Loma 2
2
Yaubada yana laufata tunutunugina.
1A, o'eni-ma mali kaliva yana dewa koyona fa'ina uhawavekoyoyena. Ugahe ugayo, “Bana gikoyo fa'ina Yaubada aimo ginalaufata.” O keke unagahe fa'ina koyona kadu mene o againiya gidadauda. Hida hima koyonai-dina bana gififaisewadi-ma kadu o ufifaisewadi fa'ina, bana uhawavekoyoyena tu kadu o tauni uhawavekoyoye. 2Ide kahalamanena Yaubada gilubodana be kaliva yadi koyona fa'ina ginalaufata. 3Au o vaita hakwadi yo unuwanuwa vaita Yaubada yana laufata una'oseni? Mali kaliva yadi koyona fa'ina uhawavekoyoyedi tu o tauni koyonai-dina ufifaisewadi. Makewa o keke afaiweya Yaubada yana laufata una'oseni. 4Yaubada gihinekalikaliye. Ya koyona fa'ina keke gidamadulaufata, au gi'atuvefa'ile. Mena yana hinekalikali yana atuvefa'ila fa'ina ma'i uwowomumuyena o ka'i keke? Vaita udahalamaneni Yaubada gihinekalikaliye be higa ya dewa koyona unahegeni-yo Bana againe unahagavila.
5Tu ide omi miYuda wanogali! Nuwami fanifanina kadu tagami kuluna ada keke wadahagavilami fa'ina, yami koyona ana laufata wakikiveba'una. Aimo tova mulina Yaubada kaliva ginavedewayaugida tunutunugina be badi koyodiyao yana ila'a guwana hinanuhagana ana toveya, yami koyona ana laufata lakahi-mo'ena wanavaina. 6#Md 16:27Kaliva sa'eyana sa'eyana gavaimi gavaimi hihuluhuluva, ka'i yamumuna o ka'i koyona, medemi adi laufata Yaubada ginaveledi. 7Kaliva tufoidi tova moya'aina yadi wa'atuvefa'ila hihuluhuluva yamumuna be higa Yaubada ginahawaveyamumuyedi-yo hinakaiwabu be Bana buye hinamiyamiya-vagata. Yaubada badi kalivai-dina yawai-vagahidi ginaveledi. 8#2Te 1:8Tu kaliva tufoidi taudiyaogaga yadi nuwanuwa hi'ita'itave'avina ada nuwanuwa velemo'ena hikilokilowena kadu dewa koyona himulimuliyena. Yaubada badi kalivai-dina agaidiya gina'ila'a be adi matahiwadi ginaveledi. 9Tomiyababi gaveyao moya'aidi koyona hihuluhuluvina, medema vita ase'u'aulolo hinanuhagana. Nagona miYuda kalivai-dana ada laufata koyona kananuhagana tu kadu yo'o tulidiyao kalivai-dina buye'i hinanuhagana. 10Atu gaveyao moya'aidi hihuluhuluva hagihagina, medema kaiwabu davadava aseniwalova hinanuhagana. Nagona miYuda kalivai-dana mena laufata hagihagina kanamidinuhagana tu kadu yo'o tulidiyao kalivai-dina buye'i hinanuhagana. 11#1Fi 1:17Fa'ina Yaubada yana laufata tunutunugina. Ka'i kwanamiYuda o ka'i keke kwanamiYuda tu yo'o tulina kalivana digo, adi laufata leleleya.
Moya'aida laufata yada dewa amine kananuhagana.
12Badi keke miYuda tu yo'o tulidiyao kalivai-dina Mosese yana vehimeya keke hidahalamaneni. Ka'i badi kalivai-dina keke mena adi wavehimeya tu hinakoyo, au meda keke mena adi wavehimeya tu hinabwavi. Keke vehimeyai-nadi ana dibutoyoga fa'ina hinabwavi, au taudiyao hikoyo fa'ina hinabwavi be keke Yaubada buye hinamiyami. Ide miYuda Mosese yana vehimeya kahalamanena. Ka'i ide kalivai-dana we'a ada wavehimeya tu kanakoyo, au Yaubada mena vehimeyai-nadi ana dibutoyoga fa'ina ginavedewayaugida be ada laufata ginaveleda. 13#Md 7:21; Ye 1:22Wa'ita, gaveyao yegayegadiyao Yaubada matane? Keke vehimeya ana tonogala. Au vehimeya ana to'idibumuhiga yegayegadiyao Yaubada matane. Ka'i tamo hakwadi vehimeyai-nadi gida'ita'itave'avina, kadu medema fa'ine Yaubada gidagahe gidagayo, “Bana kaliva yegayegana Iya matakuya.” 14Badi keke miYuda tu yo'o tulidiyao kalivai-dina Mosese yana vehimeya keke hidahalamaneni. Tu ka'i taudiyao yadi nuwenuweya vehimeyai-nadi gigahe amine ma hidahuluva, au mena keke adi wavehimeya nonogana vehimeya ana nuwanuwa yadi dewa againe hidaseyemaunena. 15Mosese yana vehimeya badi keke agaidiya gidadauda tu mena vehimeyai-nadi ana nuwanuwa, vehimeya kadu hawata, ase'asediya gidadauda ma yadi dewa againe hiseyemaunena. Kadu togahe nuwafoudiya yana gahe againe hihalamanena vehimeya ana nuwanuwa ase'asediya gidadauda, fa'ina hinahuluva koyona amine o dakeya yadi nuwenuweya hi'ayaunena, o ka'i hinahuluva yamumuna amine o lugolagola yadi nuwenuweya hi'ayaunena. Au hidede amine kahalamanena vehimeya ana nuwanuwa ase'asediya gidadauda. 16#1Ko 4:5Aimo tova mulina Yaubada yana vedewayauga ana toveya au hidede amine ginalakayemu. Medema tovai-nadi Yaubada yana vehimeya againe Yesu Keliso ide kaliva yada nuwahinage kadu yada dewa sevasevauyana fa'ina ginavedewayaugida. Au hidede amine Venuwa'ata Yamumuna iya galulumamalena-ma gigahe.
