Loma 4
4
Abelahamo givetumagana fa'ina, bana kaliva yegayegana
Yaubada matane.
1Tu ide miYuda bwaneneda lakahina Abelahamo fa'ina ganagahe. Ka'i bana Yaubada yana vehimeya gidibumuhigena fa'ina Yaubada matane giyegayega o ka'i gavaiyami? 2Ka'i bana yana idibumuhiga fa'ina Yaubada gidasena yegayegana Bana matane digo, yana idibumuhiga fa'ina anafaiweya tauna ana egana gidakilakahina. Atu keke tamo gavadi gidadauda-yo anafaiweya Yaubada matane tauna ana egana gidakilakahini. 3#Aba 15:6; Ga 3:6Yana yegayega Yaubada matane fa'ina, Veyao Tuwaina ana buki gavaimi gigahe? Gigayo,
Abelahamo Yaubada givetumaganena, ada yana vetumagana fa'ina Yaubada bana fa'ine gigahe gigayo, Bana kaliva yegayegana Iya matakuya.
4Wa'ita, ka'i kaliva taubada sa'eyana againe ginafaisewa, bana taubada mani ginavelena. Keke gidagahe vaita nuwakabubu gidaveleni. Au gigayo, “Bana yana idibumuhiga fatana gavelena.” 5Atu Yaubada kaliva yana yegayega Bana matane fa'ina keke faisewa ana nuwanuwa amine gidahuluva. Hai kaliva yana yegayega Yaubada matane fa'ina keke yana idibumuhiga againe ginaluluve'avina au yana vetumagana Yaubada againe ginasena, medema fa'ine Yaubada ginagahe ginagayo, “Bana kaliva yegayegana Iya matakuya.” Ka'i ide tokoyona Yaubada againe kanavetumagana, au ide tokoyona nonogana yada vetumagana fa'ina ide fa'ideya ginagahe ginagayo, “Badi kaliva yegayegadiyao Iya matakuya.” 6Meda anafaiweya tuwai-mo'ena tokaiwabu Devida kaliva yegayegana Yaubada matane fa'ine gigahe. Bana kaliva yana idibumuhiga fa'ina Yaubada keke gidanuwanuwa tu yana vetumagana ginuwenuweni-yo bana fa'ine gigahe gigayo, “Bana kaliva yegayegana Iya matakuya.” E, bana kalivai-nadi yana vemwamwala lakahina fa'ina Devida Veyao Tuwaina ana bukiya gilukahihi gigayo,
7 #
Sam 32:1-2
Kaliva gaveyao yadi sidamana
Yaubada giyawelina kadu
yadi koyona givekwaulaugena,
medema yadi vemwamwala gavatubuga!
8Hai kaliva yana koyona fa'ina
Kaiwabu keke ginalaufata,
medema yana vemwamwala gavatubuga!
Hidedemi Devida gigahe.
Keke wowoda ana tomogolota au yada vetumagana againe kayegayega.
9Tu mena vemwamwala Devida gilukahihiyena-ma ka'i ime miYuda wowomeya iya'iyaya hitomogolohina-ma kalivai-mana ama loi gagana ananuhagana? Keke-mo'a. Au kadu badi yo'o tulidiyao kalivai-dina adi tomogolota keke ma yadi vetumagana againe vemwamwalai-nadi hinanuhagana. Hidedemi kahalamanena fa'ina Yaubada bonana ahe kayakahina gigayo, “Abelahamo yana vetumagana fa'ina, bana fa'ine Yaubada gigahe gigayo, Bana kaliva yegayegana Iya matakuya.” 10Gava tova Yaubada hidedemi gigahe? Yaubada yana iya'iyaya Abelahamo wowone ahe hitomogolohini-yo gigahe o ka'i aimo keke hidatomogolohini tu gigahe? Me Yaubada yana iya'iyaya Abelahamo wowone aimo keke hidatomogolohini tu Yaubada gigahe vaita bana kaliva yegayegana. 11Nagona Yaubada gigahe vaita Abelahamo yana vetumagana fa'ina bana kaliva yegayegana Bana matane tu muliya Yaubada givehimeyena be yana iya'iyaya wowone hitomogolohina. Medema aituha higa vaita ginahalamanena aimo wowona ana tomogolota keke gidavaini tu yana vetumagana Yaubada againe gimadusena fa'ina yana yegayega Bana matane ginuhagana. Yana vetumagana wai ginagona tu iya'iyaya wai gimulina. Hidede amine Abelahamo againe gilakayemu be higa gaveyao moya'aidi Yaubada yana iya'iyaya keke wowodiya hidatomogolohini tu Bana againe hivetumagana-yo gigahe vaita badi yegayegadiyao Bana matane, medema vaita Abelahamo bwaneneneyao ada bana bwanenedi. 12Bana Abelahamo kadu ime miYuda bwanenema, Yaubada yana iya'iyaya wowomeya atomogolohina-ma kalivai-mana. Keke vaita wowoma ana tomogolota fa'ina bana bwanenema, keke. Au ime gaveyao Abelahamo tavagine ananauna higa bana aimo Yaubada yana iya'iyaya wowone keke hidatomogolohini tu Yaubada againe gimaduvetumagana amine ime avetumagana, medema Abelahamo bwaneneneyao ada bana ime bwanenema.
Gaveyao tovetumagana, medema Yaubada yana wonadabadaba agaidiya gisena.
