Hinangan 19
19
Si Paul laꞌi si Epesus
1Sābu laꞌi si Apollos si Korinto, lumengngan si Paul pabutas si meꞌ kalahatan diyataꞌ sampay tekka iye si Epesus. Makadugpak iye laꞌi meꞌ tindeg si Isa. 2Tilewne siye, paꞌinne, “Tasangkabi ke Niyawa Sutsihin sakaliꞌ kaꞌam sandel pu si Isa Almasi?” “Gaꞌ,” paꞌinde, “gaꞌ kami bisan makakale weꞌ niyaꞌ Niyawa Sutsi.” 3Paꞌin si Paul, “Na, pandi ine bakas pamandi kaꞌamin?” “Pandi panoloꞌ Yahiyahin,” paꞌinde. 4Paꞌin si Paul, “Pandi panoloꞌ Yahiyahin pandi tawubat. Pinandi weꞌ ne sasuku magsusunan duk ngalebbahan duseden. Saguwaꞌ inakahan isab weꞌ ne meꞌ aꞌahin weꞌ subey siye sandel si mapaturul si iyehin, hātinen pu si Isa.” 5Pagkalede inin, pinandi ne siye, tandaꞌ weꞌ sukuꞌ pu si Isa ne siye. 6Manjari binettad weꞌ si Paul tangannen si siye. Magtawus paꞌasek Niyawa Sutsihin si siye duk missā ne siye si meꞌ bissāhan seddili, duk pinalataꞌ isab weꞌ de meꞌ bissā Tuhanin. 7Niyaꞌ sampūꞌ duk duwe ekkahanden.
8Manjari padiyalem si Paul pī si langgal meꞌ Yahudihin duk missā iye si meꞌ aꞌahin sabab pagbayaꞌ Tuhanin. Gaꞌ niyaꞌ talew-talewne missā si siye. Dem tellum bulan iye inin bahannen. Magsuꞌal iye duk siye duk hinumatan teꞌed siye weꞌ ne duk niyaꞌ ne siye sandel pu si Isa. 9Saguwaꞌ meꞌ sinduwehin, tuwas teꞌed kōkden duk gaꞌi siye kahagad. Magbissā laꞌatan pe siye sabab toloꞌ miyaꞌan si pagharapan meꞌ aꞌahin. Hangkan tahalaꞌ si Paul amban langgal miyaꞌan duk binoꞌo weꞌ ne meꞌ masandel pu si Isahin. Duk kahabaꞌ ellew laꞌi ne iye magusihat si meꞌ aꞌahin si iskulan Tirannus. 10Iye inin hinangannen dem duwen tahun hangkan kēmon meꞌ aꞌa si tibuꞌukan lahat Asiya miyaꞌan, Yahudi ke atawa dumaꞌin Yahudi, takalede lapal sabab si Isa, Panuhutanin.
Meꞌ anak si Eskebahin
11Inurungan balakat si Paul weꞌ Tuhanin maghinang meꞌ hinangan balakatan makaꞌulaliꞌ manamal. 12Bisan meꞌ panyitu hadja duk meꞌ tuwaliya bakas tagunane bang binoꞌo pī si meꞌ masakihin, kawuliꞌan siye amban meꞌ sakiden duk paluwas meꞌ seyitanin amban siye.
