Loma 3
3
Yaubada yana gahe keke-mo'a ginayawelini.
1Tu mena yaku gahe Yuda kaliva wowoda ana tomogolota fa'ina ka'i kaliva sa'eyana ginagahe ginagayo, “Gava yamumu againe ide miYuda badi yo'o tulidiyao kalivai-dina katubuhegedi? Wowoda ana tomogolota againe gava yamumu kanuhagani?” 2Me yamumu moya'aina, e yamumu tulina tulina ide miYuda kanuhagana. Yamumu sa'eyana ganamidiyakahina higa Yaubada Bana bona-mo'ena ide miYuda agaideya gihawavemogatalena be higa tomiyababi matatabudi kanahawaveleveledi. Hidedemi ada vehimeya giveleda. 3#2Ti 2:13Kadu'e tuwai-mo'ena Yaubada yana veyao ide miYuda agaideya gisena be giwonadabadaba vaita gina'itave'avida. Tu yada yo'o kalivadi tufoidi moya'aidi Yaubada bonana keke hidavetumaganeni ada yana veyao hikilowena. Gavaiyami? Badi hikilowena fa'ina, ka'i kanagahe vaita Yaubada yana wonadabadaba yada yo'o ada itave'avina fa'ina gidayawelini? Keke, keke-mo'a! 4#Sam 51:4Omi wahalamanena kaliva ma hiveve'afwayafwaya tu Yaubada keke-mo'a gidafwaya. Au gavaimi gigahe medemi gigugai. Meda anafaiweya Veyao Tuwaina ana buki gigahe gigayo,
Ka'i O Yaubada unagahe, au makewa kaliva moya'aidi ya gahe au velemo'ena ma hina'itahalamanena. Ka'i kaliva hinahawavekoyoye, au makewa yadi gahe fwaya ma kabu'avane ginayemu.
Hidedemi tokaiwabu Devida Veyao Tuwaina ana buki againe gigahe.
5Tu tamo hakwadi hida babi ana nuwanuwa amine ginagahe ginagayo, “Ka'i ide kahuluva koyona, au mali kaliva Yaubada yana huluva tunutunugi-mo'ena himadu'itana. Gavadi-yo yada koyona againe Yaubada yana huluva tunutunugina kakivemahalina nonogana givematahiwadiyeda? Bana hima Yaubada keke tunutunugina.” Ka'i hidede amine kanagahe o ka'i keke? Keke, keke-mo'a! 6Yaubada gihuluhuluva tunutunuginaga. Ka'i Bana keke kaliva tunutunugina digo, kadu keke tomiyababi moya'aida anafaiweya ginavedewayaugida. 7Kadu kaliva sa'eyana ginagahe ginagayo, “Yaku fwaya againe kaliva Yaubada yana gahe au velemo'ena ma himadu'itana. Gavadi-yo yaku fwaya Yaubada yana kaiwabu gikivetubugina nonogana tokoyona adi matahiwadi giveledi amine aku matahiwadi ginaveleku?” 8Ka'i medema gahe velemo'ena digo, kaliva tufoidi kadu hinagahegahe hinagayo, “Kanahuluva koyona be higa mali kaliva yada koyona againe Yaubada kaliva hagihagi-mo'ena ma hinamadu'itana.” E, kaliva tufoidi hiveyaineku higa vaita mena gahe-nadi amine gadavehawala. Gaveyao medede amine higahegahe, medema gilubodadi be adi matahiwadi hinanuhagana.
Keke tamo hakwadi yegayegana Yaubada matane.
9 #
Lo 3:23
Hida kagahe ime miYuda yamumu moya'aina anuhagana. Medema fa'ina gavaimi kananuwanuwa? Ka'i ide miYuda badi yo'o tulidiyao kalivai-dina Yaubada matane katubuhegedi o ka'i keke? Keke, keke-mo'a! Nuwanuwa koyona ide miYuda givehimeyeda kadu omi yo'o tulimiyao kalivai-mina givehimeyemi, au moya'aida koyona ana kaliva, ada ita leleleya. 10#Sam 14:1-3Meda Veyao Tuwaina ana buki gigahe gigayo,
Keke tamo hakwadi yegayegana Yaubada matane, keke-mo'a.
11Keke tamo hakwadi eda tunutunugina gidahalamaneni,
keke tamo hakwadi Yaubada gidaleleleni.
12Kaliva moya'aidi Yaubada yana eda hihegena,
moya'aidi yadi nuwanuwa balana
keke tamo hakwadi gidahuluva yamumuna, keke-mo'a.
13 #
Sam 5:9, 140:3 Yadi gahe vaita lahi yauyaugina ana lada amine.
Meyadi fwaya againe gimaga.
Yadi veyaina ma vaita oloto awabugodi koyona amine.
14 #
Sam 10:7
Hinuwanuwakoyove'ine fa'ina wonakoyokoyo agaidiya awadi gimaga.
15 #
Gah 1:16
Himaduve'amunumunuga be higa kaliva hinaluve'alikadi.
16Fafali moya'aina agaidiya hinunudadana
kaliva koyodiyao adi iya'iyaya gidadauda,
ase'u'aulolo kadu kaliva adi kivekoyo.
17Kukuya ana eda keke hidahalamaneni.
18 #
Sam 36:1
Yaubada keke ma'ita hidamatauseni.
Au hidedemi Yaubada kaliva moya'aida yada dewa fa'ina Veyao Tuwaina ana buki againe gigahe.
