Afositolo 18
18
Folo Kolinita melala againe gilumamala.
1Tu Folo ahe Aliyofago Koniselo agaidiya gilukahihi gihavaina, gikidewadewa be Adenisi ginuyabuyabuni tu gina melala ana egana Kolinita againe. 2Medede againe Yuda kaliva sa'eyana ginuhagana, ana egana Akwila. Bana fafali ana egana Fonito againe gitubuga, ada vavinena adi egana Filisila. Au fafali ana egana Itali againe vavinena buye hitauya be Kolinita againe hiyemuna-mo'a. Itali hinuyabuyabuna fa'ina Loma Tokaiwabu lakahina, ana egana Sisa-Kelodiyo, givehimeya be miYuda moya'aidi Itali melalina lakahina Loma hinanuyabuyabu-'owona. 3#1Ko 4:12Au Folo gina gi'itadi, ada badi yadi faisewa bana yana faisewa amine higa falai ana i'ona'onaga, fa'ina badi agaidiya gina gimiyami buye hififaisewa. 4Ada sabati sa'eyana sa'eyana agaidiya manuwa-abavehawala ana egana sinagogi againe ginauna, miYuda kadu yo'o tulidiyao kavewagadi miGilika gigahegahe-ya'aya'alidi be yana laumamala hinavetumaganena.
5 #
Af 17:14-15
Tu badi Sailosi Timoti Masedoniya againe hitauya ma ahe hiyemu againe, Folo faisewa sa'eyanaga givebutu gi'abi'abina higa tova moya'aina gilulumamala, Yesu au Yaubada yana Tovegida Keliso ma miYuda agaidiya gihawahawavemogatalena. 6#Af 13:46Tu badi higawoluwoluyena ada hihawave'iyohoyohoyena againe, ana aikeva ana fwayafwaya badi matadiya gisibutuna be higa ana vehimeya badi agaidiya gihavaina-ma ana aituha. Au gigahedi gigayo, “Ka'i keke yawai-vagahimi wananuhagani, au taumiyao. Keke aku vita. Au ganahawa'atuhenehenemi be yo'o tulidiyao kalivai-dina agaidiya ganana ganalumamala.”
7Ada au ginuyabuyabudi tu gina yo'o tulidiyao kalivana sa'eyana yana manuweya giluku gimiyami, ana egana Titiyo-Yasito. Bana Yaubada gihawadavadavana ada yana manuwa sinagogi liline. 8Ada kaliva sa'eyana ana egana Kelisifo, bana sinagogi ana tovehimeya, Kaiwabu againe givetumagana, bana'e kadu yana manuwa hinagena buye hivetumagana. Kadu miKolinita tufoidi moya'aidi Folo yana laumamala hinogalini-yo hivetumagana ada hibafitaiso.
9 #
1Ko 2:3
Tu bogi sa'eyana Folo gi'eno'ita ada yana ita againe Kaiwabu gigahena gigayo, “Keke unamatauta, au una'atuvefa'ila tova moya'aina unalulumamala, keke una'ilova. 10Iya o'eni buye kamimiyami fa'ina keke tamo hakwadi anafaiweya ginamunu, au hida melala againe yaku kaliva be yaku vevine moya'aidi himimiyami.” Au hidedemi Kaiwabu gigahe. 11Ada au Folo Kolinita againe malamala sa'eyana kadu hafuna gimiyami, Yaubada bonana gilumamalena.
MiYuda Folo hivekotuna.
12Tu bana Galiyo, kwanaLoma, fafali ana egana Akaiya againe gikabemani ana toveya, miYuda hivevai be Folo hikive'avina ada kotu againe hinauwena. 13Higahe higayo, “Hida hima kaliva tova moya'aina kaliva gisisive'auyedi be eda tulina amine Yaubada hinahawadavadavana, ada edai-nadi yama vehimeya gihawatana.”
