Hinangan 21
21
Hap pī si Paul si Awrusalam
1Manjari nabiyaꞌ ne kami si meꞌ aꞌa Epesus miyaꞌan duk patulak ne kami. Manalus kami tudju Kos. Pagellew dambuwaꞌ tekka kami si Rodos, duk billaꞌi palanjal kami hap Patara. 2Laꞌi si Patara ngasuwaꞌ kami kappal sōng patulak hap Penisiya. Pasakey kami laꞌi duk nuhut ne kami patulak. 3Pagkite kami ne pūꞌ Kiprusin, palabey kami duk si bibangan kami pūꞌ miyaꞌan bu palanjal kami tudju Siriya. Laꞌi si lahat Tiros pinaduwaꞌi meꞌ duwaꞌan kappalin hangkan duwaꞌi kami laꞌi. 4Ngasuwaꞌ kami laꞌi meꞌ tindeg si Isa duk patennaꞌ kami si siye da simana. Peggeꞌ bakas siye pinahātihan weꞌ Niyawa Tuhanin, hangkan inakahan weꞌ de si Paul gaꞌi iye dinaꞌak palaꞌus hap Awrusalam. 5Pagtaꞌabut ne ellew patahalaꞌ kamihin, tinuhutan kami weꞌ de kēmon paluwas amban puweblo binoꞌo meꞌ andaden duk meꞌ anakden. Manjari nengge kami kēmon duk tuꞌut kamihin si tapiyan māku-māku si Tuhan. 6Ubus magtabiyaꞌ ne kami duk pasakey ne kami si kappal. Siye hap lumaꞌ ne balik.
7Patulak kami amban Tiros hap Tolemas. Pagtekka kami laꞌi, sinagina weꞌ kami meꞌ pagkasi kami tindeg si Isa malaꞌihin duk laꞌi kami si siye da ellew. 8Pagsasumuhin patulak ne isab kami duk tekka kami si Kesarea. Hap pī kami si lumaꞌ si Pilip, aꞌa bahannen magmahalayak-mahalayak aka-aka mahāp sabab si Isahin. Patennaꞌ kami laꞌi si iye. Si Pilip inin dambuwaꞌ hep amban meꞌ aꞌa pituꞌ tapeneꞌ laꞌi si Awrusalam magbahagiꞌ-bahagiꞌ sīn paggastuhin matuꞌuhin. 9Niyaꞌ ampat anakne budjang magpalataꞌ bissā Tuhanin. 10Paglaꞌi ne kami bang piyem bahangi, niyaꞌ tekka pī dambuwaꞌ aꞌa amban lahat Yahudiya inēnan Agabus. Magpalataꞌ du isab iye bissā Tuhanin. 11Pī iye si kami duk ineddoꞌ weꞌ ne kandit si Paulin, bu ne mugung di bettisnen duk tangannen duk kanditin. Ubus paꞌin Agabus, “Iye inin lapal amban Niyawa Sutsihin: Dapuꞌ kandit inin iningketan du isab kuweꞌ inin weꞌ meꞌ Yahudi si Awrusalamin duk sōngande du iye pī si antanan meꞌ aꞌa bangsa seddilihin.”
12Pagkale kami pinaꞌin Agabus inin, kami ne duk meꞌ katindegan si Isa malaꞌihin buyuꞌ-buyuꞌ kami si Paul gaꞌi dinaꞌak palaꞌus hap Awrusalam. 13Saguwaꞌ nambung si Paul, paꞌinne, “Weꞌey kaꞌam iyan magtangis? Dukka teꞌed ateykun weꞌ bi. Maglillaꞌ du ku dumaꞌin hadja iningketan saguwaꞌ bisan pe pinapatey laꞌi si Awrusalam, basta sabab Panuhutankun si Isa.” 14Gaꞌi teꞌed iye takoleꞌ kami mages, hangkan padeheng ne hadja kami duk paꞌin kami, “Bayaꞌ-bayaꞌ Tuhanin ne.”