13Niyaꞌ isab ngalatag lahat miyaꞌan meꞌ Yahudi magtawal-tawal. Tawalden pagpaluwas seyitan amban aꞌa. Manjari suleyande ginuna ēn si Isa, Panuhutanin, pamaluwasde seyitan. Paꞌinde si meꞌ seyitanin, “Si ēn si Isa minahalayak si Paulin, daꞌakte kaꞌam paluwas amban aꞌa iyan.” 14Manjari inin, niyaꞌ pituꞌ lella magpungtinaꞌi nawal sa īꞌ. Samaden si Eskeba, imam nakuraꞌ meꞌ Yahudihin. 15Sakaliꞌ ne sinuleyan weꞌ de pinaluwas seyitanin kuweꞌ miyaꞌan, nambung seyitanin, paꞌinne, “Si Isa kataꞌuhanku, duk si Paul kataꞌuhanku. Saguwaꞌ kaꞌam, gaꞌi kaꞌam kataꞌuhanku. Sine teꞌ kaꞌam?” 16Magtawus meꞌ lella miyaꞌan kinapangan ginansing-gansing weꞌ aꞌa taga seyitanin. Gaꞌ siye makaꞌatu. Magubas siye kēmon amban lumaꞌ aꞌa miyaꞌan, bakat-bakat siye duk kakuwantangan ne. 17Manjari maꞌumantag inin bawag si tibuꞌukan Epesus, si meꞌ Yahudi duk si meꞌ bangsa seddili. Paꞌasekan talew siye kēmon duk pasōng bantu ēn Panuhutanin, si Isa. 18Ekka meꞌ masandel pu si Isahin pī patampal magbennal si meꞌ hinangande malaꞌatin. 19Ekka siye bakas meꞌ magtawal-tawalin, binoꞌo weꞌ de pinagtipun meꞌ kitab-kitab panulatan meꞌ tawalden, duk ineggas weꞌ de si pagmatahan meꞌ aꞌahin. Initung weꞌ de halgaꞌ meꞌ kitab-kitab miyaꞌan, niyaꞌ limempūꞌ ngibu pilak. 20Hangkan takite weꞌ balakatan lapal Tuhanin duk ngalatag ne paꞌin lapal Tuhanin. Duk magkaꞌekka meꞌ makahagad si lapal Tuhanin.
Sasew hadje laꞌi si Epesus
21Puwas miyaꞌan, magsakap si Paul hap pī isab si lahat Makedoniya duk Akaya, ubus bu palaꞌus ne hap Awrusalam. “Ubus ku hap Awrusalam,” paꞌinne, “subey ku isab tapī si Roma.” 22Hangkan dinaꞌak weꞌ ne duwangan meꞌ tabangnen, si Timoteo duk Erastus, padehellu hap Makedoniya sābune dahuꞌ laꞌi si Asiya.
23Sābu miyaꞌan, laꞌi si Epesus niyaꞌ sasew hadje sabab toloꞌ si Isahin. Kuweꞌ inin kahalannen. 24Niyaꞌ dambuwaꞌ pandey magsasal-sasal pilak, ēnnen si Demetiri. Magsasal iye lumaꞌ-lumaꞌ pilak kuweꞌ bantuk langgal tuhande dendehin inēnan Artemis. Demetiri duk meꞌ aꞌa maghinang si iyehin, ekka sīn takasuwaꞌde si hinangde miyaꞌan. 25Tinawag siye kēmon weꞌ Demetiri dinaꞌak magtipun. Tinawag isab weꞌ ne meꞌ seddili aꞌa maghinang kuweꞌ hinangde miyaꞌan. Paglaꞌi ne siye kēmon, paꞌinne si siye, “Meꞌ bagay, kataꞌuhanbi weꞌ hāp teꞌed usahaten bi si hinang inin. 26Takitebi ne duk takalebi ne bang ine hininang aꞌa inēnande si Paul miyaꞌan. Magtoloꞌ iye weꞌ bang tuhan hinang aꞌa, gaꞌi koꞌ bennal tuhan. Duk ekka ne kahagad si panoloꞌne inin, dumaꞌin hadja tuꞌu si Epesus, saguwaꞌ arak si kēmon tibuꞌukan Asiya. 27Hangkan siya-siya hinangte bi inin, kaw diyawaꞌan meꞌ aꞌahin,” paꞌinne. “Duk kaw isab sampay langgal tuhante bi mabangsahanin gaꞌi ne pinahadje dem atey. Kuweꞌitu si Artemis sinumba weꞌ kēmon aꞌa si tibuꞌukan Asiya duk sampay si tibuꞌukan dunya. Saguwaꞌ siya-siya kaw dumiyawaꞌ bangsanen,” paꞌin Demetiri.