14 #
Af 25:18-19
Ada bana Folo gidagahe ma bana Galiyo miYuda gigahedi gigayo, “Omi miYuda wanogali! Ka'i hida kaliva tamo hakwadi againe gidakai'afu o ka'i gidaluve'alika ada yana koyona lakahina amine digo, au gadahawahegeku be yami gahe gadanogalina. 15Tu omi yana hifufugaga fa'ina wavekwageyena, kadu egana tulina tulina kadu taumiyao yami vehimeya fa'ina wavekwageyena. Au taumiyao wanakivetuvetununa. Hida omi yami gaitoma fa'ina iya keke ganavedewayauga.” 16Ada au giwavidi be vedewayauga ana manuwa againe hihobu. 17Hihobu tu kaliva ana egana Sosidenisi hikive'avina, bana sinagogi ana tovehimeya. Hikive'avina digo abavedewayauga ana eda'awaneya himununa, tu bana Galiyo keke gidahawatadi.
Folo Anidiyoka againe giyewana.
18Tu Folo tovetumagana Kolinita againe buye himiyami ma'i lauva tunugina yo gihegedi, ada gilowoga be ginana fafali ana egana Siliya againe. Ada badi Filisila Akwila hibwa'ulina. Taliya ana melala ana egana Senikeliya againe hiyemu tu bana Folo boi Yaubada againe giwonadabadaba fa'ina, u'una gitotona, higa yana wonadabadaba ana aituha giluyabuna. Au wakeya adi'itoto hidododi be hinauwedi. 19#Af 17:17Ada melala ana egana Efeso againe hiyemu ada medede againe badi Filisila Akwila himiya tu bana Folo ginuyabuyabudi be ginunudadana. Au sinagogi againe gina miYuda buye hive'agahegahe. 20Ada badi hive'o'olena be agaidiya ginamiya lauva tunugina tu givekekeyedi. 21#Af 19:1; Ye 4:15Ada au gilowoga againe gigahedi gigayo, “Ka'i Yaubada ginahawahegeku amine, omi agaimiya ganayewaku.” Ada au gina wakeya giyage be Efeso ginuyabuyabuna. 22Hinauna tu melala ana egana Sisaliya againe hiyemu au Folo gihobu be gina Yelusalema againe tovetumagana gilusiuleyedi-yo au Anidiyoka againe gihobu. 23Ada Anidiyoka againe gimiyami ma'i lauva tunugina tu kadu givebutu ginunudadana, Galesiya ana fafali kadu Filidiya ana fafali agaidiya ginumiyamiyanana. Ada melala moya'aina agaidiya tovetumagana gilu'ageyedi be tova moya'aina Yesu hinavetuvetumaganena.
Tolaumamala ana egana Afolosi kahihina.
24 #
1Ko 3:5
Tu Yuda kaliva sa'eyana, ana egana Afolosi, Efeso againe gi'ela. Bana melala lakahina ana egana Alekisanidiya againe gitubuga, ada bana tolaumamala hagihagina, kadu Veyao Tuwaina ana buki gihalamane-hagihagiyena. 25#Af 19:3Ada Kaiwabu yana Eda againe gisikulu ada yana wadibumuhiga gilulumamala, Yesu kahihina gilulukahihiyena tunutunugina. Tu bafitaiso Yesu ana eganeya ma keke gidahalamaneni, au Yoni yana bafitaisogaga gihalamanena. 26Au givebutu sinagogi againe ase'asena bouna gilumamala. Tu badi Filisila Akwila hinogalina againe, yadi manuweya hivega'aulena be Yaubada yana Eda fa'ina hikivetuvetununa. Gavadi aimo keke gidahalamane-hagihagiyeni, medema fa'ina hikivetuvetununa.
27Himiyami tu tova sa'eyana Afolosi gigahe gigayo, “Fafali ana egana Akaiya againe iya ganana.” Au tovetumagana yana nuwanuwa hinogalini-yo hivelugana, leta Akaiya tovetumagana agaidiya hi'etoladina be higa Afolosi hinavetobohiyanena. Ada au gina giyemu tu tovetumagana medede againe givelugadi lakahina, badi Yaubada yana nuwadoga fa'ina Yesu Keliso againe ahe hivetumagana-ma kalivai-dina. 28#Af 9:22Givelugadi fa'ina yana laumamala againe miYuda gifaiwalahegedi, ada Veyao Tuwaina ana buki giyakayakahina be higa givehawaledi Bana Yesu velemo'ena Yaubada yana Tovegida Keliso.
ទើបបានជ្រើសរើសហើយ៖
Afositolo 18: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
