Hinangan 22
22
1“Meꞌ kapungtinaꞌihan duk meꞌ kamatettoꞌahan,” paꞌin si Paul, “pakale kaꞌam si bissāku inin pamēbbegku dikun.” 2Pagkalede iye missā si bissāhan Hibrani, pasōng ne siye gaꞌ maghidjul. Manjari paꞌinne si siye, 3“Aku inin aꞌa Yahudi du. Inanakan ku laꞌi si Tarsus si lahat Kilikiya, saguwaꞌ kasuligankun tuꞌu si Awrusalam. Bakas ku mulid Gamaliel, duk katoloꞌan ku teꞌed si saraꞌ meꞌ kapapuꞌanten bi. Duk nuhut ku Tuhanin dambūs-būs kuweꞌ du kaꞌam kuweꞌitu inin. 4Bininasa weꞌ ku meꞌ aꞌa manuhut toloꞌ si Isahin sampay niyaꞌ siye matey,” paꞌin si Paul. “Siniggew siye weꞌ ku lella-dende kinalabusu. 5Kasaksiꞌan imam nakuraꞌin duk kēmon kakunsihalanin weꞌ toꞌo pinaꞌinku inin. Bakas ku kaꞌurungande meꞌ sulat para si meꞌ pagkasite bi Yahudi laꞌi si Damaskusin. Hangkan hap pī ku si Damaskus supaya tasiggewku meꞌ tindeg si Isa takasuwaꞌku malaꞌihin duk taboꞌoku siye iningketan pitu si Awrusalam bininasa tuꞌu.”
Magaka si Paul sabab patindegne pu si Isahin
(Hinangan 9:1-19; 26:12-18)
6“Pagtapit ne ku si Damaskus lettu ellew, bessuwang niyaꞌ sahaya dantaꞌ manamal amban diyataꞌ langit sinag pī si aku. 7Hebbaꞌ ku si bulak duk niyaꞌ suwala takaleku magpaꞌin, ‘O Saul. Saul. Weꞌey ku binasanu?’ 8Tinilew weꞌ ku, ‘Sine kew, Tuwan?’ Nambung iye, ‘Si Isa ku, aꞌa Nasaretin. Aku hep bininasanun.’ 9Na, meꞌ saweꞌkun, takitede dantaꞌin,” paꞌin si Paul, “saguwaꞌ gaꞌ tahātide bang ine pinaꞌin suwala si akuhin. 10Manjari tinilew weꞌ ku, ‘Ine subey hininangkun, Tuwan?’ Paꞌinne si aku, ‘Kuwat kew duk palanjal ne kew pī si Damaskus. Inakahan du kew laꞌi kēmon hinang pinasukuꞌ weꞌ Tuhan si kaꞌuhin.’ 11Manjari pessek ne ku weꞌ silew dantaꞌ miyaꞌan,” paꞌin si Paul, “hangkan tinundan ku weꞌ meꞌ saweꞌkun pī si Damaskus.
12“Laꞌi si Damaskus, niyaꞌ aꞌa inēnan Ananiyas. Be-āgama iye duk nuhut saraꞌten bi. Pagaddatan teꞌed iye weꞌ meꞌ Yahudi si Damaskusin kēmon. 13Pī Ananiyas inin si aku duk nengge iye si bihingku. Paꞌinne si aku, ‘Saul, pungtinaꞌite kew. Ngite ne kew balik.’ Magtawus ku ngite balik,” paꞌin si Paul, “duk pinayaman iye weꞌ ku. 14Paꞌin Ananiyas si aku, ‘Tapeneꞌ kew weꞌ Tuhanin, Tuhan inisbat weꞌ meꞌ kapapuꞌanten bi, supaya kataꞌuhannu kinabayaꞌannen. Tapeneꞌne kew supaya isab takitenu daraꞌakanne mabentelin, duk takalenu asal suwalanen missā. 15Peggeꞌ hinangne kew saksiꞌ, ngakahan kēmon aꞌahin sabab meꞌ bakas takitenun duk takalenun. 16Na, daꞌa ne kew dayan,’ paꞌin Ananiyas si aku. ‘Kuwat kew duk kew tapandi, tandaꞌ weꞌ sukuꞌ pu si Isa ne kew. Ngampun kew pu si Isa, Panuhutanin duk ampunne meꞌ dusenun.’ ”
