Hinangan 20
20
Si Paul palabey amban lahat Makedoniya duk Girik
1Pagpuwas meꞌ sasew miyaꞌan, tinawag weꞌ si Paul meꞌ katindegan si Isahin dinaꞌak magtipun. Missā iye si siye pangasigne ateyden, ubus bu nabiyaꞌ ne iye duk pī iye hap Makedoniya. 2Pī iye ngalatag meꞌ kalahatan malaꞌihin duk missā iye si meꞌ aꞌahin pangasigne ateyden. Ubus pī iye si lahat Girik. 3Patennaꞌ iye laꞌi tellum bulan. Manjari magmemes iye sōng patulak hap Siriya. Saguwaꞌ pagkataꞌuhanne weꞌ magsakap hatiꞌ meꞌ Yahudihin mapatey iye, mikil iye moleꞌ palān balik amban Makedoniya. 4Meꞌ saweꞌnen disi Sopater, aꞌa amban lahat Berea anak si Pirus, duk si Aristarkus duk Sekundus, meꞌ aꞌa amban Tessalonika, duk si Gayus amban Derbe, duk disi Tikikus duk Toropimus, meꞌ aꞌa amban Asiya, duk si Timoteo. 5Padehellu siye inin hap Toroas ngagad kami laꞌi. 6Pagpuwas pagkādjaꞌan meꞌ Yahudi pamangande pan gaꞌi sinagetan pasuligin, patulak kami amban Pilipi. Puwas limem bahangi, tekka kami si meꞌ saweꞌ kamihin laꞌi si Toroas. Laꞌi kami patennaꞌ da simana.
Tamanan papī si Paul hap Toroas
7Pagsangem Sabtuꞌ, magtipun kami mangan pan binahagiꞌ-bahagiꞌ pangesseban kamatey si Isahin. Magsakap si Paul tahalaꞌ pagsasumuhin, hangkan magusihat iye si meꞌ aꞌahin ngeregseꞌ tengaꞌ bahangi. 8Pagtipunan kamihin diyataꞌ lumaꞌ duk ekka payitaꞌan laꞌi. 9Niyaꞌ dambuwaꞌ lella bataꞌ pe, inēnan Utikus, ningkoloꞌ diyataꞌ tendewan. Sakaliꞌ pinatahaꞌ weꞌ si Paul bissānen, kinaruꞌ teꞌed Utikus miyaꞌan duk ujud kapatuli. Manjari laboꞌ iye amban katellu bangkat lumaꞌ pagtipunan kami miyaꞌan hap pī padiyawaꞌ. Pagbengketde iye, asal matey ne. 10Saguwaꞌ duwaꞌi pī si Paul ngapangan iye ngekkepan. Manjari paꞌin si Paul, “Daꞌa kaꞌam suse. Ellum ne iye.” 11Ubus balik ne iye pī diyataꞌ lumaꞌ ngepak-ngepak panin duk mangan iye. Missā pe iye si siye ngeregseꞌ salung-salung, ubus bu tahalaꞌ ne iye duk meꞌ saweꞌnen. 12Lella mabataꞌ bakas malaboꞌin, binoꞌo weꞌ meꞌ saweꞌnen hap lumaꞌ ellum. Duk sanyang du dem ateyden.
Amban Toroas hap Miletus
13Padehellu kami amban si Paul hap pī si kappal duk patulak kami hap Assos, peggeꞌ isun kamihin weꞌ laꞌi ne hadja si Assos pasakey si Paul. Pangandaꞌakanne hep miyaꞌan peggeꞌ paꞌinne maglengngan hadja iye amban diyataꞌ duk laꞌi ne kami magkasuwaꞌ si Assos. 14Pagtekka kami si Assos, sinampang kami weꞌ si Paul. Manjari binoꞌo ne iye weꞌ kami sinakey si kappal duk palanjal kami hap Mitilene. 15Patulak isab kami billaꞌi duk pagellew dambuwaꞌ tekka kami laꞌi si antag Kiyos. Pagsasumuhin pasagid kami si Samos, duk kaduwe ellewnen tekka kami si Miletus. 16Pikilan si Paulin weꞌ gaꞌi ne iye pasagid si Epesus duk iye gaꞌi dayan laꞌi si lahat Asiya. Peggeꞌ magdayiꞌ-dayiꞌ iye hap Awrusalam supaya tasaꞌutne du pagkādjaꞌan meꞌ Yahudi inēnande Pentekostesin.
