Loma 11
11
Yaubada miIsileli adi tufo gihinekalikaliyedi.
1 #
Fl 3:5
Tu hida miIsileli yadi tagakulu fa'ina ahe gagahe. Gavaiyami? Ka'i Yaubada Tauna yana yo'o higa miIsileli gikilowedi? Keke, keke-mo'a! Iya tauku kwanaIsileli, iya Abelahamo bwanenena ada Abelahamo gaisena Beniyamina ana yo'o agaidiya gatubuyemu, ada iya keke gidakiloweku. 2E, Yaubada yana yo'o tuwai-lokalokana givenuwadadane-vagahidi amanadi keke gidakilowedi. Yaubada bonana ana to'awatalatalaina ana egana Elaiya kahihina Veyao Tuwaina ana bukiya gidadauda-ma ma'i wahalamanena o ka'i keke? Buki ana bai sa'eyana againe Elaiya miIsileli gihawavekoyoyedi Yaubada matane. 3#1Kin 19:10,14Elaiya gigahe-kawowo gigayo,
Kaiwabu, O bona ana to'awatalatalaina moya'aidi
hiluve'alikadi ada ya atudidiga hiluyawelidi.
Iya au akukaibe-mo'a ada nuwanuwadi hinaluve'alikaku.
4 #
1Kin 19:18
Gavaimi bonalaufata Yaubada bana givele? Yaubada gigahena gigayo,
Gavadi-yo hidedemi ugahe? Iya yaku kaliva seveni tausani (7,000) Tauku fa'ikuya gasevehailedi, higa badi keke yaubada kilumina ana egana Beli againe hida'odu'odu-ma kalivai-dina.
5Meda anafaiweya tova adamoya miIsileli tufoidiga Yaubada yana nuwadoga fa'ina giluwafadi be yana kaliva himimiyami. 6Yaubada keke kaliva yadi huluva yamumuna fa'ina gidaluwafadi, au Tauna yana nuwadogeya giluwafadi. Ka'i Yaubada kaliva yadi huluva yamumuna gida'italuveluveni-yo gidaluwafadi digo, yana nuwadoga vaita dewa yamumuna fatana au keke nuwadoga velemo'ena.
7Yaubada yana lauwafa gavaiyami ana nuwanuwa? MiIsileli yadi yegayega Yaubada matane hilelelena tu keke moya'aidi hidanuhagani. Au tufoidiga Yaubada giluwafadi-ma kalivai-dina hinuhagana. Tu velugadiyao tagadi gikulu-mo'a. 8#2Veh 29:4Meda anafaiweya yadi tagakulu fa'ina Veyao Tuwaina ana buki gigahe gigayo,
Yaubada nuwadi gikivefanina be
keke adifaiweya hinanuwanuwahagihagi,
kadu keke adifaiweya hina'itahalamana.
Boi hidedemi hivebutu be gi'ela tova adamoya.
9-10 #
Sam 69:22-23
Kadu Devida Yaubada nibaineyao gi'alatabutabuyedi ada yana gahe Veyao Tuwaina ana bukiya gidadauda gigayo,
Yadi avemwamwala ana toveya Yaubada
agedi ginavebahina be hinabe'u.
Adi matahiwadi ginaveledi.
Matadi ginakahuna be keke hina'ita.
Vita tulina tulina ginasive'odu-vagahidi.
Au hidedemi Devida gigahe.
Yo'o tulidiyao kalivai-dina Yaubada yana kibababala
hinuhagana.
11 #
Af 13:46
Kadu'e ganatoliluvaluva. Badi miIsileli Yesu Keliso hikilowena fa'ina, Yaubada yana eda againe hitutumadumadu be hibe'u. Ka'i yadi be'u againe agolaufofola hivaina o ka'i keke? Keke, keke-mo'a! Badi miIsileli hikoyo fa'ina, Yaubada yo'o tulidiyao kalivai-dina agaidiya ginuwanuwa be ginakibababaledi, higa vaita miIsileli hina'ita-yo hina'ahukwahukwa-yo adi kibababala Yesu Keliso againe hinalelena. 12Badi miIsileli hikoyo be Keliso hikilowena fa'ina, fafali moya'aina kalivai-dina Yaubada yana nuwakabubu lakahina hinuhagana. Yaubada yana nuwakabubu badi miIsileli hinuhagababuna fa'ina, badi keke miYuda tu yo'o tulidiyao kalivai-dina Yaubada yana lokolokofou moya'aina hinuhagadi. Ka'i miIsileli yadi kilowa fa'ina mali yo'o Yaubada yana lokolokofou hinuhagadi, au aimo miIsileli moya'aidi Yaubada againe hinahagaviladi ana toveya, ide Yaubada yana kaliva moya'aida yana lokolokofou kananuhagadi-ma gavatubuga kadu gavavewaga!