19Tu ide miYuda kahalamanena Yaubada vehimeya tulina tulina agaideya gisena, ada gilubodada be vehimeyai-dina matatabudi kana'itave'avidi. Atu keke kada'itave'avini fa'ina, ide miYuda kadu omi yo'o tulimiyao kalivai-mina buye kahuluhuluva koyona ma moya'aida Yaubada matane kave'amata. E, Yaubada ide tomiyababi moya'aida yada koyona fa'ina ginavedewayaugida be ada laufata ginaveleda. 20#Ga 2:16; Lo 7:7Moya'aida Yaubada yana vehimeya kayawelidi fa'ina, Yaubada keke tamo hakwadi fa'ine ginagahe ginagayo, “Bana yaku vehimeya gi'itave'avidi fa'ina, bana kaliva yegayegana Iya matakuya.” Mena vehimeyai-dina agaidiya keke yada yegayega gidayemu. Au vehimeyai-dina agaidiya yada nuwanuwa koyona ka'ayaunena.
Kaliva yada yegayega Yaubada matane inubana ma
vetumagana.
21Tu tova adamoya Yaubada mali eda yada yegayega Bana matane fa'ina givehawaleda. Boi tuwai-mo'ena Mosese yana buki-vehimeya againe kadu Yaubada bonana ana to'awatalatalaina yadi etoladi againe edai-nadi fa'ina hilukahihiyena. Ada mena yada yegayega Yaubada matane ana eda tulina keke Mosese yana vehimeya ana dibumuhiga againe gidave'inuba. 22-23#Lo 1:17, 3:9Au eda tulina inubana ma Yesu Keliso ana vetumagana againe. E, gaveyao moya'aidi Keliso againe hivetumagana, medema tokoyona nonogana Yaubada badi fa'idiya gigahe gigayo, “Badi kaliva yegayegadiyao Iya matakuya.” Yada koyona fa'ina ime miYuda kadu omi yo'o tulimiyao kalivai-mina ada ita leleleya Yaubada matane, fa'ina ide kaliva moya'aida koyona kafaisewani-yo Yaubada ana ita mahamahali-mo'ena againe ada ita itababubabuna. 24#Ef 2:8Meda ide moya'aida yada koyona fa'ina yogoyogonideyao kamiyami-tu Yesu Keliso gitutuvehobuda. Ada Yaubada yana nuwadoga kaliva moya'aida agaideya gihawahegena be Yesu Keliso yana tutuvehobu fa'ina ide tokoyona nonogana giseda yegayegadeyao Bana matane. 25#1Yn 4:10Yaubada Yesu Keliso giyemaunena be gina'alika higa Bana dayagina gimadu-yo kaliva yadi koyona ana laufata giyawelina be Yaubada yana ila'a ginahavaina. Ada ka'i ide Yesu Keliso againe kanavetumagana, au Bana dayagina yada koyona ginayawelini-yo Yaubada yana ila'a agaideya ginahavaina. Gavadi-yo Yaubada Yesu Keliso giyemauneni-yo koyona ana laufata fa'ina gi'alika? Me mededemana againe kanahalamanena Bana kaliva tunutunugina higa kaliva yadi koyona fa'ina makewa gilaufata. Ka'i keke ginalaufata digo, kadu keke kaliva tunutunugina. Tova tuwaina Yaubada kaliva gi'atuvefa'iledi be yadi koyona keke gidamadulaufata, tu tova adamoya Yesu Keliso giyemaunena be koyona ana laufata fa'ina gi'alika. 26E, tova adamoya kaliva yada koyona fa'ina Yaubada Yesu againe gilaufata be higa yana nuwanuwa tunutunugina ma ginaseyemaunena. Ada au hidede amine kahalamanena Yaubada kaliva tunutunugina. Kadu yada koyona Yesu againe gilaufata fa'ina, ide tokoyona gaveyao Yesu kavetumaganena, medema giseda yegayegadeyao Bana matane.
27Hai ada egana ana kailakata? Keke, keke-mo'a! Vehimeya ka'idibumuhigedi fa'ina, ka'i adafaiweya kanaselakalaka vaita ide kaliva yegayegadeyao? Keke, keke-mo'a! Fa'ina keke vehimeya ana idibumuhiga au yada vetumagana Yesu againe fa'ina ide kaliva yegayegadeyao Yaubada matane. 28#Ga 2:16E, hidedemi kahalamanena, higa keke vaita Yaubada yana vehimeya kada'idibumuhigedi fa'ina au Yesu kavetumaganena fa'ina Yaubada giseda yegayegadeyao Bana matane. 29#Lo 10:12Gavaimi wanuwanuwa? Ka'i Bana Yaubada au miYudagaga yama Yaubada, ime agaimeya yana vehimeya Mosese awane gisena-ma kalivai-mana? Keke-mo'a. Au Bana'e kadu yo'o tulidiyao kalivai-dina buye yadi Yaubada. 30Yaubada Bana'e au sa'eyanaga ada yana nuwanuwa kaliva moya'aida agaideya sa'eyanaga. Ime miYuda gaveyao Yesu againe avetumagana, au medema Yaubada gisema yegayegameyao Bana matane. Omi yo'o tulimiyao kalivai-mina gaveyao Yesu againe wavetumagana, au medema Yaubada gisemi yegayegamiyao Bana matane. 31Yesu againe kavetumagana fa'ina, keke-mo'a Yaubada yana vehimeya tuwai-mo'ena gisena-ma kadakiloweni. Au vehimeyai-nadi kahawaveyamumuyena.
ទើបបានជ្រើសរើសហើយ៖
Loma 3: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