15Palabey bang piyem bahangi, magmemes kami duk palanjal ne kami hap Awrusalam. 16Niyaꞌ meꞌ tindeg si Isa si Kesareahin nuhut kami isab duk binoꞌo kami weꞌ de pī si lumaꞌ si Manason peggeꞌ laꞌi padehengan kamihin. Si Manason inin aꞌa Kiprus, duk dambuwaꞌ iye amban meꞌ tindeg si Isa tagnaꞌley.
Tindew si Paul si Yakub
17Pagtekka kami laꞌi si Awrusalam, kēgan teꞌed meꞌ katindegan si Isa malaꞌihin nampang kami. 18Pagsasumuhin magtuhut kami duk si Paul pī nindew si Yakub. Laꞌi du isab patipun meꞌ bahiꞌin. 19Sinagina si Paul weꞌ de, ubus bu inaka-aka ne weꞌ ne si siye kēmon meꞌ bakas pinahinang Tuhan si iye diyalem meꞌ kabangsahan seddilihin. 20Pagkalede inin, pinudji weꞌ de Tuhanin. Manjari paꞌinde pu si Paul, “Bagay, kataꞌuhannu du weꞌ ibuhan ne meꞌ bangsate bi Yahudi masandel pu si Isahin. Bēbbegande teꞌed saraꞌ si Musahin. 21Bakas siye kaꞌakahan sabab kaꞌu, weꞌ magtoloꞌ koꞌ kew si kēmon meꞌ Yahudi maglahat si meꞌ lahat kabangsahan seddilihin, weꞌ gaꞌi ne subey tuhutde saraꞌ si Musahin. Paꞌinnu koꞌ weꞌ gaꞌi ne siye subey magislam meꞌ anakden duk gaꞌi ne siye subey nuhut meꞌ kaꞌaddatan bangsa Yahudihin. 22Na, ine enteꞌ subey hinangnu? Peggeꞌ bugtuꞌ takalede ne weꞌ tiyaꞌ ne kew tekka. 23Hangkan hāp bang tuhutnu pinaꞌin kami si kaꞌu inin,” paꞌin meꞌ bahiꞌin. “Niyaꞌ tuꞌu ampat aꞌa bakas ngajanjiꞌ si Tuhan duk sōng tambus ne janjiꞌden. 24Patuhut kew pī si siye si langgal hadjehin duk hinangun bi addat Yahudi pasal pagsutsihin. Bayedanun gastu pagkulubanden duk ne siye kapagkeke, tandaꞌ weꞌ tambus ne janjiꞌde miyaꞌan. Manjari bang hinangnu inin, kataꞌuhan meꞌ aꞌahin du kēmon weꞌ gaꞌi toꞌo meꞌ takalede sabab kaꞌuhin. Saguwaꞌ kataꞌuhande weꞌ asal tuhutnu du saraꞌ si Musahin. 25Na, pasal meꞌ aꞌa bangsa seddili masandel pu si Isahin,” paꞌinde, “bakas ne du siye paboꞌohan kami sulat ngakahan siye weꞌ subey siye gaꞌi mangan ine-ine bakas paglamas si meꞌ limbagan tuhan-tuhan, subey siye gaꞌi mangan lahaꞌ atawa hayep pikel, duk subey siye gaꞌi magjina.”
26Manjari binoꞌo ne weꞌ si Paul meꞌ aꞌa ampatin, duk pagsasumuhin pī ne siye magtuhut ngahinang meꞌ addat Yahudi pasal pagsutsihin. Pagubus miyaꞌan hinangde, pī si Paul si langgal mahadjehin magaka si meꞌ imamin bang sumiyan tambus pagsutsiden duk bang sumiyan ne siye dangan-dangan magkuluban si Tuhan.