28Pagkale meꞌ aꞌa magtipun miyaꞌan pinaꞌin Demetirihin, astel teꞌed siye. Ngalingan-ngalingan siye pinapales, paꞌinde, “Pinahadje teꞌed Artemis, tuhan meꞌ aꞌa Epesusin.” 29Ujudnen hewuhalaꞌ dem tibuꞌukan puweblo miyaꞌan. Siniggew weꞌ meꞌ aꞌahin si Gayus duk Aristarkus, meꞌ aꞌa Makedoniya saweꞌ si Paul maglengnganin. Ilalas weꞌ de duwanganin pī dem lumaꞌ mahadje pagtipun-tipunanin. 30Mabayaꞌ si Paul pī paharap si meꞌ aꞌa mabanesin, saguwaꞌ pinages iye weꞌ meꞌ katindegan si Isahin. 31Bisan meꞌ bagellal bagayne si lahat Asiya miyaꞌan, masan pī si iye ngamey-ngamey gaꞌi iye dinaꞌak padiyalem pī si lumaꞌ mahadje pagtipun-tipunanin.
32Sābu miyaꞌan hidjul teꞌed dem pagtipunan miyaꞌan. Ngalingan-ngalingan sinduwehin sa inin, ngalingan-ngalingan isab sinduwehin sa miyaꞌan. Peggeꞌ kaꞌekkahanin, gaꞌ bisan kataꞌuhande bang weꞌey siye miyaꞌan laꞌi magtipun. 33Manjari niyaꞌ dambuwaꞌ aꞌa inēnan Iskandal pinakōkan weꞌ meꞌ Yahudihin, dinaꞌak missā si meꞌ aꞌahin. Kannal meꞌ aꞌa sinduwehin weꞌ iye pagjānan sasewin. Manjari magsinyas iye duk tanganne duk siye pakale peggeꞌ sōng iye missā. 34Saguwaꞌ pagtakilale meꞌ aꞌahin weꞌ Yahudi hatiꞌ iye, magdūs siye kēmon ngalingan-ngalingan dem duwe ora, binalik-balik bissāden, paꞌinde, “Pinahadje teꞌed Artemis, tuhan meꞌ aꞌa Epesusin.”
35Ujud lettep siye kēmon weꞌ bagellal magsulat-sulat si puweblo miyaꞌan. Paꞌinne si meꞌ aꞌahin, “O meꞌ aꞌa Epesus. Kataꞌuhan du hep weꞌ aꞌahin kēmon weꞌ kite bi meꞌ aꞌa Epesusin mangantan lumaꞌ Artemisin, tuhante bi mabangsahanin, duk batu masutsi malaboꞌ amban diyataꞌ langitin. 36Gaꞌ niyaꞌ kapamasuwey sabab inin. Hangkan padeheng hadja kaꞌam duk daꞌa kaꞌam maghinangan ine-ine bang gaꞌi dahuꞌ bakas pikilbi. 37Tiyaꞌ binoꞌo weꞌ bi meꞌ aꞌa inin pitu, bu gaꞌ du siye bakas ngahawasan langgal atawa missā laꞌatan sabab tuhante dendehin. 38Bang batang tuntutan Demetiri duk meꞌ saweꞌnen meꞌ aꞌa inin, niyaꞌ du meꞌ ellew paghukum-hukuman duk īꞌ du laꞌi meꞌ mangahukumin. Ambat siye laꞌi manuntutin. 39Duk bang niyaꞌ pe palkalaꞌbi seddili, subey laꞌi hinatul si pagmitingan meꞌ aꞌa lahat inin. 40Peggeꞌ siya-siya kite bi, kaw kite bi tinuntutan sabab sasew maꞌumantag ellew inin bu gaꞌ niyaꞌ jānne. Na, gaꞌi kite bi makapagdaꞌawa sabab pagtipunante bi inin.” 41Pagubus miyaꞌan bissāne, pinapoleꞌ ne weꞌ ne meꞌ aꞌahin.
ទើបបានជ្រើសរើសហើយ៖
Hinangan 19: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