MiYuda Mosese yana vehimeya hihalamanena fa'ina
hiselakalaka tu vehimeyai-nadi keke hida'itave'avini.
17Tu o'eni ma tauni a egana ukilakahina ugayo, “Iya kwanamiYuda, Mosese yana vehimeya againe galuluve'avina. Iya Yaubada gahalamanena fa'ina, iya Bana yana yo'o kalivana.” 18Au hidede amine ugahegahe ada velemodi o halamani, Yaubada yana nuwanuwa uhalamanena, kadu Mosese yana vehimeya againe usikulu fa'ina hadema dewa yamumuna hadema dewa koyona ma afaiweya unaluve'uve'una. 19O unuwave'avina vaita o badi matadi gi'uyuyuna-ma adi tokivetuvetunu kadu badi yadi nuwanuwa uyu'uyuyuna againe himimiyami-ma o tomahala nuwadi ana tokivemahala. 20O badi fanifanidiyao ukivetuvetunudi kadu kabi'odiyao uvehavehawaledi. O Mosese yana vehimeya uhalamanena fa'ina, uvaitana halamana kadu nuwanuwa velemo'ena matatabuna udaluyabuni. 21O mali kaliva uvehawaledi tu o'eni ma mene tamo halamana tauni uvehawale o ka'i keke? O kai'afu fa'ina ululumamala tu mene tamo gavadi o uki'afuna o ka'i keke? 22O mali kaliva uhawatadi ugayo, “Keke wanakelele.” Tu hawata kelele fa'ina o ma'i u'itave'avina o ka'i keke? Kilumina uhawave'iyohoyohoyena. Mene tamo lokoloko kilumina yadi manuwa-tafalolo agaidiya uki'afuna o ka'i keke? 23O'eni Mosese yana vehimeya fa'ina uselakalaka ugayo, “Ime miYuda Yaubada yana vehimeya Mosese awane gilakayemu-ma ahalamanena. Mena vehimeyai-nadi ana kaiwabu lakahi-mo'ena.” Tu omi moya'aimi vehimeyai-nadi wayawelina fa'ina Yaubada mena vehimeya givelemi-ma u'ihawadamanena. 24Mena ihawadamana fa'ina Veyao Tuwaina ana buki gigahe gigayo,
Omi miYuda yami dewa koyona fa'ina, yo'o tulidiyao kalivai-dina Yaubada ana egana hihawatagona.
Yaubada yana iya'iyaya keke wowomiyagaga au kadu
nuwamiya wanatomogolohina.
25Ide omi miYuda agaimiya kadu ganagahe. Tuwaina fwefweyamiya Yaubada yana iya'iyaya wowomi againe hitomogolohina. Ka'i Mosese yana vehimeya wana'itave'avina, au ami tomogolota gaitoma lakahina. Atu ka'i vehimeya wanayawelina, au ami ita'ita vaita Yaubada yana iya'iyaya keke wowomiya hidatomogolohini. 26Ka'i badi yo'o tulidiyao kalivai-dina Yaubada yana iya'iyaya keke wowodiya hidatomogolohini-ma Mosese yana vehimeya ana nuwanuwa hi'idibumuhigena, au adi ita'ita Yaubada matane gavaiya'amine? Wona velemona badi vaita Yuda kaliva iya'iyayai-nadi wowodiya hitomogolohina-ma amidiya Yaubada matane. 27Badi yo'o tulidiyao kalivai-dina Yaubada yana iya'iyaya keke wowodiya hidatomogolohini tu vehimeya hi'ita'itave'avina amanadi omi miYuda hinatubutagomi. Badi kalivai-dina adi tomogolota keke tu vehimeya hi'ita'itave'avina. Omi miYuda Yaubada yana vehimeya Mosese buki againe gi'etoladina-ma wahalamanena kadu yana iya'iyaya wowomiya gidadauda nonogana vehimeyai-nadi wayaweyawelina. Medema fa'ina yo'o tulidiyao kalivai-dina omi miYuda hinatubutagomi.
28-29 #
Kl 2:11
Gaveyao Yaubada yana kaliva velemo'ena? Omi miYuda wagahe wagayo, “Ime miYuda moya'aima Yaubada yana kaliva. Ime Yuda kaliva Yaubada yana iya'iyaya wowomeya hitomogolohina Yaubada yana vehimeya Mosese buki againe gi'etoladina-ma amine fa'ina, ime Yaubada yana kaliva. Kadu tamameyao hinameyao Yuda kalivana vevinena fa'ina ime ama egana miYuda.” Hidede amine omi wagahe tu keke. Hai kaliva bana nuwane Alu'aluwa Mahalina yana iya'iyaya gitomogolohina, medema Yaubada yana kaliva velemo'ena ada kanavewagana vaita bana kwanamiYuda. Bana ana tomogolota ma au nuwane tu keke wowone, kadu tomogolota inubana Alu'aluwa Mahalina againe atu keke buki yana vehimeya againe. Ada bana kalivai-nadi ana egana ana kailakata keke kaliva agaidiya au Yaubada againe ginanuhagana.
ទើបបានជ្រើសរើសហើយ៖
Loma 2: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