Siniggew si Paul laꞌi dem langgal hadjehin
27Pagsōng ubus ne pitum bahangi pagsutsiden, niyaꞌ meꞌ Yahudi amban Asiya ngite si Paul laꞌi dem langgal hadjehin. Kinawul weꞌ de meꞌ aꞌa maꞌekkahin duk siniggew weꞌ de si Paul. 28Ngalingan siye papales, paꞌinde, “O kaꞌam meꞌ aꞌa Israꞌilin, nabang kaꞌam. Iye ne hep inin aꞌa mangalatag kalahat-lahatanin magtoloꞌ si kēmon aꞌa. Meꞌ panoloꞌnen ngandiyawaꞌan bangsaten bi duk saraꞌ si Musahin duk sampay langgalte bi inin. Duk dagun,” paꞌinde, “tiyaꞌ pe isab niyaꞌ boꞌone meꞌ aꞌa dumaꞌin Yahudi padiyalem pitu dem langgal, moꞌo sammal pitu si panambahayangante bi masutsi inin.” (29Paꞌinde inin peggeꞌ bakas takitede Toropimus, aꞌa Epesusin, magtuhut duk si Paul laꞌi si puweblo duk kannalde binoꞌo iye weꞌ si Paul dem langgal.)
30Manjari, hewuhalaꞌ dem tibuꞌukan Awrusalamin sabab miyaꞌan. Magubas meꞌ aꞌahin pī niggew si Paul duk ilalas iye weꞌ de binoꞌo paluwas amban langgal miyaꞌan. Ubus magtawus tinambel weꞌ de gawangin. 31Sābude sōng mamapatey si Paulin, tekka akahin pī si kelnel meꞌ sundalu Romahin weꞌ hewuhalaꞌ ne tibuꞌukan Awrusalamin. 32Magtawus kelnelin moꞌo meꞌ tininti duk meꞌ sundalu duk magdayiꞌ-dayiꞌ siye pī si antag pagsasewanin. Pagkite meꞌ aꞌahin kelnelin duk meꞌ sundaluhin, padeheng ne siye ngalubakan si Paul. 33Pī kelnelin patapit niggew si Paul duk dinaꞌak weꞌ ne kinarena duk duwe karena si meꞌ sundalunen. Manjari tinilew weꞌ ne meꞌ aꞌahin, paꞌinne, “Sine aꞌa inin duk ine dusenen?” 34Niyaꞌ amban dem kaꞌekkahan aꞌahin nganggasud nambung sa miyaꞌan, sinduwehin isab nganggasud nambung sa inin. Hiyul manamal hangkan gaꞌi kataꞌuhan kelnelin bang ine teꞌed maꞌumantagin. Manjari dinaꞌak weꞌ ne si Paul binoꞌo si meꞌ sundalunen pī dem kutaꞌ. 35Laꞌi pe hadja si Paul si haren kutaꞌin, subey ne iye binengket weꞌ meꞌ sundaluhin hawal basag pagsōngad meꞌ aꞌahin. 36Peggeꞌ paturul-turul hep siye pu si Paul duk nganggasud-nganggasud, paꞌinde, “Papateyun bi iye.”
Missā si Paul pamēbbegne dinen
37Pagsōng ne si Paul boꞌode padiyalem pī dem kutaꞌ, missā si Paul si kelnelin, paꞌinne, “Makajari ke ku missā si kaꞌu?” Nambung kelnelin, paꞌinne, “Taꞌu kew hatiꞌ missā Girik? 38Bang kuweꞌ iyan,” paꞌinne pu si Paul, “dumaꞌin kew hatiꞌ aꞌa Misil bakas mapakuntara si gubelno Romahin baꞌahu miyaꞌan duk mamoꞌo meꞌ mundu ampat ngibu magbessihin pī dem lahat makagindew-gindew?” 39“Dumaꞌin,” paꞌin si Paul. “Aku inin Yahudi. Inanakan ku laꞌi si Tarsus si lahat Kilikiya. Aꞌa amban lahat bangsahan ku inin. Pākuku si kaꞌu, Kelnel, pabissāhun ku si meꞌ aꞌa inin.” 40Dinaꞌak ne si Paul weꞌ kelnelin. Hangkan nengge iye diyataꞌ haren duk ninyas iye duk tanganne si meꞌ aꞌahin duk siye pakale. Sakaliꞌ ne siye padeheng maghidjul, missā si Paul si siye si bissāhan Hibrani.
ទើបបានជ្រើសរើសហើយ៖
Hinangan 21: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