13Tuwai-mo'ena Yaubada Abelahamo againe giwonadabadaba gigayo, “O againiya kadu bwanenemomo agaidiya babi matatabuna ganavelemi.” Keke vaita Abelahamo Yaubada yana vehimeya gida'idibumuhigeni fa'ina, Yaubada hidedemi gidawonadabadaba. Au bana Yaubada givetumaganeni-yo gisena yegayegana Bana matane fa'ina, Yaubada yana wonadabadaba bana againe kadu bwaneneneyao agaidiya gisena. 14#Ga 3:18Yaubada keke gidagahe vaita badi Mosese yana vehimeya hi'idibumuhigena-ma yana wonadabadaba guwana hinanuhagani. Au gigahe vaita badi Bana againe hivetumagana-ma hinanuhagana. Ka'i badi vehimeya ana todibumuhiga yana wonadabadaba guwana hidanuhagana digo, ide Yaubada ana tovetumagana kadavetumagana-kawowo kadu Yaubada yana wonadabadaba vaita gaitoma-kawowo. 15#Lo 5:13Yaubada yana wonadabadaba guwana keke Mosese yana vehimeya ana idibumuhiga againe gidalakayemu. Fa'ina ka'i Mosese yana vehimeya kanayawelina, keke Yaubada yana wonadabadaba guwana kananuhagani au Yaubada yana ila'a guwana kananuhagana. Ada ka'i keke tamo vehimeya gidadauda digo, kadu keke tamo vehimeya ana aiyawela gidadauda.
16Tu vehimeya againe Yaubada yana ila'a guwana gilakayemu fa'ina, yana wonadabadaba guwana keke Mosese yana vehimeya ana idibumuhiga againe gidalakayemu. Au vetumagana againe gilakayemu be higa ide tovetumagana tokoyona nonogana Yaubada yana nuwadoga againe yana wonadabadaba kananuhagana, kadu Abelahamo bwaneneneyao gaveyao moya'aidi yadi wavetumagana ma adifaiweya hinanuhagana. E, Yaubada yana wonadabadaba guwana vetumagana againe gilakayemu be higa ide miYuda yada wavetumagana Mosese yana vehimeya ka'idibumuhigena-ma kalivai-dana ada loi gagana kananuhagana. Au ide gaveyao kavetumagana Abelahamo givetumagana amine, medema buye kananuhagana. Bana Abelahamo vaita ide moya'aida bwaneneda amine. 17#Aba 17:5Meda anafaiweya tuwaina Yaubada Veyao Tuwaina ana bukiya gigahe gigayo,
Iya ganagahe-yo yo'o tulidi tulidi o againiya hinatubuyemu.
Hidedemi Yaubada Abelahamo againe gigahe. Ada au bana ide tovetumagana yo'o tulidi tulidi kalivai-dana bwaneneda Yaubada matane. Abelahamo Yaubada againe givetumagana, Bana'e to'alika alikeya gisivemidididi kadu yana gahe againe gaitoma keke gidadauda-ma gilakayemu amanadi Yaubadai-nadi.
Abelahamo yana vetumaganadona abave'ita ide fa'ideya.
18 #
Aba 15:5
Wa'ita, tuwai-mo'ena Yaubada Abelahamo againe gigahe gigayo, “Ibadibadi adi vemoya'ai amine bwanenemomo hinamoya'ai.” Abelahamo givekaliva nonogana keke gidagahe gidagayo, “Gavaimi be aku unuma hidamoya'ai?” Au Yaubada yana gahe givetumaganena ada yana wavetumagana gilulauboda. Ada au givetumagana amine, yo'o tulidi tulidi tovetumaganai-dina bana againe hitubuyemu. 19#Aba 17:17Boi Abelahamo ana malamala vaita wani hanaledi (100) amine. Wowona giwelolo-mo'a keke anafaiweya kwamana gina'ivetubugini. Kadu vavinena Sela utuna giwelolo-mo'a keke anafaiweya ginavehifuga. Atu tauna wowona kadu Sela yana vesilakai ginuwenuwena againe, yana vetumagana keke gidagakowakowa. 20E, yana vetumagana keke gidahegeni kadu Yaubada yana wonadabadaba fa'ina keke gida'amalakibo. Au yana vetumagana againe gifaiwala be Yaubada ana egana gikilakahina. 21Ginuwave'avi-mo'ena vaita Yaubada giwonadabadaba amine meda anafata ginahuluva. 22#Aba 15:6Au hidede amine givetumaganadona fa'ina, Yaubada bana fa'ine gigahe gigayo, “Bana kaliva yegayegana Iya matakuya.” 23-24#Lo 15:4Mena gahe ma keke bana anakaibe fa'ina Yaubada bonana eto'etoladina againe gidadauda. Au kadu ide fa'ideya Yaubada tuwaina gigaheye-vagahina, ide Bana'e Yesu yada Kaiwabu alikeya gisivemididina-ma againe kavetumagana-yo ide fa'ideya Yaubada ginagahe ginagayo, “Badi kaliva yegayegadiyao Iya matakuya” ma ide kalivai-dana. 25#Ais 53:5Yada Kaiwabu Yesu yada koyona fa'ina alikeya hihegenauwena, ada yada yegayega Yaubada matane fa'ina Yaubada alikeya gisivemididina be wayawaina gimimiyami.
ទើបបានជ្រើសរើសហើយ៖
Loma 4: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
