Loma 10
10
MiIsileli yegayega ana eda hifaniyena.
1Omi tobohiyakweyao Loma againe, yaku nuwanuwa keke kabi'ona yaku yo'o miIsileli adi kibababala hinanuhagana, ada medema fa'ina Yaubada againe gave'ove'o'ola. 2Badi Yaubada fa'ine hi'idibumuhiga ma iya akufaiweya gana'alakakila, tu yadi idibumuhiga keke nuwakaifolega againe gidave'inuba. 3#Lo 9:31-32Gavaiya'amine Yaubada kaliva gisedi yegayegadiyao Bana matane ma hifaniyena, hivaitana taudiyao Mosese yana vehimeya hi'i'idibumuhigena fa'ina hinayegayega Yaubada matane. Medema fa'ina keke Yaubada againe hidahawahegedi be Bana Tauna ginasedi yegayegadiyao Bana matane. 4Yesu Keliso Mosese yana vehimeya gitubutagona be vehimeyai-nadi ana abavehimeya gihavaina, higa vaita gaveyao Keliso againe hivetumagana, medema Yaubada gisedi yegayegadiyao Bana matane.
Fafali moya'aina kalivai-dina adifaiweya Yaubada againe
hinakova be adi kibababala hinanuhagana.
5Tu miIsileli hinuwanuwa vaita vehimeya ana dibumuhiga againe Yaubada ginasedi yegayegadiyao Bana matane. Tuwai-mo'ena Mosese mena yegayega ana eda fa'ina gi'etoladina hidede amine. Gigayo, “Hai kaliva Yaubada yana vehimeya gi'idibumuhigena, medema yawaina ginanuhagana.” 6-7Tu kadu gahe sa'eyana vaita kaliva yada yegayega inubana Keliso ana vetumagana againe gigayo, “Keke nuwahinageniya unagahe unagayo, Hakwadi lobameya ginalaka be higa Keliso babiya gina'ihobuyeni? Hakwadi to'alika yadi abageya ginahobu be higa Keliso gina'ilakahini?” Keke medede amine unagahe fa'ina Keliso ahe gihobu'ela kadu alikeya ahe gimididi-havagi. 8#2Veh 30:14Au hida gahe Veyao Tuwaina ana bukiya gidadauda gigayo,
Yaubada bonana liliniya gidadauda,
e ase'aseniya gidadauda kadu awaniya uyakayakahina.
Bonai-nadi ma venuwa'ata vetumagana fa'ina alulumamalena amanadi. 9Higa ka'i yo'o matadiya unahawavemogatala unagayo, Yesu yaku Kaiwabu, kadu ase'aseniya unavetumagana vaita Yaubada alikeya gisivemididina, au hidema fa'ina Yaubada ya koyona agaidiya ginakibababale. 10Fa'ina ase'asedeya kavetumaganeni-yo Yaubada giseda yegayegadeyao Bana matane, ada yo'o matadiya Yesu kahawavekaiwabuyeni-yo Yaubada yada koyona agaidiya gikibababaleda. 11#Ais 28:16Ada yada vetumagana Yesu againe fa'ina Veyao Tuwaina ana buki gigahe gigayo,
Keke tamo hakwadi Bana againe givetumagana-ma ginavetumagana-wayoga.
12 #
Kl 3:11; Ga 3:28 Mena gahe ma fafali moya'aina kalivai-dana fa'ideya gigahe. Ide miYuda fa'ideya kadu omi yo'o tulimiyao kalivai-mina fa'imiya gigahe, fa'ina moya'aida ada ita leleleya Yaubada matane. Bana'e ide miYuda yada Kaiwabu kadu omi yo'o tulimiyao kalivai-mina yami Kaiwabu. Ada gaveyao moya'aidi Bana againe hikova, medema givelugadi lakahina. 13#Yow 2:32Meda anafaiweya Veyao Tuwaina ana buki gigahe gigayo,
Gaveyao moya'aidi Kaiwabu againe hinakova,
medema adi kibababala hinanuhagana.
Keke kanagahe miIsileli fanifanidiyao fa'ina keke
Yesu hidavetumaganeni.
14-15 #
Ais 52:7
Atu kaliva Kaiwabu againe keke hidavetumagana fa'ina gavaimi-yo Bana againe hidakova? Gilubodana be Yaubada bonana ana tolaumamala gida'iveninisedi. Tolaumamala gilubodadi be Kaiwabu fa'ine hidalumamala. Kaliva hinanogalini-yo adifaiweya hinavetumaganena. Yesu againe hinavetumagana-yo adi kibababala fa'ina adifaiweya Kaiwabu againe hinakova. Atu Yaubada tolaumamala ahe gi'iveninisedi fa'ina Veyao Tuwaina ana buki gigahe gigayo,
Badi venuwa'ata yamumuna hi'aliyena-ma yadi ela gavayamumu!
16 #
Ais 53:1
Atu keke miIsileli moya'aidi Venuwa'ata Yamumuna hidavenogaleni. Meda tuwai-mo'ena to'awatalatalaina ana egana Aiseya yana bukiya gi'etoladina gigayo,
Kaiwabu, ime ya kaliva O bona alumamalena,
tu keke moya'aidi hidavenogaleni.
17Ada au kahalamanena kaliva yadi vetumagana yana yemu inubana ma au Yaubada yana venuwa'ata ana nogala againe. Ada Yaubada yana venuwa'ata ana nogala inubana au tolaumamala Keliso fa'ine hilulumamala.
18 #
Sam 19:4
Tu ganatoliyemi hidede amine. Ka'i miIsileli Keliso ana laumamala hinogalina o ka'i keke? Makewa hinogalina ada meda Veyao Tuwaina ana buki gigahe gigayo,
Babi matatabuna hinunuwaliliugina be kaliva tolaumamala agodi hinogalina. E, yadi laumamala fafali moya'aina agaidiya give'aliyahega.
19 #
2Veh 32:21
Kadu ganatoliluvaluva, ka'i miIsileli mena venuwa'atai-nadi hihalamanena o ka'i keke? Makewa hihalamanena. Nagona Yaubada yana gahe sa'eyana higa vaita miIsileli halamanidiyao ma Mosese giyakahina be Veyao Tuwaina ana bukiya gidadauda. Bana Yaubada gigayo,
Omi miIsileli badi yo'o tulidiyao kalivai-dina fa'idiya
wagahe wagayo, Badi iyohoyoho au kwavakwavadiyao.
Tu Iya ganagaheyedi ganagayo, Badi yaku yo'o kalivai-dina. Medema fa'ina omi wanaga'uma'uma,
e yaku gahe fa'ina wana'ago'uga.
Hidede amine Yaubada gigahe be Mosese gi'etoladina. 20#Ais 65:1Tu muliya Aiseya Yaubada yana gahe toyogina keke yana wamatauta giyakahina yo'o tulidiyao fa'idiya be Veyao Tuwaina ana bukiya gidadauda gigayo,
Badi kaliva keke hidaleleku-ma aku halamana hivaina.
Badi kaliva keke hidave'o'oleku-ma agaidiya gahawavemogataleku.
21 #
Ais 65:2
Atu Yaubada yana gahe sa'eyana miIsileli fa'idiya ma Aiseya giyakahina hidede amine. Gigayo,
Mala gilauna gina mala gibogi nimaku gatunena be gana'atugogodi tu tagadi kuluna, bonaku keke hidavenogaleni.
Hidede amine Yaubada gigahe be Aiseya gi'etoladina.
ទើបបានជ្រើសរើសហើយ៖
Loma 10: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