Dinaꞌak si Paul magmahalayak si meꞌ aꞌa dumaꞌin Yahudi
17“Manjari balik ku pitu hap Awrusalam,” paꞌin si Paul. “Duk sābuku ngampun laꞌi dem langgal hadjehin, 18pabagala si aku si Isa, Panuhutanin, duk missā iye si aku. Paꞌinne, ‘Padayiꞌ kew duk tahalaꞌ kew bittuꞌu amban Awrusalam peggeꞌ gaꞌi du kahagad meꞌ aꞌa matuꞌuhin meꞌ panaksiꞌnu sabab akuhin.’ 19‘Saguwaꞌ Tuwan,’ paꞌinku, ‘asal kataꞌuhande du weꞌ bakas talatagku meꞌ kalanggalanin niggew duk mapeddiꞌan meꞌ masandel si kaꞌuhin. 20Duk pamapatey meꞌ aꞌa pu si Estepanin, saksiꞌnun, laꞌi du ku isab padūs si hinangde miyaꞌan, duk aku pe mamanteyan meꞌ semmek meꞌ aꞌa mamapatey iyehin.’ 21Saguwaꞌ paꞌin Panuhutanin si aku, ‘Tahalaꞌ ne kew bittuꞌu, peggeꞌ daꞌakte kew patala pī si meꞌ kabangsahan dumaꞌin Yahudihin.’ ”
22Pakale teꞌed meꞌ aꞌahin pu si Paul sampay tabissāne inin. Saguwaꞌ ubus hadja inin bissāne, nagnaꞌ ne isab siye maggasud papales, paꞌinde, “Papateyun bi iye. Gaꞌi iye pataꞌ ellum.” 23Maggasud ne paꞌin siye duk iliyab-liyaban weꞌ de meꞌ semmekden duk magsabulak leppug padiyataꞌ hawal astelden. 24Manjari dinaꞌak weꞌ kelnelin binoꞌo si Paul si meꞌ aꞌanen pī diyalem kutaꞌ. Dinaꞌak isab weꞌ ne ilubakan si Paul duk iye magaka bang weꞌey meꞌ Yahudihin maggasud kuweꞌ miyaꞌan nguntarahan iye. 25Pagtaꞌingketan ne weꞌ de si Paul sōng ilubakan, paꞌin si Paul si tininti manengge malaꞌihin, “Nuhut saraꞌ ke kaꞌam bang kaꞌam ngalubakan aꞌa Roma sa aku inin, bu gaꞌ pe ku bakas tahukum?” 26Pagkale tinintihin inin, pī iye si kelnelin duk paꞌinne, “Ine teꞌ arak hininangte inin? Aꞌa miyaꞌan hatiꞌ aꞌa Roma.” 27Manjari pī kelnelin pu si Paul nilew iye, paꞌinne, “Akahanun ku matoꞌohin, aꞌa Roma ke kew?” “Aweꞌ,” paꞌin si Paul. 28Paꞌin kelnelin, “Aku inin ekka sīn tapamayedku si gubelno Romahin duk ku manjari aꞌa Roma.” “Saguwaꞌ aku,” paꞌin si Paul, “aꞌa Roma ku kemuwe panganak akuhin.” 29Pagkalede miyaꞌan, magtawus tahalaꞌ amban si Paul meꞌ aꞌa sōng mangalubakan iyehin. Sampay kelnelin tinalew sakaliꞌ kataꞌuhanne weꞌ si Paul aꞌa Roma, peggeꞌ iye hep mangandaꞌak si Paul kinarenahin.
Si Paul si harapan meꞌ kakunsihalanin
30Bayaꞌ kataꞌuhan kelnelin bang ine teꞌed panuntutan meꞌ Yahudi si Paulin. Hangkan pagsasumuhin dinaꞌak weꞌ ne magtipun meꞌ nakuraꞌ meꞌ imamin duk kēmon meꞌ kakunsihalanin. Manjari pinaluwas weꞌ ne si Paul amban kutaꞌ duk binoꞌo weꞌ ne pinaharap pī si meꞌ kakunsihalan miyaꞌan.
ទើបបានជ្រើសរើសហើយ៖
Hinangan 22: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