13-14Tu omi Loma againe wamimiyami-ma tufoimi keke miYuda tu yo'o tulimiyao kalivai-mina. Adamoya omi agaimiya ganagahe be wananogalina. Yesu Keliso givegideku be Bana loseyanina omi yo'o tulimiyao kalivai-mina agaimiya gi'iveniniseku. Mena yaku faisewa ga'ivelakahina be higa tauku yaku yo'o kalivai-dina omi ami kibababala ana nauhaga fa'ina hina'ahukwahukwa-yo tufoidi Yesu Keliso againe hinahagaviladi-yo kadu adi kibababala buye hinanuhagana. 15Wananuwanuwa Yaubada miIsileli gikilowedi againe fafali moya'aina kalivai-dina Yaubada buye hiveyao. Aimo tova mulina miIsileli hinahagaviladi be Yaubada yana yo'ogaga agaidiya ginavega'auledi againe, yadi miya gavayamumu! Au makewa'e yadi yewa vaita alikeya hinamididi-havagi be wayawaidi ivaguna hinamiyami.
16Wa'ita, ka'i yami faha wa'aiyala be bavagu Yaubada againe wahawahegena, au vaita yami faha matatabuna Yaubada againe wadahawahegeni be Bana gidagayo, “Hida hima yaku faha.” Meda ka'i yami ai sa'eyana walamina fa'ina wanagahe wanagayo, “Medema Yaubada yana gaitoma,” au vaita dobona kadu laganina higa ai matatabuna Yaubada againe wadahawahegeni be Bana gidagayo, “Hida hima yaku ai.” Meda anafaiweya tuwai-mo'ena miIsileli bwanenediyao kikaiwabudiyao fa'idiya Yaubada gigahe gigayo, “Hida hima yaku kaliva,” fa'ina tova mulina bwanenediyao moya'aidi fa'idiya ginagahe ginagayo, “Hida hima yaku yo'o.”
Abaluvefota ma ai olive luhei, sa'eyana melamelala sa'eyana walawala'a.
17Kadu abaluvefota sa'eyana ma miIsileli vaita ai melamelala ana egana olive amine, tu omi yo'o tulimiyao kalivai-mina vaita olive walawala'a amine. Yaubada mena ai melamelala laganina tufoidi giludobodi be gisedi, tu ai walawala'a laganina tufoidi gikuyadi digo gi'aliyedi be ai melamelala dobone gihavidi ada uyona givedamana be hitubulatuna. Ai walawala'a laganina ai melamelala uyona hiyuyuna be hififaiwala amine, meda Yaubada yana nuwadoga tulina tulina miIsileli giveledi-ma agaidiya omi yami faiwala wavaivaina. 18Badi miIsileli vaita ai laganina Yaubada giludobodi-ma keke wana'itatagotagodi. Wanogali! Ai laganina keke walamina gidave'ani, au walamina laganina give'adi. Omi ai walawala'a laganina miIsileli walamidiya yami faiwala wavaivaina fa'ina, keke-mo'a gidalubodami be wana'itatagotagodi. 19Atu omi wadagahe wadagayo, “Ika tu Yaubada miIsileli giludobohegedi be yadi abaga ime fa'imeya gisiunana.” 20Wagahe velemodi atu badi keke hidavetumagana fa'ina Yaubada giludobohegedi tu omi yami wavetumagana fa'ina wamimiyami. Keke wananuwanuwalaka, au taumiyao wana'itave'avimi be yami vetumagana keke wanahegeni. 21MiIsileli vaita ai melamelala lagani-mo'ena ma hikoyo againe, Yaubada keke gidayavadi. Ka'i omi vaita ai walawala'a laganina gihavimi-ma wanakoyo digo, keke-mo'a omi ginayavami.
22 #
Hi 3:14
Fa'ina Yaubada yana nuwakabubu kadu yana nuwakoyo wananuwenuwena. Badi hibe'u-ma agaidiya gilaufata tu omi ginuwakabubuyemi. Ka'i omi yami wavetumaganadona wanamiyami amine o ginanuwakabubuyemi. Keke digo, kadu omi ginaludobohegemi. 23Ada ka'i miIsileli hinahagaviladi-yo hinavetumagana amine o, Yaubada yana yo'ogaga agaidiya ginaseyewedi, fa'ina adi seyewa Bana ana tagalowalowa. 24Ada au omi yo'o tulimiyao kalivai-mina vaita ai walawala'a laganina Yaubada gikuyadi be ai melamelala againe gihavidi-yo hivetubulatuna-ma amine. Ai walawala'a laganina keke ihayana ai melamelala againe hinavetubulatuni. Tu badi miIsileli vaita ai melamelala laganina Yaubada giludobodi-ma au Yaubada ihayana taudiyao yadi ai againe ginahaviyewedi, fa'ina medema lagani-mo'ena.