Panessaꞌ-nessaꞌ si Paul si meꞌ bahiꞌ amban Epesusin
17Hangkan pagtekka kami laꞌi si Miletus, maboꞌo si Paul bissā pī si meꞌ bahiꞌ masandel pu si Isa laꞌi si Epesusin, dinaꞌak siye pasampang pī si iye laꞌi si Miletus. 18Pagtekka meꞌ bahiꞌin, missā si Paul si siye. “Kataꞌuhanbi du,” paꞌinne, “bang ine hinangankun tiggelanku luꞌu si kaꞌam, kemuwe tagnaꞌ katekkaku si Asiyahin. 19Maghinang ku si Panuhutanin, diyawaꞌ teꞌed pagateykun duk daran mettak boheꞌ matakun,” paꞌinne. “Maghinang ne ku paꞌin bisan ku kahunitan sabab pagisun meꞌ Yahudi kuntara si akuhin. 20Kataꞌuhanbi,” paꞌin si Paul, “weꞌ asal gaꞌ teꞌed niyaꞌ tapukanku ine-ine bang si kahāpanbi du saguwaꞌ magusihat ku duk magtoloꞌ ku si kaꞌam si kaꞌekkahan aꞌa duk si kalumaꞌanbi. 21Bangsa Yahudi duk bangsa dumaꞌin Yahudi, saliꞌ-saliꞌ siye sessaꞌanku weꞌ subey teꞌed lebbahande meꞌ duseden duk balik ne si Tuhan. Duk subey isab siye sandel si Panuhutanten bi, si Isa. 22Na kuweꞌitu, tiyaꞌ ku hap Awrusalam peggeꞌ inin pangandaꞌakan Niyawa Sutsihin. Gaꞌi kataꞌuhanku bang ine maꞌumantag si akuhin laꞌi. 23Luwal iye kataꞌuhankun,” paꞌin si Paul, “pinabugtuꞌ si aku weꞌ Niyawa Sutsihin si kēmon lahat papīhankun, weꞌ kinalabusu du ku duk bininasa. 24Saguwaꞌ gaꞌi ne ellegku umulkun supaya hadja tahinangku pangandaꞌakan akuhin, duk taꞌubusku hinang pangurung si aku weꞌ Panuhutanten bi si Isa. Duk hinangku inin, magmahalayak aka-aka mahāp sabab lasa duk aseꞌ Tuhanin.
25“Bakas ne kaꞌam talatagku kēmon, ngusihatan kaꞌam sabab pagbayaꞌ Tuhanin. Duk kataꞌuhanku weꞌ taman kuweꞌitu hadja pagkiteten bi. 26Hangkan akahante kaꞌam ellew inin weꞌ bang niyaꞌ kaꞌam para dangan tapī si narkaꞌ, gaꞌi ne ku kasusunan. 27Peggeꞌ gaꞌ niyaꞌ tapukanku amban kaꞌam saguwaꞌ inaka weꞌ ku si kaꞌam kēmon sakap Tuhanin. 28Pahatul-hatul kaꞌam si dibi,” paꞌin si Paul, “duk ipatun bi isab kēmon meꞌ masandel pu si Isa pinaꞌipat Niyawa Sutsi si kaꞌamin. Hatulun bi meꞌ masandel si Panuhutanten bi peggeꞌ sukuꞌ si Tuhan siye sabab matey Anaknen para si siye. 29Kataꞌuhanku weꞌ paglumikut ne ku,” paꞌin si Paul, “niyaꞌ iyan piyu palamud si kaꞌam meꞌ guru dustaꞌan duk magtoloꞌ siye gaꞌi bennal. Kuweꞌ siye meꞌ asu bahani, duk gaꞌi siye maꞌaseꞌ si kaꞌam. 30Bisan amban dem kaꞌekkahanbi, niyaꞌ du iyan magdustaꞌ supaya taboꞌode meꞌ masandel pu si Isahin patuhut si siye. 31Hangkan papateng-pateng kaꞌam. Duk esseb-essebun bi weꞌ ellew-sangem dem tellun tahun, gaꞌ ku padeheng ngusihatan kaꞌam dangan-dangan duk ekka boheꞌ mataku buꞌus sababbi.
32“Na kuweꞌitu,” paꞌin si Paul, “karayaw kaꞌam ipat Tuhanin, duk karayaw lapalne sabab lasanen duk aseꞌnen makahaget sandelbi si Tuhanin. Bang tuhutbi lapalne inin, pasukuꞌan Tuhanin kaꞌam kahāpan, iye asal pamusakaꞌne si meꞌ manuhut iye dambūs-būsin. 33Gaꞌ ku bakas magnapsuhan alataꞌ aꞌa, pilakne ke atawa bulawanne atawa semmekne. 34Kaꞌam, kataꞌuhanbi du teꞌed weꞌ maghinang ku duk niyaꞌ paggastu kami duk meꞌ saweꞌkun. 35Pinakitehan weꞌ ku si kaꞌam,” paꞌin si Paul, “weꞌ subey kite bi maghinang pabasag supaya tatabangante bi meꞌ mamiskinin. Subey essebte bi bakas binissā Panuhutanten bi si Isa, paꞌinne, ‘Pasōng kite kēgan bang kite ngurung amban bang kite inurungan.’ ”
36Pagubus si Paul missā, nengge iye duk tuꞌutne magtuhut duk siye kēmon, māku-māku si Tuhan. 37Sakaliꞌ ne siye nabiyaꞌ, magtangis siye ngalipunesan si Paul duk ngūkan iye. 38Iye teꞌed makadukka siyehin, bissānen weꞌ gaꞌi ne iye kitede balik. Ubus tinuhutan iye weꞌ de hap pī si kappal.
ទើបបានជ្រើសរើសហើយ៖
Hinangan 20: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
