġnaqtuanik savallaruanik, tamatkuniŋalu iłuaqsiriḷḷaruanik, ikayuiruksraniglu, ataniġnaqutiqaqtuallu, uqallaruallu allakaaġiiñik uqautchiñik naluramiŋnik. 29Uvva inna. Tamatkiġḷutiŋ ukpiqtuaguruat tilirauŋitchut alġaqsruiyyaqulugich, suli tamatkiġḷutiŋ God-mun uqaqtauŋiñmiut. Tamatkiġḷutiŋ iḷisaurrauŋiñmiut, naaggaunnii tamatkiġḷutiŋ aliuġnaqtuanik savalaiñmiut. 30Iluqaqpiaġmiŋ piqaŋiñmiut iłuaqsiriñiġmik. Suli tamatkiġḷutiŋ uqallasiḷḷaruaguŋiñmiut allanik uqautchiñik naluramiŋnik naagga mumiksiḷḷasiḷutiŋ tamatkuniŋa allanik uqautchiñik. 31Tavraasii kipiġniupiaġitchi anniqsuutaułhaaqtuanik aitchuusiaqaġuglusi. Paŋmapak uqallautiniaġivsi nakuułhamaaqtuamik aitchuusianiñ.
ទើបបានជ្រើសរើសហើយ៖
1 Corinthians 12: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)