Yaubada yana vevai miIsileli adi yo'o fa'idiya.
25Tu tobohiyakweyao, nuwanuwaku Yaubada yana vevai boi gisevauyena tu tova adamoya gihawavemogatalena-ma wanahalamanena, be higa keke wananuwanuwalaka vaita omi yo'o tulimiyao kalivai-mina badi miIsileli wadakaiwabuhegedi. Yaubada yana vevai sevasevauyana hidede amine. MiIsileli keke matatabudi hidatagakulu. Au tufoidi Yesu Keliso hivetumaganena. Tu badi hitagakulu-ma yadi tagakulu hinanunauwena tu omi yo'o tulimiyao kalivai-mina ami gavaiyehi tuwai-lokalokana Yaubada giluwafami-ma ami kilagalaga amine yana yo'ogaga agaidiya wanaluku-'owoga yo badi tagadi gina'afolena. 26-27#Ais 59:20-21Ada au medema tovai-nadi miIsileli adi yo'o matatabudi hinaluku-'owoga be adi kibababala hinanuhagana. Au hidedemi Yaubada yana vevai. Meda tuwaina Yaubada Veyao Tuwaina ana bukiya gigayo,
Yakobu bwaneneneyao adi Tokibababala
yadi melala lakahina Saiyoni againe
ginatubuyemu be nuwadi ganakiviviyeni-yo
yadi vekwaulauga ginahavaina.
Ada yadi nuwanuwa koyona ganavaihegena
be hidedemi yaku veyao agaidiya ganasena.
Hidedemi Yaubada gigahe miIsileli fa'idiya.
28-29Tuwai-mo'ena Yaubada miIsileli bwanenediyao kikaiwabudiyao giluwafadi be gigahedi vaita badi'iyao kadu bwanenediyao buye ginanuwakabubuyedi. Ma badi miIsileli Yesu Keliso ana Venuwa'ata Yamumuna hikilowena fa'ina, badi au Yaubada nibaineyao. Ma yadi kilowa againe omi yo'o tulimiyao kalivai-mina ami kibababala ana eda gi'ayauna. Atu tuwai-mo'ena Yaubada miIsileli bwanenediyao kikaiwabudiyao giluwafadi fa'ina, Bana aimo ginuwanuwa lakahina miIsileli agaidiya. Yaubada yana lauwafa kadu yana nuwakabubu keke-mo'a ginavaiyeweni. 30Tuwaina omi yo'o tulimiyao kalivai-mina Yaubada wadibutoyogena tu tova adamoya badi miIsileli Yaubada hidibutoyogena fa'ina yami eda gi'ayauna be Yaubada yana hinekalikali wanuhagana. 31Meda anafaiweya omi yo'o tulimiyao kalivai-mina Yaubada yana hinekalikali wanuhagana fa'ina, tova adamoya badi miIsileli Yaubada hidibutoyogena higa vaita aimo badi omi buye Yaubada yana hinekalikali hinanuhagana. 32Fa'ina Yaubada kaliva moya'aida yada idibutoyoga fa'ina giseda yogoyogonideyao be higa moya'aida ginahinekalikaliyeda.
Yaubada ana hawadavadava.
33Yaubada yana nuwadoga gavadawana! Yana nuwahuya kadu yana halamana gavatubuga! Hakwa'adi yana nuwanuwa inubana anafaiweya ginahalamaneni? Au keke, keke tamo. Hakwa'adi yana faisewa tavagina anafaiweya gina'uyeni? Au keke, keke tamo. 34-35#Ais 40:13; Yob 41:11Meda Veyao Tuwaina ana buki gigahe gigayo,
Hakwadi Kaiwabu nuwana gihalamaneni?
Hakwadi Yaubada ana tokivetuvetunu?
Au keke, keke tamo.
Hakwadi tamo gavadi Yaubada givele-yo
Bana ginalaufata? Au keke, keke-mo'a.
36 #
1Ko 8:6
Fa'ina gaitoma moya'aidi Bana againe hive'inuba ada Bana yana faiwala againe givefota-vagahidi ada Bana yana kaiwabu fa'ina himimiyami. Yaubada ana egana kanakilakahina be yana kaiwabu ginaduva-vagata tova inaga inaga keke ana abalauyabu. Ehe hidedemi.
ទើបបានជ្រើសរើសហើយ៖
Loma 11: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
